OMU njiri ya Matayo, nitusoma ngu: “Yesu yataha omu yekaru yabingamu bona abakaba nibagura omu yekaru, najumika emeza zabo abahingisize efeza, nentebe zabo abaguzire amaiba; yabagamibira ati kikahandikwa ngu enju yange erayetwaga enju eyokusabiramuga: baitu inywe nimugifora obuingira bwabanyagi”—Matayo 21:12, 13.

Ebyafayo nibyoleka ngu abantu banu abatundiraga omu yekaru batwazaga kubi abaguzi babo nibabaseera muno. Ekyokurorraho, amaiba gakaba gasemeriire kutundwa sente ntaito nukwo abanaku nabo basobole kugura eky’okuhonga. Baitu ebyahandiikirwe eby’Abaheburaniya ebya ira nibyoleka ngu haroho obwire obu bwahikire omu kyasa ky’okubanza omuntu akaba aine kusasura edinali ya feza kusobora kugura amaiba abiri. Omukozi kusobora kutunga sente ezi, akaba aine kukora habw’ebiro 25. Amaiba bakatandika kugaseera muno kyaletera n’abantu abanaku kulemwa kugagura. (Ebyabalevi 1:14; 5:7; 12:6-8) Rabi Simeon ben Gamaliel akabihirwa muno habw’ekintu kinu yacwamu kukehya omuhendo gw’ebihongwa Abayudaaya bakaba basemeriire kuhonga. Aho n’aho, omuhendo gw’amaiba gukasirimuka gwagaruka ekicweka ky’ikumi ky’edinaali ya feza.

Hataroho kugurukyagurukya, abantu abasubuliraga omu yekaru bakaba baine omururu kandi bakaba nibagobera ha baguzi babo. Enu niyo ensoga habwaki Yesu yabesere ‘banyagi.’