DISURU Jahowa do apostel Paulus manurat angka parange na diparbuehon tondi parbadia. (Gal. 5:22, 23) Adong sia parange i, jala digoari do i ”parbue ni tondi”. * (Ida surat na di toru.) Bagian sian parange ”na imbaru” do parbue ni tondi on, jala ingkon diparangehon halak Kristen do i. (Kol. 3:10) Dos songon hau, porlu do aek asa marparbue. Songon i ma hita, tahaporluhon do tondi parbadia asa boi taparangehon angka parange na denggan i.​—Ps. 1:1-3.

Parange na parjolo na didok si Paulus, i ma holong. Sadia ringkot do parange on? Si Paulus mandok, ”Doshon na soada ma ahu, anggo so parholong ni roha ahu.” (1 Kor. 13:2) Alai, aha do holong i? Jala songon dia do patuduhon i di ngolunta siganup ari?

Nang pe maol patorangkon lapatan ni holong, alai dipaboa Bibel do songon dia halak parholong marpingkir jala marpangalaho. Halak na parholong ”sabar jala burju”, jala ”dihalashon do hasintongan”. ”Dihuphupi . . . do sasude, satia do tu sasude, mangkirim do di sasude, jala sabar do manaon sasude.” Alai, molo ndang adong holong ni sasahalak gabe mangiburu ma ibana, ginjang rohana, ndang maradat, mangkaringkothon diri sandiri, jala ndang olo manalpuhon hasalaan ni na asing. Lomo do rohanta patuduhon holong na sian ias ni rohanta tu na asing. Holong sisongon i ”ndang mangalului laba tu diri sandiri”.​—1 Kor. 13:4-8, Bibel siganup ari.

”Haholongon do Debata.” (1 Joh. 4:8) Tarida do i di sude ulaonNa. Holong na umbalga na hea dipatudu Debata tu jolma i ma marhite manuru Jesus tu tano on mate humongkop hita. Apostel Johannes mandok, ”Sian on do gabe patar holong ni roha ni Debata na tu hita; sian naung sinuruna i Anakna na sasada i tu portibi on, asa mangolu hita marhitehite Ibana. Di bagasan on do holong ni roha i: Ndada hita mangkaholongi Debata; Ibana do mangkaholongi hita, jala disuru do Anakna, bahen pardengganan pasaehon dosanta.” (1 Joh. 4:9, 10) Alani holong ni Debata, boi ma disesa dosanta. Gabe marpangkirimon ma hita jala mandapot hangoluan.

Dipatudu Jesus do holongna tu jolma marhite mangalehon ngoluna mangulahon lomo ni roha ni Debata. Apostel Paulus paboahon, ”Di bagasan lomo ni rohana i gabe angka na badia hita, binahen ni daging ni Jesus Kristus, naung pinelehonna, na sahali i.” (Heb. 10:9, 10) Ndang adong jolma na boi patuduhon holong na umbalga sian i. Didok Jesus, ”Jala holong na umbalga sian sada halak tu donganna, i ma molo olo ibana mate mangkophop donganna i.” (Joh. 15:13, Bibel siganup ari) Alai boi do jolma na mardosa maniru holong ni Jahowa dohot Jesus? Boi! Taulas ma songon dia hita boi mangulahon i.

Dijujui si Paulus do hita tingki didok, ”Sitiru Debata ma hamu, songon angka anak na hinaholongan! Jala parangehon hamu ma haholongon i songon Kristus i, na mangkaholongi hamu jala dilehon do dirina humongkop hita.” (Eps. 5:1, 2) Aha do lapatan ni ”parangehon hamu ma haholongon i”? Lapatanna ingkon tapatudu do holong ganup tingki. Ndang boi hita patuduhon holong holan di pangkataion sambing. Ingkon tapatudu do i di pambahenanta. Disurat si Johannes do, ”Hamu angka anaha, unang ma hatanta dohot dilanta mangkaholongi; naeng ma marhitehite pambahenan dohot hasintongan.” (1 Joh. 3:18) Umpamana, alani holongta tu Jahowa dohot tu dongan jolma, olo ma hita ’marbarita na uli taringot Harajaon’. (Mat. 24:14; Luk. 10:27) Na patuduhon holong do molo sabar hita, burju, jala rade manalpuhon hasalaan ni na asing. Taulahon ma poda ni Bibel na mandok, ”Ingkon masisesaan dosa do hamu sama hamu songon Tuhan i na manesa dosamuna.”​—Kol. 3:13, Bibel siganup ari.

Molo tapasingot na asing, na patuduhon holong do hita tu ibana. Umpamana, tingki tangis ianakhonna adong do natuatua na mangalehon sude pangidoan ni anakna i, asa unang tangis be. Alai natuatua na mangkaholongi ianakhonna, ndang sai mangalehon sude na pinangido ni anakna i. Songon i ma holong ni Debata di hita, ”diajar Tuhan i do na hinaholongan ni rohana”. (Heb. 12:6) Alani i, na patuduhon holong do hita molo tapasingot sasahalak. (Poda 3:11, 12) Ala halak na mardosa do hita, maol do patuduhon holong. Alai boi do hita lam tu dengganna patuduhon holong. Songon dia carana? Taulas ma tolu cara.

