1, 2. Со дикхена о мануша ко е Јеховаскере сведокија?

БУТ мануша дикхена о шукар особине со иси е Јеховаскере сведокон. На пример, о писатели о Антон Гил башо пхраља хем о пхења тари нацистичко Германија пишинѓа: „О нацистија мрзинена сине е Јеховаскере сведокон... Џи ко 1939 берш, 6.000 лендар сине ко [концентрациона логорија]“. Ов вакерѓа кај иако цидинѓе баре муке, о Сведокија сине смириме ко пхаре ситуацие, ачхиле верна е Девлеске, сине лен јекхипе хем е јаверен сине лен доверба ки ленде.

² Ко амаро време, о мануша тари Јужноафриканско Република исто аѓаар дикхле кај е Јеховаскере сведокон иси лен шуже особине. Јекх време, ки адаја пхув на сине дозволимо е Сведоконге таро различна расе те кхеден пе заедно. Ама, недела ко 18 декември 2011 берш, побутер таро 78.000 Сведокија таро различна расе тари Јужноафриканско Република хем таро јавера пхувја кхединѓе пе заедно ко најбаро стадиони ко Јоханесбург башо  јекх посебно теократско настан. Јекх таро управникија е стадионескере вакерѓа: „Џи акана на дикхљум нијекх јавер група мануша ко акава стадиони те понашинел пе добором шукар. Сарине сиен шукар уравде хем бут шукар чистинѓен о стадиони. Ама, сој најважно, машкар туменде иси мануша таро различна расе“.

3. Соске амаро пхралипе тано нешто посебно?

³ Чак о мануша кола со нане е Јеховаскере сведокија дикхена кај амаро пхралипе тано нешто посебно (1. Пет. 5:9). Соске амари организација тани бут поразлично таро јавера организацие? Адалеске со бут трудинаја амен те цида амендар са о буќа со на мангела о Јехова. Ко адава поможинела амен и Библија хем о свети дух. Амен шунаја о совет тари Библија: „Хуљавен и пурани личност... хем уравен и неви личност“ (Кол. 3:9, 10).

4. Со ка дикха ки акаја статија хем соске?

⁴ Откеда ка хуљава и пурани личност, ваљани те пазина никогаш повише те на урава ла. Ки акаја статија ка дикха сар шај те хуљава и пурани личност хем соске адава тано добором важно. Ка дикха кај шај секој те керел баре промене ко пло живото бизи разлика кобор лошна буќа керѓа англедер. Пало адава ка дикха со шај те керен окола со служинена е Девлеске бут берша ма те мукхен и пурани личност палем те овел дело лендар. Соске ваљани те кера лафи башо акала буќа? Несаве со служинѓе е Јеховаске на пазинѓе хем почминѓе те размислинен хем те понашинен пе исто сар со керена сине англедер те пенџарен е Јехова. Адалеске, секова јекх амендар ваљани те на бистрел акала лафија: „Кој мислинела кај терѓола, те пазинел те на перел“ (1. Кор. 10:12).

5. а) Вакер пример со сикавела соске ваљани одма те хуљава и пурани личност. (Дикх и слика ко почеток тари статија.) б) Спрема ко Колошаните 3:5-9, кола буќа тане дело тари пурани личност?

⁵ Со ка кере ако дикхеа кај те шеја тане мелале хем кхандена? Ка хуљаве лен со посигате. Слично аѓаар, ако дикхаја кај кераја нешто со о Јехова на мангела, ваљани одма те менина адава. Шукар тано те шуна о совет е Павлескоро со денѓа ле е пхраленге ко прво веко: „Циден са акава тумендар“. Те дикха дуј асавке буќа со вакерѓа лен о Павле: о блуд, или јавере лафенцар о сексуално неморал, хем о мелалипе. (Читин Колошаните 3:5-9.)

6, 7. а) Сар е Павлескере лафија сикавена кај ваљани бут те трудина амен те хуљава и пурани личност? б) Сар живинела сине и Сакура хем со поможинѓа ла те менинел пе?

⁶ Сексуално неморал. Кеда ки Библија пишинела „блуд“, мислинела пе ко сексуално однос машкар дуј џене кола со нане законски венчиме сар ром хем ромни. О Павле вакерѓа кај о слуге е Девлескере мора те „мударен“ пле „делија е телоскере“ кеда керела пе лафи башо сексуално неморал. Акава значинела кај ваљани бут те трудина амен те цида амендар о погрешна желбе. Акаја борба нане локхи, ама шај те победина!

 ⁷ Акава шај те дикха таро пример јекхе пхењакоро тари Јапонија која со викинела пе Сакура. * (Дикх и фуснота.) Џикоте бајрола сине, ој бут пути осетинела пе сине коркори хем тажно. Ко 15 берш почминѓа те овел ла сексуална односија различна манушенцар мислиндор кај аѓаар нане те осетинел пе коркори. Адалеске сине ла трин абортусија. Ој вакерела: „Ко почеток осетинава ман сине сигурно адалеске со сине ман сексуална односија, соске мислинава сине кај некој мангела ман хем кај ваљанава некаске. Ама сар накхела сине о време, адава керела сине те осетинав ман панда понесигурно“. И Сакура живинела сине аѓаар џикоте на пхерѓа 23 берш. Тегани почминѓа те проучинел и Библија е Јеховаскере сведоконцар хем бут свиџинѓа пе лаке адава со сикљола сине. О Јехова поможинѓа ла те чхинавел е неморално животоја хем ма те осетинел пе више криво. Акана и Сакура тани општо пионери хем на осетинела пе више коркори. Ој вакерела: „Бут сиум бахтали соске о Јехова секова диве сикавела манге кобор мангела ман“.

