JEWBA ñi duam mu, ti apostol Pablo wirintukuy ñi femngen tati llowkelu Ngünechen ñi newen, kidu nütramkay aylla dungu mu (Galata 5:22, 23, TNM) * (inaduamnge ti kimal dungu). Müley ñi femngechi chengeal tati pu kristiano famentufilu tañi kuyfike weda wimtun (Kolosense 3:10). Kiñe anümka wülay fün llowle fentren ko, feymu ka femngechi iñchiñ küpa femliyiñ Pablo ñi wirintukuel, müley taiñ llowal Ngünechen ñi newen ka eluwküleal taiñ ngünenieaetew (Salmo 1:1-3).

Wünelu mu, Pablo feypi “piwkeyefengey”. ¿Tunte falin-ngey ti piwkeyewün? Pablo feypi “nienoli ta piwkeyechen, chem falilay rume ñi femkeel” (1 Korintio 13:2). Welu, ¿chem am tati piwkeyewün? ¿Chumngechi piwkeyefengeafuiñ? Ka, ¿chumngechi pengelafuiñ piwkeyen fill antü?

Küdawngey taiñ wiñoldungual tüfa. Welu, ti Biblia pengeli ñi rakiduamken ka femken tati nielu piwkeyen. Feypi tati piwkeyefengelu ñochi duamngey, “küme piwkengey” ka ayüwkey “rüfngechi dungu mew”. Kafey, “itrokom mew kutrankawkey, kom küme feyentukey, üngümkey maneluwün mew, ka itrokom ngenoafelkey”. Rume duamtukefi ta kakelu, küme piwke mew ngüneytukefi, ka küme weniyefi. Welu kiñe che nienole piwkeyen, ütrirchengeay, mallmangeay, fill weda piay, chekawün-ngeay ka wiñoduamtuchelayay. Iñchiñ ayülaiñ taiñ femngechi chengeal, welu may müley taiñ rüf piwkeyeal, femngechi taiñ doyümnoafiel taiñ ayükeel (1 Korintio 13:4-8).

“Ngünechen am ta piwkeyen ürke” (1 Juan 4:8). Kom tañi femken pengelkey tüfa. Kidu werküfi tañi Fotüm Mapu mew ñi kutrankawal ka layal iñchiñ taiñ duam mu, femngechi Chaw Jewba pengeli taiñ rume piwkeyeetew. Ti apostol Juan feypi: ‘Ngünechen pengeleleiñmew taiñ piwkeyeetew feychi werkülu tañi kiñen Fotüm ta tüfachi mapu mew femngechi taiñ nieael rumel mongen ta kisu ñi Fotüm mew. Fey tüfa famngechi pengeleleiñmew taiñ piwkeyenieetew: Ngünechen werküy tañi Fotüm iñchiñ taiñ piwkeyefiel mew no, welu may kisu taiñ piwkeyeetew mew ta iñchiñ, femngechi ta [Jesus] chalintukuwi tañi langümngeael, taiñ wiñoduamangetuael kisuke iñchiñ taiñ kulpan mew’ (1 Juan 4:9, 10). Chaw Dios taiñ piwkeyeetew mu, taiñ kulpan wiñoduamatungeay, nieafuiñ maneluwün ka afnoachi mongen.

Jesus wülpay tañi mongen ñi femal tañi Wenu Chaw ñi ayükeel, femngechi pengeli ñi rume piwkeyefiel tati pu che. Ti apostol Pablo feypi: “Jesucristo am femlu Ngünechen ñi ayüelchi dungu, chalintukuwlu kisu ñi kuerpu tañi langümngeael kiñe rupa müten, fey rumel ñi femwenoael” (Ebrew 10:9, 10). Chem che no rume pengel-layafuy femngechi piwkeyen. Jesus feypi: “Tati doy fütra piwkeyen tañi nieafel ta kiñe che fey tañi wülael kisu ñi mongen kütu ñi weni mew”  (Juan 15:13). Kulpafengelu am iñchiñ, ¿inayentuafuiñ Jewba ka Jesus ñi piwkeyen? Femafuiñ llemay. Feymu ngüneduamaiñ chumngechi taiñ diturpuafel.

