THIANG thlarau nih a chuahtermi ziaza pakua kong kha lamkaltu Paul nih a ṭial. (Gal. 5:22, 23, NW) Mah duh a nung tukmi ziaza hna cu “thlarau theitlai” tiah auh an si. * Mah theitlai cu Khrihfa a simi nih kan i hruk awk a simi “mithar” ah aa telmi a si. (Kol. 3:10) Ti ṭha tein a hmumi thingkung pakhat cu a thei a tlai bantukin mi pakhat cungah thiang thlarau zalong tein rian a ṭuan khawh ahcun mah theitlai hna hi a tlai ve lai.—Salm 1:1-3.

Paul nih a langhtermi thlarau theitlai i a pakhatnak ziaza cu dawtnak a si. Mah ziaza cu zeitluk in dah man a ngeih? Paul nih dawtnak ka ngeih lo ahcun “zeihmanh” ka si lo tiah a ti. (1 Kor. 13:2) Dawtnak timi cu zeidah a si, zeitindah kan ṭhanter khawh i nifate zeitindah kan langhter khawh?

Dawtnak kong kha a dikthliar in fianter cu a har tuk ko nain Baibal nih dawtnak langhter khawh ning kha a langhter. Tahchunhnak ah, dawtnak a ngeimi cu “thlachiat a ruat i mi cungah zaangfahnak a ngei,” cun “biatak tu ah khan aa lawm.” Mi pakhat nih dawtnak a ngeih tikah “a inkhawh lomi zeihmanh a um lo, zumhnak a ngeihmi le ruahchannak a ngeihmi le inkhawhnak a ngeihmi cu donghnak an ngei lo.” Midang kha lungtak tein a dawt hna i a zohkhenh hna. Cun zumhawk a tlakmi hawikom zong a si. Asinain dawtnak a ngeih lo ahcun nahchuahnak a ngei lai, aa porhlaw lai, tla bulbal in khua a sa lai, amah zawn lawng aa ruat lai i mi ngaihthiam a duh lai lo. Mah bantuk a ṭha lomi ziaza kha si loin ‘mah zawn ruat lo’ dawtnak taktak kha langhter kan duh.—1 Kor. 13:4-8.

“Pathian cu dawtnak a si.” (1 Johan 4:8) Mah kha a tuahsernak kip ah a lang. A ngan bikmi a dawtnak cu mi vialte kan caah harnak in buin thih awkah Jesuh kha vawlei ah a rak thlahmi hi a si. Lamkaltu Johan nih hitin a chim: “Pathian nih a kan dawtnak a langhter ning cu hitihin a si: a Fapa ngeihchun kha vawlei ah hin a run thlah i amah thawngin nunnak kan ngei lai. Dawtnak ka timi cu, Pathian kan rak dawt hi a si lo, amah nih a kan dawt i kan sualnak ngaihthiamnak ding caah a Fapa kan sinah a run thlah hi a si.” (1 Johan 4:9, 10) Pathian dawtnak ruangah kan sualnak ngaihthiam kan si i ruahchannak le nunnak kan ngei kho.

Jesuh nih Pathian duhnak ningin a nunnak a peknak thawngin mi vialte a kan dawt kha a langhter. Lamkaltu Paul nih hitin a ti: “Jesuh Khrih nih Pathian duhmi kha a tuah caah, voikhat ah za lakin amah a pum aa pekchanhnak thawng khan kannih cu kan sualnak in a kan thenh cang.” (Heb. 10:9, 10) Zei bantuk minung hmanh nih mah nakin a ngan deuhmi dawtnak kha an langhter kho lo. Jesuh nih hitin a ti: “Mi nih a hawile caah dawtnak ngan bik a ngeih khawhmi cu an ca i a nunnak pek hi a si.” (Johan 15:13) Jehovah le Jesuh nih an langhtermi dawtnak kha mitlinglo a simi minung nih kan i  zohchunh kho hna maw? Kan i zohchunh khawh. Zeitindah kan i zohchunh khawh hna ti kha i ruah hna u sih.

