1, 2. Abantu nibagamba ki aha Bajurizi ba Yehova?

ABANTU baingi nibeetegyereza ngu Abajurizi ba Yehova n’ab’omutaano. Nk’eky’okureeberaho, omuhandiiki Anton Gill akasiima Abajurizi ba Yehova ahabw’emitwarize yaabo mirungi omu butware bwa Nazi omuri Germany. Akahandiika ati: “Abajurizi ba Yehova bakaba nibatwarwa nk’abazigu abarikukirayo ab’Abanazi. . . . Omuri 1939 Abajurizi ba Yehova 6,000 bakaba bari omu nkambi.” Akongyeraho ngu n’obu Abajurizi ba Yehova baraabe babonabonesiibwe munonga bakaba nibamanywa nk’abeesigwa, omu kugyemeserezibwa bakaguma baikaikaine, bahamiire ahari Ruhanga waabo, kandi baine obumwe.

² Emyaka mikye enyima, abantu omuri South Africa nabo bakeetegyereza ekintu eky’omutaano aha Abajurizi ba Yehova. Eizooba rimwe, Abajurizi ba Yehova abatarikushushanisa erangi omu eihanga eryo bakaba batarikwikirizibwa kuba hamwe. Kwonka, aha Sande, Okwaikumi-n’abiri 18, 2011, Abajurizi ba Yehova abarikurenga 78,000 ab’erangi zitarikushushana omuri South  Africa n’amahanga agari haihi, bakateeranira hamwe aha ruteerane rw’omutaano omu kishaayi ekirikukirayo obuhango omuri Johannesburg. Omwe aha barikukurira ekishaayi ekyo akagira ati: “Aba nibo bantu abarikukirayo kugira emitwarize mirungi abu ndareebire omu kishaayi eki. Boona bajwire gye. Kandi bantu mwe muboneize gye ekishaayi. Kwonka okukira munonga, timurikushoroora omu rangi.”

3. Niki ekirikureetera obumwe obu twine kuba obw’omutaano?

³ N’ahabw’ekyo n’abantu abatari Bajurizi ba Yehova nibeetegyereza gye ngu obumwe obu twine omu nsi yoona n’obw’omutaano. (1 Petero 5:9) Ahabw’enki turi ab’omutaano aha bibiina ebindi? Ahabw’okuhwerwa Baibuli n’omwoyo gwa Ruhanga ogurikwera, nituhindura emitwarize yoona etarikushemeza Yehova. ‘Nitujuura omuntu owa ira,’ kandi ‘tujwara omuntu omusya.’—Abakolosai 3:9, 10.

4. Nituza kugamba ahari ki omu kicweka eki, kandi ahabw’enki?

⁴ Bwanyima y’okujuura omuntu owa ira, titwine kumugaruraho. Omu kicweka eki, nituza kubanza twegye oku turikubaasa kujuura omuntu owa ira n’oku eki kiri kikuru munonga. Nituza kwetegyereza ngu nikibaasika omuntu kukora empinduka z’amaani n’obu yaakuba yaabaire naakora ebibi by’amaani. Bwanyima nituza n’okwetegyereza eki abo abatwire omu mazima kumara emyaka mingi barikubaasa kukora kwetantara kugaruraho omuntu owa ira. Ahabw’enki twine kugamba ahari eki? Eky’obusaasi, abamwe abaabaire nibaheereza Yehova tibabaasize kuguma bari abegyendesereza. Batandikire kugaruka kuteekateeka n’okukora ebintu ebi baabaire nibakora batakamanyire Yehova. Buri omwe ahariitwe aine kwijuka okurabura oku: “Orikuteekateeka ngu ayemereire ayerinde atagwa.”—1 Abakorinso 10:12.

5. (a) Ha eky’okureeberaho ekirikworeka ahabw’enki twine kujuura ahonaaho omuntu owa ira. (Reeba ekishushani aha kutandika.) (b) Ni bikorwa ki eby’omuntu owa ira ebirikugambwaho omu Abakolosai 3:5-9?

⁵ Noobaasa kukora ki waayetegyereza ngu ebijwaro byawe n’ebirofa kandi ngu nibinuuka? Noobijuura ahonaaho. Omu muringo nigwo gumwe, twamanya ngu nitukora ebintu ebi Yehova arikwanga, ni kikuru okukora empindahinduka ahonaaho. Paulo arikugamba aha bikorwa bibi nk’ebyo, akagira ati: “Murekye n’ebi byona.” Ka tugambe ahari bibiri aharibyo: obushambani n’ebihagaro nari emize mibi.—Shoma Abakolosai 3:5-9.