8. Кола навике шај те керен амен мелале англо е Девлескере јакхја?

⁸ Мелалипе. Ки Библија о „мелалипе“ на значинела само сексуално неморал. Шај те значинел о лошна навике сар сој о пушибе хем те вакерен пе безобразна шале (2. Кор. 7:1; Еф. 5:3, 4). Исто аѓаар, шај те значинел о лошна буќа со керена лен о мануша кеда тане коркори, сар сој о читибе лила кола со возбудинена лен сексуално или о дикхибе порнографија. Акала буќа шај те анен џи ки јавер лошно навика, и мастурбација (Кол. 3:5). * (Дикх и фуснота.)

9. Џи ко со шај те анел и неконтролирано „сексуално страст“?

⁹ О мануша со дикхена редовно порнографија овела лен неконтролирано „сексуално страст“ хем шај те овен зависна таро секс. О истражувачија халиле кај и зависност тари порнографија тани слично сар и зависност таро алкохол или дрога. Адалеске на изненадинела амен адава со и навика те дикхел пе порнографија иси ла лошна последице. Акава шај те анел џи ки лаџ, те на кера амари бути сар со ваљани, лошно фамилијарно живото, развод па чак некој коркори те мударел пе. Кеда цело берш на дикхља порнографија, јекх мануш вакерѓа кај палем почминѓа те поштујнел коркори пес.

10. Сар о Рибеиро чхинавѓа те овел зависно тари порнографија?

¹⁰ Буте џененге тано чаче пхаро те боринен пе те на дикхен порнографија. Ама ола шај те побединен. Размислин башо Рибеиро таро Бразил. Кеда сине тинејџери, гело песке кхералдан хем почминѓа те керел бути ки јекх фабрика со рециклиринела хартија. Адатхе дикхља порнографска списанија. О Рибеиро вакерела: „Хари похари добором бут уљум зависно, со едвај аџикерава сине ми џувли колаја со живинава сине те икљол таро кхер те шај те дикхав порнографска филмија“. Јекх диве џикоте сине ки бути, о Рибеиро дикхља о лил Тајната на семејната  среќа машкар о бут јавера лила кола со ваљани сине те овен рециклириме. Ов леља ле хем читинѓа ле. Адава со читинѓа охрабринѓа ле те почминел те проучинел и Библија е Јеховаскере сведоконцар. Ама, понадари да ваљани сине леске бут време те шај те чхинавел адале лошно навикаја. Со поможинѓа ле? Ов вакерела: „Молинава ман сине, проучинава сине и Библија хем размислинава сине башо адава со сикљовава хем аѓаар почминѓум те ценинав повише е Девлескере особине. Сар накхела сине о време, мло мангипе башо Јехова уло позорало тари мли желба те дикхав порнографија“. И Библија хем о свети дух поможинѓе е Рибеиро те хуљавел и пурани личност, ов крстинѓа пе хем акана служинела сар старешина.

11. Со шај те поможинел некас те цидел пе тари порнографија?

¹¹ Те шај те чхинавел е лошно навикаја, о Рибеиро ваљанѓа те керел нешто повише него само те проучинел и Библија. Ов мора сине хор те размислинел башо адава со читинела сине тари Библија хем те мукхел адава те ресел џи ко лескоро вило. Мора сине те молинел е Јехова те поможинел ле. Акала буќа поможинѓе е Рибеиро, лескоро мангипе башо Јехова те овел побаро тари желба те дикхел порнографија. Те шај те цида амен тари порнографија, амен да мора те манга бут е Јехова хем те мрзина о лошнипа. (Читин Псалм 97:10.)

12. Со поможинѓа е Стивене те цидел пестар и холи хем о лошна лафија?

¹² Несаве мануша сигате хољанена хем ки холи вакерена лафија коленцар со вреџинена е јаверен. Кеда случинела пе акава, цело фамилија цидела. На пример, јекх дад тари Австралија со викинела пе Стивен сине ле навика те акошел хем бут локхе те хољанел чак ситниценге. Ов вакерела: „Ме хем ми ромни трин пути одвојнѓем амен хем чак денѓем документија башо развод“. Тегани, ола почминѓе те проучинен и Библија е Јеховаскере сведоконцар хем о Стивен трудинела пе сине те керел адава со сикљола сине тари Библија. Ов вакерела кај англедер те пенџарел е Јехова, ов сине сар јекх бомба која со секова моменти шај сине те пхајрол соске бут сигате хољанела сине. Ама, кеда почминѓа те шунел о советија тари Библија, о буќа уле пошукар. Ов вакерела: „Акана мли фамилија тани побахтали. Адалеске со поможинѓа ман о Јехова, акана иси ман баро мир“. О Стивен служинела сар слуга-помошнико хем лескири ромни некобор берша служинела сар општо пионери. О старешине таро лескоро собрание вакерена: „О Стивен тано мирно, вредно хем понизно пхрал“. Исто аѓаар вакерена кај никогаш на дикхле ле хољамо. О Стивен на мислинела кај ов коркори успејнѓа те променинел пе. Ов вакерела: „Нане сине те овен ман нијекх таро акала шуже берекетија ако на мукхава сине о Јехова те поможинел ман хем те керел промене ки мли личност“.

