CHYOI pra ai wenyi a majaw byin pru wa ai atsam ningja jahku a lam ka na matu Yehowa gaw kasa Pawlu hpe lam matsun ya wa ai. (Galati 5:​22, 23) Dai atsam ningja ni yawng hpe “wenyi a asi” ngu shaga ai. * Ndai asi gaw Hkristan ni hpun ging ai “gawng shing-yan ningnan” hta mung lawm ai. (Kolose 3:10) Hka law law lu ai hpun gaw asi si lu ai zawn, anhte a prat hta chyoi pra ai wenyi lu na nga yang, dai atsam ningja ni nga na re.​​—⁠​Shakawn 1:​1-3.

Pawlu tsun wa ai atsam ningja ni kaw nna shawng nnan gaw tsawra myit re. Ndai atsam ningja gaw kade daram manu dan ai kun? Tsawra myit n nga yang, “hpa n rai nga nngai” nga nna Pawlu tsun wa ai. (1 Korinhtu 13:​2) Rai yang, tsawra myit ngu ai gaw hpa rai a ta? Dai hpe gara hku shalat lu nna, shani shagu gara hku madun lu na ta?

Tsawra myit a lam tup hkrak tsun na matu gaw n loi tim, tsawra myit rawng ai wa a myit mang ai lam hte galaw hkawm sa ai lam, Chyum Laika hta tsun da ai. Ga Shadawn, tsawra myit rawng ai wa gaw ‘myit galu kaba nga ai, matsan dum nga ai.’ Bai nna, “yawng mayawng hpe hkam mana nga ai, galoi mung kam sham nga ai, galoi mung myit mada nga ai, galoi mung hkam sharang nga ai.” Shi gaw kaga ni hpe grai tsawra ai, lanu lahku ai, sadi dung ai. Tsawra myit n rawng ai wa chyawm gaw, manawn ai, gumrawng ai, sari n rawng ai, tingkyeng myit nga ai, mara n raw ya ai. Dai zawn n kaja ai atsam ningja ni hpe madun na malai, anhte ni gaw “tinang a akyu n tam ai” jet ai tsawra myit hpe madun mayu ga ai.​​—⁠​1 Korinhtu 13:​4-8, NW.

“Karai Kasang gaw tsawra ai myit rai nga ai.” (1 Yawhan 4:​8) Shi galaw ai lam yawng gaw dai hpe sakse madun nga ai. Shinggyim masha ni a matu kaba htum tsawra myit madun ai lam gaw, shi a kasha hpe n ni n kri hkrum let si hkam na matu mungkan ga de shangun dat ai re. Kasa Yawhan ndai hku tsun ai: “Karai Kasang gaw shi a Kasha shingtai hpe mungkan ga de shangun dat wu ai rai nna, anhte gaw shi a marang e ahkrung nga ma li ga, nga ai rai nna, dai gaw anhte hta e, Karai Kasang a tsawra ai myit dan pru ai lam rai nga ai. Anhte gaw, Karai Kasang hpe tsawra nga ga ai n rai, shi hkum nan anhte hpe tsawra nga ai hte, anhte a yubak a matu mara gawng malai hkungga tai u ga, shi a Kasha hpe shangun dat ai lam gaw, tsawra ai lam madung rai nga ai.” (1 Yawhan 4:​9, 10) Karai Kasang a tsawra myit a majaw, mara raw hkrum ai, myit mada lam nga wa nna htani htana asak lu wa ai.

Yesu gaw Karai Kasang ra sharawng ai hpe galaw na matu, shi a asak hpe sak jaw ai hku nna shinggyim masha ni hpe tsawra ai lam madun wa ai. Kasa Pawlu ndai hku tsun ai: “Dai myit ra ai hku a gawp e, Yesu Hkristu a hkum hkrang hpe lang lata sha nawng ya ai a marang e, anhte gaw shachyoi shapra ai hkrum sa gaw ai.” (Hebre 10:​9, 10) Shinggyim masha kadai mung dai hta grau ai tsawra myit n lu madun ai. “Jinghku wa a matu tinang a asak nawng kau hkra tsaw ra ai myit hta, grau kaba ai tsaw ra ai myit gaw kadai hta mung n rawng nga ai” nga nna Yesu tsun  wa ai. (Yawhan 15:13) N hkum tsup ai ni gaw, Yehowa hte Yesu madun wa ai tsawra myit hpe kasi la lu na kun? La lu ai. Gara hku nna kun ngu ai hpe matut bawng ban yu ga.

