1, 2. Адәмләр Йәһва гувачилири һәққидә немини байқайду?

КӨП АДӘМ Йәһва гувачилириниң алаһидә екәнлигини байқайду. Мәсилән, Антон Джилл исимлиқ язғучи Гувачиларниң нацист Германиясидә яхши хисләтләрни көрсәткәнлиги үчүн махтиған. У мундақ дәп язған: «Нацистлар болупму Йәһва гувачилирини өч көргән... 1939-жили тәхминән 6000 Гувачи [мәхбуслар лагериға] чүшти». Униң ейтишичә, Гувачилар дәһшәтлик азап чәксиму, ишинишкә лайиқ, бесим астидиму хатирҗәмлик сақлайдиған, Худаға вападар вә инақ болғанлиғи билән мәлум.

² Җәнубий Африкида яшайдиған адәмләрму Йәһва гувачилириниң башқилардин алаһидә екәнлигини байқиған. Бир вақитта у йәрдә һәр түрлүк ирқтин чиққан адәмләргә, шу җүмлидин Гувачиларғиму, җәм болушқа мәнъий қилинған. Амма 2011-жилниң 18-декабрь күни Җәнубий Африка билән әтрапидики дөләтләрдин кәлгән һәрхил ирқлардин болған 78 000дин ошуқ Гувачи Йоханнесбургниң әң чоң стадионидики бир мәхсус программиға жиғилди. Шу чағда стадионниң бир башқурғучиси улар  һәққидә: «Бу стадионда бурун жиғилғанларниң ичидики әң үлгилик силәр. Һәммиңлар бирдәк сәрәмҗан кийингән. Шундақла силәр стадионни бәк яхши тазилидиңлар. Әң муһими, һәқиқәтән көп милләтлик тәшкилат екәнсиләр»,— деди.

3. Тәшкилатимиз немиси билән өзгичә?

³ Шуңа һәтта Гувачи әмәс кишиләр бизниң хәлиқарилиқ тәшкилатимизниң башқа тәшкилатлардин өзгичә екәнлигигә көз йәткүзиду (Петрусниң 1-хети 5:9). Немишкә биз һәрқандақ башқа тәшкилаттин пәриқлинимиз? Сәвәви Худа Сөзи билән муқәддәс роһниң ярдими һәм биз Йәһваға яқмайдиған һәрқандақ нәрсидин айрилишқа бар күчимизни салимиз. Биз «кона шәхсни йешип», «йеңи шәхскә кийинимиз» (Колосилиқларға 3:9, 10).

4. Бу мақалидә немини қараштуримиз вә немишкә?

⁴ Кона шәхсимизни йәшкәндин кейин, уни қайта киймәслигимиз керәк. Бу мақалидә биз кона шәхсимизни қандақларчә йешишкә болидиғанлиғини вә буниң немишкә шунчилик муһим екәнлигини қараштуримиз. Шуниң билән адәм бурун яман ишларға беши билән кирип кәткән болсиму, һаятини тамамән өзгәртәләйдиғанлиғини биливалалаймиз. Андин көп жил давамида һәқиқәтни билгәнләр кона шәхсини қайтидин киймәслик үчүн немә қилалайдиғанлиғини муһакимә қилимиз. Немә үчүн? Бәк әпсуски, бурун Йәһваға хизмәт қилғанлар пәхәс болмай, Йәһвани билмәй туруп қилған иш-һәрикәтлири билән ойлириға қайтқан. Шуниң үчүн һәрбиримиз: «Ким туримән дәп ойлиса, жиқилип кетишидин байқисун»,— дегән агаһландурушқа диққәт қилишимиз зөрүр (Коринтлиқларға 1-хәт 10:12).

5. а) Немишкә кона шәхстин дәрру айрилиш керәк екәнлигини мисал билән чүшәндүрүң (Мақалиниң бешидики рәсимгә қараң). ә) Колосилиқларға 3:5—9 айәтләрдә кона шәхскә хас қандақ ишлар тилға елинған?

⁵ Кийимимизниң паскина вә йеқимсиз пуриғанлиғини сәзсиңиз, немә қилаттиңиз? Уни мүмкинқәдәр тез йешишкә алдираттиңиз, шундақ әмәсму? Шуниңға охшаш, Йәһва өч көридиған ишлар билән шуғулланғанлиғимизни чүшәнсәк, дәрру өзгиришимиз керәк. Паул мундақ яман һәрикәтләр тоғрисида: «Өзүңлардин мошуниң һәммисини... нери қилиңлар»,— дәп язған. Һазир уларниң иккисигә, йәни җинсий әхлақсизлиқ вә напаклиққа, диққәт ағдурайли (Колосилиқларға 3:5—9ни оқуң).

