«قۇدايدىڭ ادام اقىلىنان اسقان تىنىشتىعى»
«قۇدايدىڭ ادام اقىلىنان اسقان تىنىشتىعى جۇرەكتەرىڭدى... ساقتايدى» (فىلىپىلىكتەرگە 4:7).
اندەر: 76، 141
1، 2. فىلىپىدە پاۋىل مەن سىيلاس نەنى باستان وتكەردى؟ (ماقالانىڭ باسىنداعى سۋرەتتى قاراڭىز.)
كەلەسى وقيعانى ەلەستەتىپ كورىڭىزشى. ٴتۇن ورتاسى. پاۋىل مەن سىيلاس دەگەن ميسسيونەرلەر ٴفىلىپى قالاسىنداعى ٴبىر تۇرمەنىڭ ەڭ تۇپكى قاراڭعى قاپاسىندا وتىر. ٴجۇرىپ قوزعالا المايدى، ويتكەنى اياقتارى بۇعاۋلى. ارقالارى قاتتى اۋىرادى، سەبەبى بۇنىڭ الدىندا سوققىعا جىعىلعان ەدى (ەلشىلەردىڭ ىستەرى 16:23، 24). سول كۇنى كۇندىز ٴبىر توبىر ادام پاۋىل مەن سىيلاستى بازار الاڭىنا سۇيرەپ اپارعان بولاتىن. ول جەردە جەرگىلىكتى باسشىلار اي-شاي جوق ولاردى سوتتاپ جىبەردى. ۇستەرىندەگى كيىمىن جۇلىپ الىپ، شىبىقپەن دۇرە سوقتىردى (ەلشىلەردىڭ ىستەرى 16:16—22). نەتكەن ادىلەتسىزدىك! پاۋىل ريم ازاماتى بولعاندىقتان، ٸسى دۇرىس قاراستىرىلۋى كەرەك ەدى *.
2 پاۋىل تۇرمەدە وتىرىپ، سول كۇنى بولعان وقيعانى جانە فىلىپىنىڭ تۇرعىندارى جايلى ويلانسا كەرەك. پاۋىل ساپارمەن بارعان كوپتەگەن قالالاردا ٴماجىلىسحانا بار ەدى، ال بۇل قالادا ول دا جوق. سوندىقتان مۇنداعى ياھۋديلەر قالا سىرتىنداعى وزەن جاقتا عيبادات ەتۋگە ٴماجبۇر (ەلشىلەردىڭ ىستەرى 16:13، 14). سوندا بۇل قالادا ٴماجىلىسحانا بولۋ ٷشىن تالاپ ەتىلەتىن ون ياھۋدي ەر ادامنىڭ دا بولماعانى ما؟ بۇعان قوسا، فىلىپىنىڭ تۇرعىندارى وزدەرىنىڭ ريم ازاماتى بولعاندارىن قاتتى ماقتان تۇتادى (ەلشىلەردىڭ ىستەرى 16:21). سول سەبەپتى دە ولار ياھۋدي بولعان پاۋىل مەن سىيلاستى ريم ازاماتى دەپ ويلاماعان شىعار. ارينە، جاعداي تۋرا سولاي بولدى دەپ كەسىپ ايتۋ قيىن، ٴبىراق ٴبىر بىلەتىنىمىز، پاۋىل مەن سىيلاس تۇرمەگە ادىلەتسىز قامالعان ەدى.