“Tsawra nga ai kashu kasha hte maren, Karai Kasang a samnang ai ni tai nga mu. Hkristu gaw nanhte hpe tsawra ai hte, . . . nanhte a matu mara nawng kau ya ai hte maren, nanhte mung tsawra ai hta a hkawm nga mu” nga nna kasa Pawlu n-gun jaw wa ai. (Ehpesu 5:​1, 2) “Tsawra ai hta a hkawm nga mu” ngu ai gaw hpa lachyum rai a ta? Tsawra myit hpe galoi shagu madun ra ai ngu tsun mayu ai re. Kaga ni hpe tsawra ai ngu nna ntsa lam sha tsun na n re. Anhte a galaw ai lam hku nna madun na re. Yawhan ndai hku ka wa ai: “Shu sha ni e, ga hte shinglet hte sha n rai, amu bungli hte, teng man ai ga hte, anhte tsawra nga ga.” (1 Yawhan 3:18) Ga shadawn, “mungdan a kabu gara shiga” hpe hkaw tsun ai hku nna, Yehowa hte kaga ni hpe tsawra ai lam madun ga ai. (Mahte 24:14; Luka 10:27) Myit galu ai, matsan dum ai, mara raw ya ai hku nna mung anhte “tsawra ai hta a hkawm nga” ga ai. “Madu nanhte a mara hpe raw dat kau ya ai hte maren, nanhte mung galaw nga mu” ngu ai Chyum Laika lam matsun hpe anhte hkan sa ga ai.​​—⁠​Kolose 3:​13.

Kaga ni hpe anhte sharin shaga ai, shading sharai ai shaloi, shanhte hpe n tsawra ai ngu ai lachyum n re. Ga shadawn, ma langai hkrap nga ai shaloi hkrap ai zim mat na matu, ma hpyi ai yawng hpe kanu kawa nkau galaw ya ma ai. Raitim, kasha hpe gaja nan tsawra ai kanu kawa ni chyawm gaw, ra ang yang sharin shaga ma ai. Dai zawn sha, Karai Kasang gaw tsawra ai myit ngu tsun ai raitim, shi “tsawra ai wa hpe sharin” shaga ai. (Hebre 12:​6) Dai majaw, ra ang ai shaloi sharin shaga ai gaw tsawra myit re. (Ga Shagawp 3:​11, 12) Anhte yawng gaw yubak masha ni re ai majaw, tsawra myit hpe kalang lang n lu madun ai. Dai majaw, tsawra myit madun ai lam hta rawt jat ra ai. Gara hku nna kun? Lam masum hpe hkaja yu ga.

Langai, tsawra myit byin pru shangun ai chyoi pra ai wenyi lu na matu akyu hpyi u. Yehowa gaw “hpyi ai ni hpe dai chyoi pra ai Wenyi jaw na” nga nna Yesu tsun wa ai. (Luka 11:13) Chyoi pra ai wenyi lu na matu akyu hpyi nna, anhte hpe karum na matu ahkang jaw na nga yang, grau grau nna tsawra chye ai ni tai wa na hpe kam mai ai. (Galati 5:16) Ga shadawn, nang gaw myitsu salang rai yang, kaga ni hpe tsawra myit hte Chyum Laika hku sharin shaga lu na matu, chyoi pra ai wenyi hpyi shawn mai ai. Kanu kawa rai yang, ma ni hpe pawt ai hku n re ai sha, tsawra myit hte sharin shaga lu na matu, chyoi pra ai wenyi hpyi shawn mai ai.

Lahkawng, kaga ni n tara ai hku galaw yang pyi, shanhte hpe Yesu gara hku tsawra myit madun wa ai hpe myit yu u. (1 Petru 2:​21, 23) Marai langai ngai gaw na ntsa shut hpyit ai (sh) n tara ai lam hkrum ai nga yang, ‘Yesu nga yang gara hku galaw na’ ngu nna tinang hkum tinang san u. Nauna Le gaw, dai hku san wa ai majaw lama ma n galaw shi yang shawng myit wa chye ai. Shi ndai hku tsun ai: “Ngai na bungli manang langai gaw, kaga bungli manang ni hpang de, ngai na n kaja ai lam ni ka da ai e-mail sa dat ai shaloi, ngai grai hkam sha wa ai. Raitim, tinang hkum tinang ndai hku san wa ai: ‘shi hte kanawn mazum ai hta Yesu hpe ngai gara hku kasi la lu na kun?’ Yesu nga yang gara hku galaw na hpe sumru ngut ai hpang, dai lam hpe ahkyak n shatai sana matu dawdan kau ai. Dai bungli manang wa gaw, hkam kaja lam grai sawng taw nna, myit daw myit hten nga ai hpe hpang de she chye dat ai. Dai majaw, shi dingsang ka mayu nna e-mail sa dat ai n re ai ngu nna ngai hkam la kau ai. Tsawra myit madun ai Yesu a kasi ningli hpe sawn sumru ai gaw, nye ntsa n kaja tim, shi hpe tsawra myit madun na matu karum ya wa ai.” Madu Yesu hpe kasi la na nga yang, galoi mung tsawra myit madun lu na re.

