ဘ့ၣ်လီၤကွံာ် နီၢ်လီၢ်လံၤဒီး သိးထီၣ်အီၤလၢၤတဂ့ၤ
“ပှၤလီၢ်လံၤဒီးအတၢ်မၤတဖၣ်န့ၣ်, သုဘ့ၣ်လီၤကွံာ်လံ.” —ကလီးစဲ ၃:၉.
၁, ၂. ပှၤအဂၤတဖၣ် ထံၣ်ဝဲယဟိဝၤပှၤအုၣ်အသးဒ်လဲၣ်.
ပှၤအါဂၤသ့ၣ်ညါဝဲလၢ ယဟိဝၤပှၤအုၣ်အသးတဖၣ်န့ၣ် လီၤဆီဒီးပှၤအဂၤတဖၣ်လီၤ. အဒိ, ပှၤကွဲးလံာ်ဖိ အဲထီၤ ကၠ့လ် စံးပတြၢၤဝဲ ယဟိဝၤပှၤအုၣ်အသးတဖၣ်လၢ အအိၣ်မူလၢနၣ်စံၢ် ကၠၢမနံၣ်အစိၤန့ၣ်လီၤ. အဝဲကွဲးဝဲလၢ– “ယဟိဝၤပှၤအုၣ်အသးတဖၣ် နၣ်စံၢ်မၤအၢမၤနးအဝဲသ့ၣ် ဒီးဖဲ ၁၉၃၉ နံၣ်န့ၣ် ယဟိဝၤပှၤအုၣ်အသးအဂၤ ၆,၀၀၀ ဘၣ်အိၣ်လၢ ဃိာ် [concentration camps] အပူၤလီၤ.” ဒီးအဝဲတဲကဒီးဝဲလၢ ယဟိဝၤပှၤအုၣ်အသးတဖၣ် ထံၣ်ဘၣ်တၢ်နးတၢ်ဖှီၣ်ဘၣ်ဆၣ် ဘၣ်တၢ်သ့ၣ်ညါအီၤလၢ အဝဲသ့ၣ်မ့ၢ်ပှၤလၢ ပှၤနာ်န့ၢ်အီၤသ့, အိၣ်ခုၣ်ခုၣ်မုာ်မုာ်, တီဒီးအယွၤ ဒီးအိၣ်ဃူဃူဖိးဖိးလီၤ.
၂ လၢအပူၤကွံာ် ပှၤလၢအအိၣ်လၢ ကီၢ်အၤဖြံၤကၤ ကလံၤထံးတဖၣ် ထံၣ်ဘၣ်ဝဲလၢ ယဟိၤဝၤပှၤအုၣ်အသးတဖၣ်န့ၣ် လီၤဆီန့ၢ်ဒံးပှၤအဂၤတဖၣ်လီၤ. လၢညါလၢကီၢ်အၤဖြံၤကၤအပူၤန့ၣ် ယဟိဝၤပှၤအုၣ်အသးလၢ အဖံးအလွဲၢ်တဒ်သိးလိာ်အသးတဖၣ် ထီၣ်တၢ်အိၣ်ဖှိၣ်ရိဖှိၣ် ဒ်သိးသိးတန့ၢ်ဘၣ်. ဘၣ်ဆၣ် ဖဲ ၂၀၁၁ လါဒံၣ်စ့ဘၢၣ် ၁၈ သီအိၣ်ဘှံးနံၤန့ၣ် ယဟိဝၤပှၤအုၣ်အသးအဂၤ ၇၈,၀၀၀ ဘျဲၣ် လဲၤထီၣ်ဝဲတၢ်အိၣ်ဖှိၣ်ဖးဒိၣ်လၢ ဝ့ၢ်ကၠီးဟါနၤစဘၢၣ်လီၤ. ပှၤသ့ၣ်တဖၣ်န့ၣ် အကလုာ်ဒူၣ်တဒ်သိးလိာ်အသးဘၣ် ဒီး
အိၣ်ဟဲလၢထံကီၢ်အါဘ့ၣ်လီၤ. ပှၤလၢအကွၢ်ထွဲ ပှၤမၤတၢ်အိၣ်ဖှိၣ်ဖးဒိၣ်အလီၢ် လၢအတမ့ၢ်ယဟိဝၤပှၤအုၣ်အသးတဂၤ တဲဝဲလၢ– “ကမျၢၢ်ဖးဒိၣ်လၢ အအိၣ်ဒီးတၢ်ဃူတၢ်ဖိး ထဲအံၤန့ၣ် ယတထံၣ်ဘၣ်နီတဘျီဘၣ်. ဒီးအဝဲသ့ၣ်ခဲလၢာ် ကူကၤဝဲသညူးသပှၢ် ဒီးသုမၤကဆှဲကဆှီ ပတၢ်လီၢ်တၢ်ကျဲ ပျီဒိၣ်မးလီၤ. ဘၣ်ဆၣ်တၢ်လၢအလီၤဆီဒိၣ်ကတၢၢ်န့ၣ် သုအိၣ်ဒီးကလုာ်ဒူၣ်အကလုာ်ကလုာ်လီၤ.”၃. ဘၣ်မနုၤအဃိ ပတၢ်ကရၢကရိလီၤဆီဒီး တၢ်ကရၢကရိအဂၤလဲၣ်.
၃ ပှၤလၢအတမ့ၢ် ယဟိဝၤပှၤအုၣ်အသးဒၣ်လဲာ် အဝဲသ့ၣ်ထံၣ်ဝဲလၢ ပတၢ်ကရၢကရိ လီၤဆီဒီး တၢ်ကရၢကရိအဂၤတဖၣ်လီၤ. (၁ ပ့းတရူး ၅:၉ ) ဘၣ်မနုၤအဃိ ပလီၤဆီဒီး တၢ်ကရၢကရိအဂၤတဖၣ်လဲၣ်. မ့ၢ်လၢယွၤအကလုၢ်ကထါ ဒီးသးစီဆှံတၢ်မၤစၢၤအဃိ ပဂုာ်ကျဲးစၢးဆီတလဲ ပတၢ်အိၣ်မူ ဒီးဂုာ်ကျဲးစၢးအိၣ်မူဒ် ယွၤအတၢ်ဘၣ်သးအသိးလီၤ. ပမၤဒ်အံၤန့ၣ်မ့ၢ်ဒၣ်ပ “ဘ့ၣ်လီၤကွံာ်” ပှၤလီၢ်လံၤဒီးပကူထီၣ်သိးထီၣ်က့ၤ “ပှၤသီ” လီၤ.—ကလီးစဲ ၃:၉, ၁၀.