Paul nih hitin thazaang a kan pek: “Pathian dawtmi fa nan si caah amah bantuk kha si i zuam u. Khrih nih a kan dawt i a nunnak kha kan caah a pek bantukin kannih zong kan nunnak cu dawtnak nih a uk ve awk a si.” (Efe. 5:1, 2) ‘Dawtnak i ukter’ timi cu zei sullam dah a si? Mah cu a zungzal in dawtnak langhter kha a chim duhmi a si. Midang kan dawt hnanak kha kan kaa lawng si loin kan tuahsernak in kan langhter. Johan nih hitin a ṭial: “Ka fale hna, kan i dawtnak hi hmur le kaa lawnglawng a si awk a si lo, dawtnak taktak, thil tinak ah a langmi dawtnak a si awk a si.” (1 Johan 3:18) Tahchunhnak ah, Jehovah le kan minunghawi kan dawt hna caah “Vancung Pennak kong thawngṭha” kha kan chim. (Matt. 24:14; Luka 10:27) Lungsaunak, zaangfahnak le ngaihthiamnak kan langhternak thawngin ‘dawtnak kha kan i ukter.’ “Bawipa nih aan ngaihthiam hna bantukin pakhat le pakhat nan i ngaithiam lai” timi Baibal ruahnak cheuhnak kha kan zulh.—Kol. 3:13.

Midang ruahnak kan cheuh hna i kan chimhhrinh hna tikah kan daw hna lo tinak a si lo. Tahchunhnak ah, nulepa cheukhat nih an fale an ṭah tikah an ngam nakhnga an halmi hna paoh kha an pek men hna lai. Asinain fale a daw taktakmi nih cun a herh tikah a herh ningin an chimhhrinh hna. Cu bantukin Pathian cu dawtnak a si ko nain “Bawipa nih a dawtmi hna cu dan a tat tawn hna.” (Heb. 12:6) Cucaah dawtnak kan ngeih ahcun a herh tikah a herh ningin kan cawnpiak hna lai. (Ptb. 3:11, 12) Asinain kannih cu misual kan si i dawtnak kha a zungzal in kan langhter kho lo ti kha i cinken. Cucaah dawtnak langhternak ah kan ṭhancho zungzal a hau. Zeitindah kan tuah khawh? Ṭhancho khawhnak lam pathum kha i ruah hna u sih.

Pakhatnak ah, dawtnak a chuahtermi Pathian thiang thlarau kha hal. Jesuh nih “thiang thlarau a halmi cu” Jehovah nih a pek hna tiah a ti. (Luka 11:13) Cucaah Pathian sinah thiang thlarau kan hal i a kan bawmhnak kan cohlan a si ahcun dawtnak kan ngei chin lengmang lai ti kha kan zumh khawh. (Gal. 5:16) Tahchunhnak ah, Khrihfa upa na si ahcun Baibal in midang ruahnak na cheuh hna tikah thiang thlarau na hal khawh. Asiloah nulepa na si ahcun nan fale kha thinhun buin si loin dawtnak he nan cawnpiak khawh hna nakhnga thiang thlarau nan hal khawh.

Pahnihnak ah, midang nih a ding loin an pehtlaih lio hmanhah Jehsuh nih dawtnak a langhter ning kha thukpi in ruat. (1 Pet. 2:21, 23) Mi pakhatkhat nih na thin aan hunter asiloah a ding loin pehtlaih na si tikah “Jesuh siseh law zeidah a tuah hnga? tiah i hal. Mah biahalnak nih unaunu Leigh kha thil a tuah hlanah ṭha tein ruah hmasa awkah a rak bawmh. Hitin a chim: “Voikhat cu ka rian ṭuanṭihawi pakhat nih ka ṭhatlonak kong le ka rian ṭuanning kong kha a dang kan rian ṭuanṭihawi pawl sinah e-mail in ca a kuat hna. Mah nih ka lung a ka fahter tuk. Asinain ‘mah rian ka ṭuanṭihawi he i pehtlaihnak ah Jesuh kha zeitindah kaa zohchunh khawh?’ tiah kaa hal. Jesuh nih a tuah hngami kong ka ruah hnuah zeihmanh tuah lo awkah bia ka khiah. A hnuah, anih cu a zual tukmi zawtnak a ngei i lungretheihnak tampi a tong ti kha kan hun hngalh. Cucaah timh ciammam tein cakuat kha a ṭialmi a si lo tiah biachahnak ka tuah. Jesuh kong ruahnak nih ka thin a hun tuk lio hmanhah dawtnak langhter dingin a ka bawmh.” Jesuh kan i zohchunh ahcun midang cungah dawtnak kan langhter zungzal lai.

