A JEHOVAH a ulemekrael er a apostol el Paulus el mo meluches el kirel aike el etiu el blekeradel el mei el okiu a urerel a chedaol reng. (Galatia 5:22, 23, BT) Sel bo ledak el rokui, e aika el ungil el blekeradel a okedongall el “rodech ra Reng.” * (Momes er a footnote.) Aika el rodech er a reng a dirrek el tedebechel a “beches el klengar” el kirir a Rekristiano el mo olab. (Kolose 3:10) El di ua kerrekar el mo ourodech a lsekum kede kerekikl el melubs er ngii er a ralm, me a chad a mo olecholt aika el ungil el blekeradel a lsekum a chedaol reng a omekrael er a klengar er ngii.​—Psalm 1:1-3.

A kot el blekeradel el lulsaod er ngii a Paulus a bltikerreng. Ngua ngera kerresel tia el blekeradel? A Paulus a millekoi el kmo a lak a bltikerreng, “e ng diak a ultutelek.” (1 Korinth 13:2) Engdi ngerang a bltikerreng, e mekera domekeroul er ngii, e mekera dolecholt er ngii er a bek el taem?

Me alta e ngkmal meringel a dosaod el kmo ngerang a bltikerreng, engdi Biblia a mesaod er a rolel a lomdasu a chad el oubltikerreng me a loruul a tekoi. El ua tiang, a chad el olecholt er a bltikerreng a “klou a rengul e bekokuii” e “oldeu er a rengul er a mera el tekoi.” Ngdirrek el “outekangel el diak le toched er a rokui el tekoi, e oumera rokui el tekoi, e melatk e mengiil el diak louedikel a rengul, e klou a rengul el diak le mesim er a rokui el tekoi.” E ngar er ngii a mekreos el deleuill er ngii el obengterir a rebebil, e omekerreu er tir, e sebeched el ultuil er ngii. Engdi a lsekum a chad a diak el olecholt er a bltikerreng, e ngmechechei, e kedidai a rengul, e diak el delodau, e di omdasu er a di ngii, e diak lousubes er a rebebil. Me ngdiak el soad el olecholt a chouaika el mekngit el blekeradel. Ngbai soad el olecholt er a mera el bltikerreng el mo er a rebebil, el sel bltikerreng el diak el di losiik er a mo uchul a klungiolel.​—1 Korinth 13:4-8.

A “Dios a bltikerreng.” (1 Johanes 4:8) A rokui el urerel me a blekerdelel a ochotii el kmo, ng Dios er a bltikerreng. A klou el olechotel a bltkil a rengul el mo er a rechad, a sera loderechii a Jesus el mei er a chutem el mo chuarm e mad el kired. A apostol el Johanes a kmo: “E a Dios a ulechotii a bltkil a rengul er a loderchii a di tal Ngelekel el mer a beluulchad, me bo dokiu ngii el mo nguu a klengar. Tiakid a bltikerreng el kmo, ng diak le kid a mle betik a rengud er a Dios; ng bai Dios a mle betik a rengul er kid me ng ulderchii a Ngelekel, el doeak ngii e ng musubes a kngtid.” (1 Johanes 4:9, 10) Me ngokiu a bltkil a rengul a Dios, e a kngtid a sebechel el musubes, e dirrek el mo er ngii a omeltked me a dirrek el klengar er kid.

A Jesus a ulechotii el kmo, ngbetik a rengul er a rechad a uchul me ngtilengetengii a klengar er ngii el mo meruul a soal a Dios. A apostol el Paulus a kmo: “Ng Jesus Kristus el mlo remuul a ikel mle soal a Dios a uchul me kede rokui el mla mekikiid er a klengit el oeak a tenget el bedengel el di mle tal lodersii e merekong.” (Hebru 10:9, 10) Ngdiak a ngii di el chad el sebechel el ochotii a kuk ngarbab el bltikerreng. A Jesus a kmo: “A kot el ngarbab el bltikerreng a sel le mad a chad el kirir a re sechelil.” (Johanes 15:13) Ngsebechir a rediak el mecherrungel el chad el oukerebai er sel bltikerreng el ulechotii a Jehovah me a Jesus? Ngsebechir! Me bo dosaod a rolel a bo doruul el uaisei.

