Asanninneq – Pissuseq nalissaqanngitsoq
JEHOVAP apustili Paulusi isumassarsisillugu pissuserineqartussat qulingiluat anersaap illernartup sunniineratigut pilersinneqartut pillugit allatsippaa. (Gal 5:22, 23) Pissuserineqartussat nuannersut taakku ataatsimoortillugit ‘anersaap inerititaanik’ taaneqarput. * Inerititaq tamanna aamma ‘inuttut pissusermut nutaamut’ ilaavoq. (Kol 3:10, NW) Soorlu orpik inerititaqassaguni naleqquttumik imerterneqartariaqartoq, taamatuttaaq inuup pissuserineqartussat nuannersut taakku ineriartortissavai anersaaq illernartoq inuunermini sunniuteqarluartikkuniuk. – Tuss 1:1-3.
Paulusip asanninneq siulliullugu taavaa. Pissuseq tamanna qanoq pingaaruteqartigaa? Paulusi allappoq asannissuseqanngikkuni ‘suunngitsuussagaluarluni’. (1 Kor 13:2) Asanninnerli suua, qanorlu ineriartortinneqarlunilu ullut tamaasa ersersinneqarsinnaava?
ASANNINNEQ QANOQ ERSERSINNEQARTARPA?
Asanninneq nassuiaqqissaaruminaakkaluartoq inuk asannittoq qanoq eqqarsarlunilu iliuuseqartarnersoq Biibilimi allaatigineqarpoq. Assersuutigalugu asannittoq ‘kamagittartuullunilu saamasuullunilu sallusuissut tipaatsuutigisarpaa’. Inuk asannissuseqartoq “tamatigut naammagittartuuvoq, tamatigut uppertarpoq, tamatigut neriuttarpoq, tamatigut ilalaartarpoq”. Allat tunniusimalluinnarfigalugillu soqutigilluinnarpai. Aamma ikinngutitut ilumoorfiginnittuuvoq. Inulli asanniuitsoq sinngatuujullunilu makitasuujullunilu kanngunartuliortarlunilu namminissarsiortuullunilu isumakkeerfiginniuitsuuvoq. Uagut nuanniitsunik taamaattunik pissuseqarnata allanik asanninnivik, ‘namminissarsiortarinngitsoq’, ersersikkusupparput. – 1 Kor 13:4-8.
JEHOVA JIISUSILU MALIGASSAALLUARNERPAAPPUT
‘Guuti tassaavoq asanninneq.’ (1 Joh 4:8) Suliai iliuusiilu tamarmik tamatumunnga uppernarsaataapput. Jehova inuiannut asannittuliornerpaavoq Jiisusi uagut pilluta naalliulluni toqusussanngorlugu nunarsuarmut aallartikkamiuk. Apustili Johannesi ima allappoq: “Matumuuna Guutip asanninnera akornatsinni saqqummersinneqarsimavoq: Guutip ernituani silarsuarmut aallartimmagu taassumuuna inooqqulluta. Asanninneq tassaanngilaq uagut Guuti asagatsigu, tassaavorli Guutip asammatigut erninilu aallartimmagu ajortivut pillugit pilliutitut saammaannartitsissutitut.” (1 Joh 4:9, 10) Guuti asannittuummat ajortitsinnik isumakkeerfigineqarsinnaallutalu neriuuteqarluta inuusinnaavugut.
