APÓSTOL Pablon Diospa yuyaychasqan kaspa ‘santo espirituq rurunkunamanta’ * willaran (Gál. 5:22, 23). Isqonmi chay rurukunaqa, chaykunan mosoq p’acha jina noqanchispaq (Col. 3:10). Chayta allinta entiendenapaq kaypi piensasun. Juj sach’ata allinta cuidasun chayqa allintan rurunqa ¿riki? Chhaynan santo espirituq rurunwanpas, sichus allinta kausasun chayqa santo espiritun noqanchispi kanqa chhaynapitaq rurunkunata rikuchisun (Sal. 1:1-3).

Pabloqa munakuymantan ñaupaqta rimaran. ¿Imaraykun munakuq kana? Pabloq nisqan jina mana munakuq kaspaqa ‘manan imapaqpas’ valesunmanchu (1 Cor. 13:2). Ichaqa, ¿imapunin munakuq kay? ¿Imaynatan munakuq kayta wiñachisunman? ¿Imaynatan rikuchisunman munakuq kasqanchista? Chaykunatan kaypi yachasun.

Chaytaqa manan atisunmanchu simillawan explicayta. Chayrayku aswan rimasun imaynatas munakuyta rikuchisunman chayta. Bibliaq nisqan jina “pipas munakuqqa pacienciakuqmi, sumaq sonqon”, “cheqaq kaqmantan kusikun”, “tukuy imapin pacienciakun, tukuy imatan creen, tukuy imatan suyan, tukuy imatan aguantan”. Chaymantapas pipas munakuqqa khuyapayakuqmi, jujkunapin interesakun. Mana munakuqmi ichaqa envidioso, alabakuq, jatunchakuq, mana respetoyoq, payllapi piensaq, imallawanpas phiñakuq, mana perdonakuq ima. Chaykunata sonqonchispi wiñachinamantaqa jujkunaq allinnintan maskhananchis, chhaynapin rikuchisun cheqaq munakuq kasqanchista (1 Cor. 13:4-8).

Bibliapin nin: “Diosqa munakuymi”, nispa (1 Juan 4:8). Tukuy ima ruwasqanmi rikuchin Diosqa munakuq kasqanta. Jesusta kay pachaman kachamuspan Diosqa rikuchiran may jatunchus munakuynin kasqanta. Apóstol Juanmi niran: “Diosqa sapan Churinta kay pachaman kachamusqanwanmi munakuwasqanchista rikuchiran, chhaynapi chay Churinrayku kausayta chaskinanchispaq. Manan noqanchischu Diostaqa munakuranchis, aswanmi pay noqanchistaqa munakuwaranchis, chaymi Churinta kachamuran juchanchisrayku allipunachiy sacrificiota ruwananpaq; chaymi munakuq kayqa”, nispa (1 Juan 4:9, 10). Diospa chhayna munakuq kasqanraykun juchanchiskuna perdonasqa kapun, wiñay kausaytapas chaskisunchis.

Jesuspas Diospa munayninta junt’ananpaq kay pachaman jamuspan rikuchiran runakuna munakusqanta. Chay ruwasqanmantan Pablo niran: “Diospa chay ‘munayninman’ jinan noqanchisqa Jesucristoq cuerpon ch’ulla kutillata ofrendapi jaywasqa kasqanwan ch’uyanchasqa karanchis”, nispa (Heb. 10:9, 10). Noqanchisrayku wañuspan Jesusqa rikuchiran may  munakuwasqanchista. Chaymi niran: “Amigonkunarayku vidanta qoqmi aswan munakuqqa, chaymanta aswan munakuqqa manan kanchu”, nispa (Juan 15:13). ¿Atisunmanchu juchasapaña kashaspapas Jehová Dios jina Jesús jina munakuq kayta? Arí, atisunmanmi. Chayta kunan yachasun.

Pablon nin: “Dios jina kaychis paypa munasqa wawankuna kasqaykichisrayku. Chaymantapas munanakuspa kausaychis imaynan Cristopas munakuwaranchis jinata”, nispa (Efes. 5:1, 2). Chaypi nisqan jina tukuy tiempon munanakunanchis. Ichaqa sonqomantan munakuyninchisqa kanan. Apóstol Juanmi niran: “Wawallaykuna, ama simillawanchu [...] munakusunqa, aswanpas tukuy sonqowan imatapas ruwaspa munakuq kasqanchistaqa rikuchisun”, nispa (1 Juan 3:18). Chaypi nisqanman jinachus runamasinchiskunata munakusun chayqa gustowanmi willamusun ‘Diospa gobiernonmanta’ (Mat. 24:14; Luc. 10:27). Munakuq kasqanchistan rikuchillasuntaq pacienciakuq kaspa, llamp’u sonqo kaspa, perdonakuq kaspa ima. Bibliapin nin: “Imaynan Jehová Diospas tukuy sonqowan perdonarasunkichis chhaynallatataq qankunapas ruwaychis”, nispa (Col. 3:13).

