EVANGELYO ya Matheyo ninsoma wira: “Vottharelana, Yesu ahikela mpani mwa Muluku. Ahiwomola-mo atthu yatumiha ni yathuma mpani memmo. Ahipittula mesa àlipa-òwakakhanya musurukhu ni minyukhu s’ale yatumiha ipomba, khwahimyerya wira: Volempwa wira: ‘Emp’aka yihaniweke empa y’olompa’. Nto nyuwo mokhaliha nikhuku n’anawiye”.​—Matheyo 21:12, 13.

Soohimmwa sinnooniherya wira ale yaatumiha mutemplo, yaaniweliha epereso wira awiiyeryeke ale yaathuma. Mwa ntakiheryo, okhala wene ipomba khisaatta musurukhu, nto alipa-oohaawa yaaniwerya othuma wira avahe mukuttho. Masi, soolempwa sa khalai sa aYuda, sinihimya wira eseekulu yoopacerya, waahikhala okathi ipomba piili saatumihiwa aya edenaario emosa ya eweero. Wira namuteko ophwanye edenaario emosa, aahaana ovara mahiku 25. Nto, ipomba saahiwela epereso, mpakha amasikhini ahinawerya othuma. (Onamukuttho 1:14; 5:7; 12:6-8) Eyo yaahimwiiriha Rabbi Simeon ben Gamaliel onanariwa vanceene mpakha ovukula nummuru na mikuttho aYuda yaavekeliwa aya. Moohipisa, epereso ya ipomba piili yaahivukuwa inatumihiwa esentavo ya edenaario ya eweero.

Nto ela enooniherya wira ale yaatumiha mutemplo yaari ananrima ni yaaphavela owiiyerya ale yaathuma. Ti maana aya Yesu aahimmye awe okhala ‘anawiye’.