Jiisusip inuiannik asanninnini ersersippaa Guutip piumasaatut iliorluni inuunini pilliutigigamiuk. Apustilip Paulusip ima allaffigaatigut: ‘Piumasaa malillugu illernartitaavugut Jiisusi-Kristusip timaata ataasiaammik pilliutigineqarneratigut.’ (Hebr 10:9, 10) Inuk kinaluunniit asannittuliornerusinnaanngilaq. Jiisusi ima oqarpoq: “Annerusumik asanninneqanngilaq ikinngutini pillugit inuunerminik akiginnittup asanninneranit.” (Joh ) Inuit naammalluinnanngitsuusut Jehovap Jiisusillu asanninnerat ilaarsinnaavaat? Aap! Qanoq taamaaliorsinnaasugut sammeriartigu. 15:13
‘ASAQATIGIILLUSI INUUGITSI’
Paulusip ima kajumissaarpaatigut: “Guuti maligassarisiuk taassumunnga qitornaasutut asasaasutut, inuugitsilu asaqatigiillusi soorlu Kristusip asagaatigut uagullu pilluta imminut tunniulluni tunissutitut.” (Ef 5:1, 2) ‘Asaqatigiilluni inuuneq’ qanoq paasisariaqarpa? Isumaqarpoq tamatigut asannittuliortassasugut. Allat asanerarlugit oqaannartanngilagut. Iliuuseqarnitsigut ersersittarparput. Johannesi ima allappoq: “Qitornaasusi, oqaasiinnartigut oqaannakkulluunniit pinnata suliatsigulli sallusuinnikkullu asannittuuniarta!” (1 Joh 3:18) Assersuutigalugu Jehova inoqativullu asagatsigit ‘naalagaaffimmik iivangkiiliu’ oqaluussissutigisarparput. (Matt 24:14; Luk 10:27) Aamma asaqatigiilluta inuusarpugut naammagittaraangatta, inussiarnersuugaangatta isumakkerfiginnittuugaangattalu. Biibilimi siunnersuut una maleruarparput: “Soorlu Naalakkap isumakkeerfigigaasi taamatuttaaq ilissi iliussaasi.” – Kol 3:13.
Allanik siunnersuigaangatta naqqiigaangattaluunniit imaanngilaq asanninngitsugut. Assersuutigalugu meeraq qiagaangat angajoqqaat ilaasa meeqqap piumasaa sunaluunniit pitittarpaat. Angajoqqaarli qitornaminik asannivissoq pisariaqaraangat maleruutiinnartanngilaq. Taamatulli Guutip asannittuugaluarluni ‘asasani anusinngorsartarpai’. (Hebr 12:6) Tassa pisariaqaraangat naleqquttumik perorsaaneq asannittuliorneruvoq. (Uss 3:11, 12) Eqqaamajulli tamatta ajortiliugatta asannittuliunngitsoortartugut. Tassa tamatta asanninnermik ersersitsilluarnerusinnaavugut. Qanoq? Pingasutigut taamaaliorsinnaanerput sammeriartigu.
ASANNINNEQ QANOQ INERIARTORTISSINNAAVARPUT?
Siullermik, Guuti qinnuigiuk anersaamik illernartumik, asanninnermik ineriartortitsisartumik, tuneqqullutit. Jiisusi oqarpoq Jehovap “imminut qinusut Anersaamik Illernartumik tuniumaarai”. (Luk 11:13) Taamaattumik anersaaq illernartoq qinnutigigutsigu uagutsinnullu sunniuteqartikkutsigu asanninnerujartulissasugut qularissanngilarput. (Gal 5:16) Assersuutigalugu utoqqaanertaaguit Biibili tunngavigalugu asannittumik siunnersuisinnaaqqullutit anersaaq illernartoq qinnutigisinnaavat. Angajoqqaajuguilluunniit qitornatit asannittumik, kamaannagit, perorsarsinnaaqqullugit Guutip anersaavanit ikioqqullutit qinusinnaavutit.
Aappassaanik, Jiisusi allanit ajortumik pineqaraluaraangamiluunniit asannittuliortuaannarnera eqqarsaatigeqqissaaruk. (1 Petr 2:21, 23) Allanit ajuallatsinneqaruit naapertuilluanngitsumilluunniit misigisaqaruit imminut ima aperigit: ‘Jiisusi qanoq iliussagaluarpa?’ Qatanngutip arnap Leigh-mik atillip iliuuseqartinnani imminut taama aperigami iluaqutigaa. Ima oqarpoq: “Ilaanni suleqatima e-mailikkut suleqatikka allat uanga suliakkalu pillugit ajortumik allaffigisimavai. Ajuallaatigingaarpara. Imminulli ima aperivunga: ‘Jiisusi ilaarlugu inuk taanna qanoq pisinnaavara?’ Jiisusip qanoq iliorsimasinnaanera eqqarsaatigereerlugu aalajangerpunga eqqarsaatigiunnaarlugulu iliuuseqarfiginiarnagu. Kingusinnerusukkut paasivara suleqatiga taanna peqqiilliorujussuarsimasoq tatineqangaarsimasorlu. Isummerpunga allatani ilumoorutinngikkai. Jiisusip ajortumik pineqaraluaraangamiluunniit asannittuujuarnera eqqarsaatigigakku suleqatima asannittuliorfiginissaanut iluaqutigaara.” Jiisusi ilaartarutsigu asannittuliortuaannassaagut.
