JEHOVÁ DIOS yarichijpimi, apóstol Pabloca espíritu santo granota fucuchinshna fucuchishca, * 9 juyailla cualidadcunamanda parlarca (Gál. 5:22, 23, NM). Chai cualidadcunami mushujta churajunshna causachun ayudan (Efes. 4:24). Imashinami shuj quiruta aliguta cuidajpica juyaillaguta fucun, shinallatami Diospa espíritu santota chasquishpaca, ali cualidadcunata ricuchishun (Sal. 1:1-3).

Pundapica juyaita charinamandami apóstol Pabloca parlarca. ¿Imamandata juyaita charinaca minishtirishcapacha can? Pabloca nircami, juyaita na charishpaca na ‘imapash canichu’ nishpa (1 Cor. 13:2). Shinapash, juyaita charinaca ¿imata can? Juyaita charingapaca ¿imatata rurana capanchi? ¿Imashinata juyaita charishcataca cada punlla ricuchita ushapanchi?

Juyaita charina imapacha cajta ninaca shinllimi can. Shinapash Bibliapica ninmi: ‘Juyaita charijcunaca llaquita apanllami, shujcunatapash llaquinmi, na llullajpimi cushijun. Tucui llaquita apanllami, tucuita crinllami, tucuita shuyanllami, ima nalita rurajpipash saquinllami’ nishpa. Ashtahuangarin, juyaita charijcunaca tucui shunguhuanmi shujcunataca juyan. Paicunamanda preocuparin, paicunata saquingapapash na munanllu. Cutin juyaita na charijcunaca, shujcuna imata charijtapash ñucapa cashcanman yashpami ricun. Jariyanllami, imatapash pinganayaitami ruran, mitsa, imamandapash risintirinllami, perdonangapapash na munanllu. Chashna cangapaca na munapanchichu. Chaipa randica, shujcunata juyashpami paicunapa ima ali cajta mascangapaj munapanchi (1 Cor. 13:4-8).

Jehová Diosca juyaj Diosmi can (1 Juan 4:8). Paipa tucuilla rurashcacunapimi juyaj Taita Dios cashcata ricuchin. Ashtahuanbachaca paipa Churi Jesusta ñucanchimanda huañuchun cachamushpami, juyaita charishcata ricuchirca. Apóstol Juanga nircami: “Causaita causagrinata ñucanchi japigrichunmi Taita Diosca, paipaj shujlla Churita cai pachaman cachamushpa, ñucanchita juyajushcata ricuchirca. Ñucanchica, Taita Diosta na juyashpami causarcanchi. Ashtahuangarin pairami ñucanchita juyarca. Paillatami, paipaj Churita ñucanchi juchacunata anchuchingapaj huañuchun cachamurca” nishpa (1 Juan 4:9, 10). Jehová Diosca ñucanchicunata juyaimandami, ñucanchi juchacunata perdonan. Chaimi ñucanchicunapash shamuj punllacunapi para siempre causana esperanzata charinchi.

Jesuspash Taita Diospa munaita pactachingapaj cai Alpaman shamushpami gentecunata juyashcata ricuchirca. Apóstol Pabloca nircami, Jesusca Taita Dios munashca shinami, ‘aichayu tucushpa paillata cararishpa shuj viajella huañushca’. Chaimandami ‘ñucanchica Diospalla tucushcanchi’ nishpa (Heb. 10:9, 10). Shujcunamanda huañushpami ninanda juyashcata ricuchirca. Jesusca nircami: “Maijambash pai juyashca cumbacunamanda huañushpaca,  ninandapacha juyashcatami ricuchin” nishpa (Juan 15:13). Shinaca juchayucuna cashpapash ¿Jehová Diospa, Jesuspa ejemplota catishpa juyaita charishcata ricuchi ushapanchichu? Ari, ushapanchimi. Huaquin yuyaicunata ricupashun.

Apóstol Pabloca ninmi: ‘Taita Dios juyashca huahuacuna cashpami, paishnallapacha causana canguichi. Cristo ñucanchita juyashcashnami, juyarishpa causana canguichi. Paica ñucanchipa ali cachunmi, Taita Diosman cararishpa huañurca’ nishpa (Efes. 5:1, 2). Juyarishpa causangapaj munashpaca, ñucanchi tucui causaipimi juyaita charishcata ricuchina capanchi. Chaimandami, juyanimi nishpallaca na saquirina capanchi, ñucanchi ruraicunahuanmi ricuchina capanchi. Apóstol Juanga nircami: “Ñuca juyashca huahuacuna, ñucanchica na shimiIlahuan, na rimashcallahuan juyanimi ninachu canchi. Ashtahuangarin imagutapash rurashpami, juyajpacha cashcataca ricuchina canchi” nishpa (1 Juan 3:18). Jehovatapash, shuj gentecunatapash juyaimandami, ali villaicunata villachishun (Mat. 24:14; Luc. 10:27). Shinallata, na ñapash fiñarishpa, llaquishpa, perdonashpami juyaita charishcata ricuchinchi. Chaimandami Bibliapica nin: “Cristomanda Taita Dios cangunapaj juchacunata perdonashcashnallatami, caishujmanda chaishujmanda perdonarina canguichi” nishpa (Efes. 4:32).

