1, 2. Σο αβιλό-πες κο Παύλος ντα κο Σίλας όταν γκιλέ κο Φίλιπποι; (Ντικχ ι φωτογραφία σο ισί κι αρχή.)

ΣΚΕΦΤΙΝΕΝ σο αβιλό-πες. Ισινέ ιράτ. Ντούι ιεραπόστολοι, ο Παύλος ντα ο Σίλας, ισινέ πφαντέ εκχέ φυλακιάτε αντρέ κο καρανίκι, σε εκ πόλη σο βακέρντιβελας Φίλιπποι. Ναστί κουνιαβένας-πες επειδή λένγκε τσανγκά ισινέ πφαντέ ντα λένγκο ντουμό ντουκχάλας επειδή ντινέ-λεν μπουτ νταπ. (Πράξεις 16:​23, 24) Πιο τζανγκλέ κο ίδιος ντιβές, μπουτ τζενέ καπτιντέ ι Παυλός ντα ι Σιλάς ντα λιντέ-λεν σβάρνα μέχρι κι αγορά. Οτθέ, τσσουντέ-λεν σουγκό ανγκλάλ κο τζενέ σο κερένας κουμάντος ι πόλη για τι δικάνεν-λεν. Πφαραντέ λένγκε σέα ντα ντινέ-λεν μπουτ φαρ με ραβδιά. (Πράξεις 16:​16-22) Σο μπαρί αδικία! Ο Παύλος ισινέ Ρωμαίος πολίτης ντα τθερέλας ο δικαίωμας τι νακχέλ κανονική δίκη. *​—Ντικχ ι υποσημείωση.

² Καζόμ ισινέ κι φυλακή, ο Παύλος μπορεί τι σκεφτίνελας οντουλά σο αβιλέας-πες οντουβά ντιβές ντα ι τζενέν σο μπεσένας κο Φίλιπποι. Να τθερένας ούτε εκ συναγωγή κι πόλη, σαρ  τθερένας μπουτ γιαβερά πόλεις σο γκιλόας ο Παύλος. Οτθάρ, ο Ιουδαίοι έπρεπε τι ντεν λατρεία αβριάλ κατά πόλη, πασέ εκχέ λενιάτε. (Πράξεις 16:​13, 14) Ανταβά μπορεί τι αβέλας-πες επειδή να υπαρχίντιβενας ούτε ντες Ιουδαίοι κι πόλη, αφού αζόμ μουρσά τουλάχιστον έπρεπε τι αβέν οτθέ για τι τθερέν εκ συναγωγή. Ο τζενέ σο μπεσένας κο Φίλιπποι ισινέ μπουτ περήφανοι σο ισινέ Ρωμαίοι πολίτες. (Πράξεις 16:​21) Μπορεί οντουλέσκε μα τι νακχλάας λένγκε γκοντιάταρ ότι ο Παύλος ντα ο Σίλας, σο ισινέ Ιουδαίοι, κα μπορίνενας τι αβέν βον-ντα Ρωμαίοι πολίτες. Να τζανάσα ακριβώς σο αβιλόας-πες, αλλά τζανάσα ότι τσσουντέας ι Παυλός ντα ι Σιλάς άδικα κι φυλακή.

3. Σόσκε μπορεί τι αβέλας μπερδεμέ ο Παύλος όταν τσσουντέ-λες κι φυλακή, αλλά σο συνεχιντάς τι κερέλ;