Na parjolo, pangido ma tu Debata tondi parbadia, na marparbuehon holong. Didok Jesus, ’lehonon ni Ama i do tondi parbadia tu angka na mangido i sian Ibana’. (Luk. 11:13) Pos ma rohanta molo tapangido tondi parbadia, sai na urupanNa do hita patuduhon holong. (Gal. 5:16) Umpamana, molo hamu sahalak sintua, pangido ma tondi parbadia laho mangurupi hamu patuduhon holong tingki mangalehon sipasingot sian Bibel tu na asing. Manang molo hamu sahalak natuatua, pangido ma tondi parbadia ni Debata asa unang muruk jala patuduhon holong tingki maminsang ianakhonmuna.

Na paduahon, rimangi ma songon dia Jesus patuduhon holong nang pe ndang denggan pambahenan ni halak tu ibana. (1 Ptr. 2:21, 23) Tingki adong halak na mambahen hansit rohamuna, manang ndang suman pambahenan ni halak tu hamu, rimangi ma, ’Songon dia do Jesus mangadopi i?’ Diulahon donganta si Leigh do on. Ibana mandok, ”Hea do dongan sakarejongku paroaroahon ahu tu dongan na asing marhite e-mail. Hansit do rohangku disi. Alai husungkun ma diringku, ’Songon dia do ahu maniru Jesus tingki mangadopi halak sisongon on?’ Dung hurimangi na diulahon Jesus, husalpuhon ma pambahenna i jala ndang huparsoalhon be i. Di pudian ni ari, huboto ma na di bagasan parsahiton do donganki jala marsak do ibana. Gabe huantusi ma, ra ndang sian rohana na sinuratna i. Maniru Jesus mangurupi ahu patuduhon holong tu dongan sakarejongku na mangulahon na so denggan tu ahu.” Molo tatiru Jesus, boi ma tongtong tahaholongi na asing.

Na patoluhon, patudu ma holong na rade mangurupi angka dongan. On ma na gabe tanda di angka sisean ni Jesus. (Joh. 13:34, 35) Dipatudu Jesus do holong sisongon on, jala ibana ma na gabe sitiruon na dumenggan tu hita. Boasa? Ditadingkon ibana do surgo, ”sian na nionjar ni rohana” jala ”pangoloi sahat tu na mate”. (Plp. 2:5-8, Bibel siganup ari) Molo tatiru holong ni Jesus na rade mangurupi na asing, boi ma pamingkirion dohot pangkilalaanta songon  ibana, manjumolohon na ringkot di dongan sian na ringkot di hita.

Godang do laba ni patuduhon holong. Taulas ma dua sian i:

• PARSADAAN NI DONGAN DI LIAT PORTIBI ON: Ala masihaholongan do naposo ni Debata, gabe pos ma rohanta tingki laho tu luat na asing. Dijangkon angka donganta do hita molo laho hita tu huria na didia pe. Las do rohanta mamboto na dihaholongi ’angka hahaanggi [manang, dongan sahaporseaon] na di portibi on’ do hita! (1 Ptr. 5:9) Holan di naposo ni Debata do dapotta holong sisongon on.

• DAME: ”Patuduhon hamu ma holong ni rohamuna marhite na masiurupan.” On mambahen gabe adong ”dame na pasadahon” di hita. (Eps. 4:2, 3, Bibel siganup ari) Tahilala do dame sisongon on di parpunguan dohot di kebaktian. Tontu, imbar do hadameon na tahilala sian portibi na sursar on. (Ps. 119:165; Jes. 54:13) Na patuduhon holong do hita molo marsitutu mardame tu na asing, jala on mambahen las roha ni Ama na di surgo i.​—Ps. 133:1-3; Mat. 5:9.

Si Paulus manurat, ”Na pauliulihon do ia holong ni roha.” (1 Kor. 8:1) Aha do lapatan ni on? Di 1 Korint bindu 13, na jotjot digoari ”Ende Taringot Holong”, dipatorang do songon dia holong boi pauliulihon. Holong mambahen sasahalak manjumolohon jala manarihon donganna. (1 Kor. 10:24; 13:5) Ala denggan maradophon na asing, manarihon dongan, sabar jala burju tu nasida, boi ma mambahen huria marsada dohot mambahen keluarga na parholong.​—Kol. 3:14.

Godang do cara laho patuduhon holong tu na asing, alai holongta tu Debata do na rumingkot. Boasa? Ala holongta tu Ibana mambahen hita marsada ni roha! Sude halak na marharoroan sian marragam suku, marga, bahasa rap manomba Jahowa jala masipauneunean. (Sep. 3:9) Marsitutu ma hita ganup ari patuduhon parange parbue ni tondi parbadia na tung mansai arga on.