Pablo ngülamtueiñmew: “Inayentunierpufimün ta Chaw Ngünechen, sakin pu yall reke, ka amulemün tamün piwkeyechen mu, Kristo reke taiñ piwkeyeetew, ka iñchiñ taiñ duam mu wülkünuy ñi mongen” (Efesio 5:1, 2, TNM). ¿Chem küpa pengeli Pablo feypilu “amulemün tamün piwkeyechen mu”? Küpa kimeltueiñmew taiñ pengelal piwkeyen itrokom dungu mu. Re feypilayaiñ “iñche piwkeyeken”, welu may taiñ piwkeyen müley ñi kimfalngeal. Juan wirintukuy: “Iñche ñi pichike weni, ngelay taiñ piwkeyewael re wenche wün mew müten, welu tañi pengelngeael küme femün mew” (1 Juan 3:18). Rakiduamnge tüfa, amuldungukeiñ ti “küme kimelün dungu” Chaw Dios ñi Ngünenien mu, piwkeyekefilu kay ta Jewba ka taiñ pu chafche (Matew 24:14; Luka 10:27). Kafey, ñochi duampiwkengeliyiñ, küme chengeliyiñ ka wiñoduamtuchefengeliyiñ, amuleaiñ taiñ piwkeyechen mu. Inakeiñ tüfachi ngülam: “Chumngechi ta Ñidol wiñoduamatueymünmew, wiñoduamawaymün kay ta eymün” (Kolosense 3:13).

Welu, ngülamtufiliyiñ kam norümdungufiliyiñ ta kakelu, feypingelayafuy taiñ piwkeyechekenon. Rakiduamnge tüfa, kiñeke chaw tañi ngümanoal ñi pichiche, elukefingün chem rume ñi ayünieel. Welu kiñe chaw kam ñuke rüf piwkeyefile tañi pichiche, eluwlayay ñi rulpayaetew ñi femal kom tañi ayünieel. Ka femngechi femkey Jewba, Kidu ta piwkeyen ürke, welu ‘ngülamtudungukefi tüfeychi pu che kisu tañi piwkeyenieel’ (Ebrew 12:6). Feymew duamfalngele, norümdunguafuiñ ta kiñe che, fey pengelaiñ piwkeyen (Proverbios 3:11, 12). Welu kulpafengelu am iñchiñ, kiñeke mu pengel-layafuiñ piwkeyen, feymew yafüluwaiñ taiñ doy küme piwkeyefengeal. ¿Chumngechi femafuiñ tüfa? Inaduamaiñ küla dungu.

Kiñe: ngillatuafimi ta Chaw Dios tami eluaetew ñi newen, tüfa kelluaeymu tami nieal piwkeyen. Jesus feypi Jewba ñi elukefiel tañi newen “tüfey engün tañi ngillatuetew” (Luka 11:13). Feymew, ngillatuliyiñ taiñ eluaetew tañi newen, ka eluwliyiñ taiñ kelluaetew, fey rüfngeay taiñ doy piwkeyechefengeal (Galata 5:16). Longkolelmi ti trawünche mu, ka duamfalngele tami ngülamtuafiel Biblia mew ta kiñe peñi kam lamngen, fey ngillatuafimi ta Chaw Dios tami eluaetew ñi newen, femngechi tami kelluaetew ñi piwkeyechefengeal. Kam nielmi pichikeche, ngillatuafimi tami eluaetew ñi newen, fey tami norümafiel tami pichikeche piwkeyen mew, illkulen mew no.