ပှၤတဂၤအတၢ်အိၣ်မူ မ့ၢ်အၢထဲလဲၣ်သနာ်က့ အဝဲဆီတလဲအတၢ်အိၣ်မူသ့ဝဲလီၤ
၄. လၢတၢ်မၤလိအံၤအပူၤ ပကမၤလိသကိးတၢ်ဂ့ၢ်မနုၤလဲၣ်, ဒီးဘၣ်မနုၤအဃိလဲၣ်.
၄ ပဘ့ၣ်လီၤကွံာ်နီၢ်လီၢ်လံၤမ့ၢ်ဝံၤန့ၣ် ပတဘၣ်သိးထီၣ်က့ၤအီၤလၢၤဘၣ်. လၢတၢ်မၤလိအံၤအပူၤ ပကမၤလိဘၣ်လၢ ပဘ့ၣ်လီၤကွံာ် ပနီၢ်လီၢ်လံၤကသ့ဒ်လဲၣ်. ဒီးဘၣ်မနုၤအဃိ အရ့ဒိၣ်လၢပကဘၣ် ဘ့ၣ်လီၤကွံာ်အီၤလဲၣ်. ပကထံၣ်ဘၣ်လၢ ပှၤတဂၤအတၢ်အိၣ်မူ မ့ၢ်အၢထဲလဲၣ်သနာ်က့ အဝဲဆီတလဲအတၢ်အိၣ်မူသ့ဝဲလီၤ. ဒီးပကမၤလိဘၣ်စ့ၢ်ကီး ပှၤလၢအအိၣ်လၢ တၢ်မ့ၢ်တၢ်တီအပူၤလၢ အနံၣ်ဖးယံာ်တဖၣ်စ့ၢ်ကီး ဒ်သိးအသုတက့ၤသိးထီၣ်ကဒါက့ၤ အနီၢ်လီၢ်လံၤလၢၤတဂ့ၤအဂီၢ် ကဘၣ်မၤဝဲဒ်လဲၣ်. ဘၣ်မနုၤအဃိ ပကဘၣ်တဲသကိး တၢ်ဂ့ၢ်တဖၣ်အံၤလဲၣ်. လီၤသးအုးဒိၣ်မးလၢ ပှၤလၢအမၤယဟိဝၤယွၤ အတၢ်မၤတနီၤန့ၣ် တပလီၢ်အသးဘၣ်အဃိ က့ၤကူထီၣ်သိးထီၣ်က့ၤဝဲ အနီၢ်လီၢ်လံၤန့ၣ်လီၤ. ပဝဲတဂၤစုာ်စုာ် ပကဘၣ်သ့ၣ်နီၣ်ထီၣ် တၢ်ဟ့ၣ်ပလီၢ်လၢအမ့ၢ်– “ပှၤလၢအဆိကမိၣ်လၢ အအိၣ်ဆၢထၢၣ်န့ၣ်, ဒ်သိးအသုတလီၤဃံၤတဂ့ၤဒီး, မ်အပလီၢ်အသးတက့ၢ်.”—၁ ကရံၣ်သူး ၁၀:၁၂.
ထုးထီၣ်ကွံာ် တၢ်သးကတၢလၢ အတဂ့ၤတဘၣ်တဖၣ်တက့ၢ်
၅. (က) ဘၣ်မနုၤအဃိ အရ့ဒိၣ်လၢ ပကဘၣ်ဘ့ၣ်လီၤကွံာ် ပနီၢ်လီၢ်လံၤလဲၣ်, ဟ့ၣ်တၢ်အဒိတက့ၢ်. (ကွၢ်တၢ်ဂီၤလၢ တၢ်မၤလိ အခီၣ်ထံးတက့ၢ်.) (ခ) ကလီးစဲ ၃:၅-၉ ပာ်ဖျါထီၣ်ဝဲလၢ လုၢ်လၢ်သကဲာ်ပဝးလၢ အဘၣ်ဃးဒီး ပနီၢ်လီၢ်လံၤန့ၣ် မ့ၢ်တၢ်မနုၤတဖၣ်လဲၣ်.
၅ နမ့ၢ်သ့ၣ်ညါလၢ နဆ့ကၤဘၣ်အၢဒီး နၢတမုာ်ဘၣ်န့ၣ် နကမၤဒ်လဲၣ်. နကအဲၣ်ဒိးဘ့ၣ်လီၤကွံာ်အီၤ တဘျီဃီလီၤ. ဒ်န့ၣ်အသိး ပမ့ၢ်သ့ၣ်ညါလၢ ပမၤဘၣ်တၢ်လၢ ယဟိဝၤယွၤသးဟ့ဝဲန့ၣ် ပကဘၣ်ဆီတလဲပသး လၢအဆိအချ့လီၤ. ဘၣ်ဃးဒီး တၢ်မၤတၢ်လၢအတဂ့ၤတဖၣ်န့ၣ် စီၤပီလူးတဲဝဲလၢ– “ညိကွံာ်တၢ်အံၤတဖၣ်ခဲလၢာ်” တက့ၢ်. ပကတဲသကိးတၢ်ဂ့ၢ်ခံခါ လၢအမ့ၢ် တၢ်မၤကမၣ်မုၣ်ကမၣ်ခွါ ဒီးတၢ်လၢအတကဆှီဘၣ်န့ၣ်လီၤ.—ဖး ကလီးစဲ ၃:၅-၉ တက့ၢ်.
၆, ၇. (က) ဒ်သိးပဘ့ၣ်လီၤကွံာ် ပနီၢ်လီၢ်လံၤကန့ၢ်အဂီၢ် ပကဘၣ်ထဲးဂံၢ်ထဲးဘါန့ၣ် စီၤပီလူး အတၢ်ကတိၤ ပာ်ဖျါထီၣ်ဝဲဒ်လဲၣ်. (ခ) စၤခူရၤ အတၢ်အိၣ်မူလၢညါန့ၣ် မၤသးဒ်လဲၣ်, ဒီးဒ်သိးအဝဲကဆီတလဲ အတၢ်အိၣ်မူအဂီၢ် တၢ်မနုၤမၤစၢၤအီၤလဲၣ်.