³ Επίσης, o Παύλος μπορεί τι σκεφτίνελας σαρ ερεσλόας κο Φίλιπποι. Χάνικ μασεκά πιο τζανγκλέ ισινέ κι γιαβέρ μπάνταρ κατά Αιγαίος Πελάγος, κι Μικρά Ασία. Καζόμ ισινέ οτθέ, ο άγιος πνεύμας μπουτ φαρ να μουκχλάς-λες τι βακερέλ ο λατσσέ αμπέρια μερικέ τθεμέντε. Ισινέ σαρ τι γκερέλας-λες ο άγιος πνεύμας κάπου γιαβερτθέ. (Πράξεις 16:6, 7) Αλλά κάι; Όταν ισινέ κι Τρωάδα, ο Παύλος ντικχλάς σε εκ φαντασία εκχέ μουρσές τι βακερέλ λέσκε: «Έλα κι Μακεδονία». Ο θέλημας ι Ιεχωβάσκο ισινέ ξεκάθαρος! Οτθάρ, ο Παύλος γκιλό αμέσως κι Μακεδονία. (Διαβάνεν Πράξεις 16:​8-10) Αλλά σοράν σο αβιλό-πες; Χάνικ καιρός αφού γκιλό κι Μακεδονία, τσσουντέ-λες κι φυλακή! Σόσκε μουκχλάς ο Ιεχωβά τι αβέλ-πες ανταβά κο Παύλος; Καζόμ κα ατσσόλας κι φυλακή; Ατζέ-ντα άμα ανταλά ερωτήσεις νακχλέ κατά Παυλόσκι γκοντί, λέσκι πίστη ατσσιλί ζουρανί ντα βοβ συνεχίνελας τι αβέλ χαρούμενος. Εμ βοβ εμ ο Σίλας αρχισάλε τι “προσευχίντιβεν ντα τι δοξάνεν ι Ντεβλές γκιλίντζαρ”. (Πράξεις 16:​25) Η ειρήνη ι Ντεβλέσκι ηρεμιντάς λένγκο γκι ντα λένγκι γκοντί.

4, 5. (α) Σαρ κα μπορίνενας τι μοιάζεν οντουλά σο νακχάσα οντουλέντζαρ σο νακχλάς ο Παύλος; (β) Σαρ αλλαξάλε ο πράγματα με τρόπος σο ο Παύλος να μπεκλεντίνελας;

⁴ Νιωσάλεν ποτές σαρ ο Παύλος; Ίσως υπαρχίντιβενας κάποιες στιγμές τουμαρέ ζωγιάτε σο μανγκλέν κατά Ντεβέλ τι βοηθίνελ-τουμέν τι λεν εκ απόφαση ντα πακιάνας ότι ακολουθίνενας ι καθοδηγία σο ντέλας ο άγιος πνεύμας. Αλλά σοράν μπορεί τι αρακχλέν μπουτ δυσκολίες ή έπρεπε τι κερέν μπαρέ αλλαγές τουμαρέ ζωγιάτε. (Εκκλησιαστής 9:​11) Ακανά, όταν σκεφτίνενα-λεν ανταλά, μπορεί τι πουτσένα σόσκε ο Ιεχωβά μουκχλάς τι αβέν-πες κάποια πράγματα. Σο μπορίνελα τι βοηθίνελ-τουμέν τι συνεχίνεν τι νταϊντίνεν ντα τι τθερέν εμπιστοσύνη κο Ιεχωβά σαρέ τουμαρέ γκίσαρ; Μπορίνασα τι αρακχάς ι απάντηση άμα κα ντικχάς σο αβιλό-πες σοράν κο Παύλος ντα κο Σίλας.