3. تۇرمەگە قامالعاندا پاۋىلدى قانداي ويلار مازالاسا كەرەك، دەسە دە ول قانداي كوزقاراس تانىتتى؟
3 بۇعان قوسا، پاۋىل فىلىپىگە قالاي كەلگەنى جايلى دا ويلانعان شىعار. وسىدان بىرنەشە اي بۇرىن ول ەگەي تەڭىزىنىڭ ارعى بەتىندەگى كىشى ازيادا بولاتىن. سول جاقتا جۇرگەندە كيەلى رۋح وعان بەلگىلى ٴبىر ايماقتارعا بارۋعا بىرنەشە رەت توسقاۋىل قويعان ەدى. ال بۇل جولى كيەلى رۋح ونى ٴبىر جاققا بارۋعا تالپىندىرعانداي بولدى (ەلشىلەردىڭ ىستەرى 16:6، 7). ٴبىراق قاي جاققا؟ ول ترويادا بولعاندا ايان كوردى. اياندا ٴبىر كىسى وعان: «ماكەدونياعا كەل»،— دەدى. بۇل ەحوبانىڭ ەركى ەكەنى تۇسىنىكتى بولدى. سودان پاۋىل دەرەۋ ماكەدونياعا اتتانعان بولاتىن (ەلشىلەردىڭ ىستەرى 16:8—10 وقىڭىز). ٴبىراق ارى قاراي نە بولدى؟ ونىڭ ماكەدونياعا كەلگەنى سول ەدى، تۇرمەدەن ٴبىر-اق شىقتى! ەحوبا پاۋىلدىڭ مۇنداي جاعدايعا ۇشىراۋىنا نەگە جول بەردى؟ ول تۇرمەدە قانشا ۋاقىت وتىرماق؟ پاۋىل وسى جايتتاردى ويلاسا دا، ونىڭ سەنىمى ەش مىزعىمادى ٵرى قۋانىشىن جوعالتپادى. سىيلاس ەكەۋى «دۇعا ەتىپ، قۇدايدى انمەن ماداقتادى» (ەلشىلەردىڭ ىستەرى 16:25). قۇدايدىڭ تىنىشتىعى ولاردىڭ جۇرەكتەرى مەن وي-سانالارىن ورنىقتىردى.
4، 5. ا) ٴبىزدىڭ جاعدايىمىز قاي جاعىنان پاۋىلدىكىنە ۇقساس بولۋى مۇمكىن؟ ٵ) پاۋىلدىڭ جاعدايى قالاي كۇتپەگەن جەردەن وزگەردى؟
4 پاۋىلدىڭ سەزىمى سىزگە تانىس پا؟ بالكىم، ٴسىز ومىرىڭىزدە قۇدايدان شەشىم قابىلداۋعا كومەكتەسۋىن سۇراعان سوڭ، كيەلى رۋحتىڭ باسشىلىعىنا ساي ارەكەت ەتىپ جاتىرمىن دەپ ويلاعان كەزىڭىز بولعان شىعار. ٴبىراق ارتىنان كوپ قيىندىق كورگەن شىعارسىز يا بولماسا ومىرىڭىزدە كۇرت وزگەرىستەر جاساۋعا تۋرا كەلگەن بولار (ۋاعىزداۋشى 9:11). ال ەندى سول جاعدايلاردى ويلاعاندا، ەحوبانىڭ كەيبىر جايتتارعا نەلىكتەن جول بەرگەنىن تۇسىنبەيتىن شىعارسىز. ەحوباعا تولىقتاي ارقا سۇيەي وتىرىپ، توزىمدىلىك تانىتا بەرۋگە سىزگە نە كومەكتەسە الادى؟ پاۋىل مەن سىيلاستىڭ ٵرى قاراي باستان وتكەرگەنى وسى سۇراققا جاۋاپ بەرەدى.
5 پاۋىل مەن سىيلاس ٵن ايتىپ جاتقاندا، كۇتپەگەن جايتتار ورىن الا باستادى. الدىمەن، جەر قاتتى سىلكىندى. سوندا تۇرمەنىڭ ەسىكتەرى اشىلىپ، تۇرمەدەگى ادامداردىڭ بۇعاۋلارى سىپىرىلىپ ٴتۇسىپ قالدى. كەيىننەن تۇرمە باستىعى ٶز-وزىنە قول جۇمساماق بولعاندا، پاۋىل ونى ولىمنەن اراشالاپ قالدى. ٴسويتىپ، سول تۇرمە باستىعىنىڭ بۇكىل ٷي ٸشى شومىلدىرۋ راسىمىنەن ٶتتى. ەرتەسىنە تاڭەرتەڭ قالا باسشىلارى قىزمەتشىلەرىن جىبەرىپ، پاۋىل مەن سىيلاستى تۇرمەدەن بوساتۋدى جانە قالادان شۋ شىعارماي كەتۋىن بۇيىردى. ٴبىراق قالا باسشىلارى پاۋىل مەن سىيلاستىڭ ريم ازاماتتارى ەكەنىن بىلگەندە، وتە ۇلكەن قاتەلىك جىبەرگەنىن ٴتۇسىنىپ، ولاردى شىعارۋ ٷشىن وزدەرى باردى. الايدا قالادان كەتەر الدىندا پاۋىل مەن سىيلاس ٶز دەگەندەرىنەن قايتپاي، جاڭادان شومىلدىرۋ راسىمىنەن وتكەن باۋىرلاستارى ٴلۇدياعا بارىپ قوشتاسىپ قايتتى. سول جەردە فىلىپىدەگى باسقا باۋىرلاستاردى دا كورىپ، ولاردى جىگەرلەندىرۋدىڭ مۇمكىندىگىن قالت جىبەرمەدى (ەلشىلەردىڭ ىستەرى 16:26—40). وسىلايشا جاعداي ٵپ-ساتتە وزگەرىپ كەتتى!
