YAHOVA apumira mpostolo Paulu toera kulemba makhaliro mapfemba a misapo ya nzimu wakucena. (Agalata 5:22, 23) Makhaliro anewa adidi asacemerwa ‘misapo ya nzimu.’ * (Onani cidzindikiro capantsi.) Misapo ineyi isacita khundu ya ‘umunthu upswa’ wakuti Akristu asafunika kuubvala. (Akolose 3:10) Ninga muti wakuti usabala misapo ungathirirwa mwadidi, munthu anakhalambo na makhaliro anewa adidi kakamwe angathirirwa na nzimu wakucena.—Masalmo 1:1-3.

N’khaliro wakutoma udalonga Paulu ndi ufuni. Thangwi yanji ndi wakufunika kakamwe? Paulu alonga kuti mbadakhonda kukhala na ufuni, ‘nkhabe basa.’ (1 Akorinto 13:2) Mphapo ufuni ninji, pontho tinaukulisa tani na kuupangiza ntsiku zonsene?

Maseze ndi pyakunentsa kakamwe kufokotoza kuti ufuni ninji, Bhibhlya isafokotoza kuti munthu waufuni asanyerezera tani na asacita tani pinthu. Mwacitsandzo, munthu waufuni ndi ‘wakupirira na wakukoma ntima,’ pontho ‘asatsandzaya na undimomwene.’ Munthu angakhala na ufuni, ‘asaphimbira pinthu pyonsene, asakhulupira pinthu pyonsene, asadikhira pinthu pyonsene, asapirira pinthu pyonsene.’ Iye asafuna kakamwe anango, asaatsalakana mwadidi, mbakhala xamwali wandimomwene. Mbwenye munthu angasowa ufuni, asakhala wantcanje, wakudzikuza, asacita pinthu pyakukhonda thema, asacita pinafuna iye basi na wakukhonda kulekerera. M’mbuto mwakupangiza makhaliro ninga anewa akuipa, ife tisafunika kufuna kakamwe anango. Thangwi munthu waufuni ‘nkhabe kusaka pinthu pyace basi.’—1 Akorinto 13:4-8.

‘Mulungu ndi ufuni.’ (1 Jwau 4:8) Mabasa na macitiro ace onsene asapangiza pyenepi. Ufuni wace ukulu wapangizika mudatuma iye Yezu toera kudzathabuka pa dziko yapantsi mbatifera. Mpostolo Jwau alonga: ‘Mulungu apangiza ufuni wace kwa ife mu kutuma Mwanace wautombo toera tikwanise kukhala na umaso. Natenepa, iye apangiza ufuni wace kwa ife, sife tayu adafuna Mulungu, mbwenye ndiye adatifuna mbatitumira Mwanace ninga ntsembe yakuthema thangwi ya madawo athu.’ (1 Jwau 4:9, 10) Thangwi ya ufuni wa Mulungu, tinakwanisa kulekererwa madawo athu, mbatikhala na cidikhiro ca umaso.

Yezu apangiza kuti akhafuna anthu mudapereka iye umaso wace toera kucita cifuno ca Mulungu. Mpostolo Paulu alonga: ‘Thangwi ya ‘cifuno’ ceneci, ife taceneswa kubulukira mu kupereka manungo a Yezu Kristu kabodzi basi.’ (Ahebere 10:9, 10) Nee munthu m’bodzi mbadakwanisa kupangiza ufuni unoyu. Yezu alonga: ‘Nkhabepo munthu ali na ufuni ukulu kupiringana ule adafera axamwali ace.’ (Jwau 15:13) Kodi anthu akusowa ungwiro anakwanisa kutowezera ufuni udapangiza Yahova na Yezu? Inde! Tendeni tidinge kuti tinacita tani pyenepi.

Paulu asatiwangisa: ‘Khalani akutowezera Mulungu ninga anace akufunika na kupitiriza kufamba mu ufuni ninga mudakufunirani Kristu.’ (Aefesi 5:1, 2) Kodi asabvekanji mafala akuti ‘kufamba mu ufuni’? Asabveka kupangiza ufuni ndzidzi onsene. Nee tisafunika kulonga basi ene kuti tisafuna anango. Tisafunika kupangiza pyenepi na macitiro athu. Jwau alemba: ‘Ananga a pantima, tifunane, tayu na mafala peno mulomo basi; mbwenye na mabasa a undimomwene.’ (1 Jwau 3:18) Mwacitsandzo, ife tisamwaza ‘mphangwa zadidi za Umambo’ thangwi tisafuna Yahova na anyakuendekana athu. (Mateo 24:14; Luka 10:27) Pontho ‘tisafamba mu ufuni’ tingakhala akupirira, akukoma ntima na akulekerera. Ife tisaphatisira uphungu wa Bhibhlya: ‘Ninga Yahova akulekererani na ntima onsene, citanimbo pyenepi.’—Akolose 3:13.