⁵ Όταν ο Παύλος ντα ο Σίλας γκιλιαβένας ι Ντεβλέσκε, αρχισάλε τι αβέν-πες μπουτ πράγματα σο να μπεκλεντίνενας λένγκε. Πρώτα, αβιλό εκ μπαρό σεισμός. Ο πόρτες ι φυλακιάκε πουτάρντιλε. Σοράν, ο αλυσίδες σαρέ ι φυλακισμέ τζενένγκε νικίστιλε λένταρ. Ο μουρς σο αρακχαβέλας οντουλέν σο ισινέ κι φυλακή γκιλό τι μουνταρέλ-πες, αλλά ο Παύλος τσσιναντάς-λες. Οντουβά μουρς ντα σαρί λέσκι φαμιλί μπολντιλέ. Όταν ντισιλό, οντουλά σο κερένας κουμάντος ι πόλη μπουτσσαντέ τζενέν για τι νικαβέν ι Παυλός ντα ι Σιλάς κατά φυλακή ντα για τι μανγκέν λένταρ τι νασέν. Όταν ο τζενέ σο κερένας κουμάντος ι πόλη σικλιλέ ότι ο Παύλος ντα ο Σίλας  ισινέ Ρωμαίοι πολίτες, αγαντέ πουμαρό λάθος ντα γκιλέ βον ο ίδιοι για τι νικαβέν-λεν αβρί. Αλλά πριν τι νασέν κατά πόλη, ο Παύλος ντα ο Σίλας γκιλέ τι χαιρετίνεν ι Λυδιά, σο μπολντιλίας πριν χάνικ ντιβεσά. Επίσης, να χασαρντέ ι ευκαιρία τι ντεν ζορ κο γιαβερά πφραλά κο Φίλιπποι. (Πράξεις 16:​26-40) Καζόμ σουγκό αλλαξάλε σαρέ ο πράγματα!

6. Σο κα ντικχάς ντα σο κα ντας-αμέν γκοντί ακανά;

⁶ Σο σικλιάσα οντουλένταρ σο αβιλέ-πες κο Παύλος; Ο Ιεχωβά μπορίνελα τι κερέλ οντουβά σο να μπεκλεντίνασα, οτθάρ να χρειαζίντιβελα τι ανησυχίνας όταν νακχάσα δοκιμασίες. Τζανάσα ότι ανταβά σο σικλιλό ο Παύλος ατσσιλό λέσκε οντουλένταρ σο γραφιντάς πιο σοράν κο πφραλά σο ισινέ κο Φίλιπποι για το ανησυχίες ντα για την ειρήνη ι Ντεβλέσκι. Ανταλέ μαθημάστε κα ντικχάς ι Παυλόσκε λάφια σο ισί κο εδάφια Φιλιππησίους 4:6, 7. (Διαβάνεν) Σοράν, κα ντας-αμέν γκοντί γιαβερά-ντα παραδείγματα κατά Αγία Γραφή σο σικαβένα σαρ κερντάς ο Ιεχωβά οντουβά σο να μπεκλεντίνενα ο τζενέ. Κο τέλος, κα ντικχάς σαρ μπορίνελα «η ειρήνη ι Ντεβλέσκι» τι βοηθίνελ-αμέν τι νταϊντίνας κο δοκιμασίες ντα τι τθεράς εμπιστοσύνη κο Ιεχωβά σαρέ αμαρέ γκίσαρ.

7. Σο μάθημας σικλιαρντάς ο Παύλος ι πφραλέν κο Φίλιπποι όταν γραφιντάς λένγκε, ντα σο μπορίνασα τι σικλιάς αμέν;

⁷ Όταν ο πφραλά κο Φίλιπποι διαβαντέ ι επιστολή σο γραφιντάας λένγκε ο Παύλος, σο σκεφτιντέ; Ο πιο μπουτ μπορεί τι ντινέ-πες γκοντί οντουλά σο νακχλάας ο Παύλος ντα ο Σίλας ντα σαρ βοηθιντάας-λεν ο Ιεχωβά με τρόπος σο να μπεκλεντίνενας. Σο μάθημας σικλιαρέλας-λεν ο Παύλος κι επιστολή σο γραφιντάς λένγκε; Ο μάθημας ισινέ: Μα ανησυχίνεν. Κερέν προσευχή, ντα κα τθερέν ι «ειρήνη ι Ντεβλέσκι σο ισί πιο οπρέ σαρέ οντουλένταρ σο αγαβένα». Σο μανγκέλα τι βακερέλ ανταβά; Μερικές μεταφράσεις ι Γραφιάκε βακερένα ότι η ειρήνη ι Ντεβλέσκι «ισί πιο οπρέ σαρέ οντουλένταρ σο μανγκάσα μπουτ τι αβέν-πες» ή «νακχαβέλα κάθε σχέδιος σο κερένα ο τζενέ». Κι πραγματικότητα, ο Παύλος βακερέλας ότι να νακχέλα αμαρέ γκοντιάταρ καζόμ σουκάρ ισί «η ειρήνη ι Ντεβλέσκι». Παρόλο σο μπουτ φαρ να τζανάσα σαρ τι λύνας αμαρέ προβλήματα, ο Ιεχωβά τζανέλα. Ντα μπορίνελα τι κερέλ οντουβά σο να μπεκλεντίνασα.​—Διαβάνεν 2 Πέτρου 2:9.

