JIOWA a amwékútú ewe aposel Paulus le makkeei usun ekkewe tiu napanap mi pop seni angangen ewe manaman mi fel. (Kal. 5:22, 23) Iir meinisin ekkena napanap mi amwarar, ra iteni uwaan ewe manaman mi fel. * (Ppii ewe pwóróus fan.) Pwal iir kinikinin “ewe manau mi fö” mi lamot ngeni Chón Kraist ar repwe napanapeni. (Kol. 3:10) Ren án efóch irá epwe uwaéch, a lamot epwe naféch únúman konik. Pwal ina usun ika a fetáléch ewe manaman mi fel lón manawen emén, iwe epwe pwal eáni ekkena napanap mi echipwér.​—Kölf. 1:1-3.

Tong, ina ewe áeúin napanap Paulus a makkeetiw. Ifa úkúkún aúchean ena napanap? Paulus a erá pwe ika ese eáni tong, iwe ‘esap wor aúchean.’ (1 Kor. 13:2) Nge met weween tong me ifa usun sipwe ámááraatá me pwári iteitan?

Inaamwo ika a fókkun weires ach sipwe áweweei wesewesen weween tong, nge Paipel a áweweei ekiekin me napanapen emén aramas mi eáni tong. Áwewe chék, emén aramas mi tong a “mosonotam o kirikiröch” me a “pwapwaäsini mine a let.” Atun emén a eáni tong, a “a engila fän mettoch meinisin, a lükü meinisin, a apilüküni meinisin, a tipeppos fän mettoch meinisin.” A alóllóól an tongei aramas, a enletin chúngú aramas, me i emén chiechi mi tuppwél ngeni chienan. Nge ika emén ese eáni tong, iwe i emén mi lólówó, a lamalam tekia, súfélúngaw, achéchééi pwisin i, me ese omusaaló tipisin ekkewe ekkóch. Sise mochen eáni ekkena sókkun napanap, sia mochen pwári tong mi enlet ngeni aramas, ewe sókkun tong “esap kütta püsin an.”​—1 Kor. 13:4-8.

“Kot mi tong.” (1 Joh. 4:8, Testament Mi Fö) Meinisin an angang me féfférún kewe ra pwári ena. An tong mi lapalap fán iten aramas, a pwá ren an tiinaato Jesus ngeni fénúfan pwe epwe riáfféú me máló fán itach. Ewe aposel Johannes a erá: “Kot a pwäri an echenikich ren an tinato Nöün Aleman lon fanüfan, pwe kich sipwe manau ren. Iei wewen chen: Esap pwe kich sia echeni Kot, nge i a echenikich o tinato Nöün we pwe i popun pwe ach tipis kana ra musala.” (1 Joh. 4:9, 10) Pokiten án Kot tong, a tongeni musoló tipisich kewe me sia tongeni eáni ápilúkúlúk me manaw.

Jesus a pwári an tongei aramas ren an fangóló manawan le féri letipen Kot. Aposel Paulus a erenikich: “Pokiten Jesus Kraist a föri mine Kot a mochen pwe epwe föri, kich meinisin sia küna limöch seni tipis pun a eäni asor püsin inisin fän eu chök.” (Ipru 10:9, 10) Ese wor emén aramas a tongeni pwári ena sókkun tong mi lap seni ena. Jesus a erá: “Esap wor eman a eäni chen mi lapalap seni ei chen, are eman a pölükü manauan fän iten chiechian kana.” (Joh. 15:13) Itá mi tufich ngeni aramas rese unuséch ar repwe áppirú án Jiowa me Jesus tong ra pwári? Ewer! Sipwe ppii ifa usun sia tongeni féri ena.

Iei án Paulus pesepes: “Oupwe appiru Kot, usun chok noun kewe mi achengicheng, oupwe fefetal lon tong, usun chok Kraist a pwal tongeikich, o a pwisin fangelo manauan fan asengesich.” (Ef. 5:1, 2, TF) Met weween ach sipwe “fefetal lon tong”? A wewe ngeni ach sipwe pwári tong fansoun meinisin. Ach tong esap chék lón kapas nge epwe fiti féffér. Johannes a makkeei: “Ämi nei kana, ach chen esap fis lon kapas chök, pwe pwal lon ach föför mi let.” (1 Joh. 3:18) Áwewe chék, sia afalafala “ewe Pworausen Manau usun ewe Mwün Kot” pokiten sia tongei Jiowa me chón óruch. (Mat. 24:14; Luk. 10:27) Sia pwal “fefetal lon tong” atun sia mosonottam, kirekiréch, me omusaaló tipisin ekkewe ekkóch. Sia apwénúetá án Paipel ei kapasen emmwen: “Oupwe fokun amusamusfengen usun ach Samol a amusala ämi tipis.”​—Kol. 3:13.

Ika sia fénéú are áwena ekkewe ekkóch, esap weween nge sise eáni tong. Áwewe chék, ren án néún ekkóch sam me in repwe chipeló le kechiw, ra kan féri met chék néúr we a mochen. Nge emén sam are in mi wesewesen tongei néún, epwe silei ineet epwe apasa aapw are ewer atun mi fich. Pwal ina chék usun, inaamwo ika Kot mi tong, nge a “fönöü iö a echeni.” (Ipru 12:6) Iwe a eú alen tong ach eáni fén fán úkúkéch atun mi fich. (SalF. 3:11, 12) Nge sipwe chemeni pwe kich meinisin chón tipis me fán chómmóng a nafangaw ach pwári tong. Nge kich meinisin sia tongeni feffeitá lón ach pwári tong. Ifa usun sipwe féri ena? Sipwe ppii úlúngát alen ach féri ena.