6, 7. а) Паулниң сөзлири кона шәхстин айрилиш наһайити қийин екәнлигини қандақ көрситиду? ә) Сакура қандақ һаят кәчүргән? У өзгириш үчүн күчни нәдин алди?

⁶ Җинсий әхлақсизлиқ. Муқәддәс китапқа бенаән, «җинсий әхлақсизлиқ» — қануний некада турмиғанларниң арисидики җинсий мунасивәт. Паул мәсиһийләрниң җинсий әхлақсизлиққа бағлиқ «йәрлик әзалирини» «өлтүрүши» керәклиги һәққидә ейтқан. Бу — натоғра һәвәслиримиздин айрилиш үчүн бар күчимиз билән тиришишимиз  керәклигини билдүриду. Буни қилиш асан әмәс, лекин бу қолумиздин келиду!

⁷ Япониядә яшайдиған Сакура исимлиқ қериндаш билән немә йүз бәргәнлигини көрүп бақайли * (Изаһәткә қараң.). У өсмүр чеғида пат-пат өзини ялғуз һис қилип, көңлидики бошлуқни толдурғуси кәлгән. Ялғузлуқни һис қилмаслиқ үчүн у 15 йешидин башлап һәр түрлүк кишиләр билән җинсий алақидә болушни башлиди. У үч қетим бала чүшүрди. Сакура мундақ дәйду: «Әң бешида, әхлақсизлиқ билән шуғуллинип, өзүмни керәклик сезинип, бирсиниң муһәббитигә ериштим дәп ойлиған едим. Амма қанчә көп җинсий алақидә болсам, шунчилик өзүмни хәвп астида һис қилидиған болдум». Сакура 23 яшқичә мошундақ һаят кәчүргән. Кейин у Йәһва гувачилири билән Муқәддәс китапни тәтқиқ қилишқа башлиди вә алған билими униңға наһайити йеқип қалди. Йәһва Худаниң ярдими билән Сакура әхлақсиз һаят йолини ташлап, уни азаплиған гуна вә уят сезимидин айрилди. Бүгүн Сакура пешқәдәм сүпитидә хизмәт қилип, өзини ялғуз һис қилмайду. У мундақ дәйду: «Һәр күни Йәһваниң меһир-муһәббитиниң нуриға чөмүп жүргиним мени бәк бәхитлик қилиду».

8. Худаниң алдида бизни напак қилидиған бәзи ишлар қандақ?

⁸ Напаклиқ. Муқәддәс китапта «напаклиққа» җинсий әхлақсизлиқтинму көпирәк нәрсә киридиғанлиғи йезилған. Униңға тамака чекиш вә тетиқсиз чақчақларни қилиштәк ишлар кириду (Коринтлиқларға 2-хәт 7:1; Әфәсликләргә 5:3, 4). Шуниң билән, шәһваний нәпсини қозғитидиған китапларни оқуш яки порнографияни көрүшкә охшаш ялғуз қалғанда қилинидиған яман ишларму кириду. Мундақ ишлар мастурбация дегән напак адәткә әкелиши мүмкин (Колосилиқларға 3:5) * (Изаһәткә қараң.).

9. Адәм тоюмсиз «шәһвәтни» риваҗландурса, буниң ақивети қандақ болуши мүмкин?

⁹ Порнографияни дайим көридиған адәм тоюмсиз «шәһвәтни» риваҗландуруп, җинсий мунасивәткә хумар болуп қалиду. Тәтқиқатчилар порнографиягә болған хумарлиқ һарақ яки зәһәрлик буюмларға болған хумарлиққа охшаш екәнлигини байқиған. Шу сәвәптин, бу яман адәтниң виждан азавиға, ишидики үнүми төвәнләшкә, аилиниң бәхитсиз болушиға яки аҗришишқа, һәтта адәмниң өз-өзигә қол селишиға охшаш ечинишлиқ ақивәтләргә әкелидиғанлиғи һәйран қаларлиқ әмәс. Мәсилән, бир жил давамида порнография көрүш хумарлиғи билән күришип, шу адитидин айрилған бир әр киши өз-өзини қайтидин һөрмәтләшкә башлиғанлиғини ейтқан.

10. Рибейро порнографияниң тузиғидин қандақ азат болди?