Pingajussaanik, imminut pilliutigeriaannaalluni asanninneq ilinniaruk. Asanninneq taamaattoq Jiisusip ajoqersugaasa ilumoortut ilisarnaatigaat. (Joh 13:34, 35) Jiisusi nammineq taamatut asannittuuvoq, maligassiuilluaqqissaarporlu. Qanoq? Qilak qimallugu uagut pilluta ‘Guutisut isikkuni iperarlugu inuttut nikanartippoq toqumut allaat’. (Fil 2:5-8) Jiisusip imminut pilliutigeriaannaalluni asanninnera ilaarutsigu taassumatut eqqarsarlutalu misigissaagut, aamma allat pisariaqartitaat salliutissavavut.
ASANNITTULIORNERUP PILLUAQQUSSUTISSARTAI
Asannittuliorneq pilluaqqussutisiassartarpassuaqarpoq. Uku marluk eqqarsaatigitigit:
Asannittuliorutta qanoq pilluaqquneqassaagut?
-
NUNARSUAQ TAMAKKERLUGU QATANNGUTIGIISSUIT: Asaqatigiikkatta nalunngilarput ilagiit nunarsuarmi sumiikkaluartulluunniit tikikkutsigit qatanngutinit tikilluaqquneqangaassalluta. Nunarsuaq tamakkerlugu qatanngutigiissuarnit asaneqarluni nalunagu pilluaqqussutisiap nuannissusia! (1 Petr 5:9) Guutip innuttai kisimik taamatut asaqatigiipput.
-
EQQISSEQATIGIINNEQ: ‘Immitsinnut kamageqatigiikkatta eqqissineq ataqatigiissutigaarput.’ (Ef 4:2, 3) Eqqissineq taama ittoq ataatsimiinnitsinni ataatsimeersuarnitsinnilu misigisarparput. Silarsuarmi avissaartuuffiusumi eqqisseqatigiinnerput immikkuullarissuuvoq, ilaa? (Tuss 119:165; Es 54:13) Allat eqqisseqatiginiarlugit iliuuseqaraangatta ilumut asallutigit ersersittarparput, tamannalu Ataatatta qilammiusup iluaraa. – Tuss 133:1-3; Matt 5:9.
‘ASANNINNEQ INERIARTORTITSIVOQ’
Paulusi ima allappoq: ‘Asanninneq ineriartortitsivoq.’ (1 Kor 8:1) Tamanna qanoq isumaqarpa? Korinthimiunut allakkamini siullerni kapitali 13-imi nassuiarpaa asanninneq qanoq ineriartortitsisartoq. Asannittup allanut pitsaanerpaaq noqqaassutigisarpaa. Asannittup allat pisariaqartitaannik isumagisarpai. (1 Kor 10:24; 13:5) Aamma isumassuiumatuujugami, kamagittartuugami inussiarnersuugamilu ilaqutariinnik asannittunik ilagiinnillu ataasiussuseqartunik ineriartortitsisarpoq. – Kol 3:14.
Assigiinngitsorpassuartigut asannittuliorsinnaavugut, Guutimilli asanninnerput naleqarnerpaallunilu ineriartornarnerpaavoq. Sooq? Guutimik asanninnerput ataasiussuseqaatigigatsigu! Inuit assigiinngitsunik tunuliaqutaqarlutillu, naggueqarlutillu oqaasillit ‘isumaqatigiillutik’ Jehova kiffartorfigaat. (Sef 3:9) Pissuseq nalissaqanngitsoq tamanna, Guutip anersaavata illernartup inerititaata ilaa, ullut tamaasa ersersitsigu.
^ par. 2 Allaaserisaq manna allaaserisat qulingiluat siullersaraat pissuserineqartussanik anersaap inerititarisaanik ataasiakkaarinnittut.