YEHOFA meke apostel Pawlesi sikiifi neigin manii di a santa yeye e meke sama abi * (Luku a maiki a ondoo.) (Galasiyasama 5:22, 23). A den manii ya Kelesten mu abi tu fu man toon „nyun sama” (Kolosesama 3:10). Leti enke fa wan bon e meke nyanyan te ai fende wataa ala yuu, a so wi o man abi den manii di Kelesten mu abi te wi e meke a santa yeye tii wi.​—Psalm 1:1-3.

A fosi manii di Pawlesi kai, a lobi. Saide lobi de taanga fanowdu? Pawlesi taki efu a á lobi taawan, da den sani di a be e du be o de „fu soso” (1 Korentesama 13:2). Ma san a lobi? San o yeepi u fu lobi taawan? Fa u sa soi ala dei taki u lobi taawan?

Winsi fa a taanga fu taki pilisisi san a lobi, tokuso Beibel e soi fa wan sama di lobi taawan e denki anga fa ai du sani. Beibel taki wan sama di lobi taawan „abi pasensi anga bun manii”. Sowan sama e „piisii anga sani di tuu”. „A abi boo anga ala sani. Ai biibi ala sani, ai howpu ala sani, ai holidoo winsi san e pasa.” Ai fii gi taawan, ai booko en ede anga taawan. Te wan sama lobi wan taawan a nai gwe fika en. Ma wan sama di á lobi taawan e dyalusu, a abi heimembee, ai du sani di á fiti, a nai booko en ede anga taawan, boiti dati a nai gi taawan paadon. Wi á mu abi den takuu manii ya, ma u mu meke moiti fu lobi taawan. Efu u lobi taawan tuutuu, ’u ná o suku wini fu u wawan’.​—1 Korentesama 13:4-8.

„Gadu a lobi” (1 Yohanisi 4:8). Ala den sani di a taki anga den sani di a du, e soi taki en na lobi. A moo gaan sani di Gadu du fu soi taki a lobi u, a di a sende en manpikin Yesesi kon a goontapu fu dede gi u. Apostel Yohanisi taki: „Na a fasi ya Gadu soi taki a lobi u di a sende a wan kodo manpikin fi en kon a goontapu, fu a sa yeepi u fu fende a libi. A lobi ya á wani taki a wi be lobi Gadu, ma neen be lobi wi. Neen meke a sende en Manpikin kon enke wan ofaandi di e tapu den sondu fu u. A ofaandi ya e meke wi anga Gadu kon bun baka” (1 Yohanisi 4:9, 10). A di Gadu lobi u meke ai gi u paadon fu u sondu. Na a sani ya meke wi abi a howpu fu libi fu teego.

Yesesi soi taki a lobi libisama. A gi en libi fu du san Gadu wani. Apostel Pawlesi taki: „Na a ’wani’ fu Gadu ya, meke u kon santa, fu di Yesesi Kelestesi gi en sikin enke wan ofaandi fu ala ten, wan leisi namo” (Hebrewsama 10:9, 10). Nawan libisama poi soi lobi moo Yesesi. A taki: „A moo gaan lobi di wan sama sa soi, a fu dede gi den mati fi en” (Yohanisi 15:13). Wi enke sondu libisama poi waka a Yehofa anga Yesesi baka? Eeye. Meke u luku fa u sa du a sani ya.

Pawlesi gi wi a taanga-sikin taki: „Enke lobi pikin fu Gadu, da u mu du sani enke fa u sabi taki Gadu seefi be o du sani. U mu tan lobi useefi, leti enke fa Kelestesi be lobi u. A dede gi u. A gi en libi enke wan ofaandi di e sumee switi gi Gadu” (Efeisesama 5:1, 2). San a wani taki fu „tan lobi useefi”? A wani taki u mu soi lobi ala yuu. U nai taki a mofu namo taki u lobi taawan, ma u du e soi tu taki u lobi taawan. Yohanisi taki: „Pikin, wi á mu e taki a mofu namo taki u lobi useefi, ma u mu du sani anga wan kiin ati fu soi taki u lobi useefi” (1 Yohanisi 3:18). Wi e paati a „bun nyunsu fu a Kownukondee” fu di u lobi Yehofa anga taa sama (Mateyesi 24:14; Lukasi 10:27). Wi e soi taki u „lobi useefi” tu te wi abi pasensi, bun manii anga te wi e gi taawan paadon. Wi e du san Beibel taki. A taki: „Leti enke fa Yehofa e gi u paadon anga en hii ati, a so useefi mu gi taawan paadon tu.”​—Kolosesama 3:13.

Te u lobi wan sama, da dati á wani taki u ná o taki anga en te a du wan sani di á bun. Son mma anga dda e du ala san den pikin wani, fu di den á wani a pikin kee. Ma wan sama di lobi en pikin tuutuu, ná o du a sani ya efu a á de fanowdu. A so a de tu taki winsi fa Gadu a lobi, toku Beibel taki: „Na a sama di Yehofa lobi ai puu kaasi gi, leti enke fa wan dda e du anga wan manpikin di a lobi” (Hebrewsama 12:6). A sani ya e soi taki a de fanowdu fu poti taawan a pasi (Odo 3:11, 12). Fu di wi a sondu sama meke son leisi wi e feegete fu soi lobi. Neen meke ala u mu meke moiti fu soi lobi. Fa u sa du a sani ya? Meke u luku dii fasi fa u sa du a sani ya.