«ادام اقىلىنان اسقان تىنىشتىق»
6. قازىر ٴبىز نە قاراستىرامىز؟
6 اتالمىش وقيعادان قانداي ساباق الامىز؟ ەحوبا ٴبىز كۇتپەگەن نارسەنى ىستەي الادى، سول سەبەپتى قيىندىقتارعا كەزىككەندە بىزگە سارىۋايىمعا بەرىلۋدىڭ ەش قاجەتى جوق. باسىنان وتكەرگەندەرى پاۋىلعا قاتتى اسەر ەتتى. بۇنى پاۋىلدىڭ كەيىنىرەك فىلىپىلىك باۋىرلاستارعا جازعان سوزدەرىنەن كورۋگە بولادى. وندا ول ۋايىم مەن قۇدايدىڭ تىنىشتىعى جايلى ايتقان بولاتىن. بۇل ماقالادا پاۋىلدىڭ سول سوزدەرىن، ياعني فىلىپىلىكتەرگە 4:6، 7ٴنى (وقىڭىز) قاراستىرامىز. سوسىن كيەلى كىتاپتاعى باسقا دا وقيعالاردى شولىپ وتەمىز. بۇل وقيعالار دا ەحوبانىڭ ٴبىز كۇتپەگەن نارسەلەردى ىستەي الاتىنىنا دالەل بولىپ تابىلادى. ال سوڭىندا «قۇدايدىڭ تىنىشتىعى» قالاي ەحوباعا تولىقتاي سەنىم ارتا وتىرىپ، قيىنشىلىقتارعا توزۋگە كومەكتەسەتىنىن تالقىلايمىز.
ەحوبا ٴبىز كۇتپەگەن نارسەنى ىستەي الادى، سول سەبەپتى قيىنشلىقتارعا كەزىككەندە بىزگە سارىۋايىمعا بەرىلۋدىڭ ەش قاجەتى جوق
7. پاۋىل فىلىپىلىكتەرگە جازعان حاتىندا نەنى ۇيرەتكىسى كەلدى جانە ٴبىز دە نە نارسەگە ۇيرەنە الامىز؟
7 فىلىپىدەگى باۋىرلاستار پاۋىلدىڭ حاتىن وقىعاندا، ويلارىنا نە كەلدى؟ بالكىم، ولاردىڭ كوبىسى پاۋىل مەن سىيلاستىڭ وقيعاسىن جانە ەحوبانىڭ ولارعا ەشكىم كۇتپەگەندەي كومەكتەسكەنىن ەسكە تۇسىرگەن شىعار. حاتىندا پاۋىل ولاردى نە نارسەگە ۇيرەتكىسى كەلدى؟ ول: «ەش ۋايىمداماڭدار. دۇعا ايتىڭدار، سوندا «قۇدايدىڭ ادام اقىلىنان اسقان تىنىشتىعىنا» يە بولاسىڭدار»،— دەگىسى كەلدى. بۇل تىركەس نەنى بىلدىرەدى؟ كيەلى كىتاپتىڭ كەيبىر اۋدارمالارىندا بۇل تىركەس «ارمانداعانىمىزدان دا اسىپ تۇسەتىن تىنىشتىق» نە «ادامداردىڭ بار جوسپارىنان دا ۇستەم تۇسەتىن تىنىشتىق» دەلىنگەن. وسىلايشا پاۋىل «قۇدايدىڭ تىنىشتىعى» ٴبىز ويلاعاننان الدەقايدا كۇشتى دەگىسى كەلگەن. كەيدە باسىمىزعا تۇسكەن قيىنشىلىقتاردىڭ شەشىمىن بىلمەسەك تە، ەحوبا بىلەدى. ٴسويتىپ، ٴبىز كۇتپەگەن نارسەنى ىستەي الادى (پەتىردىڭ 2-حاتى 2:9 وقىڭىز).