၆ တၢ်မၤကမၣ်မုၣ်ကမၣ်ခွါ. လၢလံာ်စီဆှံအပူၤ တၢ်ကတိၤလၢအမ့ၢ် “တၢ်မၤကမၣ်မုၣ်ကမၣ်ခွါ” အခီပညီမ့ၢ်ဝဲ ပိာ်မုၣ်ဒီးပိာ်ခွါခံဂၤ မံဃုာ်လိာ်အသးဖဲ တဖျီအသးဒ် ပဒိၣ်တၢ်သိၣ်တၢ်သီ အိၣ်ဝဲအသိးဘၣ်န့ၣ်လီၤ. စီၤပီလူးတဲဝဲ ခရံာ်ဖိတဖၣ်လၢ “မၤသံသုဂီၤ” လၢအကဒုးအိၣ်ထီၣ် တၢ်မၤကမၣ်မုၣ်ကမၣ်ခွါန့ၣ်တက့ၢ်. စီၤပီလူးအတၢ်ကတိၤအံၤ အဲၣ်ဒိးစံးဝဲ ပကဘၣ်ဂုာ်ကျဲးစၢးဆူၣ်ဆူၣ် ဒ်သိးပကထုးထီၣ်ကွံာ် ပတၢ်သူၣ်လီသးကွံလၢ အတဂ့ၤတဖၣ်န့ၣ်လီၤ. ပကမၤဒ်အံၤအဂီၢ်
တမ့ၢ်တၢ်လၢအညီထီဘိဘၣ် ဘၣ်ဆၣ် ပမၤနၢၤအီၤန့ၢ်ဝဲလီၤ.၇ ပကတဲသကိး ဒီပုၢ်ဝဲၢ်မုၣ် စၤခူရၤ လၢအအိၣ်လၢ ကီၢ်ယပၣ်တဂၤ အတၢ်လဲၤခီဖျိလီၤ. * (ကွၢ်တၢ်ဂ့ၢ်အဘျဲၣ်တက့ၢ်.) ဖဲ စၤခူရၤ ဒိၣ်ထီၣ်သီအခါ အဝဲတူၢ်ဘၣ်ဝဲလၢ အအိၣ်သယုၢ်သညိထဲတဂၤအဃိ အသးအုးဝဲဒိၣ်မးလီၤ. ဒ်သိးအတၢ်သယုၢ်သညိတဖၣ် ကလီၤမၢ်အဂီၢ် ဖဲအဝဲအိၣ် ၁၅ နံၣ်အခါ အဝဲစးထီၣ်မၤ တၢ်မၤကမၣ်မုၣ်ကမၣ်ခွါလီၤ. မ့ၢ်လၢအဝဲမံဃုာ်ဒီး ပှၤအါဂၤအဃိ အဝဲဘၣ်မၤလီၤတဲာ်အဖိ သၢဒၢညါ. အဝဲတဲဝဲ– “လၢအခီၣ်ထံးန့ၣ် ယဒိးန့ၢ်ဘၣ်တၢ်သူၣ်မံသးမုာ် ဒီးယတူၢ်ဘၣ်လၢ ယလုၢ်ယပှ့ၤအိၣ်လီၤ. ဘၣ်ဆၣ် ယမၤကမၣ်မုၣ်ကမၣ်ခွါဒံးအါထီၣ် ဒီးယတၢ်သူၣ်ခုသးခုတအိၣ်လၢၤဘၣ်.” အဝဲအိၣ်မူဝဲဒ်အံၤတုၤလၢ အသးအိၣ် ၂၃ နံၣ်လီၤ. ဒီးလၢခံအဝဲစးထီၣ်မၤလိလံာ်စီဆှံ ဒီးယဟိဝၤပှၤအုၣ်အသး ဒီးအဝဲဘၣ်သူၣ်ဘၣ်သးဝဲ တၢ်လၢအမၤလိဘၣ်ဝဲတဖၣ်န့ၣ်လီၤ. ယဟိဝၤယွၤမၤစၢၤအီၤဒ်သိး အဝဲကပာ်တ့ၢ်ကွံာ် တၢ်မၤကမၣ်မုၣ်ကမၣ်ခွါ တကးဒံးဘၣ် ယဟိဝၤယွၤမၤစၢၤအီၤဒ်သိး အသုးတမဲာ်ဆှးဒီး တူၢ်ဘၣ်လၢအအိၣ် ဒီးတၢ်ကမၣ်တဂ့ၤအဂီၢ်လီၤ. ခဲအံၤ စၤခူရၤမၤပှၤလဲၤလၢညါ ဒီးအဝဲတတူၢ်ဘၣ်လၢ အအိၣ်သယုၢ်သညိလၢၤဘၣ်. အဝဲတဲဝဲလၢ– “ကိးနံၤဒဲး ယအိၣ်ဘၣ်လၢ ယဟိဝၤယွၤ အတၢ်အဲၣ်ကဒုဖီလာ်အဃိ ယသူၣ်ခုသးခုနီၢ်နီၢ်လီၤ.”
ပာ်တ့ၢ်ကွံာ် တၢ်လၢအတကဆှီဘၣ်တဖၣ်တက့ၢ်
၈. လုၢ်လၢ်လၢ ယဟိဝၤယွၤထံၣ်ဝဲလၢ အတကဆှီဘၣ်တဖၣ်န့ၣ် မ့ၢ်မနုၤလဲၣ်.