6, 7. (a) Ebigambo bya Paulo nibyoreka bita ngu nikyetengyesa amaani kujuura omuntu owa ira? (b) Sakura akaba aine mitwarize ki, kandi niki ekyamuhweraire kukora empindahinduka?

⁶ Obushambani. Omu Baibuli, “obushambani” nibutwariramu okuteerana kw’omushaija n’omukazi abatagaitsirwe hamwe. Paulo akagira ngu Abakristaayo baine ‘kwita ebiri omu ngingo zaabo’ ekirikumanyisa okutejumba omu by’obushambani. Eki nikimanyisa ngu twine kuteeraho munonga kweihamu ebyetengo bibi. Okukora ekyo nikibaasa kuguma, kwonka nitubaasa kusingura!

 ⁷ Ebyahikire ahari munyaanyazi-itwe Sakura kuruga Japan nibibaasa kutuhwera kwetegyereza eki. * (Reeba obugambo obw’ahansi.) Obu Sakura yaabaire naakura, butoosha akaba agira eihamba n’enaku. Kubaasa kweihaho eihamba, akatandika kuteerana aine emyaka 15. Sakura akateerana n’abashaija baingi kandi akaihamu enda emirundi eshatu. Akagira ati: “Omu kubanza, nkahurira ndi nk’oine oburinzi ahabw’okuteerana, ndikuteekateeka ngu nibanyetenga kandi ngu nibankunda. Kwonka ku naabaire nyeyongyera kuteerana, nyeyongyera kubura oburinzi.” Sakura akaguma naashambana okuhitsya aha myaka 23. Bwanyima Abajurizi ba Yehova bakatandika kumwegyesa Baibuli, kandi yaakunda ebi yaabaire naayega. Yehova akamuhwera kurekyera aho kuba enshambani, n’okusingura enyehurira z’okwefuuza n’okuhemuka. Hati, Sakura naaheereza nka payoniya ow’obutwire, kandi takiine eihamba. Naagira ati: “Buzima nyine okushemererwa ahabw’okwesiimira omuri rukundo ya Yehova bwira bwasheesha.”

8. Ni bikorwa ki ebirikubaasa kureetera Ruhanga kutureeba nk’abatashemeire?

⁸ Emize mibi. Omu Baibuli, emizi mibi neetwariramu ekirikukira aha bushambani. Neebaasa kutwariramu ebintu nk’okureetsa, nari okuteera obuyaga orikukoresa ebigambo bibi. (2 Abakorinso 7:1; Abaefeso 5:3, 4) Nikibaasa n’okumanyisa ebintu bibi ebi abantu barikukora bwesherekye, nk’okushoma ebitabo ebirikubareetera kwenda kuteerana nari okureeba ebirikwitsa enshoni. Ebintu ebi nibibaasa kurugamu ekikorwa kibi eky’okwemarisa. (Abakolosai 3:5) *—Reeba obugambo obw’ahansi.

9. Niki ekirikubaasa kubaho omuntu yaagira “okurigira okubi”?

⁹ Abantu abarikureeba ebirikwitsa enshoni, nibagira omuze ‘gw’okurigira okubi’ kandi nibabaasa kugira omuze gw’okwenda kuteerana buri shaaha. Abarikucondooza bashangire ngu okugira omuze gw’okureeba ebirikwitsa enshoni, nikishushana n’okugira omuze gw’okunywa amaarwa nari okukoresa ebitabura bwongo. Tikirikutangaaza kureeba ngu okureeba ebirikwitsa enshoni nikirugamu ebintu bibi. Ebi nibitwariramu enyehurira z’okuhemuka, okutakora gye aha murimo, amaka agatarimu okushemererwa, okugaitururwa, n’okweita. Bwanyima y’omushaija omwe kumara omwaka gumwe atakireeba ebirikwitsa enshoni, akagira ngu akaba naabaasa kweha ekitiinisa.

10. Ribeiro akacwa ata omuze gwe gw’okureeba ebirikwitsa enshoni?

¹⁰ Abantu baingi, nikibagumira kurekyera aho kureeba ebirikwitsa enshoni. Kwonka okugumirwa okwo nikubaasa kusingurwa. Yetegyereze ekyahikire ahari Ribeiro kuruga Brazil. Obu yaabaire akiri omushogoyo, akaruga omu ka yaaza kukora aha ikorero eririkugaruka rikaboneza empapura ezaakoresiibweho. Ku yaabaire ari okwo akareebayo magaziini ezirimu ebirikwitsa enshoni. Ribeiro naagira ati: “Mporampora, nkagira gukahinduka omuze. Omuze ogu gukeeyongyera munonga nkaba ntarikubaasa kutegyereza omukazi ou naabaire nintuura nawe kuruga omu nju ngu mbaase kureeba ebirikwitsa enshoni.” Eizooba  rimwe aha murimo, Ribeiro akareeba omurundo gw’ebitabo ebi baabaire nibaza kugaruka kukoramu ebindi, reero yaareeba akatabo Ekirikureeta Okushemererwa omu Ka. Akakakwata yaakashoma. Ebi yaayegiremu bikamureetera kwega Baibuli arikuhwerwa Abajurizi ba Yehova. Kwonka nabwo, Ribeiro kikamutwarira obwire kucwa omuze gw’okureeba ebirikwitsa enshoni. Niki ekyamuhwereire? Akashoboorora ati: “Kurabira omu kushaba, okweyegyesa Baibuli, n’okuteekateeka aha bi ndikwega, nkeyongyera kusiima emitwarize ya Ruhanga okuhitsya obu rukundo ei nyiniire Yehova yaahamiire kimwe okukira ekyetengo kyangye ky’okureeba ebirikwitsa enshoni.” Ribeiro arikuhwerwa Baibuli n’omwoyo gurikwera, akakora empindahinduka, yaabatizibwa, kandi hati naaheereza nk’omureeberezi omu kibiina.

11. Niki ekirikuhwera omuntu kwetantara ebirikwitsa enshoni?

¹¹ Yetegyereze ngu Ribeiro kubaasa kwetantara ebirikwitsa enshoni, akakora ekirikukira aha kushoma Baibuli. Akaba ateekateeka munonga aha bi arikwega omu Baibuli kandi abiikiriza kumuhika aha mutima. Akaba ashaba Yehova, arikumweshengyereza kumuhwera. Ebintu ebi bikahwera Ribeiro kuhamya rukundo ei yaabaire ainiire Ruhanga, n’ahabw’ekyo akasingura ekyetengo kye ky’okureeba ebirikwitsa enshoni. Kubaasa kwerinda ebirikwitsa enshoni, naitwe twine kukundira kimwe Yehova kandi tukanga ekibi.—Shoma Zaaburi 97:10.

12. Niki ekyahwereire Stephen kucwa ekiniga n’okujumiirana?

¹² Abantu abamwe nibarahuka kugira ekiniga, kandi bagambira abandi ebigambo ebirikusaasa. Ekyo kyabaho, eka yoona neebonabona. Omushaija omuzaire kuruga Australia orikwetwa Stephen akaba akira kukoresa ebigambo ebirikuhemura kandi akaba agira ekiniga ahonaaho n’aha bushonga bukye munonga. Naagira ati: “Nyowe n’omukazi wangye tukataana emirundi eshatu kandi tukaba turiyo nituteekateeka aha kugaitururwa.” Kwonka, bakatandika kwegyesibwa Baibuli Abajurizi ba Yehova, kandi Stephen akateeraho kugyendera aha bi yaabaire naayega. Naagira ngu atakamanyire Yehova, akaba agira ekiniga kingi haagira ekyamugwisa kubi aba nka bomu erikwenda kubaruka. Kwonka Stephen ku yaatandikire kukuratira obuhabuzi bw’omu Baibuli, ebintu bikaba gye. Naagira ati: “Omu ka yaitu hakabamu empinduka. Ndikuhwerwa Yehova, hati nyine obusingye n’obugwa gye.” Hati, Stephen n’omuheereza omu kibiina, kandi omukazi we atwire ari payoniya ow’obutwire kumara emyaka mingi. Abareeberezi omu kibiina eki Stephen arimu bakagira bati: “Stephen n’ow’eishe-emwe ohunami, orikukora munonga, kandi n’omucureezi.” Bakagira ngu tibakamureebaga naagira ekiniga. Stephen tarikwehimbisa ahabw’empindahinduka ezi yaakozire. Naagira ati: “Nkaba ntarikwija kutunga emigisha egi yoona ku ogire ngu tindaikiriize Yehova kumpwera kugira emitwarize mirungi.”

13. Ahabw’enki ekiniga kiri ekya kabi munonga, kandi Baibuli neeturabura ahari ki?

 ¹³ Baibuli neeturabura ngu twetantare kugira ekiniga, obushaarizi, n’oruyombo. (Abaefeso 4:31) Ebintu ebi nibirugamu ebikorwa by’obushaarizi. Obunaku obu, abantu baingi omu nsi nibateekateeka ngu ekiniga, ebikorwa by’obushaarizi n’ebintu bya butoosha. Kwonka okutwaza omu muringo ogu, buzima tikirikuhaisa Omuhangi waitu ekitiinisa. Ab’eishe-emwe baingi bakaba baine kuhindura emitwarize yaabo kandi bakajwara omuntu omusya.—Shoma Zaaburi 37:8-11.