8، 9. ا) پاۋىل فىلىپىدە ادىلەتسىزدىككە كەزىكسە دە، مۇنىڭ قانداي وڭ ناتيجەسى بولدى؟ ٵ) نەلىكتەن فىلىپىدەگى باۋىرلاستار پاۋىلدىڭ سوزدەرىنە تولىقتاي سەنىم ارتتى؟
8 فىلىپىدەگى باۋىرلاستار پاۋىلدىڭ حاتىن وقىعاندا، سوڭعى ون جىل ىشىندە ەحوبانىڭ وزدەرىنە ىستەگەن ىستەرى جايلى ويلاپ، بويلارىنا جىگەر قۇيىلسا كەرەك. ەحوبا پاۋىل مەن سىيلاستىڭ ادىلەتسىزدىك كورۋلەرىنە جول بەرسە دە، مۇنىڭ ناتيجەسىندە «ىزگى حاباردى قورعاپ، ونى زاڭداستىرۋ» مۇمكىن بولدى (فىلىپىلىكتەرگە 1:7). ەندى فىلىپىنىڭ قالا باسشىلارى جاڭادان قۇرىلعان ماسىحشىلەر قاۋىمىن قۋدالاۋعا داتتەرى بارمادى. پاۋىل ٶزىنىڭ ريم ازاماتى ەكەنىن تىلگە تيەك ەتكەندىكتەن بولار، شاكىرت لۇقا ٴفىلىپى قالاسىندا پاۋىل مەن سىيلاس كەتكەننەن كەيىن ەمىن-ەركىن تۇرا العان. وسىنىڭ ارقاسىندا ول سول قالاداعى جاڭادان ٴماسىحشى بولعاندارعا اياققا تۇرۋعا كوپ كومەكتەسكەن.
9 فىلىپىدەگى باۋىرلاستار پاۋىل ٶز حاتىندا جاي عانا وزىنىڭ وي-پىكىرىن جازىپ قويماعانىن بىلگەن. ويتكەنى پاۋىل اسا اۋىر قيىنشىلىقتاردى ٶز باسىنان وتكەرگەن. ٴتىپتى فىلىپىلىكتەرگە ارناعان حاتىن ول ريمدەگى ۇيىندە قاماۋدا وتىرعاندا جازعان. ٴبىراق ول سوندا دا «قۇدايدىڭ تىنىشتىعىنا» يە ەكەندىگىن ٴبىلدىردى (فىلىپىلىكتەرگە 1:12—14؛ 4:7، 11، 22).
«ەش نارسەنى ۋايىمداماڭدار»
10، 11. قانداي دا ٴبىر قيىندىقتى ويلاپ ۋايىمداساق، نە ىستەۋىمىز كەرەك جانە ٴبىز نە نارسەگە ۇمىتتەنە الامىز؟
10 «ەش نارسەنى ۋايىمداماي»، «قۇدايدىڭ تىنىشتىعىنا» يە بولۋعا بىزگە نە كومەكتەسەدى؟ پاۋىلدىڭ فىلىپىلىكتەرگە جازعان حاتىنان كورەتىنىمىزدەي، قانداي دا ٴبىر قيىندىق جايلى ويلاپ مازالانساق، ەڭ دۇرىسى — دۇعا ەتۋ. سوندىقتان بويىمىزدى سارىۋايىم مەڭدەسە، دۇعا ايتىپ ۋايىمىمىزدى تارقاتايىق (پەتىردىڭ 1-حاتى 5:6، 7 وقىڭىز). ەحوباعا دۇعا ايتقاندا، ول ٴسىزدىڭ قامىڭىزدى ويلايتىنىنا ٴجۇز پايىز سەنىمدى بولىڭىز. ٵربىر جاقسىلىعى ٷشىن ٵردايىم شۇكىرشىلىك ٴبىلدىرىڭىز. سونداي-اق ەحوبانىڭ «ٴبىز سۇراعان نە ويلاعان نارسەلەردىڭ بارىنەن الدەقايدا كوپ نارسە ىستەي الاتىنىن» ەشقاشان ۇمىتپاڭىز (ەفەستىكتەرگە 3:20).