Pathumnak ah, mah zawn ruat lo dawtnak langhter awkah cawng. Mah bantuk dawtnak cu Jesuh zultu taktak kan si a langhtertu a si. (Johan 13:34, 35) Jesuh theng nih mah dawtnak kha a rak langhter i kan caah zohchunh awk ṭha a chiah. Zeitin in dah? Vancung in a rung ṭum i “thih tiangin” zeizong vialte kha “amah lungtho tein” a hlawt dih. (Fil. 2:5-8) Jesuh i mah zawn ruat lo dawtnak kha kan i zohchunh tikah kan  ruahnak le kan intuarnak cu amah he kan i lo lai i kanmah herhmi nakin midang herhmi kha biapi deuh ah kan chiah lai.

Dawtnak langhternak nih ṭhatnak tampi a chuahter. Tahchunhnak pahnih in i ruah hna u sih.

• Vawleicung Pumpi ah a Ummi Unaurual: Pakhat le pakhat kan i dawt caah vawleicung ah a ummi zei bantuk Khrihfabu i kan tlawn hmanhah unau pawl nih nuam tein an kan conglawmh lai ti kha kan hngalh. ‘Vawleicung khuazakip i a ummi zumhnaklei in kan unau a simi hna’ sinin dawtnak kan hmuhmi cu thluachuah taktak a si. (1 Pet. 5:9) Cu bantuk dawtnak cu Pathian miphun lak lawngah a ummi a si.

• Daihnak: ‘Pakhat le pakhat kan i bawm i dawtnak kan langhter,’ mah nih ‘daihnak hri khan fek tein a kan ṭem.’ (Efe. 4:2, 3) Mah daihnak kha pumhnak le civui hna in kan hmuh khawh. Aa ṭhencheumi vawlei ah cu bantuk daihnak cu aa thleidang tukmi a si ko lo maw? (Salm 119:165; Isa. 54:13) Midang he rem tein kan umnak thawngin kan dawt hnanak kha kan langhter i mah nih vancung kan Pa lung a lawmhter.—Salm 133:1-3; Matt. 5:9.

Paul nih ‘dawtnak nih a sersiam’ tiah a ti. (1 Kor. 8:1) Mah cu zeidah a chim duhmi a si? “Dawtnak hla” tiah an auhmi 1 Korin dal 13 ah dawtnak a sersiammi kong kha Paul nih a fianter. Dawtnak nih midang ṭhatnak kha a kawl. Midang an herhmi zong kha a hngalh. (1 Kor. 10:24; 13:5) Cun dawtnak cu zawnruahnak a ngei, a lung a sau i zaangfahnak a ngeih caah chungkhar ah dawtnak a umter i Khrihfabu ah lungrualnak a umter.—Kol. 3:14.

Midang cungah dawtnak langhter khawhnak lam tampi a um, asinian Pathian dawtnak cu a sunglawi bikmi le thazaang petu bik a si. Zeicah? Pathian dawtnak nih kan lung a rualter. Hnulei sining, miphun le holh aa lo lomi hna nih “lungkhat tein” Jehovah kha hmuhkhat te ah kan biakṭi. (Zef. 3:9) Pathian thiang thlarau nih a chuahtermi mah a sunglawi tukmi theitlai kha nifate langhter awkah biakhiak hna u sih.