A Paulus a melisiich er kid el kmo: “Chelechal mcheleoch el ngelekel a Dios, e ng kiriu el melasem el mo ua ingii. A klengar er kemiu a kirel el mo cheldereder er a bltikerreng, el di ua Kristus el betik a rengul er kid me ng uldersii a klengar er ngii el kired.” (Efesus 5:1, 2) Ngera belkul a bo de “cheldereder er a bltikerreng”? Ngbelkul a kmo, kede olecholt er a bltikerreng er a bek el taem. Ngdiak di dedu el kmo ngbetik a rengud er a rebebil e lemerekong. Kede olecholt er ngii el oeak a omerelled. A Johanes a milluches el kmo: “Re ngelekei a bltikerreng er kid a diak le kirel di ngar omelekoi; ng kirel el meral mo chemolt er omeruul.” (1 Johanes 3:18) El ua tiang, kede omerk er a “Ebangkelio el kirel ngii el Renged” e le ngbetik a rengud er a Jehovah me a rechad. (Mateus 24:14; Lukas 10:27) Kede dirrek el “mo cheldereder er a bltikerreng” sel dolecholt er a kllourreng, me a bekokuii el reng, e dousubes er a rechad. Kede oltaut er a omellach er a Biblia el kmo: “Ng kiriu el mo kausubes, el ua ia Rubak el mla ousubes a telemelliu.”​—Kolose 3:13.

A lsekum kede omeklatk me a lechub kede mesmechokl er a rebebil, e ngdiak el belkul a kmo ngdiak el betik a rengud er tir. El ua tiang, a ruungalek a bo lorrob er a rengelekir el mo diak el langel, e te locha mo meruul a ngii di el tekoi el sorir rengelekir. Engdi a oungalek el betik a rengul er a ngelekel a kirel el mo mesmechokl er ngii a lsekum e ngmo kirel. Me ngdi osisiu, alta Dios a bltikerreng engdi ‘ngmesmechokl er ngikel le betik a rengul er ngii.’ (Hebru 12:6) Me ngolechotel a bltikerreng a lsekum e ngmo kired el mesmechokl er a rebebil. (Osisechakl 3:11, 12) Engdi lak dobes el kmo, kid el rokui a uldiukes er a klengit me kede blechoel el mo diak dolecholt er a bltikerreng. Engdi ngsebeched el rokui el melasem el mo olecholt er a bltikerreng. Ngmekera doruul er tiang? Me bo dosaod a edei el rolel.

A kot, molengit er a Dios me lebeskau a chedaol reng er ngii el ngii a mekdebechii a bltikerreng. A Jesus a dilu el kmo, a Jehovah a ‘mesterir a Chedaol Reng tirkel olengit er ngii!’ (Lukas 11:13) Me ngsebechel el mo ulterekokl a rengud el kmo, a lsekum kede olengit er a chedaol reng e mecherei me ngolengeseu er kid, e ngsebeched el mo olecholt er a bltikerreng. (Galatia 5:16) El ua tiang, a lsekum ke ta er a remechuodel, e ngsebechem el olengit er a chedaol reng me lolengeseu er kau el mo olecholt er a bltikerreng sel bo el kirem el mesmechokl er a rebebil el ousbech er a Biblia. Me a lechub e ke oungalek, e ngsebechem el olengit me a chedaol reng er a Dios lolengeseu er kau el mesmechokl er a ngelekem el diak el kesib a rengum, e ngbai ngar er a bltikerreng.

A ongerung, bom dmolech el melebedebek el kirel a rolel a Jesus a lolecholt er a bltikerreng el mo lmuut er a taem el rebebil a mle mekngit er ngii. (1 Petrus 2:21, 23) A lsekum a chad a ongesechii a rengum me a lechub e ke mo chelebangel a chelebirukel el omeruul, e di lekau loker el kmo, ‘Ngerang mo meruul a Jesus?’ A odos el ngklel a Leigh a miltik el kmo, a lsekum ngoker er ngii tiaikid el ker e ngblechoel el olengeseu er ngii el mo ungil el omdasu er a uchei er a loruul a tekoi. Ngmelekoi el kmo: “Ngmla er ngii a ta el taem el chad el kimdak el oureor a lilechesii a e-mail el mo er a ta er chad el kimdak el oureor el melekoi a mekngit el tekoi el kirek me a ureor el kurruul er ngii. E tiang a kmal ulengesechii a renguk. Engdi ak mlo melatk el kmo, ‘Ngmekera kuukerebai er a Jesus sel bok chelebangel er a chad el uaisei a blekerdelel?’ Me a uriul er a kulebedebek er a omerellel a Jesus okmo me ngmlo chelebangel er tia el tekoi, e ak millilt el obes er ngii el tekoi, e diak krellii el mo mondai. Me a uriul, e ak mlo medengei el kmo ngika el chad a chelebangel er a kmal meringel el rakt, e dirrek el kmal meringel a uldesuel er a betok el tekoi. Me ak mlo melatk el kmo nglocha dimlak el durengul er aike el tekoi el lulluches el kirek. Me sel kulatk er a kerebil a Jesus er a rolel a lolecholt er a bltikerreng, e ngmillisiich er ngak el mo olecholt er a osisiu el rolel a bltikerreng el mo er a rechad el kimdak el oureor.” Me a lsekum kede oukerebai er a Jesus, e kede mo blechoel el olecholt er a bltikerreng el mo er a rebebil.