¹⁰ Көп адәм үчүн порнографияниң тузиғидин азат болуш наһайити қийин. Лекин бу күрәштә ғәлибә қазиниш мүмкин. Бразилиядә яшайдиған Рибейрониң мисалини қараштурайли.  У өсмүр чеғида өйидин кетип, қәғәзни қайта ишлитиш заводиға ишқа кириду. Шу йәрдә у порнографиялик журналларни көрди. У мундақ дәйду: «Аста-аста мән хумар болдум. Униңға бешим билән кирип кәткиним шунчилик, порнографиялик видеоларни көрүш үчүн, биллә яшиған аял өйдин қачан кетиду дәп күтүп олтираттим». Кейин бир күни Рибейро ишида догиланған китапларниң арисида «Аиләвий бәхитниң сири» намлиқ китапни тепивелип, уни оқуп чиқиду. Андин у Йәһва гувачилири билән Муқәддәс китапни тәтқиқ қилишни башлайду. Амма порнография көрүш адитидин айрилиш үчүн узақ вақит кетиду. Униңға немә ярдәм бәрди? У мундақ дәп чүшәндүрди: «Дуа қилиш, Муқәддәс китапни тәтқиқ қилиш вә биливалғиним һәққидә мулаһизә қилиш арқилиқ Худаниң хисләтлиригә болған миннәтдарлиғим өсивәрди. Нәтиҗидә Йәһваға болған меһир-муһәббитим порнография көрүшкә болған һәвәсимдин ешип чүшти». Муқәддәс китап билән муқәддәс роһниң ярдими билән Рибейро һаятини өзгәртип, чөмдүрүлүш мәрасимидин өтти вә һазир у җамаәттә ақсақал болуп хизмәт қиливатиду.

11. Порнографияниң тузиғидин азат болушқа немә ярдәм бериду?

¹¹ Байқисиңиз, порнографиядин нери туруш үчүн Рибейро пәқәт Муқәддәс китапни оқупла қоймиди. У Муқәддәс китаптин билгини тоғрисида чоңқур мулаһизә қилип, Худа Сөзиниң жүригигә тәсир қилишиға йол қойған. Йәһваға дуа қилип, ярдәм сорап ялвурған. Булар арқилиқ Худаға болған меһир-муһәббити күчийип, порнографиягә болған хумарлиғини йеңивалди. Порнографияниң тузиғидин азат болуш үчүн бизму Йәһвани қаттиқ яхши көрүшимиз вә яманлиқтин нәпрәтлинишимиз керәк (Зәбур 97:10ни оқуң).

12. Стивенға ғәзәп вә һақарәтлик сөзләрдин айрилишқа немә ярдәм бәрди?

¹² Бәзи адәмләрниң аччиға час болиду вә улар башқиларниң көңлини ағритидиған һақарәтлик сөзләрни ейтиду. Буниңдин пүткүл аилә азап чекиду. Австралиядә яшайдиған Стивен исимлиқ бир әр киши бурун ағзини яман қилип, йоқла нәрсигә аччиқлинатти. У: «Аялим иккимиз үч қетим айрим яшап, әнди аҗрашмақчи едуқ»,— дәйду. Кейин улар Гувачилар билән Муқәддәс китапни тәтқиқ қилишқа башлап, Стивен билгәнлирини әмәлийәттә қоллинишқа тиришиду. Униң ейтишичә, Йәһвани билмәй турғанда бир нәрсә униң җениға тәгсә, ғәзәпләнгини шунчә, у худди бир йерилишқа аз қалған бомбиға охшап кетәтти. Бирақ Муқәддәс китап принциплирини қоллинишқа башлиғанда, вәзийәт яхшилинишқа башлиди. У мундақ дәп бөлүшти: «Аилимизниң әһвали түп йилтизи билән өзгәрди. Йәһваниң ярдими билән мән течлиқ вә хатирҗәмликкә егә болдум». Һазир Стивен хизмәт ярдәмчиси сүпитидә, униң аяли болса бирнәччә жилдин бери пешқәдәм болуп хизмәт қиливатиду. Җамаитидики ақсақаллар Стивен һәққидә мундақ дәйду: «Стивен бәк әмгәкчан, еғир-бесиқ вә кәмтәр бурадәр». Улар униң аччиқланғанлиғини һечқачан көрмәпту. Стивен өз күчүм билән өзгәрдим дәп һесаплимайду. У: «Әгәр Йәһваниң шәхсимни  пүтүнләй өзгәртиш үчүн бәргән ярдимини рәт қилсам, һаятимдики әҗайип бәрикәтләрниң һечқайсини көрәлмәттим»,— дәйду.

13. Немишкә ғәзәп хәвплик? Муқәддәс китапта қандақ агаһландуруш бар?

¹³ Муқәддәс китап бизни ғәзәп, җедәл һәм аһанәттин нери турушқа агаһландуриду (Әфәсликләргә 4:31). Булар адәттә зорлуққа әкелиду. Бүгүнки күндә көп адәм ғәзәп вә зораванлиқниң һеч ямини йоқ дәп ойлайду. Амма мундақ жүрүш-туруш, әмәлийәттә, Яратқучимизни шәрмәндә қилиду. Көп қериндашлиримизға бу җәһәттин өзгиришкә тоғра кәлгән вә шундақ қилип улар йеңи шәхскә еришти (Зәбур 37:8—11ни оқуң).

