1, 2. Uga pendapat kalak kerna Saksi Jahwe?

MELALA kalak si ngataken maka Saksi Jahwe e la bagi kalak si deban. Contohna, lit sekalak penulis gelarna Anton Gill si muji Saksi Jahwe i Nazi, Jerman. Nina, ”Kejam kel Nazi man Saksi Jahwe. . . . Bas tahun 1939 lit 6.000 si itama bas [kamp konsentrasi].” Ikatakenna ka maka amin gia seh kel tersiksana kalak e, tapi itandai ia selaku kalak si banci iteki, la nggit ngelawan, setia man Dibatana, janah ersada.

² Mbaru-mbaru enda, iperdiateken kalak bas Afrika Selatan maka lit si beda bas Saksi Jahwe. Mbarenda, Saksi si la seri rupana la banci bebas radu ras pulung. Tapi, bas wari Minggu, 18 Desember 2011, lebih 78.000 Saksi si pulung i stadion si mbelangna i Johannesburg. Kalak e reh bas erbage-bage suku i Afrika Selatan ras kota-kota si ndeher i je. Nina sekalak manajer, ”Lenga pernah kuidah kalak si pulung bage ulina. Mejile kel peruisna. Janah bersih kel banna stadion e. Tapi si mantapna kel kuakap, erbage-bage suku kena kerina.”

3. Engkai maka la lit persadan si seri ras persadanta?

³ Jelma si nterem pe banci idahna maka la lit persadan si seri bagi persadan Saksi Jahwe. (1 Petrus 5:​9.) Engkai maka organisasinta la seri ras organisasi si deban? Perban kita erjuang ngubah sifatta gelah sentudu ras peraten Jahwe. Enda banci silakoken perban penampat kesah si badia ras Pustaka. Emaka banci ’sitangtangi manusia si male’, janah sipake ”manusia si mbaru”.​—Kolose 3:​9, 10.

4. Kai kari sibahas? Engkai maka perlu sibahas?

⁴ Kenca nggo sitangtangi manusia si male, eme kerina perbahanen ras kebiasan si salah, ulanai pernah sipake. Bas pembahasen enda, sipelajari kari ngkai maka perlu sitangtangi manusia si male ras uga carana. Siidah ka uga kalak si mekelek pe salahna banci robah. Sibahas ka kari uga carana gelah kalak si nggo ndekah bas kebenaren lanai ipakena manusia si male. Engkai maka perlu sibahas enda? Seh kel sayangna, lit piga-piga si nggo ngelayani Jahwe la ia metenget. Dungna, perukuren ras perbahanenna mulihi ka bagi paksa ia lenga nandai Jahwe. Emaka, kita sekalak-sekalak arus ngukuri persinget enda, ”Kalak si erpengakap maka ia nteguh pertedisna, ulin me ia metenget gelah ola ia guling.”​—1 Korinti 10:12.

5. (a) Bereken anding-andingenna ngkai maka arus mis sitangtangi manusia si male. (Nen gambar pemena artikel.) (b) Kai saja si termasuk manusia si male bagi si ituriken Kolose 3:5-9

⁵ Kai si ilakokenndu adi melket janah mbau uisndu? Pasti mis itangtangindu. Bage ka pe, adi sieteh perbahanenta la ngena ate Jahwe, arus mis siperobahi. Sentudu ras kai si ikataken Paulus, ”Ambekkenlah kerina si bage rupa.” Mari sinen dua contohna: ersada kula ntah pe erhubungen seks ras kalak si labo teman geluhna bage pe lagu langkah si melket.​—Oge Kolose 3:​5-9.

6, 7. (a) Arah kata-kata Paulus, kai buktina perlu usaha i bas nangtangi manusia si male? (b) Tangtangna uga kegeluhen Sakura? Engkai maka banci ia robah?

⁶ Erhubungen seks ras kalak si labo teman geluhna. Nina Paulus arus ’ibunuh’ kalak Kristen ”biak-biak doni si la mehuli” si lit hubungenna ras seks si salah. Enda mbuktiken maka arus tuhu-tuhu kita erjuang ngambekken kerina sura-sura si salah. Memang mesera, tapi banci silakoken!

⁷ Buktina banci siidah arah pengalamen turang seninanta Sakura, bas Jepang nari. * (Nen keterangen tambahen.) Asum Sakura reh belinna, melungen janah megogo atena rusur. Gelah lanai akapna melungen, erhubungen seks ia mulai kenca umurna 15 tahun. Erhubungen seks ia ras piga-piga dilaki janah lit telu kali igugurkenna kandungenna. Nina, ”Tangtangna, meriah kuakap erhubungen seks, perban iperluken kalak kuakap aku janah lit si ngkelengi aku. Tapi, reh rusurna kulakoken si e, reh biarna aku.” Enda idalani Sakura seh ngasa umurna 23 tahun. Dungna, jumpa ia ras Saksi Jahwe janah meriah kel ukurna erlajar Pustaka. Alu penampat Jahwe banci ipengadina lagu langkahna si la mehuli e janah lanai isalahkenna bana ras lanai mela akapna. Gundari, nggo jadi perintis biasa ia, janah lanai melungen akapna. Nina ka, ”Meriah kel ukurku banci nggejapken kekelengen Jahwe tep-tep wari.”