Áeúin, sipwe tingorei Kot an we manaman mi fel, ewe mi uwaani tong. Jesus a erá pwe Jiowa a “fangela Ngünmifel ngeni chokewe mi tüngorei.” (Luk. 11:13) Iwe sia tongeni lúkúlúk pwe ika sia iótek fán iten ewe manaman mi fel me mut ngeni an epwe álisikich, iwe epwe lallapóló ach pwári tong. (Kal. 5:16) Áwewe chék, ika en emén mwán mi ásimaw, ka tongeni tingor ewe manaman mi fel epwe álisuk le eáni tong atun kopwe éúréúra ekkewe ekkóch seni ewe Paipel. Are ika en emén sam are in, ka tongeni tingor álillisin án Kot we manaman mi fel pwe kopwe fénéú noum kewe fán tong nge esap fán song.

Oruuan, ekilonei ifa usun Jesus a pwári tong pwal mwo nge atun aramas ra eriáfféwú. (1 Pet. 2:21, 23) Atun aramas ra asongok are atun ra eáni féffér ese pwúng ngonuk, kopwe pwisin eisinuk, ‘Met Jesus epwe féri ika a fis ngeni ena?’ Emén fefin Chón Kraist itan Leigh a kúna pwe an eisini pwisin i ena kapas eis, a álisi an epwe ekiek mwen epwe féri och mettóch. A erá: “Fán eú, emén chienei chón angang a e-mail ngeni chienem kewe chón angang usun met mi ngaw usui me met ewe angang ua féri. A fókkun ámeteki letipei. Nge ua eisini pwisin ngang, ‘Ifa usun upwe tongeni áppirú Jesus lón féfférúi ngeni ei aramas?’ Mwirin ai ekieki itá met Jesus epwe féri, ua filatá le likitaló ekiekin ewe osukosuk me usap pwal alapaaló. Mwirin, ua silei pwe chienei na chón angang a fen kúna chómmóng osukosuk ren an semmwen me a chómmóng met a kan aúreki. Ua ekiekiló pwe eli esap kon ina weween met ewe neminna e makkeei usui. Ai ekieki án Jesus leenien áppirú ren an pwári tong pwal mwo nge atun aramas ra sótun asonga, a álisiei le pwal pwári ena esin tong ngeni chienei we chón angang.” Ika sia áppirú Jesus, sipwe chék pwáppwári tong ngeni ekkewe ekkóch.

Aúlúngátin, sipwe káé le pwári ewe esin tong mi pennúkú pwisin mochenin. Ina ewe esin tong mi esissillatá chókkewe mi enletin tapweló mwirin Jesus. (Joh. 13:34, 35) Pwisin Jesus a eáni ena esin tong me a isetiw leenien áppirú mi unuséch fán itach. Ifa usun? Ren an likitaló leenian lón láng, me “fangala meinisin mine a eäni” fán itach pwal mwo nge “tori mäla.” (Fil. 2:5-8) Atun sia áppirú án Jesus tong mi pennúkú pwisin mochenin, iwe ach ekiek me memmeef epwele  usun chék an, me sipwele akkomwa met mi lamot ngeni ekkewe ekkóch lap seni pwisin kich.

A wor chómmóng feiéchún ach pwári tong. Sipwe ppii ruu me leir.

• EÚ MWICHEICHEN PWIPWI WÓÓN UNUSEN FÉNÚFAN: Pokiten sia tongei emén me emén pwiich kewe, iwe sia silei pwe ese lifilifil menni mwichefel sipwe ló ngeni wóón unusen fenufan, nge repwe etiwakich fán tong. A ifa me feiéchún óm silei pwe mi wor tongómw me ren ewe mwicheichen pwipwi wóón unusen fénúfan! (1 Pet. 5:9) Sia chék tongeni kúna ena esin tong lein néún Kot kewe aramas.

• KINAMWE: “Oupwe echenifengenikemi ren ämi songomangfengen lefilemi.” Ena mettóch epwe suuki ngenikich ach sipwe pwapwaiti ewe ‘kinamwe mi rifengenikich.’ (Ef. 4:2, 3) Sia meefi ena kinamwe atun ach kewe mwich me mwichelap. Kese tipeeú ngeni pwe ese wor táppin ena esin kinamwe lón ei fenufan mi tipefesen? (Kölf. 119:165; Ais. 54:13) Atun sia achocho le kinamwe ngeni aramas, iwe sia pwári pwe sia enletin tongeer, me ina met epwe apwapwaai Semach we lón láng.​—Kölf. 133:1-3; Mat. 5:9.

Paulus a makkeei: “tong a aufichi-kich-eta.” (1 Kor. 8:1) Met weween ena? Lón 1 Korint sópwun 13, ewe ekkóch ra kan eita ngeni “Psalm of Love,” a áweweei ifa usun tong a aúfichikichetá. Tong a kan akakkomwa mochenin ekkewe ekkóch me chúngú met mi lamot ngeniir. (1 Kor. 10:24; 13:5) Pokiten tong a kan ekieki ekkewe ekkóch, chúngúúr, mosonottam, me kirekiréch, iwe a apéchékkúlatá ewe tong lón famili me apéchékkúla tipeeúin ekkewe mwichefel.​—Kol. 3:14.

A chómmóng alen ach sipwe pwári ach tongei aramas, nge ach tongei Kot ina met mi kon aúchea me ina ewe sókkun tong mi apéchékkúlakich seni meinisin. Pwata? Pokiten ach tong fán itan a eririfengenikich! Aramas mi sókkopat nónnómur, fénúer, me sókkofesen ar fós, ra fel ngeni Jiowa me angangfengen “fän tipeeu.” (Sef. 3:9) Ousipwe tipeppós le pwári ena napanap mi fókkun aúchea iteiten rán, ewe mi pop seni án Kot we manaman mi fel.