11 ٴبىز دە پاۋىل مەن سىيلاس سياقتى، ەحوبانىڭ بىزگە قالاي كومەكتەسكەنىن كورىپ تاڭداي قاعۋىمىز مۇمكىن. ول بىزگە تاڭعاجايىپ تۇردە كومەكتەسپەسە دە، ٵردايىم ٴدال ٴبىز قاجەت ەتكەن نارسەنى بەرەدى (قورىنتتىقتارعا 1-حات 10:13). بۇل ەحوبا جاعدايىمىزدى تۇزەتەدى نە ماسەلەمىزدى شەشىپ بەرەدى دەپ جاي قول قۋسىرىپ وتىرۋدى بىلدىرمەيدى. ٴبىز دۇعالارىمىزعا ساي ارەكەت ەتۋگە ٴتيىسپىز (ريمدىكتەرگە 12:11). ٸس-ارەكەتتەرىمىز دۇعامىزدىڭ شىن جۇرەكتەن شىققانىن ايان ەتەدى، ٵرى بۇل ەحوبا ٷشىن بىزگە باتاسىن بەرۋىنە نەگىز بولىپ تابىلادى. ەحوبانىڭ ٴبىز سۇراعاننان دا، كۇتكەننەن دە الدەقايدا كوپ نارسە ىستەي الاتىنىن ەش ۇمىتپاۋىمىز كەرەك. كەيدە ول ٴبىز مۇلدەم كۇتپەگەن نارسەنى ىستەپ، تاڭعالدىرىپ جاتادى. ەندەشە، ەحوبانىڭ ٴبىز كۇتپەگەن نارسەلەردى ىستەي الاتىنىنا دەگەن سەنىمىمىزدى كۇشەيتەتىن مىسالداردىڭ كەيبىرىن قاراستىرايىق.
ەحوبانىڭ ادام كۇتپەگەن نارسەلەردى ىستەگەن كەزدەرى
12. ا) سەنناحيريم قوقان-لوقى كورسەتكەندە، ەزەكيا پاتشا نە ىستەدى؟ ٵ) ەحوبانىڭ قيىندىقتى قالاي شەشكەنىنەن نە بىلەمىز؟
12 كيەلى كىتاپتا ەحوبانىڭ ادام كۇتپەگەن نارسەلەردى ىستەگەنى جايلى مىسالدار جەتەرلىك. مىسالى، ەزەكيا ياھۋدانىڭ پاتشاسى بولىپ تۇرعاندا، اسسيريا پاتشاسى سەنناحيريم ياھۋداعا شابۋىلداپ، يەرۋساليمنەن باسقا قالالاردىڭ ٴبارىن جاۋلاپ الادى (پاتشالار 2-جازبا 18:1—3، 13). سوسىن ول يەرۋساليمگە شابۋىلداماق بولادى. سوندا ەزەكيا نە ىستەدى؟ الدىمەن، ول ەحوبانىڭ كومەگىن ٶتىنىپ دۇعا ەتتى ٵرى يشايا پايعامبار ارقىلى ەحوبادان كەڭەس سۇرادى (پاتشالار 2-جازبا 19:5، 15—20). سوسىن سەنناحيريمنىڭ تالاپ ەتكەن اقىسىن تولەۋ ارقىلى پاراساتتىلىق تانىتتى (پاتشالار 2-جازبا 18:14، 15). سوڭىندا ول قالانى ۇزاققا سوزىلاتىن قورشاۋعا دايىندادى (شەجىرەلەر 2-جازبا 32:2—4). بۇل وقيعا نەمەن ٴبىتتى؟ ەحوبا ٴبىر پەرىشتەسىن جىبەرىپ، ول ٴبىر-اق تۇننىڭ ىشىندە سەنناحيريمنىڭ 000 185 ساربازىن سۇلاتىپ سالدى. ٴتىپتى ەزەكيانىڭ ٶزى بۇلاي بولادى دەپ كۇتپەگەن ەدى! (پاتشالار 2-جازبا 19:35).