၈ တၢ်တကဆှီဘၣ်. လၢလံာ်စီဆှံအပူၤ တၢ်ကတိၤလၢအမ့ၢ် “တၢ်တကဆှီဘၣ်” န့ၣ် တမ့ၢ်ထဲတၢ်မၤကမၣ်မုၣ်ကမၣ်ခွါတခါဘၣ်. အဲၣ်ဒိးစံးစ့ၢ်ကီးဝဲ လုၢ်လၢ်အဂၤဒ်သိးဒီး တၢ်အီမိာ်ဒီး တၢ်တဲလီၤနံၤတၢ်လၢ အဘၣ်အၢဘၣ်သီတဖၣ်န့ၣ်လီၤ. (၂ ကရံၣ်သူး ၇:၁; အ့းဖ့းစူး ၅:၃, ၄) တကးဒံးဘၣ် အဲၣ်ဒိးစံးစ့ၢ်ကီးဝဲ တၢ်တဂ့ၤတဘၣ်လၢ ပှၤမၤခူသူၣ်ဝဲဒ်သိးဒီး တၢ်ဖးလံာ်လဲၢ်လၢ အဒုးအိၣ်ထီၣ်တၢ်သးကတၢ မ့တမ့ၢ် တၢ်ကွၢ်တၢ်ဂီၤဘ့ၣ်ဆ့န့ၣ်လီၤ. တၢ်သ့ၣ်တဖၣ်အံၤ ထိၣ်ဟူးထိၣ်ဂဲၤထီၣ်ပှၤလၢ ပကမၤဘၣ်တၢ်လၢ တကဆှီဘၣ်ဒ်သိးဒီး တၢ်ဖူးလဲးနီၢ်ကစၢ်မုၣ်ခွါက့ၢ်ဂီၤလၢ တၢ်သးကတၢအပူၤန့ၣ်လီၤ. (ကလီးစဲ ၃:၅) *—ကွၢ်တၢ်ဂ့ၢ်အဘျဲၣ်တက့ၢ်.
၉. ပှၤတဂၤ မ့ၢ်တမၤလီၤမၢ်ကွံာ်အ “တၢ်သးကတၢ” လၢအတကြၢးတဘၣ်န့ၣ် တၢ်ကကဲထီၣ်အသးဒီးအီၤဒ်လဲၣ်.
၉ ပှၤလၢအညီနုၢ်ကွၢ် တၢ်ဂီၤဘ့ၣ်ဆ့န့ၣ် ဒုးအိၣ်ထီၣ်ဝဲ “တၢ်သးကတၢ” ဒီးကဲထီၣ်ပှၤလၢအသးကွံထဲ တၢ်မံဃုာ်အိၣ်ဃုာ်န့ၣ်လီၤ. ပှၤဃုသ့ၣ်ညါတၢ်တဖၣ် ပာ်ဖျါထီၣ်ဝဲလၢ တၢ်စွဲတၢ်ကွၢ်တၢ်ဂီၤဘ့ၣ်ဆ့န့ၣ် လီၤဂာ်ဒ်သိး တၢ်စွဲသံး မ့တမ့ၢ် ကသံၣ်မူၤဘှီးန့ၣ်လီၤ. နမ့ၢ်စွဲတၢ်ကွၢ်တၢ်ဂီၤဘ့ၣ်ဆ့န့ၣ် ကမၤဘၣ်ဒိနၤဒိၣ်မးလီၤ. ပှၤလၢအစွဲတၢ်ကွၢ်တၢ်ဂီၤဘ့ၣ်ဆ့န့ၣ် အဝဲသ့ၣ် သးဘၣ်အၢလီၤအသး, တသးစၢၢ်ဆၢအတၢ်မၤအါအါလၢၤဘၣ်, တအိၣ်ဒီးဟံၣ်မုာ်ဃီပၢၤဘၣ်, မၤကတၢၢ်ကွံာ်အတၢ်ဆီဟံၣ်ဆီဃီ ဒီးတုၤဒၣ်လဲာ် မၤသံလီၤအသးသ့ဝဲလီၤ. ပိာ်ခွါတဂၤတဲဝဲလၢ အဝဲပာ်ပတုာ်ကွံာ် တၢ်ကွၢ်တၢ်ဂီၤဘ့ၣ်ဆ့ ကအိၣ်တနံၣ်ဝံၤမး အဝဲပာ်လုၢ်ပာ်ပှ့ၤလီၤက့ၤအသးန့ၢ်ဝဲလီၤ.
၁၀. ရံၤဘ့ရိၤ ပာ်ပတုာ်ကွံာ်ဝဲတၢ်ကွၢ်တၢ်ဂီၤဘ့ၣ်ဆ့ န့ၢ်လၢကျဲဒ်လဲၣ်.
၁၀ ပှၤတနီၤနီၤန့ၣ် ကဟးဆှဲးတၢ်ကွၢ်တၢ်ဂီၤဘ့ၣ်ဆ့အဂီၢ် တညီလၢအဝဲသ့ၣ်အဂီၢ်ဘၣ်. ဘၣ်ဆၣ်ပမၤနၢၤကွံာ် လုၢ်လၢ်အံၤသ့ဝဲလီၤ. ပကတဲသကိး ဒီပုၢ်ဝဲၢ်လၢ အအိၣ်လၢ ကီၢ်ဘြၣ်စ့(လ်) လၢအမံၤမ့ၢ် ရံၤဘ့ရိၤ အဂ့ၢ်လီၤ. ဖဲအဝဲအသးစၢ်ဒံးအခါ စံၣ်လီၤလၢဟံၣ်ပူၤ ဒီးလဲၤမၤတၢ်လၢ ပှၤမၤဟးဂီၤကွံာ်လံာ်လဲၢ် အလီၢ်န့ၣ်လီၤ. ဖဲန့ၣ်န့ၣ် အဝဲထံၣ်ဘၣ်ဝဲတၢ်ဂီၤဘ့ၣ်ဆ့ အလံာ်တဖၣ်လီၤ. ရံၤဘ့ရိၤ တဲဝဲလၢ– “ယံာ်ထီၣ်ယံာ်ထီၣ်န့ၣ် ယစွဲတၢ်ကွၢ်တၢ်ဂီၤဘ့ၣ်ဆ့လီၤ. လၢခံ ယစွဲတၢ်ကွၢ်တၢ်ဂီၤဘ့ၣ်ဆ့ တုၤဒၣ်လဲာ် ယအဲၣ်ဒိးလၢပိာ်မုၣ်လၢ ယအိၣ်ဒီးအီၤတဂၤ ကလဲၤလၢတၢ်ချၢဒ်သိး ယကွၢ်တၢ်ဂီၤမူလၢ အလီၤသးဘၣ်အၢတဖၣ် ကန့ၢ်အဂီၢ်လီၤ.” ဒီးThe Secret of Family Happiness လၢလံာ်လဲၢ်တဖၣ်အကျါန့ၣ်လီၤ. အဝဲဟံးထီၣ်ဖးဝဲ လံာ်အံၤလီၤ. ဒီးတၢ်လၢအဖးဘၣ်ဝဲတဖၣ်န့ၣ် ထိၣ်ဟူးထိၣ်ဂဲၤထီၣ်အီၤဒ်သိး အကမၤလိလံာ်စီဆှံဒီး ယဟိဝၤပှၤအုၣ်အသးလီၤ. ဘၣ်ဆၣ် ဒ်သိးအဝဲကပာ်ပတုာ်ကွံာ် တၢ်ကွၢ်တၢ်ဂီၤဘ့ၣ်ဆ့အဂီၢ် အဝဲဘၣ်ဂုာ်ကျဲးစၢးဝဲ ဖးယံာ်ညါ. ဒ်သိးအဝဲမၤဝဲကန့ၢ်အဂီၢ် တၢ်မနုၤမၤစၢၤအီၤလဲၣ်. အဝဲတဲဝဲလၢ– “ခီဖျိယဃ့ဘါထုကဖၣ်, ဖးလံာ်စီဆှံ ဒီးဆိကမိၣ်ထံတၢ်လၢ ယမၤလိဘၣ်တဖၣ်အဃိ ယပာ်လုၢ်ပာ်ပှ့ၤ ယွၤအတၢ်ဂ့ၤတၢ်ဝါတဖၣ် ဒီးယတၢ်အဲၣ်အီၤဒိၣ်ထီၣ်ဝဲလီၤ. လၢတၢ်န့ၣ်အဃိ ယပာ်ပတုာ်ကွံာ် တၢ်ကွၢ်တၢ်ဂီၤဘ့ၣ်ဆ့န့ၢ်ဝဲလီၤ.” ခီဖျိ ယွၤအကလုၢ်ကထါ ဒီးယွၤသးစီဆှံအတၢ်မၤစၢၤအဃိ ဒီပုၢ်ဝဲၢ်ရံၤဘ့ရိၤ ဆီတလဲအတၢ်အိၣ်မူန့ၢ်ဝဲ ဒီးဒိးဘျၢအသးလၢထံ ဒီးခဲအံၤအဝဲမ့ၢ် တၢ်အိၣ်ဖှိၣ်သးပှၢ်တဂၤလီၤ.
ဘၣ်တနံၤ လၢတၢ်မၤလီၢ်န့ၣ် ရံၤဘ့ရိၤ ထံၣ်ဝဲလံာ်လၢအမ့ၢ်ပကဘၣ်အဲၣ်ယဟိဝၤယွၤလၢ ပသူၣ်ဒီဖျၢၣ်သးဒီဖျၢၣ် ဒီးသးဟ့တၢ်အၢန့ၣ်လီၤ
၁၁. ဒ်သိးပှၤလၢ အစွဲတၢ်ကွၢ်တၢ်ဂီၤဘ့ၣ်ဆ့တဂၤ ပာ်ပတုာ်ကွံာ်ဝဲ တၢ်ကွၢ်တၢ်ဂီၤဘ့ၣ်ဆ့ကန့ၢ်အဂီၢ် ကဘၣ်မၤဝဲတၢ်မနုၤလဲၣ်.
၁၁ ဒ်သိးရံၤဘ့ရိၤ ပာ်ပတုာ်ကွံာ် တၢ်ကွၢ်တၢ်ဂီၤဘ့ၣ်ဆ့ကန့ၢ်အဂီၢ် ပထံၣ်ဘၣ်လၢ အဝဲဘၣ်မၤလိလံာ်စီဆှံ တကးဒံးဘၣ် ဘၣ်မၤစ့ၢ်ကီးဝဲတၢ်အဂၤသ့ၣ်တဖၣ်လီၤ. တၢ်လၢအမၤလိဘၣ်ဝဲလၢ လံာ်စီဆှံအပူၤတဖၣ်န့ၣ် အဝဲဆိကမိၣ်ထံဝဲတုၤအနုာ်လီၤလၢ အသးပူၤန့ၣ်လီၤ. ဒီးအဝဲဘၣ်ဃ့ဘါထုကဖၣ်လၢ ယဟိဝၤယွၤအအိၣ် ဒီးဃ့ကညးဝဲလၢယဟိဝၤယွၤ ကမၤစၢၤအီၤလီၤ. မ့ၢ်လၢအဝဲမၤဝဲဒ်န့ၣ်အဃိ မၤစၢၤအီၤဒ်သိး အတၢ်အဲၣ်ယွၤကဒိၣ်ထီၣ်လီၤ. ဒီးမ့ၢ်လၢအတၢ်အဲၣ်ယွၤ ဒိၣ်ထီၣ်ဝဲအဃိ အဝဲမၤနၢၤကွံာ်ဝဲ အတၢ်သူၣ်လီသးကွံလၢ အအဲၣ်ဒိးကွၢ်တၢ်ဂီၤဘ့ၣ်ဆ့တဖၣ်န့ၢ်ဝဲလီၤ. ပဝဲသ့ၣ်တဖၣ်စ့ၢ်ကီး ဒ်သိးပဟးဆှဲး တၢ်ကွၢ်တၢ်ဂီၤဘ့ၣ်ဆ့ကန့ၢ်အဂီၢ် ပကဘၣ်အဲၣ်ယဟိဝၤယွၤလၢ ပသူၣ်ဒီဖျၢၣ်သးဒီဖျၢၣ် ဒီးသးဟ့တၢ်အၢန့ၣ်လီၤ.—ဖး စံးထီၣ်ပတြၢၤ ၉၇:၁၀ တက့ၢ်.
ပာ်တ့ၢ်ကွံာ် တၢ်သးဒိၣ်, တၢ်ဒုၣ်ဒွဲၣ် ဒီးတၢ်လံၣ်တၢ်လီ
၁၂. ဒ်သိးစတံၤဘ့ၣ် အတၢ်ပာ်သူၣ်ပာ်သး ကဆီတလဲအဂီၢ် တၢ်မနုၤမၤစၢၤအီၤလဲၣ်.