8, 9. (α) Παρόλο σο ο Παύλος αδικισάλοας κο Φίλιπποι, σο λατσσιπέ νικίστιλο οντουλένταρ σο νακχλάς; (β) Σόσκε ο πφραλά κο Φίλιπποι μπορίνενας τι πακιάν σαρέ πουμαρέ γκίσαρ οντουλά σο γραφιντάς ο Παύλος;

⁸ Η επιστολή σο γραφιντάς ο Παύλος πρέπει τι ντινάς ζορ κο πφραλά σο ισινέ κο Φίλιπποι επειδή αντάς λένγκε γκοντιάτε οντουλά σο κερντάας λένγκε ο Ιεχωβά ο τελευταία ντες μπρεσά. Ο Ιεχωβά μουκχλάς τι αδικίντιβελ ο Παύλος ντα ο Σίλας, αλλά ο αποτέλεσμας ισινέ “τι υπερασπίνεν ο λατσσέ αμπέρια ντα τι ντιντιόλ-λεν ο δικαίωμας κατά νόμος τι βακερέν-λεν”. (Φιλιππησίους 1:7) Οντουλά τζενέ σο κερένας κουμάντος κο Φίλιπποι κα σακιντίνενας τι τζαν κόντρα κι νεβί Χριστιανική εκκλησία. Μάλλον επειδή ο Παύλος βακερντάς ότι ισινέ Ρωμαίος πολίτης, ο μαθητής Λουκάς μπορισάλο τι μπεσέλ κο Φίλιπποι όταν νασλό ο Παύλος ντα ο Σίλας. Ο Λουκάς μπορίνελας σοράν τι βοηθίνελ ι νεβέ Χριστιανόν κο Φίλιπποι.

⁹ Όταν ο πφραλά κο Φίλιπποι διαβαντέ ι επιστολή ι Παυλόσκι, τζανένας ότι  ο Παύλος γραφίνελας πραγματένγκε σο νακχλάας-λεν πι ζωγιάτε. Βοβ τθερέλας μπουτ μπαρέ δυσκολίες. Ατζέ-ντα όταν γραφιντάς οντουλέ πφραλένγκε, ισινέ φυλακισμέ πι κχερέστε κι Ρώμη. Αλλά συνεχίνελας τι σικάντιβελ ότι τθερέλας ι «ειρήνη ι Ντεβλέσκι».​—Φιλιππησίους 1:​12-14· 4:7, 11, 22.

10, 11. Σο χρειαζίντιβελα τι κεράς όταν ανησυχίνασα εκχέ προβλημάσκε, ντα σο μπορίνασα τι μπεκλεντίνας;

¹⁰ Σο μπορίνελα τι βοηθίνελ-αμέν μα τι “ανησυχίνας για τίποτα”, αλλά τι τθεράς ι «ειρήνη ι Ντεβλέσκι»; Ο λάφια σο γραφιντάς ο Παύλος ι πφραλένγκε κο Φίλιπποι σικαβένα αμένγκε ότι, όταν ανησυχίνασα εκχέ προβλημάσκε, οντουβά σο κα βοηθίνελ-αμέν ισί η προσευχή. Οτθάρ, όταν ανησυχίνασα, χρειαζίντιβελα τι κεράς αμαρέ ανησυχίες προσευχές. (Διαβάνεν 1 Πέτρου 5:6, 7) Όταν προσευχίντιβενα κο Ιεχωβά, τι αβέν σίγουροι αντρέ τουμαρέ γκίστε ότι βοβ πφαμπόλα τουμένγκε. Πάντα τι ευχαριστίνεν-λες για κάθε ευλογία σο τθερένα. Ντα ποτές μα τι μπιστρέν ότι ο Ιεχωβά μπορίνελα «τι κερέλ πιο μπουτ οντουλένταρ σο σκεφτίνασα ντα σαρέ οντουλένταρ σο μανγκάσα λέσταρ ή αγαβάσα».​—Εφεσίους 3:20.

