JIIHÓVAH éí yilʼaadii Paul áyidííniid: Níłchʼi diyinii éí shá ndaalʼaʼí yee yíká análwoʼ. God bidineʼé haitʼéego “níłchʼi diyinii bineestʼąʼ” chodeidoołʼįįł éí níłchʼi diyinii bíká adoolwoł. * (Footnote níníłʼı̨́.) (Galatians 5:​22, 23) Díí éí “iiná ániidíii” bił ahídéétʼiʼ, éí Daʼoodlánígíí yiih dahakááh. (Colossians 3:10) Tʼiis, tó ląʼígo bił ninákahígíí nahalingo, diné łaʼ níłchʼi diyinii bineestʼąʼ nabiiłnáago, éí hweʼiinaʼ nizhónígo joołtʼih doo.—Psalm 1:​1-3.

Paul éí níłchʼi diyinii bineestʼąʼ áłtsé yikʼeʼashchínígíí éí ayóóʼóʼóʼní. Éísh ílı̨́? Paul ání: “bee ayóóʼóʼóʼníinii shiiʼ ádingo tʼáadoo náníshdlíní da.” (1 Corinthians 13:2) Áko, ayóóʼóʼóʼní éí haʼátʼíísh átʼé? Haash yitʼéego bidziilgo ííníilzin? Áádóó haitʼéego ííshjání ádadiilnííł?

Ayóóʼóʼóʼní baa hojilneʼgo, éí nanitłʼah. Ákondi haitʼéego diné ayóóʼóʼóʼní bee baa áhwiinítʼínígíí, éí Diyin Bizaad nihił ííshjání ííłʼı̨́. Diné ayóóʼóʼóʼnínígíí éí “nízaadgóó haʼólní, áádóó joobaʼ” índa “tʼáá aaníinii tʼéí yaa bił hózhǫ́.” Áádóó “tʼáá ałtsojįʼ oodlą́, tʼáá ałtsojįʼ bił chohooʼı̨́, tʼáá ałtsoní yichʼįʼ haʼólní.” Diné ayóóʼóʼóʼnínígíí éí nááná háiida ayóóʼáyóʼní, dóó yaa aʼááh nízin, áádóó akʼis baʼahódlíhígíí jílı̨́. Ákondi, diné łaʼ doo ayóóʼóʼóʼníígóó, éí oołchʼı̨́įd, ádaa haʼniih, bee ádíláah, tʼáá shí tʼéí nízin, áádóó doo aa náhodiʼáah da. Éidígíí átʼéego doo dahiniiʼnáa da. Ndi, tʼáá aaníigo ayóóʼádaʼííníiʼníi doo. Éí binahjįʼ “doo tʼáá shí tʼéí” daniidzin da.—1 Corinthians 13:​4-8.

“God ayóóʼóʼóʼníinii nilı̨́.” (1 John 4:8) Tʼáá ałtso yee yinaashnishígíí bee ííshjání ííłʼı̨́. Jesus nihookáaʼjįʼ ayííłʼaʼgo tiʼhoozniiʼ dóó nihá daaztsą́, éí binahjįʼ aláahdi bílaʼashdlaʼii ayóóʼóʼóʼnínígíí bee nihił béédahózin. Yilʼaadii John ání: “God biYeʼ tʼááłáʼí bá yizhchínígíí bee dahiniiʼnáa doo biniyé nihokááʼ dineʼé yitahjįʼ yiníłʼaʼ. Díí bee Diyin God ayóóʼánihóʼnínígíí nihił béédahoozin. Díí éí ayóóʼóʼóʼní bee bééhózinii: nihídóogo Diyin God ayóóʼádeíníiʼnínígíí éí dooda, nidi bídę́ęʼgo ayóóʼánihóʼníigo biYeʼ nihá dadootsaał biniyé yiníłʼaʼgo nihibąąhági átʼéii ałtso nihá yóóʼiidííʼą́.” (1 John 4:​9, 10) God ayóóʼánihóʼnínígíí biniinaa nidaʼayiilzihígíí nihá yóóʼiidiiʼaah binahjįʼ nihił chohooʼı̨́.