14. Mbwenu shi nikibaasika omuntu omushaarizi kuhinduka omucureezi?

¹⁴ Ow’eishe-emwe Hans naaheereza nk’omureeberezi omu kibiina omuri Austria. Omuhikaanisa w’akakiiko k’abareeberezi omu kibiina eki Hans arimu akagira ati: “N’omwe aha b’eishe-emwe abacureezi abu waakwenzire kureeba.” Kwonka Hans akaba ataba mucureezi butoosha. Obu yaabaire akiri omushogoyo, akatandika kunywa amaarwa maingi kandi yaaba omushaarizi. Eizooba rimwe obu yaabaire asinzire, akagira ekiniga kingi munonga yaita omwishiki ou yaabaire naashambana nawe. Hans akatwarwa omu kihome kumara emyaka 20, kwonka ekihome tikiramureeteire kuhindura aha mitwarize ye. Kwonka nyina wa Hans akashaba omureeberezi kumutaayaayira, kandi Hans akatandika kwega Baibuli. Hans naagira ati: “Kikaba kigumire kujuura omuntu wangye owa ira. Ebigambo by’omu Baibuli ebyangarwiremu amaani n’ebiri omu Isaaya 55:7, ebirikugira biti: ‘Omubi arekye omuhanda gwe,’ na 1 Abakorinso 6:11, aharikugamba ahari abo abaarekire ebibi ebi baabaire nibakora: ‘Kandi bamwe omuriimwe mukaba muri nk’abo.’ Kumara emyaka mingi, Yehova ampwereire  arikukoresa omwoyo gwe gurikwera kubaasa kujwara omuntu omusya.” Hans akabatizibwa akiri omu kihome, kandi akarekurwa bwanyima y’okumara omu kihome emyaka 17 n’ameezi mukaaga. Akagira ati: “Ninsiima munonga embabazi za Yehova n’okusaasira kwe kwingi.”

15. Ni mutwarize ki ogundi ogw’omuntu owa ira, kandi Baibuli neekigambaho ki?

¹⁵ Okugamba ebishuba n’omutwarize gw’omuntu owa ira. Nk’eky’okureeberaho, abantu baingi nibabeiha kugira ngu bataha emishoro nari kwetantara obujunaanizibwa bw’enshobe zaabo. Kwonka Yehova ni “Ruhanga orikwesigwa” nari ow’amazima. (Zaaburi 31:5) N’ahabw’ekyo naayenda ngu abaheereza be boona ‘bagambe amazima’ kandi ‘batabeihana.’ (Abaefeso 4:25; Abakolosai 3:9) Buzima, twine kugamba amazima n’obu kyakuba kigumire nari nikitureetera kuhemuka.—Enfumu 6:16-19.

16. Niki ekiraatuhwere kujuura omuntu owa ira?

¹⁶ Tikirikubaasika kujuura omuntu owa ira ahabw’amaani gaitu. Sakura, Ribeiro, Stephen, na Hans boona bakateeraho munonga okukora empindahinduka aha mitwarize yaabo eya ira. Ekyabahwereire n’amaani g’Ekigambo kya Ruhanga n’omwoyo gwe ogurikwera. (Luka 11:13; Abaheburaayo 4:12) Kubaasa kugasirwa omu maani ago, twine kushoma Baibuli buri izooba, kuteekateeka aha bi turikushoma, kandi tukeezirikira okushaba Yehova kutuha obwengye n’amaani kugira ngu tubaase kugyendera aha bi turikwega. (Yoshua 1:8; Zaaburi 119:97; 1 Abatesalonika 5:17) Kandi nitugasirwa omu Kigambo kya Ruhanga n’omwoyo gwe ogurikwera, twatebeekanisa kandi tukaza omu nteerane z’ekibiina. (Abaheburaayo 10:24, 25) Kandi nitwenda n’okukoresa ebintu ebindi ebi ekibiina kya Yehova kituhaire, nka magaziini, JW Broadcasting, JW Raiburare, na jw.org.—Luka 12:42.

17. Omu kicweka ekirikukurataho nitwija kugamba ahari ki?

¹⁷ Twagamba aha mitwarize mibi mingi ei Abakristaayo baine kujuura okutagarukaho kugira ngu bashemeze Yehova. Kwonka hariho ekindi eki twine kukora. Twine kujwara omuntu omusya kandi tukaguma tumujwaire ebiro byona. Omu kicweka ekirikukurataho, nitwija kugamba oku turikubaasa kukora eki.