Ichaqa, pipas munakuqqa manan jinatachu jujkunaq mana allin ruwasqanta qhawan. Juj munakuq taytapas manan jinatachu qhawan wawan gustonman jina imatapas ruwananta, aswanmi wawan allin kananta munaspa ima mañantapas qonqachin. Chhaynan Jehová Diospas, payqa “munakusqan runakunatan wanachin” (Heb. 12:6). Chhaynaqa, munakuq runaqa manan jinatachu qhawan imatapas, aswanmi pitapas wanachina kaqtinqa wanachin (Prov. 3:11, 12). Ichaqa juchasapa runakunataq kanchis chayqa manapaschá mayninpiqa munakuywanchu imatapas ruwasun. Chaymi kunan kinsa yanapaykunamanta yachasun munakuqlla kananchispaq.

1) Jehová Diosmantan mañakunanchis santo espiritunta. Jesuspa nisqan jina Jehová Diosqa qonqan santo espiritunta mañakuqninkunaman (Luc. 11:13). Chay espirituman jinataqmi purinanchis chhaynapin yachasun munakuq kayta (Gál. 5:16). Umalliqkunapas Diosmantan espirituta mañakunanku munakuywan consejokunata qonankupaq. Tayta-mamakunapas Diospa espirituntan mañakunanku wawankuta munakuywan wanachinankupaq.

2) Jesusqa munakuywanmi imatapas ruwaq jujkunaña ñak’arichiranku chaypas, chaypin piensananchis (1 Ped. 2:21, 23). Chay ejemplon yanapawasun jujkuna mana allinta tratawaqtinchis. Chayrayku, ima llakipipas tarikushanchis chayqa tapukusun: “¿Imatan Jesús ruwanman karan?”, nispa. Leigh sutiyoq hermanapas chaytan ruwaran, paymi nin: “Juj kutinmi llank’aqmasiy wakin compañeroykunaman noqamanta mana allinta rimaspa mensajeta apachisqa. Sinchi nanasqan chay ruwasqanwan kasharani. Ichaqa manaraq imatapas ruwashaspan tapukurani: ‘¿Imatan Jesús ruwanman karan?’, nispa. Chaypi piensasqaymi yanapawaran chayta qonqapunaypaq. Chayllamanmi yacharani chay llank’aqmasiyqa onqosqa kashasqanta, sinchi llakisqa kashasqantawan. Chaymi nirani: ‘Manapaschá yuyaypichu chaykunataqa qelqaran’, nispa. Jesuspa imachus ruwasqanpi piensaymi yanapawaran chay compañerayta sumaqta qhawarinaypaq”, nispa. Sichus Jesuspa ejemplonta qatikusun chayqa munakuywanmi imatapas ruwasun.

3) Jujkunaq allinnintan maskhananchis, chhaynapin rikuchisun munakuq kasqanchista cheqaq cristianokuna kasqanchistapas (Juan 13:34, 35). Bibliaq nisqan jina ‘imaynachus Jesuspa yuyaynin karan’ chhaynan yuyayninchispas kanan. Payqa janaq pachata saqespan kay pachaman jamuran noqanchisrayku wañunanpaq (Filip. 2:5-8). Jesús jina munakuq kasun, pay jinataq  imatapas qhawarisun chayqa, manan noqallanchispichu piensasun aswanmi jujkunata ñaupaqman churasun.

Munakuq kaspaqa imaymana bendicionkunatan chaskisun. Kunan yachasun iskay bendicionkunamanta.

• MUNDONTINPIN HERMANONCHISKUNA KANQA. Noqanchispura munanakusun chayqa maymanña chayasun chaypas sumaqtan hermanonchiskunaqa chaskiwasun. Kusikunapaqmi lliu mundontinpi familiayoq kayqa ¿riki? (1 Ped. 5:9). Diospa llaqtallanpin chhayna kausayqa kan, manan maypipas chayqa rikukunmanchu.

• THAJ KAY. Munanakuspaqa llapanchismi thaj kaypi jujllachasqa kasun (Efes. 4:2, 3). Kay t’aqanasqa mundopiqa Diospa llaqtallanpin jujllachasqa kausanchis. Chaymi juñunakuyman rispapas asambleakunaman rispapas thaj kanchis (Sal. 119:165; Is. 54:13). Chhaynaqa, kallpachakushallasun jujkuna-jujkunawan sumaqta kausananchispaq, chhaynapin rikuchisun munakuq kasqanchista Diosta munakusqanchistapas (Sal. 133:1-3; Mat. 5:9).

Bibliaq nisqan jina ‘munakuyqa runatan kallpachan’ (1 Cor. 8:1). ¿Ima ninantaq chayri? Chaytan Pablo explicashan 1 Corintios 13 capitulopi. Kaypi yachasqanchis jina, munakuqqa jujkunaq allinnintan maskhan (1 Cor. 10:24; 13:5). Chaymantapas munakuq runaqa pacienciakuqmi, jujkunapin piensan, munakuywanmi imatapas ruwan, chhayna runakunaqa sumaqtan familiapipas iñiqpurapipas kausanku (Col. 3:14).

Diosta munakusqanchisqa manan imawanpas igualakunmanchu, chay munakuymi llapanchista jujllachawanchis. Arí, chay munakuymi imaymana simi rimaqkunata, imaymana clase runakunata, imaymana costumbreyoq runakunata jujllaman tukuchiwanchis. Chhaynapin Diostapas juj nisqalla servishanchis (Sof. 3:9). Chhaynaqa rikuchishallasun munakuq kasqanchista.