၁၂ ပှၤတနီၤနီၤ အသးဒိၣ်ထီၣ်တၢ်ချ့, တဲဆါပှၤဂၤ ဒီးဒုၣ်ဒွဲၣ်ပှၤဂၤလီၤ. အဝဲသ့ၣ်မ့ၢ်မၤဝဲဒ်န့ၣ်န့ၣ် ကဲထီၣ်တၢ်ကီတၢ်ခဲလၢ အဟံၣ်ဖိဃီဖိအဂီၢ်လီၤ. ပၢ်တဂၤလၢအအိၣ်လၢ ကီၢ်အီးစတြ့လံယါ လၢအမံၤမ့ၢ် စတံၤဘ့ၣ်န့ၣ် အဝဲဆိၣ်တၢ်ဆူၣ်ဒိၣ်မး ဒီးလၢတၢ်ဂ့ၢ်ဆံးဆံးဖိအဃိဒၣ်လဲာ် အဝဲသးဒိၣ်ထီၣ်တၢ်ညီမးလီၤ. အဝဲတဲဝဲလၢ– “ယၤဒီးယမါ ပအိၣ်လီၤဖးသၢဘျီလံ ဒီးဘူးထီၣ်လၢ ပကမၤကတၢၢ်ကွံာ် ပတၢ်ဆီဟံၣ်ဆီဃီန့ၣ်လီၤ.’’ ဘၣ်ဆၣ် အဝဲသ့ၣ်စးထီၣ်မၤလိလံာ်စီဆှံ ဒီးယဟိဝၤပှၤအုၣ်အသးတဖၣ် ဒီးစတံၤဘ့ၣ် မၤထွဲဝဲတၢ်လၢအမၤလိဘၣ်ဝဲတဖၣ်လီၤ. အဝဲတဲဝဲလၢ တချုးလၢအသ့ၣ်ညါယဟိဝၤယွၤ ဒံးဘၣ်န့ၣ်တၢ်ဂ့ၢ်တခါခါ မ့ၢ်မၤအ့န့အသးန့ၣ် အသးဒိၣ်ထီၣ်တၢ်ဒ် မ့ၣ်ပိၢ်ကပိၢ်ဖးထီၣ်အသိးလီၤ. ဘၣ်ဆၣ် စတံၤဘ့ၣ် စးထီၣ်အိၣ်မူဝဲဒ် လံာ်စီဆှံအတၢ်ဟ့ၣ်ကူၣ်အသိးအဃိ တၢ်မုာ်တၢ်ခုၣ်အိၣ်ထီၣ်လၢ အဟံၣ်ဖိဃီဖိအကျါလီၤ. အဝဲတဲဝဲလၢ– “ခဲအံၤ ပဟံၣ်ဖိဃီဖိအတၢ်အိၣ်သးဂ့ၤထီၣ်ဝဲ ဒီးခီဖျိလၢ ယဟိဝၤယွၤအတၢ်မၤစၢၤအဃိ ယအိၣ်ဒီးတၢ်ဃူတၢ်ဖိး ဒီးတၢ်မုာ်တၢ်ခုၣ်လီၤ.” ခဲအံၤစတံၤဘ့ၣ် ကဲထီၣ်ဝဲတၢ်အိၣ်ဖှိၣ်အပှၤမၤစၢၤတၢ် ဒီးအမါမၤဝဲပှၤလဲၤလၢညါ တဘျုးနံၣ်လံ. တၢ်အိၣ်ဖှိၣ်သးပှၢ်လၢ ဒီပုၢ်ဝဲၢ်စတံၤဘ့ၣ် အတၢ်အိၣ်ဖှိၣ်တဂၤ တဲဝဲလၢ– “စတံၤဘ့ၣ်န့ၣ် မ့ၢ်ပှၤကစုဒု, မၤတၢ်ဆူၣ် ဒီးအိၣ်ဒီးတၢ်ဆီၣ်လီၤသးလီၤ.” အဝဲတဲစ့ၢ်ကီးဝဲလၢ အဝဲသ့ၣ်တထံၣ်ဘၣ်ဝဲ ဒီပုၢ်ဝဲၢ်စတံၤဘ့ၣ် အသးဒိၣ်ထီၣ်တၢ်နီတဘျီဘၣ်. စတံၤဘ့ၣ်အတၢ်ပာ်သူၣ်ပာ်သးဆီတလဲန့ၣ် တမ့ၢ်လၢအနီၢ်ကစၢ်အဃိဘၣ်. စတံၤဘ့ၣ်တဲဝဲလၢ– “ဒ်သိးယကဆီတလဲယသးအဂီၢ်
ယမ့ၢ်တတူၢ်လိာ် ယဟိဝၤယွၤအတၢ်မၤစၢၤဘၣ်န့ၣ် ယတဒိးန့ၢ်ဘၣ် တၢ်ဆိၣ်ဂ့ၤတဖၣ်အံၤဘၣ်.”၁၃. ဘၣ်မနုၤအဃိ တၢ်သူၣ်ဒိၣ်သးဖျိးန့ၣ် မ့ၢ်တၢ်လၢအလီၤဘၣ်ယိၣ်လဲၣ်. လံာ်စီဆှံဟ့ၣ်ပလီၢ်ပှၤဒ်လဲၣ်.
၁၃ လံာ်စီဆှံ ဟ့ၣ်ပလီၢ်ပှၤလၢ ပကဘၣ်ဟးဆှဲးတၢ်သးဒိၣ်, ဒီးတၢ်ဒုၣ်ဒွဲၣ်တၢ် ဒီးတၢ်ကိးဃါတၢ်န့ၣ်လီၤ. (အ့းဖ့းစူး ၄:၃၁) အါတက့ၢ်လုၢ်လၢ်သ့ၣ်တဖၣ်အံၤ ဒုးအိၣ်ထီၣ်တၢ်မၤဆူၣ်မၤစိးလီၤ. မုၢ်မဆါတနံၤအံၤ တၢ်သူၣ်ဒိၣ်သးဖျိး ဒီးတၢ်မၤဆူၣ်မၤစိးန့ၣ် ပှၤအါဂၤထံၣ်ဝဲလၢ တမ့ၢ်တၢ်နီတမံၤဘၣ်. ဘၣ်ဆၣ် ပမ့ၢ်အိၣ်ဒီး တၢ်ပာ်သူၣ်ပာ်သးဒ်အံၤန့ၣ် မ့ၢ်ဒၣ်ပတပာ်ကဲ တၢ်ဘၣ်တ့ကစၢ်န့ၣ်လီၤ. လၢတၢ်န့ၣ်အဃိ ပဒီပုၢ်ဝဲၢ်အါဂၤ ဘၣ်ဆီတလဲအတၢ်အိၣ်မူ ဒီးသိးထီၣ်ဝဲ နီၢ်သီန့ၣ်လီၤ.—ဖး စံးထီၣ်ပတြၢၤ ၃၇:၈-၁၁ တက့ၢ်.
