YAVE wavumunuina Paulu wa ntumwa mu soneka fu vua itukanga muna mwand’avelela. (Ngalatia 5:22, 23) E fu yayi iyikilwanga vo “mbongo a mwanda.” * (Tala mvovo vana yand’a lukaya.) E fu yayi ina mpe muna “kiwuntu kiampa” kina Akristu bafwete vuata. (Kolosai 3:10) Nze una o nti uyiminanga bundu vava utoma yitilwanga maza, o muntu olenda kala ye fu yayi yambote vava keyambulanga vo mwand’avelela wamfila.—Nkunga 1:1-3.

E fu kiantete kayika o Paulu i zola. Nkia mfunu kina e fu kiaki? Paulu wavova vo avo okondelo zola, i “mpavala” kwandi. (1 Korinto 13:2) Nki i zola? Aweyi tulenda kadila yo zola yo songa ko lumbu yawonso?

Kana una vo diampasi kikilu mu toma sasila o zola, Nkand’a Nzambi usonganga una muntu una ye zola keyindulwilanga yo vangila mambu. Kasikil’owu, o nkwa zola okalanga ye “luzindalalu yo walakazi” yo ‘mwena ludi e kiese.’ O muntu una ye zola, ‘ozizidilanga mawonso, okwikilanga mawonso, osilanga mawonso e vuvu yo zindalela mawonso.’ Otoma zolanga akaka, kubavua o mfunu yo kala nkundi ambote. Kansi, avo muntu kena ye zola ko, okalanga nkwa kimpala, lulendo, vanga mambu malembi songa, loko yo lembi loloka akaka. Vana fulu kia kala ye fu yambi nze yayi, tufwete songanga zola kwakieleka kuna ‘ke kuvavanga wete wa yandi kibeni ko.’—1 Korinto 13:4-8.

“Nzambi i zola.” (1 Yoane 4:8) E salu ye mavangu mandi mawonso mesonganga e ziku kia diambu diadi. E mpila isundidi kasongela zola muna wantu i vava kafila Yesu ova ntoto kamona e mpasi yo fwa mu kuma kieto. Yoane wa ntumwa wavova vo: “Muna mpila yayi kwasengomokena o zola kwa Nzambi omu yeto, o Nzambi watuma Mwan’andi mosi ova nza kimana twavuila moyo muna yandi. I kwau kuku o zola, ke yeto ko twazola Nzambi, kansi yandi watuzola yo tuma Mwan’andi se kimenga kia luloloko lwa masumu meto.” (1 Yoane 4:9, 10) Muna kuma kia zola kwa Nzambi, masumu meto malenda lolokwa, tulenda kala ye vuvu yo vua moyo.

Yesu wasonga vo wazolanga wantu kadi wavana moyo andi se kimenga mu vanga luzolo lwa Nzambi. Paulu wa ntumwa wavova vo: “Muna “luzolo” lwalu i tuveleleselwanga muna kimenga kia nitu a Yesu Kristu ina yakelwa nkelwa mosi kaka.” (Ayibere 10:9, 10) Ke vena muntu ko olenda songa e nzola ya mpila yayi. Yesu wavova vo: “Ke vena muntu ko wina ye nzola isundidi yayi, i sia vo muntu kayekola moyo andi muna wete dia akundi andi.” (Yoane 15:13) Nga wantu alembi lunga balenda kwau tanginina o zola kuna Yave yo  Yesu besonganga? Elo. Yambula twazaya una tulenda wo vangila.

Paulu watukasakesa vo “Nukala atanginini a Nzambi nze wan’anzolwa, nukangalela muna zola, wauna o Kristu katuzolela yo kuyitambika muna wete dieto.” (Efeso 5:1, 2) O ‘kangalela muna zola’ aweyi disongele? Disongele vo tufwete songanga zola e ntangwa zawonso. Ke tufwete vovanga kaka ko vo zola tuna kwau muna akaka. Tufwete wo songelanga muna mavangu. Yoane wasoneka vo: “E wan’ame anzolwa, ke tuzodi nzol’a mvovo ko ngatu ya lubini, kansi muna mavangu ye ludi.” (1 Yoane 3:18) Kasikil’owu, tusamunanga e ‘nsangu zambote za Kintinu’ kadi tuzolanga Yave ye mfinangani zeto. (Matai 24:14; Luka 10:27) ‘Tukangalelanga mpe muna zola’ vava tusonganga luzindalalu, walakazi yo loloka akaka. Tulemvokelanga longi dia Nkand’a Nzambi oku vo: “Wauna Yave kanulolokela kuna mvevo, oyeno mpe i wau nufwete vanga.”—Kolosai 3:13.

Avo tuvene luludiku yovo longi kw’akaka, ke disongele ko vo ke tu akwa zola ko. Kasikil’owu, muna sima mwana kayambula dila, mase mankaka bevanganga konso diambu kalombele o mwana. Kansi, o se ona ozolanga kikilu mwan’andi okuntumbanga avo divuilu o mfunu. Diau dimosi, kana una vo Nzambi i zola, ‘Yave osembanga ana kezolanga.’ (Ayibere 12:6) Muna kuma kiaki, dia zola kikilu mu vana muntu e longi vava divuanga o mfunu. (Ngana 3:11, 12) Kansi, sungamena vo yeto awonso tu asumuki ye ezak’e ntangwa tuyambulanga songa o zola. Muna kuma kiaki, yeto awonso tulenda wokesa songa zola. Aweyi tulenda wo vangila? Yambula twabadika mpila tatu.