جۇسىپپەن بولعان جاعدايدان قانداي ساباق الامىز؟ (مۇسانىڭ 1-جازباسى 41:42) (13-ابزاستى قاراڭىز)
13. ا) ٴجۇسىپتىڭ وقيعاسىنان نە نارسەگە ۇيرەنەمىز؟ ٵ) سارانىڭ ومىرىندە قانداي كۇتپەگەن جاعداي ورىن الدى؟
13 ال ەندى ٴجۇسىپتىڭ ەر جەتكەن كەزىندە باسىنان وتكەن وقيعانى قاراستىرايىق. مىسىردا اباقتىدا وتىرىپ، بولاشاقتا سول ەلدەگى قۇدىرەتتى ەكىنشى ادام بولاتىنى نەمەسە ەحوبانىڭ ول ارقىلى وتباسىن اشتىقتان امان الىپ قالاتىنى جۇسىپتىڭ ٷش ۇيىقتاسا دا تۇسىنە كىرمەگەن شىعار (مۇسانىڭ 1-جازباسى 40:15؛ 41:39—43؛ 50:20). ەحوبانىڭ ىستەگەنى ٴجۇسىپتىڭ بار كۇتكەنىنەن اسىپ تۇسكەنى ٴسوزسىز. سونداي-اق جۇسىپتىڭ ارعى اجەسى سارا جايلى دا ويلاپ كورەيىكشى. جاسى كەلىپ قالعان ول ەحوبا كۇڭىنىڭ ۇلىن عانا ەمەس، وزىنە دە بالا سىيلايدى دەپ كۇتتى مە؟ ىسقاقتىڭ تۋىلۋى سارانىڭ ارمانداعانىنان دا اسىپ ٴتۇستى (مۇسانىڭ 1-جازباسى 21:1—3، 6، 7).
14. ەحوباعا قاي جاعىنان سەنىمدى بولساق بولادى؟
14 ەحوبا جاڭا دۇنيە كەلگەنشە بار قيىنشىلىعىمىزدى كەرەمەت تۇردە جوق قىلىپ جىبەرەدى دەپ كۇتپەيمىز. سونداي-اق ول ٴبىزدىڭ ومىرىمىزدە تاڭعاجايىپ جايتتاردى بولدىرسىن دەپ تە تالاپ ەتپەيمىز. الايدا ەجەلدە ەحوبا ٶز ادال قىزمەتشىلەرىنە تاڭعالدىرارلىق جولدارمەن قولعابىس ەتكەنىن بىلەمىز. سودان بەرى ول وزگەرگەن جوق (يشايا 43:10—13 وقىڭىز). سول ٷشىن ٴبىز وعان سەنىمدىمىز. ونىڭ ەركىن ورىنداۋىمىز ٷشىن، ول بىزگە قاجەتتى كۇشتى دارىتاتىنىنا نىق سەنسەك بولادى (قورىنتتىقتارعا 2-حات 4:7—9). ەزەكيانىڭ، ٴجۇسىپ پەن سارانىڭ مىسالدارىنان نەگە ۇيرەنەمىز؟ ادالدىعىمىزدان اينىماساق، ەحوبا بىزگە ٴتىپتى ەڭ اۋىر دەگەن قيىنشىلىقتاردا كومەككە كەلە الادى.