13. Соске тани опасно и холи хем саво совет дела амен и Библија?

 ¹³ И Библија советинела амен те цида амендар и холи, о викибе хем о лошна лафија (Еф. 4:31). Акала буќа бут пути анена џи ко насилство. Авдиве бут џене таро свето мислинена кај тано нормално те ове насилно. Ама ако сием насилна тегани лаџакераја амаре Створителе. Адалеске, бут пхраља хем пхења ваљанѓе те менинен пе хем те уравен и неви личност. (Читин Псалм 37:8-11.)

14. Дали шај некој со сине насилно те овел кротко?

¹⁴ Размислин исто аѓаар башо пример е пхралескоро со викинела пе Ханс, кова со служинела сар старешина ко јекх собрание ки Австрија. О координатор ко старешинство таро адава собрание вакерела: „Ов тано јекх таро најкротка мануша со пенџарава лен“. Ама, о Ханс на сине секогаш асавко. Кеда сине тинејџери, почминѓа те пиел бут алкохол хем уло насилно. Јекх пути кеда сине мато, хољанѓа бут со чак мударѓа пле џувља. Сине пханло 20 берш ко затвор, ама о живото ко затвор на менинѓа ле. Џикоте сине ко затвор, лескири дај замолинѓа јекхе старешина те посетинел ле хем аѓаар о Ханс почминѓа те проучинел и Библија. Ов вакерѓа: „Сине манге бут пхаро те хуљавав мли пурани личност. Бут поможинѓе ман о библиска стихија таро Исаија 55:7, коте со пишинела: ’О румимо мануш нека мукхел пло дром‘, хем 1. Коринќаните 6:11, коте со околенге со менинѓе пе пишинела: ’Асавке сине несаве тумендар‘. Бершенцар о Јехова стрпливо поможинела ман сине пле свети духоја те уравав и неви личност“. О Ханс крстинѓа пе џикоте сине панда ко затвор хем  иклило пало 17 текваш берш таро затвор. Ов вакерѓа: „Бут сиум благодарно башо Јеховаскири милост хем со сине спремно те простинел манге“.

15. Која навика тани исто аѓаар дело тари пурани личност хем со вакерела и Библија баши лате?

¹⁵ О ховајбе тано навика која со исто аѓаар тани дело тари пурани личност. На пример, бут мануша ховавена те шај ма те платинен данокија или те нашен тари одговорност башо пле грешке. Ама, о Јехова тано Девел е чачипаскоро (Пс. 31:5). Адалеске, ов мангела лескере слуге те вакерен о чачипе хем ма те ховавен (Еф. 4:25; Кол. 3:9). Значи, секогаш ваљани те вакера о чачипе, чак кеда адава ка анел амен ки незгодно или ки пхари ситуација (Изр. 6:16-19).

16. Со ка поможинел амен те хуљава и пурани личност?

¹⁶ Нашти коркори амаре силаја те хуљава и пурани личност. И Сакура, о Рибеиро, о Стивен хем о Ханс мора сине бут те боринен пе те шај те циден пестар о лошна навике. Ама, е Девлескоро Лафи хем о свети дух поможинѓа лен те побединен ки акаја борба (Лука 11:13; Евр. 4:12). Те шај амен да успејнаја те хуљава и пурани личност, ваљани секова диве те читина и Библија, те размислина башо адава со читинаја хем секогаш те молина амен о Јехова те дел амен мудрост хем сила те кера адава со сикљоваја тари Библија (Ис. Нав. 1:8; Пс. 119:97; 1. Сол. 5:17). Исто аѓаар, мукхаја те водинел амен е Девлескоро Лафи хем о свети дух кеда спреминаја амен башо амаре состанокија хем џаја ки ленде (Евр. 10:24, 25). Мангаја те користина целосно и духовно храна која со дела амен е Јеховаскири организација преку о публикацие, и интернет-телевизија JW Broadcasting, и апликација JW Library хем и интернет-страница jw.org (Лука 12:42).

17. Со ка дикха ки јавер статија?

¹⁷ Ки акаја статија дикхлем некобор лошна навике кола со е Девлескере слуге мора те циден лен хем те пазинен ма те иранен пе палем ки ленде ако мангена те радујнен е Јехова. Ама, ваљани панда нешто те кера. Ваљани те урава и неви личност хем те трудина амен секогаш те овел дело таро амаро живото. Ки јавер статија ка дикха сар шај те кера адава.