Juyanimi nishpapash, na yangata saquinallachu canchi. Shuj ejemplota ricupashun. Huahua ama huacachun nishpa, huahua tucui ima munashcata rurashpaca, ¿huahuata ciertopacha juyashcatachu taitamamacunaca ricuchinajunman? Na. Huahuata ciertopacha juyashpaca, ima nali cajtaca aligutami intindichina can. Jehová Diospash shinallatami can. Juyaimandami paica aliguta intindichina minishtirijpica, aliguta intindichinga (Heb. 12:6, NM). Ñucanchicunapash, aliguta intindichina minishtirijujpi aliguta intindichishpaca, juyashcatami ricuchinajunchi (Prov. 3:11, 12, NM). Shinapash, juchayucunami canchi. Chaimandami tucui horas juyaita ricuchinaca shinlli can. Shinaca ¿imatata rurana capanchi? Quimsa yuyaicunata ricupashun.

Jehová Diostami, espíritu santota carahuai nishpa mañana capanchi. Jesusca nircami, espíritu santota carahuai nishpa mañajpica, Jehová Diosca carangallami nishpa (Luc. 11:13). Mañashca jipaca, ‘Diospa espíritu yachachijujta catishpami causana canchi’. Shinami juyaita charishcataca ashtahuan ricuchita ushashun (Gál. 5:16, Mushuj Testamento Quichua Imbabura). Ancianocunaca, juyaihuan consejangapami Jehová Diostaca espíritu santota carahuai nishpa mañana can. Taitamamacunapash, huahuacunata ama maipash cachun tratashpa juyaihuan, aliguta intindichingapami, Jehová Diostaca espíritu santota carahuai nishpa mañanalla can.

Shujcuna maltratajpipash, Jesús imata rurashcatami pensarina capanchi. (1 Ped. 2:21, 23). Pipash yangamanda llaquichijpi, nali sintichijpica Jesuspa ejemplomi ashtacata ayudan. Chai ratocunapica pensarinami capanchi “¿imatashi Jesusca ruranman carca?” nishpa. Leigh shuti paniguca shina pensarinata yachajushpami jarcarinata yachajurca. Paica ninmi: “Shuj punllaca, trabajopi shuj cumbami ñucatapash, ñuca trabajashcatapash nalicachishpa, shuj correota escribishpa shuj cumbacunaman cacharca. Llaquirircanimi. Shinapash, ¿imatashi Jesusca ruranman carca? nishpami pensarircani. Chai jipaca mejor cungarcanimi. Jipamanga, ñuca cumba ungushcapacha cajta, ninanda llaquirijujtami yachaj chayarcani. Chaipimi pensarircani, ñucata llaquichingapaca na munajushcangachu nishpa. Maltratajpipash Jesús imata rurashcata yarishpami, paipa ejemplota catishpa ñuca cumbata juyashcata ricuchi usharcani” ninmi. Jesuspa ejemplota catishpaca siempremi juyaita charishcata ricuchishun.

Shujcunatami pundapi churana capanchi. Jesusta ali catijcunaca, juyaimandami shujcunata pundapi churan (Juan 13:34, 35). Bibliapica ninmi: ‘Cristo Jesús yarishcatami cangunapash yarishpa causana canguichi’ nishpa. Paica ñucanchimandami jahua cielotapash saquishpa shamurca, paipa causaitapash curca (Filip. 2: 5-8). Paipa ejemplota catishpaca ñucanchicunapashmi Jesús imata yuyashcata yuyashun, imata sintishcatapash sintishun. Ashtahuangarin, shujcunatami pundapi churashun. Chashna juyaita charinaca ¿imamandata ali can?

Juyaita ricuchishpaca, ashtaca bendiciongunatami charinchi. Ishcai bendiciongunata ricupashun.

• MUNDO ENTEROPI HUAUQUIPANICUNATA CHARINA. Tucui huauquipanicunami caishuj chaishuj juyarinchi. Chaimandami maijan congregacionman rijpipash juyaihuan chasquinataca ali yachanchi. Mundo enteropi huauquipanicunata charinaca shuj jatun bendicionmi can (1 Ped. 5:9). Chashna juyaitaca Jehová Diosta sirvijcunallami charin.

• TRANQUILO, ALI CAUSAI. Randimanda aguantarishpa causashpami, tucuicuna shujllashna tandanajushca caita ushanchi (Efes. 4:2, 3). Cai mundopi gentecunaca, shuj gentecunahuan tranquilo, ali causaitaca na ushanllu. Shinapash ñucanchicunaca, tucui tandanajuicunapimi tucuicunahuan tranquilo, ali canchi (Sal. 119:165; Is. 54:13). Shujcunahuan ali llevaringapaj esforzarishpami, paicunata tucui shunguhuan juyashcata ricuchinchi, ñucanchi Taita Jehová Diostapash cushichinchi (Sal. 133:1-3; Mat. 5:9).

Apóstol Pabloca nircami: ‘Juyarishpa causanami shinllichin’ nishpa (1 Cor. 8:1). ¿Imamandata shina nirca? 1 Corintios capítulo 13​pica apóstol Pabloca nircami, juyaita charishpaca shujcunapa ima ali cajtami mascan nishpa (1 Cor. 10:24; 13:5). Shinallata nircami, juyaita charishpaca, pacienciata charin, shujcunatapash cushilla alimi tratan nishpa. Shina juyaita ricuchimandami, familiacunaca juyarin, congregacionbipash shujllashna caita ushan (Col. 3:14).

Jehová Diosta juyanaca alipachami can. Jehová Diosta juyaimandami, maijan llactamanda cashpa, ima shimita parlashpapash, tucuicuna tandanajushpa Jehová Diostaca shujllashna adoraita, sirvita ushanchi (Sof. 3:9). Shinaca, tucui punllacuna juyaita charishcata ricuchingapaj esforzaripashunchi.