A fosi sani, begi Gadu en santa yeye. Na a santa yeye e yeepi sama fu abi lobi. Yesesi taki Yehofa e gi „den sama di akisi en a santa yeye” (Lukasi 11:13). Neen meke u sa biibi taki efu u begi Yehofa fu a gi u santa yeye, neen u meke moiti, a o yeepi u fu moo lobi taawan (Galasiyasama 5:16). Efu yu a wan owluman, i sa begi Yehofa en santa yeye fu a yeepi i fu soi moo lobi, te yu e koboloiki a Beibel fu yeepi taawan. Efu yu abi pikin, i sa begi Gadu fu a gi i en santa yeye te yu o yeepi den te den á tyai denseefi bun. A sani ya o yeepi i fu leli en anga lobi.

Du fu tu sani, pakisei fa Yesesi soi taki a lobi taawan winsi den be e du ogii anga en (1 Peitilisi 2:21, 23). Te wan sama du wan sani di meke yu ati boon efuso te wan sama e libi ogii anga i, akisi iseefi taki: ’San Yesesi be o du efu a sani ya be miti en? Wan sisa den e kai Leigh taki te a akisi enseefi a sani ya, da ai fende a okasi fu denki fosi a du wan sani. A sisa ya taki: „Wan leisi wan fu den sama di mi anga en be e wooko sende wan biifi gi wan taa wookoman. A be kuutu mi. A fende taki mi nai du mi wooko bun. A sani de be hati mi tuutuu. Ma mi be akisi miseefi taki: ’Fa mi sa waka a Yesesi baka anga a sani di miti mi ya?’ Baka di mi teke ten pakisei san Yesesi be o du, mi fika a taki. Bakaten, mi kon fusutan taki a wookoman di be kuutu mi, be lai booko-ede, a be e siki tu. A so mi be kon fusutan taki kande a ná fu seefi a be wani du sani fu hati mi. Di mi pakisei fa Yesesi be e soi lobi gi taawan winsi den be e du ogii anga en, a yeepi mi fu mi soi lobi gi a wookoman ya tu.” Efu u waka a Yesesi baka, ala yuu wi o soi taawan taki u lobi den.

Du fu dii, yu á mu e denki iseefi namo, ma i mu meke moiti fu soi lobi gi taawan. Den tuutuu bakaman fu Yesesi lobi denseefi na a fasi ya (Yohanisi 13:34, 35). Yesesi seefi be e soi a lobi ya. U sa waka neen baka. Fa a du a sani ya? A gwe fika hemel, anga „ala san a be abi” fu wi ede. A „dede” gi u tu (Filipisama 2:5-8). Efu wi e meke moiti fu lobi taawan enke  Yesesi, wi o denki enke fa ai denki. Wi o du sani enke en. Wi o poti san taawan abi fanowdu a fesi tu.

A omen wini a abi te wi e soi lobi. Meke u taki fu tu:

• WI ABI BAALA ANGA SISA A HII GOONTAPU: Winsi pe fu goontapu u go, u sabi taki den baala anga sisa fu u, o libi bun anga u. A fu di u lobi useefi meke wi e libi so. Wi e fii bun te wi e si fa baala anga sisa a hii goontapu lobi denseefi. A sani ya a wan belesi tuutuu (1 Peitilisi 5:9). Na a foluku fu Gadu wawan poi soi a lobi ya.

• FREIDE: Efu wi „abi boo anga taawan” wi o man „libi na a wan” anga den (Efeisesama 4:2, 3). Wi e si taki a foluku fu Gadu e libi na a wan, te u go a komakandaa, kelen-komakandaa anga konkelesi. I nai teke en fu bigi te i luku a fasi fa wi e libi na a wan aini a goontapu ya noh? (Psalm 119:165; Yesaya 54:13) Te wi e libi na a wan anga taawan, wi e soi taki u lobi den tuutuu. A sani ya e meke Yehofa piisii.​—Psalm 133:1-3; Mateyesi 5:9.

Pawlesi taki: „Lobi e gi sama taanga-sikin” (1 Korentesama 8:1). San a sani ya wani taki? Son sama e kai 1 Korentesama kapitel 13, a „A psalm fu lobi”. A tekisi ya e soi fa lobi e gi sama taanga-sikin. Lobi e booko en ede anga san taawan abi fanowdu (1 Korentesama 10:24; 13:5). Fu di wan sama di abi lobi e denki fosi a du sani, fu di ai booko en ede anga taawan, a abi pasensi anga bun manii. Ai meke osufamii lobi denseefi. A sani ya o meke a kemeente libi na a wan tu.​—Kolosesama 3:14.

A omen fasi de fa u sa soi taawan taki u lobi den. Ma a lobi di u lobi Gadu na a moo gaan lobi di de. Saide? Bika a di u lobi Gadu meke u man libi na a wan anga taawan. Na a sani ya e meke sama fu ala nasi, tongo anga foluku e dini Yehofa „makandaa” (Sefanya 3:9). Meke u meke moiti fu soi a moin fasi ya ala dei, di a santa yeye fu Gadu e meke sama abi.