¹¹ Σαρ ο Παύλος ντα ο Σίλας, αντικάς αμέν-ντα μπορεί τι σαστίνασα οντουλένταρ σο κερέλα ο Ιεχωβά για τι βοηθίνελ-αμέν. Μπορεί μα τι κερέλ κάτι εντυπωσιακός, αλλά πάντα κα κερέλ οντουβά σο χρειαζίντιβασα. (1 Κορινθίους 10:​13) Ανταβά να μανγκέλα τι βακερέλ ότι αμέν μπεσάσα πφαντέ βαστέντζαρ ντα μπεκλεντίνασα απλά ι Ιεχωβάσκε τι διορθώνελ ο πράγματα ή τι λύνελ αμένγκε ο πρόβλημας. Πρέπει τι προσπαθίνας αμέν-ντα για τι αβέν-πες οντουλά σο βακεράσα αμαρέ προσευχιέντε. (Ρωμαίους 12:​11) Άμα κεράσα-λες ανταβά, σικαβάσα ότι μανγκάσα μπαγιά τι νακχαβάς αμαρό πρόβλημας ντα ντάσα κο Ιεχωβά ι ευκαιρία τι ευλογίνελ-αμέν. Δεν πρέπει τι μπιστράς ότι ο Ιεχωβά μπορίνελα τι κερέλ πιο μπουτ οντουλένταρ σο μανγκάσα ή οντουλένταρ σο μπεκλεντίνασα λέσταρ. Μερικές φορές μουκχέλα-αμέν πουταρντέ μόσαρ επειδή κερέλα οντουβά σο να μπεκλεντίνασα. Για τι ντικχάς κάποια παραδείγματα σο κα μπαριαρέν αμαρί εμπιστοσύνη κι δύναμη σο τθερέλα ο Ιεχωβά τι κερέλ αμένγκε οντουβά σο να μπεκλεντίνασα.

12. (α) Σο κερντάς ο βασιλιάς Εζεκίας όταν ο βασιλιάς Σενναχειρείμ νταραντάς-λες; (β) Σο σικλιάσα οντουλέσταρ σο κερντάς ο Ιεχωβά για τι λύνελ ο πρόβλημας;

¹² Κι Γραφή, αρακχάσα μπουτ παραδείγματα σο σικαβένα ότι ο Ιεχωβά κερέλα οντουβά σο να μπεκλεντίνασα. Για παράδειγμας, όταν ο Εζεκίας ισινέ βασιλιάς κο Ιούδας, ο Σενναχειρείμ, ο βασιλιάς της Ασσυρίας, τσσουντάς-πες κο Ιούδας ντα λιντάς σαρέ ο πόλεις, εκτός κατά Ιερουσαλήμ. (2 Βασιλέων 18:​1-3, 13) Σοράν, ο Σενναχειρείμ γκιλό τι λελ ι Ιερουσαλήμ. Σο κερντάς ο βασιλιάς Εζεκίας; Πρώτα προσευχισάλο κο Ιεχωβά για βοήθεια ντα μανγκλάς συμβουλή κατά προφήτης ι Ιεχωβάσκο, κατά Ησαΐας. (2 Βασιλέων 19:5, 15-20) Μετά, ο Εζεκίας σικαντάς ότι ισινέ γκοντιαβέρ ντα ντινάς κο Σενναχειρείμ ο πράγματα σο μανγκλάς. (2 Βασιλέων 18:​14, 15) Κο τέλος, ο Εζεκίας ετοιμαντάς ι πόλη ι τζενγκίσκε. (2 Χρονικών 32:​2-4) Καβά ισινέ ο αποτέλεσμας; Ο Ιεχωβά  μπουτσσαντάς εκχέ αγγελός για τι μουνταρέλ αντρέ σε εκ ιράτ 185.000 τζενέν κατά στρατός σο τθερέλας ο Σενναχειρείμ. Ούτε ο Εζεκίας να μπεσέλας τι αβέλ-πες κάτι ασακό!​—2 Βασιλέων 19:35.

