JIOVA bin mek di apɔsul Pɔl rayt bɔt nayn kwaliti dɛn we di oli spirit de ɛp wi fɔ gɛt. (Lɛta Fɔ Galeshya 5:​22, 23, NW) Dɛn kɔl dɛn fayn kwaliti dɛn ya “kwaliti dɛn we di spirit de ɛp wi fɔ gɛt.” * (Luk di futnot.) Dis kwaliti de bak pan “di nyu abit dɛn” we Kristian dɛn fɔ gɛt. (Lɛta Fɔ Kɔlɔse 3:​10) Jɔs lɛk we tik kin bia we dɛn wata am fayn fayn wan, na so pɔsin go gɛt dɛn fayn fayn kwaliti dɛn ya if i alaw di oli spirit fɔ kɔntrol in layf.—Sam 1:​1-3.

Di fɔs kwaliti we Pɔl tɔk bɔt, na lɔv. Wetin mek dis kwaliti impɔtant? Pɔl bin se if i nɔ gɛt lɔv in na “natin.” (Fɔs Lɛta Fɔ Kɔrint 13:​2) Bɔt wetin na lɔv? Aw wi go tray fɔ gɛt am ɛn du tin dɛn we de sho se wi gɛt lɔv ɔltɛm?

Pan ɔl we i nɔ rili izi fɔ ɛksplen wetin lɔv min, di Baybul tɔk bɔt aw pɔsin we gɛt lɔv de tink ɛn du tin. Fɔ ɛgzampul, pɔsin we gɛt lɔv na pɔsin we “de bia” ɛn na pɔsin we “gud” ɛn i de “gladi fɔ yɛri wetin . . . tru.” We pɔsin gɛt lɔv, dat go mek i ‘bia ɔltin we pipul du am; i go biliv gud tin bɔt pipul ɔltɛm; i go de abop ɔltɛm se bɛtɛ go fala dɛn; ɛn i nɔ go tap fɔ lɛk in kɔmpin mɔtalman wɛn tin tranga.’ Na pɔsin we rili lɛk ɔda pipul dɛn, i bisin bɔt dɛn, ɛn na pɔsin we nɔ de kɔmɔt biɛn ɔda pɔsin. Bɔt pɔsin we nɔ lɛk ɔda pipul dɛn, na pɔsin we de jɛlɔs, i prawd, i nɔ de biev fayn, na insɛf nɔmɔ i bisin bɔt, ɛn i nɔ de fɔgiv. Wi nɔ fɔ du tin dɛn we de sho se wi gɛt dɛn kayn bad abit dɛn de, bifo dat, wi fɔ sho se wi rili lɛk ɔda pipul dɛn; dat na di kayn lɔv we nɔ de mek yu “yon biznɛs nɔmɔ go bifo.”—Fɔs Lɛta Fɔ Kɔrint 13:​4-8.

“Gɔd na di wan we nɔ de tap fɔ lɛk ɔltɛm.” (Jɔn In Fɔs Lɛta 4:​8) Ɔl in wok dɛn ɛn di tin dɛn we i de du, de sho se i lɛk wi. Di men we we i dɔn sho se i lɛk mɔtalman na we i sɛn Jizɔs na di wɔl fɔ kam sɔfa ɛn day fɔ wi. Di apɔsul Jɔn bin se: “Na di we dis we Gɔd sho wi se in lɛk wi: I sɛn in wangren Pikin kam na [di] wɔl, so dat in Pikin kin mek wi gɛt layf. . . . Nɔto fɔ se wi lɛk Gɔd, bɔt in lɛk wi ɛn i sɛn in Pikin kam na [di] wɔl fɔ sakrifays insɛf fɔ wi mek i go padin wi sin dɛn.” (Jɔn In Fɔs Lɛta 4:​9, 10) Bikɔs Gɔd lɛk wi, i de fɔgiv wi sin dɛn, wi gɛt op, ɛn wi go gɛt layf tumara bambay.

Jizɔs bin sho se i lɛk mɔtalman bay we i sakrifays in layf fɔ du wetin Gɔd want. Di apɔsul Pɔl tɛl wi se: “Na bikɔs Jizɔs Krays want du wetin Gɔd want am fɔ du, mek i sakrifays in bɔdi. Na wan tɛm nɔmɔ i mek da sakrifays de ɛn di sakrifays gɛt pawa ɔltɛm. Na da sakrifays de mek wi at klin. I dɔn mek wi bi Gɔd yon pipul.” (Di Ibru Pipul Dɛn 10:​9, 10) No mɔtalman nɔ ebul sho da kayn lɔv de. Jizɔs tɔk se: “If pɔsin day fɔ in padi, no lɛk nɔ pas da wande.” (Jɔn 15:​13) Yu tink se i pɔsibul fɔ mek mɔtalman we nɔ pafɛkt  falamakata di kayn lɔv we Jiova ɛn Jizɔs dɔn sho? Yɛs, i pɔsibul! Mek wi tɔk bɔt aw wi kin ebul fɔ du dat.