Jesus éí God íinízinii bikʼehgo diné tʼáá ałtso ayóóʼájóʼnínígíí biniinaa beʼiiná yá ninéidiníʼą́. Yilʼaadii Paul ánihiłní: “God íinízinii bikʼehgo tʼááłáhídiígíí ałtso łaʼyiyiilaago Jesus Christ tʼáá bí bitsʼíís nááyiisniiʼígíí bee dadiniigingo ádanihiʼdiilyaa.” (Hebrews 10:​9, 10) Diné doo łaʼ hwee ayóóʼóʼóʼní doo ákótʼée da. Jesus ání: “Diné bikʼisóó ayóóʼádayóʼníinii yá nináʼádeetʼánígíí yá daaztsą́ągo kótʼéego ayóóʼóʼóʼní ayóó átʼéii náánáłaʼ diné doo hwee nááhódlǫ́ǫ da.” (John 15:13)  Azhą́ shı̨́ı̨́ nidaʼayiilzíih ndi, Jiihóvah dóó Jesus beʼayóóʼóʼóʼniʼ béédaʼdiilniił! Díí éí baa nídadíitʼįįł.

Paul ákóniitʼée doo nihiłní: “God baʼáłchíní ayóóʼáyóʼnínígíí danohłı̨́įgo bidaʼołʼı̨́. Tʼáá Christ ayóóʼánihóʼnínígi átʼéego ayóóʼóʼóʼní bee dayínóhkááh. Jó, Christ nihá nináʼádeetʼą́.” (Ephesians 5:​1, 2) “Ayóóʼóʼóʼní bee dayínóhkááh” haʼátʼíísh áhyiłní? Ayóóʼáyóʼní tʼáá áłahájįʼ ííshjání ádeiyíníilzingo áhyiłní. Ayóóʼánííníshʼní, doo tʼóó jiníi da. Ákondi, éí bikʼeh ájítʼı̨́į doo. John yikʼeʼashchı̨́įgo ání: “Shaʼáłchíní, Ayóóʼádaʼííníiʼní, dadiiʼníigo tʼáadoo tʼóó ádadiiʼníní doo, nidi tʼáá aaníinii bee ayóóʼádaʼahííníiʼníigo ałkʼi nideiildzil doo.” (1 John 3:18) Jiihóvah dóó diné tʼáá ałtso ayóóʼádayóʼní, éí biniinaa “bóhólníihgo bił hazʼáanii baa Haneʼ Yáʼátʼéehii” yaa dahwiilneʼ. (Matthew 24:14; Luke 10:27) Áádóó baa hadaʼííníilníigo, jiiníbaʼgo, dóó nihikʼijįʼ nidaʼiisíhígíí yóóʼadahidiitʼaah éí binahjįʼ “ayóóʼóʼóʼní bee dayínóhkááh.” Diyin Bizaad ánínígíí bikʼeh dahoniilʼı̨́: “Ahidiníłnáago ahaa dajiinohbaʼ, índa Diyin God éí Christ yee nihibąąhági átʼéii nihá yóóʼiidííʼánígi átʼéego nihí ałdóʼ . . . ahá yóóʼanídahidohʼaah.”—Ephesians 4:32.

Háiida hashké bee nazhnitingo, éí ayóóʼóʼóʼní bídéétʼiʼ. Amá dóó azhéʼé baa nitsíníkees. Azhéʼé łaʼ shı̨́ı̨́ biyeʼ yichago biniinaa tʼáá yinízinígíí yá íidoolííł. Ákondi azhéʼé biyeʼ ayóóʼáyóʼníigo ládą́ą́ʼ, éí hazhóʼó bichʼįʼ yájíłtiʼ, áko yee yikʼiʼdiitįįh. Tʼáá ákótʼéego Jiihóvah ayóóʼóʼóʼníi ndi, éí “ayóóʼáyóʼníinii tʼáá hashkée neinitin.” (Hebrews 12:6) Áko hashké bee naʼnitinígíí éí ayóóʼóʼóʼní átʼéii lá. (Proverbs 3:​11, 12) Ndi tʼáá ániitʼé nidaʼayiilzíih, łahda ayóóʼóʼóʼní doo ííshjání ádeilʼı̨́į da. Áko tʼáá áníiltso ayóóʼóʼóʼní niłdzilgo bíká ádeitʼı̨́į doo. Haitʼéego díí ádadiilnííł? Táaʼgo baa nídadíitʼįįł.