13. (α) Σο σικλιάσα οντουλένταρ σο αβιλέ-πες κο Ιωσήφ; (β) Καβά πράγμας σο να μπεκλεντίνελας η Σάρρα αβιλό-πες λάκε;

¹³ Σκεφτίνεν σο αβιλό-πες κο τερνό Ιωσήφ. Όταν ισινέ αντρέ κι φυλακή κι Αίγυπτος, ο Ιωσήφ να κα μπορίνελας τι σκεφτίνελ ότι κα αβέλας ο πιο μπαρό αρχηγός κι Αίγυπτος μετά κατά Βασιλιάς ή ότι ο Ιεχωβά κα χρησιμοποιήνελας-λες για τι σώνελ λέσκι φαμιλί κατά μπαρί μποκχ. (Γένεση 40:​15· 41:​39-43· 50:​20) Ο Ιεχωβά σίγουρα κερντάς πιο μπουτ πράγματα σαρέ οντουλένταρ σο μπεσέλας ο Ιωσήφ. Σκεφτίνεν επίσης ι Σαρρά, σο ισινέ προγιαγιά του Ιωσήφ. Μπεκλεντίνελας η Σάρρα πι πφουριματέντε ότι ο Ιεχωβά κα μουκχέλας-λα τι κερέλ τσσαβές; Ανταβά νακχαντάς σαρέ ο πράγματα σο κα μπορίνελας τι σκεφτίνελ η Σάρρα.​—Γένεση 21:​1-3, 6, 7.

14. Καβά πράγμας ισινάμ σίγουροι ότι κα κερέλ ο Ιεχωβά;

¹⁴ Να μπεκλεντίνασα ότι ο Ιεχωβά κα κερέλ θαύματα για τι νασκιαρέλ σαρέ αμαρέ προβλήματα πριν τι αβέλ ο νεβό ντουνιάς.  Ούτε μανγκάσα λέσταρ τι κερέλ πράγματα σο κα μουκχέν-αμέν πουταρντέ μόσαρ. Αλλά τζανάσα ότι ο Ιεχωβά βοηθιντάς πι υπηρετόν κο πουρανέ μπρεσά με τρόπους σο να μπορίνενας τι σκεφτίνεν. Ντα να αλλαξάλο. (Διαβάνεν Ησαΐας 43:​10-13) Ανταβά βοηθίνελα-αμέν τι τθεράς εμπιστοσύνη λέστε. Μπορίνασα τι αβάς σίγουροι ότι κα ντελ-αμέν ι δύναμη σο χρειαζίντιβασα για τι κεράς λέσκο θέλημας. (2 Κορινθίους 4:​7-9) Σο σικλιάσα κατά Εζεκίας, κατά Ιωσήφ ντα κατά Σάρρα; Άμα κα ατσσάς πιστοί κο Ιεχωβά, βοβ κα βοηθίνελ-αμέν ατζέ-ντα όταν τθεράσα ο πιο μπαρέ δυσκολίες.