Pɔl bin ɛnkɔrej wi se: “We una na Gɔd in pikin dɛn we i lɛk, una fɔ tray fɔ tan lɛk am. Una fɔ gɛt [lɔv] na una at, jɛs lɛk aw Krays lɛk wi, dɔn i gi in layf lɛkɛ sakrifays.” (Lɛta Fɔ Ɛfisɔs 5:​1, 2) Wetin i min fɔ kɔntinyu fɔ “gɛt [lɔv] na una at”? I min se wi lɛk pipul dɛn ɔltɛm. Wi nɔ jɔs de tɔk se wi lɛk ɔda pipul dɛn. Wi de sho se wi lɛk dɛn bay wetin wi de du. Jɔn bin rayt se: “Mi pikin dɛn, wi nɔ fɔ jɛs de tɔk se wi lɛk wi kɔmpin, bɔt wi fɔ de du dɛn tin we go sho se wi lɛk dɛn fɔ tru.” (Jɔn In Fɔs Lɛta 3:​18) Fɔ ɛgzampul, wi de prich di “gud nyus bɔt di Kiŋdɔm” bikɔs wi lɛk Jiova ɛn ɔda pipul dɛn. (Matyu 24:​14, NW; Lyuk 10:​27) Wi de sho bak se wi de kɔntinyu fɔ “gɛt [lɔv] na [wi] at” we wi peshɛnt, du gud, ɛn fɔgiv. Wi de fala di advays na di Baybul we se: “Una fɔ padin una kɔmpin lɛkɛ aw di Masta [“Jiova,” NW] dɔn padin una.”—Lɛta Fɔ Kɔlɔse 3:​13.

If wi kɔrɛkt ɔda pipul dɛn nɔ min se wi nɔ lɛk dɛn. Fɔ ɛgzampul, sɔm mama ɛn papa dɛn kin du ɛnitin we dɛn pikin want, fɔ mek di pikin lɛf fɔ kray. Bɔt mama ɛn papa we rili lɛk dɛn pikin go kɔrɛkt am if nid de. Semweso, pan ɔl we Gɔd nɔ de tap fɔ lɛk, i “de kɔrɛkt di wan dɛn we i lɛk.” (Di Ibru Pipul Dɛn 12:​6, NW) So i rili fayn fɔ kɔrɛkt pɔsin if nid de. (Prɔvabs 3:​11, 12) Bɔt mɛmba se wi ɔl de sin ɛn bɔku tɛm wi nɔ kin sho se wi lɛk ɔda pipul dɛn. So wi fɔ du mɔ fɔ kɔntinyu fɔ sho se wi lɛk ɔda pipul dɛn. Aw wi go ebul fɔ du am? Mek wi tɔk bɔt tri we dɛn.

Fɔs, wi fɔ aks Gɔd fɔ gi wi in oli spirit we go mek wi gɛt lɔv. Jizɔs bin se Jiova de gi “dɛn wan we aks am in Spirit.” (Lyuk 11:​13) So wi shɔ se if wi pre fɔ oli spirit ɛn alaw am fɔ ɛp wi, wi go ebul fɔ lɛk ɔda pipul dɛn mɔ ɛn mɔ. (Lɛta Fɔ Galeshya 5:​16) Fɔ ɛgzampul, if yu na ɛlda yu kin aks fɔ oli spirit fɔ ɛp yu fɔ sho se yu lɛk ɔda pipul dɛn we yu de yuz di Baybul fɔ kɔrɛkt dɛn. Ɔ if yu na mama ɔ papa, yu kin aks mek Gɔd in spirit ɛp yu nɔ fɔ vɛks we yu de kɔrɛkt yu pikin dɛn, bɔt du am di we we go sho se yu lɛk dɛn.

Sɛkɔn, tink gud wan bɔt aw Jizɔs bin sho se i lɛk ɔda pipul dɛn pan ɔl we dɛn nɔ bin de trit am fayn. (Pita In Fɔs Lɛta 2:​21, 23) We pɔsin ɔfɛn yu ɔ dɛn nɔ trit yu fayn, aks yusɛf dis kwɛstyɔn, ‘Wetin Jizɔs go du?’ Wan sista we nem Li bin kam fɔ no se we i aks insɛf da kwɛstyɔn de dat de ɛp am fɔ tink bifo i du sɔntin. I se: “Wantɛm mi kɔmpin wokmet bin sɛn imel to mi wokmet dɛn ɛn di imel bin tɔk bad tin dɛn bɔt mi ɛn di wok we a bin de du. I rili mek a fil bad. Bɔt a aks misɛf se, ‘Aw a go falamakata Jizɔs we a de tɔk bak to dis pɔsin?’ Afta we a tink bɔt wetin Jizɔs bin fɔ dɔn du, a bin disayd se a go fɔgɛt bɔt wetin i du to mi ɛn nɔ tek am big. Leta, a bin kam fɔ no se mi wokmet bin gɛt siriɔs siknɛs we bin de mɔna am ɛn in at bin pwɛl bad bad wan. A bin kam fɔ no se sɔntɛm i nɔ bin rili min wetin i bin rayt. We a tink bɔt Jizɔs in ɛgzampul we i bin sɛt fɔ lɛk ɔda pipul dɛn ivin we dɛn provok mi, dat bin ɛp mi fɔ du di sem tin bay we a sho se a lɛk mi wokmet.” If wi falamakata Jizɔs, wisɛf go kɔntinyu fɔ lɛk ɔda pipul dɛn ɔltɛm.