၁၄. ပှၤလၢအဒူတဂၤ ကဲထီၣ်ပှၤလၢအိၣ်ဒီး တၢ်ဆီၣ်လီၤသးကသ့ဧါ.
၁၄ ဒီပုၢ်ဝဲၢ်လၢအမံၤမ့ၢ် ဟဲၤ(စ်) န့ၣ်မ့ၢ်ဝဲ တၢ်အိၣ်ဖှိၣ်သးပှၢ်တဂၤ ဒီးအဝဲအိၣ်လၢ ကီၢ်အီးစတြံယါလီၤ. တၢ်အိၣ်ဖှိၣ်သးပှၢ်လၢ အအိၣ်လၢ ဟဲၤ(စ်) အတၢ်အိၣ်ဖှိၣ်တဂၤတဲဝဲလၢ– “ပှၤလၢအအိၣ်ဒီး တၢ်ဆီၣ်လီၤသးဒ်အံၤန့ၣ် နတထံၣ်ဘၣ်ကြီကြီဘၣ်.” ဘၣ်ဆၣ် လၢညါန့ၣ်အဝဲတမ့ၢ်ပှၤဒ်အံၤဘၣ်. ဖဲအဝဲအသးစၢ်ဒံးအခါ အီသံးအါတလၢအဃိ ကဲထီၣ်ဝဲ ပှၤလၢအဒူတဂၤလီၤ. ဘၣ်တဘျီ အဝဲမူၤသံးဒိၣ်တလၢအဃိ အသးဒိၣ်ထီၣ်တၢ်ဒီး မၤသံဘၣ်ဝဲအတၢ်အဲၣ်တီမုၣ်န့ၣ်လီၤ. လၢတၢ်န့ၣ်အဃိ အဝဲဘၣ်လဲၤအိၣ်လၢ ဃိာ်ပူၤအနံၣ် ၂၀ လီၤ. ဘၣ်ဆၣ် အတၢ်ပာ်သူၣ်ပာ်သး တဆီတလဲဒံးဘၣ်. လၢခံအမိၢ်မၢတၢ်အိၣ်ဖှိၣ်သးပှၢ်တဂၤ လဲၤဟးအိၣ်သကိးအီၤ ဒီးအဝဲစးထီၣ်မၤလိလံာ်စီဆှံလီၤ. အဝဲတဲဝဲလၢ– “ယကဘ့ၣ်လီၤကွံာ် ယနီၢ်လီၢ်လံၤန့ၣ် တမ့ၢ်တၢ်ညီလၢယဂီၢ်ဘၣ်. လံာ်စီဆှံအဆၢလၢ အမၤစၢၤယၤန့ၣ်မ့ၢ်ဝဲ ယၡါယၤ ၅၅:၇ လၢအစံးဝဲ– ‘မ်ပှၤတတီတလိၤဘၣ် လဲၤသဒၣ်အကျဲဒၣ်ဝဲ’ ဒီး ၁ ကရံၣ်သူး ၆:၁၁ စံးဝဲဘၣ်ဃးဒီး ပှၤလၢအပာ်တ့ၢ်ကွံာ် အတၢ်အိၣ်မူလၢ အတဂ့ၤဘၣ်တဖၣ်လၢ– ‘သုမ့ၢ်တ့ၢ်ပှၤဒ်န့ၣ်အသိးလီၤ.’ ဒ်သိးယသိးထီၣ်နီၢ်သီကန့ၢ်အဂီၢ် ယဟိဝၤယွၤမၤစၢၤယၤလၢ တၢ်သူၣ်စူၤသးစူၤအပူၤ ခီဖျိအသးစီဆှံတဘျုးနံၣ်ညါ.” ဖဲဒီပုၢ်ဝဲၢ် ဟဲၤ(စ်) ဒိးဘျၢထံအခါ အဝဲအိၣ်လၢဃိာ်ပူၤလီၤ. ဒီးအဝဲအိၣ်ဘၣ်ဝဲလၢဃိာ်ပူၤ ၁၇ နံၣ်ဘျဲၣ်ဝံၤအလီၢ်ခံ ဟးထီၣ်ဘၣ်လၢ ဃိာ်ပူၤန့ၣ်လီၤ. အဝဲတဲဝဲ– “ယစံးဘျုးဘၣ်ယဟိဝၤယွၤလၢ အတၢ်သးကညီၤဒီး တၢ်ပျၢ်တၢ်ကမၣ်အဃိလီၤ.”
၁၅. နီၢ်လီၢ်လံၤအဂၤတခါလၢ ပကဘၣ်ဘ့ၣ်လီၤကွံာ်န့ၣ် မ့ၢ်တၢ်မနုၤလဲၣ်. လံာ်စီဆှံစံးဝဲဒ်လဲၣ်.
၁၅ တၢ်လံၣ်တၢ်လီန့ၣ် ဘၣ်ထွဲလိာ်အသးဒီး နီၢ်လီၢ်လံၤန့ၣ်လီၤ. အဒိ, ပှၤအါဂၤ တအဲၣ်ဒိးဟ့ၣ်တၢ်ခိတၢ်သွဲ မ့တမ့ၢ် တအဲၣ်ဒိးလၢအတၢ်ကမၣ် ဖျါထီၣ်ဘၣ်အဃိ အဝဲသ့ၣ်လံၣ်တၢ်လီတၢ်လီၤ. ဘၣ်ဆၣ် ယဟိဝၤယွၤမ့ၢ်ဝဲ “တၢ်မ့ၢ်တၢ်တီအကစၢ်” လီၤ. (စံးထီၣ်ပတြၢၤ ၃၁:၅) လၢတၢ်န့ၣ်အဃိ အဝဲအဲၣ်ဒိးဝဲလၢ ပှၤလၢဘူၣ်ထီၣ်ဘါထီၣ်အီၤခဲလၢာ် ကပာ်တ့ၢ်ကွံာ် “တၢ်ကတိၤကဘျံးကဘျၣ်” ဒီးကကတိၤ “တၢ်မ့ၢ်တၢ်တီ” လီၤ. (အ့းဖ့းစူး ၄:၂၅; ကလီးစဲ ၃:၉) ဖဲအံၤပသ့ၣ်ညါဘၣ်လၢ မ့ၢ်ကီလၢပကတဲတၢ် တီတီလိၤလိၤအဂီၢ် မ့တမ့ၢ် မ့ၢ်ကဲထီၣ်တၢ်လီၤမဲာ်ဆှးလၢ ပဂီၢ်သနာ်က့ ပကဘၣ်တဲတၢ်မ့ၢ်တၢ်တီလီၤ.—ကတိၤဒိ ၆:၁၆-၁၉.