14. Зораван адәмниң мулайим адәмгә айлиниши мүмкинму?

¹⁴ Ханс исимлиқ бурадәр Австриядики бир җамаәттә ақсақал сүпитидә хизмәт қилиду. Шу җамаәтниң ақсақаллар кеңишиниң рәиси Ханс һәққидә мундақ дегән: «У қой ағзидин чөп алмайдиған мулайим бурадәр». Бирақ бурун ундақ болмиған. Ханс өсмүр болғанда ичимликкә берилип, зораван болуп кәткән. Бир қетим у мәс болуп, қиз достини өлтүрүп қойиду. Шуниң үчүн 20 жилға түрмигә қамилиду, амма бу униңға өзгиришкә һеч ярдәм бәрмигән. Кейин аписи бир ақсақални униңға йолуқушни сориған. Андин Ханс Муқәддәс китапни тәтқиқ қилишқа башлайду. У: «Кона шәхстин айрилиш мән үчүн интайин қийин болди. Йәшая 55:7дики “Рәзил адәм өз йолини... ташлисун” дегән сөзләр вә Коринтлиқларға 1-хәт 6:11дики гунакар йолини ташлиған адәмләр һәққидики “Бәзилириңлар шундақ болғандиңлар” дегән сөзләр маңа мәдәт бәрди. Муқәддәс роһи арқилиқ йеңи шәхскә еришишим  үчүн, Йәһва Худа маңа жиллар давамида чидамлиқ билән ярдәм берип кәлди»,— дегән. Ханс түрмидә болғанда чөмдүрүлүш мәрасимидин өтти вә он йәттә йерим жилдин кейин түрмидин чиқти. У: «Йәһваниң чәксиз меһрибанлиғи вә кәчүрүмчанлиғи үчүн бәк миннәтдармән»,— дәйду.

15. Кона шәхсниң йәнә бир қисми қандақ? Муқәддәс китапта бу һәққидә немә йезилған?

¹⁵ Кона шәхскә хас йәнә бир адәт — ялған ейтиш. Мәсилән, көп адәм селиқ төлимәслик яки қилғанлириға җавапкар болмаслиқ үчүн ялған гәп қилиду. Лекин Йәһва Худа — Һәқиқәтниң Худаси (Зәбур 31:5). Шуңа У хизмәтчилиридин «ялған сөзлимәй», әксичә «һәқиқәтни сөзләшни» тәләп қилиду (Әфәсликләргә 4:25; Колосилиқларға 3:9). Ениқки, биз һәтта ейтишқа уят яки қийин болған чағдиму растини ейтишимиз керәк (Пәнд-нәсиһәтләр 6:16—19).

16. Кона шәхстин айрилишқа бизгә немә ярдәм бериду?

¹⁶ Өз күчимиз билән кона шәхстин айрилиш мүмкин әмәс. Сакура, Рибейро, Стивен вә Ханс кона һаят тәрзини өзгәртиш үчүн көп күч селип, күришиши керәк еди. Уларға Худа Сөзиниң күчи билән муқәддәс роһ ярдәм бәрди (Луқа 11:13; Ибранийларға 4:12). Шу күчниң пайдисини көрүш үчүн, Муқәддәс китапни һәр күни оқуп, у һәққидә мулаһизә қилишимиз вә билгәнлиримизни әмәлийәттә қоллиниш үчүн даналиқ һәм күч сорап дайим дуа қилишимиз зөрүр (Йәшуа 1:8; Зәбур 119:97; Салоникилиқларға 1-хәт 5:17). Җамаәт учришишлириға тәйярлиниш һәм уларға қатнишишму Худа Сөзиниң вә муқәддәс роһниң тәсирини һис қилишимизға ярдәм бериду (Ибранийларға 10:24, 25). Униңдин ташқири, Йәһваниң тәшкилати бериватқан башқиму көплигән қуралларни қолланғанлиғимиз яхши. Мәсилән, журналлиримиз, JW Broadcasting телевизияси, «JW Library» программиси вә jw.org торбети (Луқа 12:42).

17. Келәрки мақалидә немини муһакимә қилимиз?

¹⁷ Бу мақалидә биз Худаниң хизмәтчилири айрилип, қайтидин қилмаслиғи керәк бәзи яман ишларни қараштурдуқ. Лекин буни қилиш йетәрлик әмәс. Биз йеңи шәхскә еришип, уни һаятимизниң аҗримас бир қисми қилишимиз керәк. Келәрки мақалидә буни қандақ қилишқа болидиғанлиғини муһакимә қилимиз.