Tɔd, lan fɔ sho se yu lɛk ɔda pipul dɛn wit ɔl yu at. Dis na di kayn lɛk we de sho se wi na pipul dɛn we de biɛn Jizɔs tru tru wan. (Jɔn 13:​34, 35) Jizɔs insɛf bin lɛk pipul dɛn dis kayn we ɛn i bin sɛt fayn ɛgzampul fɔ wi. Aw i du dat? We i kɔmɔt na ɛvin, “i bin put insɛf dɔŋ” fɔseka wi, ivin “te i sɔfa ɛn day.” (Lɛta Fɔ Filipay 2:​5-8, NW) We wi falamakata Jizɔs fɔ sho se wi lɛk ɔda pipul dɛn wit ɔl wi at, dat go mek wi bigin fɔ tink ɛn fil lɛk am mɔ ɛn mɔ, ɛn wi nɔ go de jɔs tink bɔt wisɛf nɔmɔ bɔt wi go de tink bɔt ɔda pipul dɛn bak.

Wi go gɛt bɔku bɛnifit we wi sho se wi lɛk ɔda pipul dɛn. Mek wi tɔk bɔt tu ɛgzampul dɛn:

• WI BRƆDA ƐN SISTA DƐN NA DI WƆL: Bikɔs wi lɛk wisɛf, wi no se di brɔda ɛn sista dɛn we de na ɛni kɔngrigeshɔn dɛn we de ɔlsay na di wɔl, go gladi fɔ wɛlkɔm wi we wi go fɛn dɛn. Na big big blɛsin fɔ no se ɔl yu “brɔda dɛn na di wɔl” lɛk yu. (Pita In Fɔs Lɛta 5:​9) Na Gɔd in pipul dɛn nɔmɔ de sho se dɛn lɛk dɛn kɔmpin dɛn da we de.

• PIS: We wi “de bia wit [wi] kɔmpin fɔ sho se [wi] lɛk dɛn,” dat de mek wi ɛnjɔy di wanwɔd na di ɔganayzeshɔn. (Lɛta Fɔ Ɛfisɔs 4:​2, 3) Wi de ɛnjɔy dis kayn pis na di mitin dɛn, di asɛmbli dɛn, ɛn na di kɔnvɛnshɔn dɛn. Wi nɔ go gri se na wi nɔmɔ de ɛnjɔy dis kayn pis tide, insay dis wɔl we nɔ gɛt wanwɔd? (Sam 119:​165; Ayzaya 54:​13) We wi tray fɔ mek pis wit ɔda pipul dɛn, wi de sho se wi rili lɛk dɛn, ɛn dat de mek wi Papa we de na ɛvin gladi.—Sam 133:​1-3; Matyu 5:​9.

Pɔl bin rayt se: “If wi lɛk wi kɔmpin wi go ɛp dɛn mek dɛn biliv Gɔd mɔ ɛn mɔ.” (Fɔs Lɛta Fɔ Kɔrint 8:​1) Wetin dat min? Insay Fɔs Lɛta Fɔ Kɔrint chapta 13, we sɔm pipul dɛn kin kɔl di “Sam we De Tɔk bɔt Lɔv,” i ɛksplen aw we wi lɛk wi kɔmpin dɛn wi go ɛp dɛn fɔ biliv Gɔd mɔ ɛn mɔ. We yu lɛk pɔsin, yu go want fɔ du wetin di pɔsin want, bifo yu du wetin yu want. We yu lɛk pɔsin, yu de kia fɔ wetin i nid. (Fɔs Lɛta Fɔ Kɔrint 10:​24; 13:​5) Bikɔs lɔv de ɛp yu fɔ peshɛnt, du gud, ɛn tink bɔt aw ɔda pipul dɛn de fil, dat de ɛp famili dɛn fɔ lɛk dɛnsɛf ɛn di kɔngrigeshɔn go gɛt wanwɔd.—Lɛta Fɔ Kɔlɔse 3:​14.

Bɔku we dɛn de fɔ sho se wi lɛk ɔda pipul dɛn, bɔt di lɛk we wi lɛk Gɔd impɔtant pas di we aw wi go lɛk ɔda pɔsin. Wetin mek? Na bikɔs di lɛk we wi lɛk Gɔd de mek wi gɛt wanwɔd! Pipul dɛn we kɔmɔt difrɛn say, we gɛt difrɛn kɔlɔ, we de tɔk difrɛn langwej dɛn, ɛn wɔship Jiova togɛda, de sav am “wit wanwɔd.” (Zɛfinaya 3:​9, NW) Mek wi mekɔp wi maynd fɔ sho dis fayn kwaliti we Gɔd in oli spirit de ɛp wi fɔ gɛt ɛvride.