Áłtséhígíí éí, God biníłchʼi diyinii bííníkeed. Éí ayóóʼóʼóʼní bitsʼą́ą́dę́ę́ʼ. Jesus áníigo, Jiihóvah éí “níłchʼi diyinii bídayókeedii yeidiyiiʼaah.” (Luke 11:13) Áko níłchʼi diyinii bíká sodadiilzingo dóó bił nideilnishgo, éí bee nihiʼayóóʼóʼóʼniʼ náásgóó dínóosééł. (Galatians 5:16) Hastóí oodlání yá naazíinii łaʼ nílı̨́įgo, diné náánáłaʼígíí bíká adiilwoł nínízingo, éí God biníłchʼi diyinii yíníkeed. Áko Diyin Bizaad bee hazhóʼó bichʼįʼ hadíídzih doogo átʼé. Áádóó amá doodaiiʼ azhéʼé nílı̨́įgo, tʼáadoo naʼáłchíní bichʼįʼ náháchįʼí. Ndi ayóóʼóʼóʼní bee naʼnitingo, éí God biníłchʼi diyinii yee níká adoolwoł.

Naaki góneʼígíí éí, náádaałaʼígíí Jesus atídabííłʼįįd ndi, haitʼéego ayóóʼóʼóʼní yichʼįʼ ííshjání áyiilaa, hazhóʼó baa nitsíníkees. (1 Peter 2:​21, 23) Háiida nichʼįʼ doo aaníígóó doodaiiʼ doo ákótʼéégóó ániilaago, díí naʼádílkid ‘Jesus haash jidoonííł?’ Sister léiʼ Leigh wolyé, díí naʼídíkidígíí áłtsé baa nitsíjíkeesgo háká eelwod. Éí ání: “Łaʼ bił naashnishígíí éí e-mail áyiilaago, shí dóó haitʼéego naashnish yaa halneʼgo saad nichxǫ́ʼígíí choyoosʼįįd. Éí yéigo baa shíniʼ. Ákondi, tʼáá shí naʼídíshkid ‘Ádeeshłíiłii, haitʼéego Jesus beʼeshʼı̨́į doo?’ Jesus haash jidooníłígíí baa nitsísíkéezgo, tʼóó bíniʼdii átʼée doo niizı̨́ı̨́ʼ. Tʼahádóó, díí bił naashnishígíí éí yéigo bąąh dahazʼą́ lágo baa ákoniizı̨́ı̨́ʼ. Nátʼą́ą́ʼ baa nitsískeesgo, éí shı̨́ı̨́ doo baa shíniʼ íidoolíił da, yinízingo ájítʼı̨́. Jesus bee ayóóʼóʼóʼní ííshjání ájiilaa yę́ę baa nitsískeesgo, éí tʼáá ákótʼéego bił naashnishígíí bichʼįʼ áníshtʼéii doo niizı̨́ı̨́ʼ.” Jesus bedaʼiilʼı̨́įgo, tʼáá áłahájįʼ nihiʼayóóʼóʼóʼniʼ ííshjání ádeilʼı̨́į doo.