Masum, tingkyeng akyu n tam ai tsawra myit madun na matu sharin la u. Ndai tingkyeng akyu n tam ai tsawra myit gaw, Yesu a sape ajet ni hpe garan ginhka ya ai masat dingsat re. (Yawhan 13:​34, 35) Madu Yesu mung dai tsawra myit nga nna, kaja htum kasi madun wa ai. Gara hku nna kun? Sumsing lamu hpe kau da nna, shi lu ma lu yawng hpe mung kau da let, “si ai du hkra” anhte a matu sak jaw wa ai hku nna re. (Hpilipi 2:​5-8) Yesu a tingkyeng akyu n tam ai  tsawra myit hpe kasi la ai shaloi, anhte a myit mang ai lam, hkam sha ai lam ni gaw shi hte grau bung wa nna, kaga ni a akyu hpe tam mayu wa na re.

Tsawra myit madun yang, akyu law law hkam la lu ai. Ga shadawn lahkawng hpe yu yu ga:

• Mungkan Grup Hpunau Nauna Ni: Anhte shada da tsawra ai majaw, mungkan ting hta nga ai gara nawku hpung de sa ai raitim, alum ala hkap tau la na re. Anhte gaw mungkan ga e nga ai nhpu nnau ni a tsawra myit lu da ai hpe chye lu ai gaw shaman chyeju re. (1 Petru 5:​9) Dai zawn tsawra myit hpe, Karai Kasang a masha ni lapran hta sha mu lu ai.

• Simsa Lam: “Tsawra myit hpe madun nna shada da hkam mana” ai gaw “ngwi pyaw ai makyit sumri a marang e, . . . myit hkrum kahkyin gumdin” na matu karum ya ai. (Ehpesu 4:​2, 3, JCLB) Dai ngwi pyaw lam hpe anhte a zuphpawng ni, zuphpawng kaba ni hta mu lu ai. Dumbru dumbra byin nga ai ya aten hta, dai zawn ngwi pyaw lam gaw grai laklai ai. (Shakawn 119:165; Esaia 54:13) Kaga ni hte simsa na matu anhte shakut ai gaw, shanhte hpe tsawra ai lam madun ai rai nna, Karai Kasang hpe mung myit shapyaw ya lu ai.​​—⁠​Shakawn 133:​1-3; Mahte 5:​9.

‘Tsawra myit gaw, shadaw shangang chye ai’ ngu Pawlu ka wa ai. (1 Korinhtu 8:​1) Dai gaw hpa lachyum ta? “Tsawra Myit Hpe Shakawn Da Ai Ga” ngu shamying da ai 1 Korinhtu daw kaba  13 hta, tsawra myit gaw gara hku shadaw shangang ya ai lam shi sang lang da ai. Tsawra myit gaw, kaga ni a akyu hpe tam ai. Kaga ni a ra kadawn ai lam ni hpe lanu lahku ya ai. (1 Korinhtu 10:24; 13:​5) Tsawra myit gaw atsawm chye myit ai, myit tau ya ai, myit galu ai, matsan dum chye ai majaw, ngwi pyaw ai dinghku hte kahkyin gumdin ai nawku hpung hpe byin tai shangun ai.​​—⁠​Kolose 3:14.

Kaga ni hpe tsawra myit madun lu na lam law law nga ai raitim, Karai Kasang hpe tsawra ai lam gaw manu dan dik htum rai nna, shadaw shangang ya ai tsawra myit re. Hpa majaw kun? Shi hpe tsawra ai gaw, anhte hpe kahkyin gumdin shangun ai. Amyu n bung ai, ga n bung ai, shingdu masa n bung ai masha yawng gaw, “myit langai sha hte” Yehowa hpe nawku dawjau ma ai. (Zehpani 3:​9) Karai Kasang a chyoi pra ai wenyi a asi re ai manu dan ai ndai atsam ningja hpe shani shagu madun na matu dawdan da ga.