15. Σο κα βοηθίνελ-αμέν τι τθεράς ι «ειρήνη ι Ντεβλέσκι» ατζέ-ντα όταν νακχάσα προβλήματα, ντα σαρ μπορίνελα τι αβέλ-πες ανταβά;

¹⁵ Σαρ μπορίνασα τι τθεράς ι «ειρήνη ι Ντεβλέσκι» ατζέ-ντα όταν νακχάσα προβλήματα; Πρέπει τι ατσσικιαράς ζουρανί αμαρί φιλία ι Ιεχωβάσαρ. Μπορίνασα τι τθεράς εκ ασακί φιλία σάντε επειδή ο Ιησούς Χριστός ντινάς πι ζωή σαρ λύτρος αμένγκε. Ο λύτρος ισί εκ κατά μπουτ σουκάρ πράγματα σο κερντάς ο Ιεχωβά. Χάρη κο λύτρος, μπορίνελα τι συγχωρίνελ αμαρέ αμαρτίες ντα μπορίνασα αντικάς τι τθεράς πάκι συνείδηση ντα τι πλησιάνας-λες.​—Ιωάννης 14:6· Ιακώβου 4:8· 1 Πέτρου 3:21.

16. Σο κα αβέλ-πες όταν λάσα ι «ειρήνη ι Ντεβλέσκι»; Βακερέν εκ παράδειγμας.

¹⁶ Σο κα αβέλ-πες όταν λάσα ι “ειρήνη ι Ντεβλέσκι σο ισί πιο οπρέ σαρέ οντουλένταρ σο αγαβάσα”; Η Γραφή βακερέλα ότι ανταγιά ειρήνη κα “αρακχαβέλ” αμαρέ καρδιές ντα αμαρί γκοντί. (Φιλιππησίους 4:7) Η μπαλαμανί λέξη σο μανγκέλα τι βακερέλ «αρακχαβέλα» αζομάν χρησιμοποιήντιβελας ι στρατιωτένγκε σο τθερένας ι ευθύνη τι αρακχαβέν εκ πόλη. Ασακέ στρατιώτες αρακχαβένας ι τζενέν σο μπεσένας κο Φίλιπποι, ντα οντουλέσκε μπορίνενας τι σοβέν ήσυχοι ο τζενέ οτθέ. Αντικάς αμέν-ντα, όταν τθεράσα ι «ειρήνη ι Ντεβλέσκι», να ανησυχίνασα, οτθάρ αμαρέ καρδιές ντα αμαρί γκοντί μπορίνενα τι ξεκουράντιβεν. Τζανάσα ότι ο Ιεχωβά πφαμπόλα αμένγκε ντα μανγκέλα τι τθεράς επιτυχία. (1 Πέτρου 5:​10) Ανταβά αρακχαβέλα-αμέν για μα τι κχινιάς επειδή τθεράσα ανησυχίες ή επειδή χασαρντάμ αμαρό θάρρος.

17. Σο κα βοηθίνελ-αμέν τι τθεράς εμπιστοσύνη ι Ιεχωβάσκε όταν κα αβέλ η μπαρί στεναχώρια;

¹⁷ Ατζεχάνικ η μπαρί στεναχώρια κα αβέλ οπράλ σαρέ κο τζενέ. (Ματθαίος 24:​21, 22) Να τζανάσα σο ακριβώς κα αβέλ-πες κο κάθε εκ αμένταρ. Όμως, να χρειαζίντιβελα τι ανησυχίνας μπουτ οντουλένγκε σο κα αβέν-πες αζομάν. Παρόλο σο να τζανάσα σαρέ οντουλά σο κα κερέλ ο Ιεχωβά, τζανάσα αμαρέ Ντεβλές. Τζανάσα σο κερντάς κο πουρανέ μπρεσά πι πιστέ υπηρετόνγκε. Ντικχλάμ ότι, σο-ντα τι αβέλ, ο Ιεχωβά κα κερέλ σίγουρα οντουλά σο τθερέλα πι γκοντιάτε. Ντα μπορεί τι κερέλ-λες ανταβά με τρόπος σο να μπεκλεντίνασα! Άρα, κάθε φαρ σο κερέλα ο Ιεχωβά κάτι αμένγκε, ντικχάσα με εκ νεβό τρόπος ι “ειρήνη ι Ντεβλέσκι σο ισί πιο οπρέ σαρέ οντουλένταρ σο αγαβάσα”.