Tááʼ góneʼígíí éí, ayóóʼóʼóʼní doo baa jisteeʼgóó ííshjání ázhdoolííł. Díí ayóóʼóʼóʼnínígíí éí Jesus bídahoołʼaahii ííshjání ádeiłʼı̨́. (John  13:​34, 35) Jesus ayóóʼóʼóʼní doo yaa yisteeʼgóó ííshjání áyiilaa. Tʼáá ákogi átʼéiigo áátʼįįdígíí bedaʼiilʼı̨́į doo. Haitʼéegoshąʼ? Jesus yáʼąąshdi ayóó átʼéii jílı̨́ı̨́ ńtʼééʼ ndi “tʼóó átsééd nahjįʼ nizhdiníʼą́.” “Dazdootsaałjįʼ nidi” bílaʼashdlaʼii ayóóʼáyóʼníigo biniinaa áátʼįįd. (Philippians 2:​5-8) Jesus ayóóʼóʼóʼní doo yaa yisteeʼgóó ájítʼínígíí bedaʼiilʼı̨́įgo, éí binahjįʼ Jesus nahalingo nitsídeikees doo. Áádóó nááná háiida íinízinígíí áłtsé baa nitsídeikees doo.

Ayóóʼóʼóʼní ííshjání ádeilʼı̨́įgo, éí ląʼígo chooʼı̨́. Naakigo baa nídadíitʼįįł:

• DAʼNÍŁTSʼĄ́Ą́GÓÓ ŁÁAʼGO DAH YIKAHÍGÍÍ: Ayóóʼádaʼahííníiʼní biniinaa, nihibrothers dóó nihisisters tʼáá ałtsogo áłah nídaadleehgi bił ké daʼahidiiʼní. “Nahasdzáán bikáaʼgi tʼáá níłtéél nítʼééʼ Christ bee nihikʼisóó danilíinii” ayóóʼádanihóʼníi lá, dooládóʼ nihikʼihojisdliʼ da! (1 Peter 5:9) God bidineʼé tʼéiyá ákótʼéego ayóóʼóʼóʼní hólǫ́.

• HODÉEZYÉELGO: “Ałchʼįʼ hadaʼíínółníigo ayóóʼádaʼahíínóhʼní” éí bee ‘łáʼí daniidlı̨́įgo kʼé bee daʼahííníitąʼgo’ nihił dahózhǫ́ǫ doo. (Ephesians 4:​2, 3) Díí átʼéego tʼáá ałtso áłah nídeidleehgóó hodéezyéelgo ahínéekah. Díí hodéezyélí éí dííshjı̨́įdi ádahooníłígíí ałhąąh niiʼnilgo, tsʼídá ałʼąą ádaatʼéii lá. (Psalm 119:165; Isaiah 54:13) Náánáłaʼ kʼé bił daʼahidiiʼníigo, éí nihiʼayóóʼóʼóʼniʼ bichʼįʼ ííshjání ádeilʼı̨́. Díí Jiihóvah bee baa dahwiiʼniih.—Psalm 133:​1-3; Matthew 5:9.

Paul ání: “Ayóóʼóʼóʼní tʼéí bee daznéeséeh.” (1 Corinthians 8:1) Haʼátʼíísh áhyiłní? Paul éí 1 Corinthians wóltaʼii 13 góneʼ, haitʼéego ayóóʼóʼóʼní bee dazhnóoséeł doogo yaa halneʼ. (1 Corinthians 10:24; 13:5) Áádóó ayóó aa nitsíkees, haʼólní, dóó aa joobaʼ, éí biniinaa nihighan hazʼánígíí bił ayóóʼádaʼahííníiʼní dóó bił áłah nídeidleehígíí łáʼí daniidlı̨́.—Colossians 3:14.

Ląʼígo ałʼąą ádaatʼéego nihiʼayóóʼóʼóʼniʼ ííshjání ádeilʼı̨́. Ákondi God ayóóʼádeíníiʼnínígíí aláahgo ílı̨́ dóó náánáłaʼ bidziil ííłʼı̨́įgo yee áká análwoʼ. Haʼátʼíí biniyé? Jiihóvah ayóóʼádeíníiʼní bee bił daʼahííníítąʼ! Daʼníłtsʼą́ą́dę́ę́ʼ diné ałʼąą ádaatʼéego dóó bizaad ałʼąą ádaatʼéego éí “tʼáá łaʼ bizhiʼee” Jiihóvah yá ndaalʼaʼ. (Zephaniah 3:9) Tʼáá ákwii jı̨́ níłchʼi diyinii bineestʼąʼ ííshjání ádeilʼı̨́į doo.