Epu: küme rakiduamnge Jesus mu, chumngechi ñi pengelken piwkeyen, weda femngefulu rume (1 Pedro 2:21, 23). Weda femngelmi kam rupalmi norngenochi dungu mu, ramtuwnge: “¿Chem femafuy Jesus?”. Kiñe lamngen Leigh pingelu, ngüneduami chumngechi ñi kelluetew tüfachi ramtun tañi rakiduamal petu ñi femnon. Kidu feypi: “Kiñe rupa, kiñe kompañ küdaw mew werkülelfi kiñe mensaje kom tañi pu chaf küdawfe, fey weda dunguyeenew ta iñche ka tañi küdaw. Tüfa rume weda duamelenew. Welu ramtuwün: ‘¿Chem femafuy Jesus?’. Fey rakiduamlu Jesus ñi femafel mew, eluwün ñi rakiduamwenoafiel feychi dungu ka rume falintunoafiel. Fey wüla, kimürpun tañi kompañ ñi rume kutrankülen ka ñi rupaken küdawngechi dungu mu. Fey rakiduamün ‘kidu küpa weda duamel-laenew chi tañi feypin mu’. Rakiduamkefun Jesus ñi femün mu, kidu pengeli piwkeyen weda femngelu rume, tüfa kelluenew ñi ka femngechi femal tañi kompañ mu”. Ka femngechi iñchiñ, inayentufiliyiñ ta Jesus, rumel pengelaiñ piwkeyechen.

Küla: eluwnge ñi famentual tami ayükeel. Pu rüf inaniekefilu ta Jesus femngechi pengelkeyngün ñi piwkeyen (Juan 13:34, 35). Ti Biblia feypikeeiñmew taiñ inayentuafiel ta Jesus. Kidu elkünuy ñi mongen wenu mapu mu, famentuy kom tañi nieel,  ka eluwi ñi langümngeal iñchiñ taiñ duam mu (Filipense 2:5-8, TNM). Inayentufiliyiñ Jesus ñi piwkeyen ka chumngechi ñi famentufiel kidu ñi ayükeel, fey rakiduamaiñ ka duamküleaiñ kidu reke, femngechi doyümaiñ kakelu che ñi duamnieel.

Nieliyiñ piwkeyen, fentren kümelkan llowaiñ. Inaduamafiyiñ epu:

• TAIÑ PU PEÑI KA LAMNGEN WALL MAPU MU KIÑEWKÜLELU: welukentu piwkeyewkelu kay iñchiñ, chem trawünche mu rume amuliyiñ, taiñ pu peñi ka lamngen küme llowaeiñmew. Wall Mapu mu nieiñ taiñ pu peñi ka lamngen taiñ piwkeyeetew, ¡tüfa kiñe falin kümelkan llemay! (1 Pedro 5:9.) Jewba ñi pu che müten femngechi piwkeyewkey.

• KÜME FELEN KA KÜMELKAWKÜLEN: ‘Welukonke küme duamtuniewiyiñ ta piwkeyewün mew’, feymew kiñewküleiñ taiñ “dew elunieetewchi küme tüngün mew” (Efesio 4:2, 3). Femngechi feleiñ taiñ fillke trawün ka fütrake trawün mu. Jewba ñi pu che müten femngechi küme feley, pu che Mapu mu am kiñewkülenolu, ¿rüfngey no am? (Salmo 119:165; Isaías 54:13.) Eluwliyiñ taiñ kümelkawal pu che engün, pengelaiñ taiñ rüf piwkeyefiel engün ka ayüwülafiyiñ taiñ Wenu Chaw (Salmo 133:1-3; Matew 5:9).

Ti apostol Pablo wirintukuy: “Tati piwkeyechen elukeeiñmew taiñ kümelkawküleael” (1 Korintio 8:1). ¿Chem küpa kimeltueiñmew tüfa? Pablo feypi tüfa 1 Korintio kapitulo 13 mu. Wünelu mu feypi tati pu nielu piwkeyen doyümkeyngün kakelu che ñi kümelkaleal (1 Korintio 10:24; 13:5). Kafey ñochi duampiwkengeyngün, fürenechekeyngün ka küme chengeyngün, feymew piwkeyewkeyngün ñi reñma mu, ka kellukeyngün ñi kiñewküleal ti trawünche (Kolosense 3:14).

Doy falin-ngey ka doy yafültukukeeiñmew taiñ piwkeyekefiel ta Jewba. ¿Chumngelu? ¡Femngechi am kiñewkülelu iñchiñ! Feymew fillke tuwün, mollfüñ ka kewün nieliyiñ rume, poyekefiyiñ ta Jewba kiñewkülen mu (Sofonías 3:9). Fey eluwaiñ llemay, taiñ piwkeyefengeal fill antü, femngechi pengelaiñ taiñ llowken Ngünechen tañi newen.