အဝဲသ့ၣ် မၤနၢၤဝဲဒ်လဲၣ်
၁၆. ဒ်သိး ပဘ့ၣ်လီၤကွံာ် ပနီၢ်လီၢ်လံၤကန့ၢ်အဂီၢ် တၢ်မနုၤကမၤစၢၤပှၤလဲၣ်.
၁၆ ပဘ့ၣ်လီၤကွံာ် နီၢ်လီၢ်လံၤလၢ ပနီၢ်ကစၢ်အဂံၢ်အဘါတသ့ဘၣ်. စၤခူရၤ, ရံၤဘ့ရိၤ, စတံၤဘ့ၣ် ဒီးဟဲၤ(စ်) အဝဲသ့ၣ်ဂုာ်ကျဲးစၢးထဲးဂံၢ်ထဲးဘါ ဒ်သိးကဆီတလဲအတၢ်အိၣ်မူန့ၣ်လီၤ. ဒ်သိးအဝဲသ့ၣ်မၤဝဲကန့ၢ်အဂီၢ် လံာ်စီဆှံ ဒီးယွၤသးစီဆှံမၤစၢၤအဝဲသ့ၣ်လီၤ. (လူၤကၣ် ၁၁:၁၃; ဧ့ၤဘြံၤ ၄:၁၂) ဒ်သိးယွၤအကလုၢ်ကထါ ဒီးယွၤအသးစီဆှံ မၤစၢၤပှၤကသ့အဂီၢ် ပကဘၣ်ဖးလံာ်စီဆှံကိးနံၤဒဲး ဒီးဆိကမိၣ်ထံတၢ်လၢ ပဖးအီၤတဖၣ်န့ၣ်လီၤ. တကးဒံးဘၣ် ဒ်သိးပမၤထွဲတၢ်လၢ ပမၤလိဘၣ်တဖၣ်ကန့ၢ်အဂီၢ် ထီဘိန့ၣ်ပကဘၣ်ဃ့ဘါထုကဖၣ်ဒ်သိး ကစၢ်ယွၤကဟ့ၣ်ပှၤ တၢ်ကူၣ်သ့ဒီးတၢ်ဂံၢ်တၢ်ဘါန့ၣ်လီၤ. (ယိၤၡူ ၁:၈; စံးထီၣ်ပတြၢၤ ၁၁၉:၉၇; ၁ သ့းစၤလနံ ၅:၁၇) တကးဒံးဘၣ် ဖဲပကတဲာ်ကတီၤ ပသးလၢတၢ်အိၣ်ဖှိၣ်ရိဖှိၣ်အဂီၢ် ဒီးပထီၣ်တၢ်အိၣ်ဖှိၣ်ရိဖှိၣ်အခါ ပဒိးန့ၢ်ဘၣ်လံာ်စီဆှံ ဒီးယွၤအသးစီဆှံအတၢ်မၤစၢၤလီၤ. (ဧ့ၤဘြံၤ ၁၀:၂၄, ၂၅) ဒီးပအဲၣ်ဒိးသူတၢ်ပီးတၢ်လီလၢ ယဟိဝၤယွၤအတၢ်ကရၢကရိ ကတဲာ်ကတီၤန့ၢ်ပှၤဒ်သိးဒီး လံာ်လဲၢ်သ့ၣ်တဖၣ်, JW တၢ်ဂီၤမူ တၢ်ရဲၣ်တၢ်ကျဲၤ, JW Library ဒီး jw.org တဖၣ်န့ၣ်လီၤ.—လူၤကၣ် ၁၂:၄၂.
ပဘ့ၣ်လီၤကွံာ် ပနီၢ်လီၢ်လံၤကသ့ဒ်လဲၣ် (ကွၢ်လံာ်အဆၢ ၁၆)
၁၇. တၢ်မၤလိလၢခံတခါန့ၣ် ပကမၤလိသကိး တၢ်ဂ့ၢ်မနုၤလဲၣ်.
၁၇ ပတဲသကိးဘၣ်ဃး လုၢ်လၢ်လၢအတဂ့ၤတနီၤလၢ ခရံာ်ဖိသ့ၣ်တဖၣ် ကဘၣ်ဘ့ၣ်လီၤကွံာ်ဝဲန့ၣ်လီၤ. ဒ်သိးခရံာ်ဖိတဖၣ် ကမၤသးခုယွၤအသးအဂီၢ် ကဘၣ်ဘ့ၣ်လီၤကွံာ် အနီၢ်လီၢ်လံၤ ဒီးကဘၣ်သိးထီၣ်က့ၤဝဲ နီၢ်သီလီၤ. ပကဘၣ်သိးထီၣ် နီၢ်သီလၢ ပတၢ်အိၣ်မူအပူၤထီဘိန့ၣ်လီၤ. တၢ်မၤလိလၢခံတခါန့ၣ် ပကတဲသကိးဘၣ်ဃး ပသိးထီၣ်နီၢ်သီ ကသ့ဒ်လဲၣ်န့ၣ်လီၤ.
^ လံာ်အဆၢ. 7 လၢတၢ်မၤလိအံၤအပူၤ ပှၤတနီၤအမံၤ ဘၣ်တၢ်ဆီတလဲအီၤ.
^ လံာ်အဆၢ. 8 ကွၢ်လံာ်လၢအမ့ၢ် အိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံအပူၤတက့ၢ် လံာ်ကဘျံးပၤ ၂၁၈-၂၁၉ တက့ၢ်.