8. Kai saja perbahanen si banci erban kita melket i adepen Jahwe?

⁸ Lagu langkah si melket. I bas Pustaka, lagu langkah si melket labo saja ngertiken erhubungen seks ras si labo teman geluhna. Enda pe termasuk ngisap ras erjagar-jagar si la mehuli. (2 Korinti 7:1; Epesus 5:3, 4) Bage pe perbahanen si ilakoken alu erbuni-buni, bagi mbaca buku si mpeturah perukuren si salah ras nonton porno. Perbahanen enda ndai banci erban kalak dungna ngelakoken masturbasi, ntah pe ndatken kepuasen seks tapi labo arah erhubungen seks. (Kolose 3:5) *—Nen keterangen tambahen.

9. Kai akibatna adi sekalak jelma lanai terkuasaisa ’peraten dagingna’?

⁹ Kalak si rusur nonton porno, dungna lanai terkuasaisa ’peraten dagingna’ janah seks saja ngenca si iukurina. Nina peneliti, kalak si candu ngenen porno bali ras kalak si candu minem-minem ras make narkoba. Emaka la ateta mamang, melala kel bahayana adi kalak nggo candu ngenen porno. Enda termasuk perasan mela, lanai tutus erdahin, keluargana la ermeriah ukur, sirang ras teman geluh, si parahna, lit ka si bunuh diri. Kenca setahun ngadi ngenen porno, nina sekalak dilaki, ”Dungna, nggo merga kuakap bangku.”

10. Kai si ilakoken Ribeiro gelah banci mpengadi kebiasan nonton porno?

¹⁰ Mesera kel iakap piga-piga kalak mpengadi kebiasan nonton porno. Tapi labo ertina la banci ipengadi. Contohna Ribeiro, Brasil nari. Paksa ia erlajar anak perana, lawes ia rumah nari janah erdahin i bas pabrik kertas bekas. I je idatna majalah porno. Nina Ribeiro, ”Dungna, nggo candu aku. Ban canduna, lanai tertahanku la nonton film porno. Tetap aku nonton amin gia i je denga rondongku si sada rumah ras aku.” I bas sada wari bas inganna erdahin, datna sada buku si judulna Rahasia Kebahagiaan Keluarga bas buku-buku bekas. Ibuatna ras iogena. Dungna, nggit ia erlajar ras Saksi Jahwe. Tapi melala si arus ilakokenna guna mpengadi kebiasanna nonton porno. Jadi, kai si erban ia berhasil? Iturikenna, ”Alu ertoto, mpelajari Pustaka, ngukuri si kupelajari, dungna reh bagesna kutandai Jahwe, janah kekelengenku man baNa banci naluken sura-surangku nonton porno.” Payo, alu penampat Pustaka ras kesah si badia, banci iubah Ribeiro kegeluhenna, kenca e iperidiken ia janah gundari ngelayani selaku pertua bas runggun.

11. Uga carana gelah bebas arah pornografi?

¹¹ Adi siperdiateken arah pengalamen Ribeiro ndai, gelah banci mpengadi kebiasan nonton porno, lit si perlu ilakokenna selain erlajar Pustaka. Arus iukurina alu mbages kai si ipelajarina e gelah kena ku pusuhna. Ertoto ka ia man Jahwe mindo penampat. Kekelengen Ribeiro man Dibata pe reh bagesna. Ban bagesna, kekelengenna e banci naluken sura-surana nonton porno. Kita pe banci bebas arah pornografi adi tuhu-tuhu keleng ateta Jahwe janah ciga ateta si salah.—Oge Masmur 97:10.

12. Kai si erban Stephen lanai menukah merawa ras lanai kasar?

¹² Lit kalak si menukah kel merawa, kasar cakapna, ras nggit ngisak-ngisakken kalak. Sifat si bagenda erban mbue masalah bas keluarga. Sekalak perbapan Australia nari si gelarna Stephen, mbarenda menukah kel ia merawa janah nggit ngisakken. Nina, ”Enggo telu kali aku ranggung janah gundari menam sirang ras ndeharangku.” Kenca si e, erlajar Pustaka kalak enda ras Saksi Jahwe, janah idalanken Stephen kai si ipelajarina. Ikataken Stephen, ope lenga itandaina Jahwe, mis ia merawa adi lit kenca si la bagi ukurna, tempa-tempa bagi bom si nukah meledak. Tapi kenca idalankenna pedah Pustaka, reh ulina ia. Ikatakenna ka, ”Nggo berubah kel keadan keluarga kami. Alu penampat Jahwe, nggo jadi kalak si tenang aku ras nggit erdame.” Gundari, Stephen nggo jadi si nampati perpulungen janah ndeharana nggo jadi perintis piga-piga tahun enda. Nina pertua-pertua bas runggunna, ”Stephen ah tenang kel kalakna, rajin, ras meteruk ukur kel.” Ikataken kalak e ka, la pernah idahna Stephen merawa. Tapi ieteh Stephen maka labo gegehna si erban ia berubah. Nina, ”Banci kudat kerina pasu-pasu e perban isampati Jahwe aku ngubah sifat-sifatku.”