15. قيىنشىلىعىمىز بولا تۇرا، قالاي ٴبىز «قۇدايدىڭ تىنىشتىعىن» ساقتاي الامىز جانە بۇل نەنىڭ ارقاسىندا مۇمكىن بولىپ وتىر؟
15 قيىنشىلىعىمىز بولا تۇرا، قالاي ٴبىز «قۇدايدىڭ تىنىشتىعىن» ساقتاي الامىز؟ بۇل ٷشىن ەحوبامەن تىعىز قارىم-قاتىناستا بولۋىمىز قاجەت. مۇنداي قارىم-قاتىناس تەك يسا ماسىحتىڭ تولەم قۇرباندىعىنىڭ ارقاسىندا عانا مۇمكىن بولىپ وتىر. تولەم — ەحوبانىڭ كەرەمەت ىستەرىنىڭ ٴبىرى. سونىڭ ارقاسىندا ول ٴبىزدىڭ كۇنالارىمىزدى كەشەدى، ٵرى ٴبىز تازا ار-ۇجدانعا يە بولىپ، وعان جاقىنداي الامىز (جوحان 14:6؛ جاقىپ 4:8؛ پەتىردىڭ 1-حاتى 3:21).
جۇرەگىمىز بەن وي-سانامىزدى ساقتايدى
16. «قۇدايدىڭ تىنىشتىعىنا» بولەنگەندە نە بولادى؟ مىسال كەلتىرىڭىز.
16 «قۇدايدىڭ ادام اقىلىنان اسقان تىنىشتىعىنا» كەنەلگەندە نە بولادى؟ كيەلى كىتاپتا ايتىلعانداي، ول ٴبىزدىڭ جۇرەگىمىز بەن وي-سانامىزدى «ساقتايدى» (فىلىپىلىكتەرگە 4:7). بۇل جەردە «ساقتايدى» دەپ اۋدارىلعان ٴسوز ٴتۇپنۇسقا تىلدە اسكەردە قولدانىلاتىن ٴسوز بولعان. بۇل ٴسوز قالانى قورعاۋعا مىندەتتەلگەن جاۋىنگەرلەر توبىنا نۇسقايتىن. ٴفىلىپى قالاسىنىڭ تۇرعىندارى وسىنداي توپتىڭ قورعانىشىندا بولعان. قالانىڭ قورعاۋلى ەكەنىن بىلگەندىكتەن، ولاردىڭ ۇيقىلارى تىنىش ەدى. سول ىسپەتتى، بىزدە دە «قۇدايدىڭ تىنىشتىعى» بولسا، مازاسىز كۇي كەشپەيمىز ٵرى جۇرەگىمىز بەن وي-سانامىز دا تىنىم تابادى. ويتكەنى ەحوبانىڭ ٴبىزدى قامقورلايتىنىن جانە باقىتتى ٶمىر سۇرگەنىمىزدى قالايتىنىن بىلەمىز (پەتىردىڭ 1-حاتى 5:10). ال بۇل ۋايىمنىڭ نە جامان سەزىمدەردىڭ ەڭسەمىزدى باسىپ تاستاۋىنان ساقتايدى.
17. زور الاپاتتا ەحوباعا سەنىم ارتۋىمىزعا نە كومەكتەسەدى؟
17 جاقىندا بۇكىل ادامزاتتىڭ باسىنا زور الاپات كەلەدى (ماتاي 24:21، 22). سول كەزدە جەكە ارقايسىسىمىزبەن ناقتى نە بولاتىنىن بىلمەيمىز. ٴبىراق ول ۋاقىت جايىندا شەكتەن تىس ۋايىمداۋدىڭ قاجەتى جوق. ەحوبانىڭ نە ىستەيتىنىن بۇگە-شىگەسىنە دەيىن بىلمەسەك تە، ٴبىز قۇدايىمىزدىڭ قانداي ەكەنىن بىلەمىز. بۇرىنداعى ادال قىزمەتشىلەرى ٷشىن نە ىستەگەنىن بىلەمىز. قانداي جاعداي بولماسىن، ول ٶز نيەتىن جۇزەگە اسىراتىنىنا دا كوز جەتكىزدىك. ول مۇنى ٴتىپتى ەشكىم كۇتپەگەن جولمەن ىسكە اسىرا الادى! ەندەشە، ەحوبا ٴبىز ٷشىن ٴبىر نارسە ىستەگەن سايىن، ٴبىز «قۇدايدىڭ ادام اقىلىنان اسقان تىنىشتىعىن» جاڭا ٴبىر جولمەن سەزىنەمىز.
^ 1-ابزاس سىيلاس تا ريم ازاماتى بولعانعا ۇقسايدى (ەلشىلەردىڭ ىستەرى 16:37).