Diantete, lomba kwa Nzambi kavana mwand’andi avelela owu ukutusadisanga mu yima o zola. Yesu wavova vo Yave ovananga “mwand’avelela kwa awana bekunlombanga.” (Luka 11:13) Muna kuma kiaki, tulenda kala ye ziku vo avo tulombele mwand’avelela muna sambu yo yambula vo watusadisa, tukala ye zola. (Ngalatia 5:16) Kasikil’owu, avo u nkuluntu, olenda lomba mwand’avelela kimana wasadisa mu songanga o zola vava ovananga akaka e longi ditukidi muna Nkand’a Nzambi. Avo u se, olenda lomba vo mwand’avelela a Nzambi wasadisa mu vana longi kwa wan’aku, ke ku makasi ko, kansi kuna zola.

Diazole, yindula una Yesu kasongela zola kana nkutu vava akaka bambangikanga. (1 Petelo 2:21, 23) Avo muntu ukendelekele yovo ovangidi e mbi, ukiyuvula: Kele vo Yesu, adieyi kadi vanga? Mpangi mosi ankento una ye nkumbu a Leigh wamona vo o kukiyuvula kiuvu kiaki diansadisa mu teka yindula vitila kavanga diambu. Wavova vo: “Lumbu kimosi, mosi muna wantu twasalanga yau entwadi watwika mensagem kwa akwame a salu yo kumpovela e mbi. E diambu diadi diankendeleka kikilu. Kansi, yakiyuvula vo: ‘Aweyi ndenda tanginina Yesu muna mpila mfwete kadila yo muntu ndioyu?’ I bosi, vava yayindula dina Yesu kadi vanga, yabaka e nzengo za vilakana diambu diadi. Kuna kwalanda, yabakula vo nkwame a salu kimbevo kiangolo kakala kiau ye mpasi zayingi kiantwasilanga. Yabakula vo mana kasoneka nanga ke mau ko kazola vova. O badika muna mbandu a Yesu ya songa o zola kana nkutu vava tutontwanga, diansadisa mu songa zola kwa nkwame a salu.” Avo tutanginina Yesu, tukwamanana songa zola kw’akaka.

Diatatu, songanga nzol’amvevo. O zola kwa mpila yayi i kuswaswanesanga alandi akieleka a Yesu. (Yoane 13:34, 35) Yesu zola kwa mpila yayi kakala kwau. Eyayi ina se mbandu kwa yeto. Mu nkia mpila? Vava kasisa e zulu, “wakisisa e nkatu” mu kuma kieto yo tambulwila nkutu vo kafwa. (Filipi 2:5-8) Avo tutanginina e nzol’amvevo a Yesu, e ngindu zeto zikala nze zandi yo sia e nsatu za wantu ankaka va fulu kiantete.

Nluta miayingi tuvuanga vava tusonganga zola. Yambula twabadika nona yole.

• KINTWADI KIA WANA-NGUDI MU NZA YAWONSO: Muna kuma kia zola kweto muna muntu yo nkwandi, tuzeye wo vo konso nkutakani tukwenda mu nza yawonso, mpangi zeto betoma kututambula. Diakiese kikilu mu zaya vo tuzolwanga kwa ‘mpangi zeto zawonso omu nza.’ (1 Petelo 5:9) O zola kwa mpila yayi tulenda ko wana kaka vana vena nkangu a Nzambi.

• LUVUVAMU: O ‘yambuziana e mambu muna zola,’ dikutusadisanga mu yangalela e “kangwa kia ungudi.” (Efeso 4:2, 3) Tuvuanga luvuvamu vava tukalanga muna tukutakanu tweto twakete ye twampwena. Nga kukwikidi ko vo yeto kaka tuna ye luvuvamu lwa mpila yayi mu nza yayi yavambana? (Nkunga 119:165; Yesaya 54:13) Vava tutatidilanga luvuvamu ye akaka, tusonganga vo zola kikilu tukubazolanga. Ediadi diyangidikanga Se dieto kuna zulu.—Nkunga 133:1-3; Matai 5:9.

Paulu wasoneka vo: “O zola kumika kukumikanga.” (1 Korinto 8:1) Ediadi aweyi disongele? Muna 1 Korinto kapu kia 13, kina wantu akaka beyikilanga vo “Nkunga a Zola,” Paulu wasasila una o zola kukumikinanga. O zola kuvavanga wete dia wantu ankaka. O zola kuvavanga lungisa nsatu za wantu ankaka. (1 Korinto 10:24; 13:5) Wau vo zola wete dia wantu ankaka kuvavanga, kuvuidi luzindalalu ye walakazi, kuwokesanga o zola kwa esi nzo yo siamisa kintwadi muna nkutakani.—Kolosai 3:14.

Vena ye mpila zayingi tulenda songela o zola muna akaka. Kansi, o zola kweto muna Nzambi i kwau kusundidi o mfunu ye kuvangamesanga. Ekuma? E kuma kadi o zola kweto muna yandi kukutusadisanga mu zingila mu kintwadi. Wantu a nsi zawonso, makanda ye ndinga besambilanga Yave mu kintwadi yo “kunsadila kumosi.” (Sefaniya 3:9) Yambula twakala ye kani dia songanga e fu kiaki kiamfunu kia mbongo a mwand’avelela a Nzambi lumbu yawonso.