13. Engkai maka sifat merawa banci erban bahaya? Ipersingeti Pustaka kita gelah ula ngelakoken kai?

¹³ Ipersingeti Pustaka kita gelah ula nukah merawa, ngerana alu cakap si kasar, ras ngisak-ngisakken kalak. (Epesus 4:​31) Adi siusur-usur, dungna nggit kita ncilakai kalak. Bas jaman gundari, kalak si menukah merawa ras kasar nggo ianggap biasa. Tapi perbahanen si bage situhuna banci ncedai gelar Jahwe. Enterem turang seninanta nggo berubah janah ipakena manusia si mbaru.—Oge Masmur 37:​8-​11.

14. Banci nge kalak si kasar jadi kalak si lembut?

¹⁴ Lit sekalak turang seninanta gelarna Hans. Ia ngelayani selaku pertua bas runggun i Austria. Nina koordinator pertua bas runggunna, ”La pernah aku jumpa bagi senina Hans lembutna.” Tapi, labo mbarenda nari Hans lembut. Paksa erlajar anak perana, nggo mulai Hans minem-minem janah jadi kalak si kasar. Bas sada wari, mabuk ia janah merawa kel ia ras ibunuhna rondongna. Iukum ia 20 tahun penjara, tapi e pe la ia robah. Ipindoken nandena gelah sekalak pertua ndahi ia. Hans pe nggit erlajar Pustaka. Nina, ”Erjuang kel aku ngubah sifat-sifatku si la mehuli. Piga-piga ayat si mpegegehi aku eme Jesaya 55:​7, si ngataken, ’Itadingken kalak jahatlah dalinna,’ ras 1 Korinti 6:​11 si ngataken maka lit piga-piga kalak si nggo banci nadingken perbahanenna si salah. I je nina, ’Nai lit piga-piga kalak i bas kam si bage.’ Perban kesabaren Jahwe sedekah ertahun-tahun enda, ras penampat si iberekenNa arah kesahNa si badia, banci kupake manusia si mbaru.” Dungna, iperidiken me Hans bas penjara, janah 17 tahun setengah kenca e ibebasken ia. Nina, ”Bujur kel ningku perban nggo ialemi Jahwe aku janah icidahkenNa perkuah ateNa si simpar.”

15. Kai deba nari bagin i bas manusia si male? Kai si ikataken Pustaka kerna si e?

¹⁵ Erbual pe bagin i bas manusia si male. Contohna, melala kalak erbual gelah ula nggalar pajak ntah pe gelah ngelakken ukumen. Tapi Jahwe, Dibata si la pernah erbual. (Heber 6:18) Emaka ateNa gelah kerina si nembah Ia pe ”nuriken si tuhu-tuhu” ras ”ola perguak”. (Epesus 4:25; Kolose 3:9) Jelas me, arus sikataken kai si benar amin gia mesera ntah pe banci erban kita mela.​—Kuan-kuanen 6:16-19.

16. Kai saja si banci nampati kita nangtangi manusia si male?

¹⁶ Nangtangi manusia si male banci nge silakoken, tapi labo alu gegehta. Sakura, Ribeiro, Stephen, ras Hans arus erjuang nadingken kegeluhenna si ndekah. Si nampati kalak enda eme gegeh bas Kata Dibata ras kesahNa si badia. (Lukas 11:13; Heber 4:​12) Gelah banci sidat gegeh e, arus sioge Pustaka tiap wari, siukuri, janah ertoto mindo kepentaren ras gegeh guna ndalankenca. (Josua 1:8; Masmur 119:97; 1 Tesalonika 5:​17) Banci ka sidat manfaat arah Kata Dibata ras kesahNa si badia alu nikapken bahan perpulungen janah reh ku perpulungen. (Heber 10:​24, 25) Melala kel penampat si ibereken organisasi si banci sigunaken misalna, oge-ogen, JW Broadcasting, JW Library, ras jw.org.—Lukas 12:42.

17. Kai si man bahasenta bas artikel si reh?

¹⁷ Enggo sibahas perbahanen salah si arus itangtangi kalak Kristen ras cara nadingkenca guna erban meriah ukur Jahwe. Tapi enda lenga bias. Arus sipake manusia si mbaru janah terus sipake segedang geluhta. Bas artikel si reh sibahas uga ngelakokenca.