A ongedei, mosuub el mo olecholt er a diak el mekimd el bltikerreng. Tiaikid el rolel a bltikerreng a lolecholt er ngii a remera el oltirakl er a Jesus. (Johanes 13:34, 35) A Jesus a uleba tiaikid el rolel a bltikerreng, e dirrek el ulechotii a ungil el kerebai el mei er kid. El mekerang? El okiu sera lechitii a eanged, e ‘longengetii er a deruchellel,’ el kired ‘el mo lmuut er a kodellel.’ (Filipi 2:5-8) Me sel doukerebai er a diak el mekimd el bltkil a rengul, e kede mo ua uldesuel, e dirrek  kede ngmai aike el sorir a rechad el mo ruchei er aike el soad.

Ngmo er ngii a betok el klungiaol sel dolecholt er a bltikerreng. Me bo dosaod a eru el kerebai.

• KLODAM EL MELIUEKL ER A BELUULECHAD EL ROKIR: Ngokiu a bltkil a rengud el mo er a derta el chad a uchul me kede medengei el kmo, a rudam me a rudos el ngar er a ngii di el ongdibel el debo er ngii el meliuekl er a beluulechad a blechoel el outkeu er kid. Me nguchul a klengeltengat sel modengei el kmo a ‘re bebil er kemiu el oumerang el ngar a beluulchad el rokir’ a betik a rengrir er kemiu! (1 Petrus 5:9) Ngsebeched el metik er tiaikid el rolel a bltikerreng er a delongelir a rechedal a Dios.

• BUDECH: Sel “molecholt a bltikerreng er kemiu el outekangel a rengmiu er a blekerdelel a ta ma tang” e ko mo chormii a “budech el merenged el oldak er kemiu.” (Efesus 4:2, 3) Kede mo chormii tiaikid el rolel a budech er a miting, me a ta el sils el ongdibel, me a dirrek el meklou el ongdibel er kid. Me kau, ngdiak mkengei el kmo tiaikid el rolel a budech a kot el ileakl er chelecha el taem el beluulechad a di ketouch a tekoi er a chelsel? (Psalm 119:165; Isaia 54:13) Me sel dolisiich a budech el obengterir a rebebil, e kede ochotii el kmo ngmera el betik a rengud er tir, e tiang a kot el odeuir a rengul a Demad el ngar er a eanged.​—Psalm 133:1-3; Mateus 5:9.

A Paulus a milluches el kmo: A “bltikerreng a bai meleketek.” (1 Korinth 8:1) Ngera belkul tiang? Ngar er a 13 el bliongel er a 1 Korinth, e a rebebil a omekedong er ngii el kmo “Chelitakl er a Bltikerreng,” e a Paulus a mesaod er a rolel e ngmeteketek a bltikerreng. A bltikerreng a mocholt lokiu sel dengesuterir a rebebil er aike el ousbech. (1 Korinth 10:24; 13:5) Ngblekeradel el kirel a ungil uldasu el melatk er a rebebil, me a kllourreng, me a bekokeuii, e melisiich er a bltikerreng er a telungalek e oldak a rokui el ongdibel.​—Kolose 3:14.

Ngkmal betok a rolel e ngsebeched el olecholt er a bltikerreng el mo er a rebebil, engdi a bltkil a rengud el mo er a Dios a kot el klou a ultutelel e melisiich. E ngera uchul? E le bltkil a rengud el mo er ngii a oldak er kid! A rechad el kakerous a klengar er tir, me a okurulir, me a omelekingir a dmak el mengull er a Jehovah e “kaukledem el mesiou er ngii.” (Sefania 3:9, NW) Me a leuaisei e bo dolecholt er tiaikid el mekreos el blekeradel er a rodech er a reng el mei el okiu a chedaol reng er a Dios er a bek el sils.