Tingapereka uphungu peno kusandika anango, nee pisapangiza kuti ife nkhabe ufuni. Mwacitsandzo, toera kumatamisa mwana analira, anyakubala anango asacita pyonsene pinafuna mwana. Mbwenye nyakubala wakuti asafuna kakamwe mwanace panango asansandika pingakhala pyakufunika. Munjira ibodzi ene, maseze Mulungu ndi ufuni, ‘Yahova asasandika ale anafuniwa na iye.’ (Ahebere 12:6) Natenepa, ndi ufuni kusandika anango khala mphyakufunika. (Misangani 3:11, 12) Mbwenye kumbukani, tonsene ndife anyakudawa pontho kazinji kene tisacimwana kupangiza ufuni. Natenepa, tonsene tinakwanisa kuwangisira toera kupangiza ufuni. Tinacita tani pyenepi? Tendeni tidinge njira zitatu.

Yakutoma, phembani Mulungu toera akupaseni nzimu wace wakucena, wakuti usabweresa ufuni. Yezu alonga kuti Yahova asapasa ‘nzimu wace wakucena ale anamphemba.’ (Luka 11:13) Natenepa, tinakwanisa kukhala na cinyindiro cakuti tingaphemba nzimu wakucena na kuutawirisa toera kutiphedza tinadzakhala na ufuni wandimomwene. (Agalata 5:16) Mwacitsandzo, khala ndimwe nkulu wa mpingo, munakwanisa kuphemba nzimu wakucena toera ukuphedzeni kukhala na ufuni mu ndzidzi unaphedza imwe anango mukuphatisira uphungu wa Bhibhlya. Peno khala ndimwe nyakubala, munakwanisa kuphemba ciphedzo ca nzimu wa Mulungu toera kusandika ananu mwaufuni, tayu mwaukali.

Yaciwiri, nyerezerani mwadidi kuti Yezu apangiza tani ufuni mu ndzidzi ukhatsalakanwa iye mwakuipa na anango. (1 Pedro 2:21, 23) Khala munthu unango akuxolani peno akucitirani pinthu pinango pyakuipa, bvundzikani: ‘Khala ndi Yezu mbadacitanji?’ Mulongo unango anacemerwa Leigh adzindikira kuti kucitika mbvundzo unoyu kwamphedza toera kunyerezera mbadzati kucita pinthu. Iye alonga: “Ntsiku inango, ndzanga wakubasa atumiza e-mail kuna andzanga akubasa ya mphangwa zakuipa thangwi ya ine na basa ikhacita ine. Pyenepi pyandidzidzida kakamwe. Buluka penepo ndabvundzika, ‘Ndinatowezera tani Yezu toera kutsalakana munthu unoyu?’ Pakumala kunyerezera kuti Yezu mbadacitanji, ndatonga kumulekerera mbindikhonda kukoya pinthu muntima. Mukupita kwa ndzidzi, ndadzindikira kuti ndzanga unoyu wakubasa akhathimbana na nyatwa yaungumi, pontho akhali wakutsukwala kakamwe. Natenepa ndaona kuti panango nee akhafuna kulonga pinthu pidalemba iye. Kunyerezera citsandzo ca Yezu cakupangiza ufuni maseze akhacitirwa pyakuipa, pyandiphedza toera kupangiza ufuni ubodzi ene kuna ndzanga wakubasa.” Khala tisatowezera Yezu, tinadzapangizambo ufuni kuna anango ndzidzi onsene.

Yacitatu, pfundzani kuti munapangiza tani ufuni wandimomwene. Unoyu ndi ufuni udadzindikirisa atowereri andimomwene a Yezu. (Jwau 13:34, 35) Yezu akhali na ntundu unoyu wa ufuni, pontho akhazikisa citsandzo cadidi kwa ife. Munjira ipi? Mukusiya kudzulu, ‘iye acepeseka’ thangwi ya ife ‘mpaka kufa.’ (Afilipi 2:5-8) Mu ndzidzi unatowezera ife ufuni wa Yezu, manyerezero na mabvero athu anadzakhala ninga a Yezu, pontho tinadzaikha pifuno pya anango pa mbuto yakutoma.

Tingapangiza ufuni, tisakhala na maphindu mazinji. Tendeni tidinge pitsandzo piwiri:

• NSOKA WA ABALE PA DZIKO YONSENE: Thangwi yakufunana kwathu unango na ndzace, tisadziwa kuti mwakukhonda tsalakana mpingo unaenda ife pa dziko yonsene, abale na alongo anatitambira mwadidi. Ndi nkhombo kakamwe kudziwa kuti tisafuniwa na ‘abale na alongo pa dziko yonsene.’ (1 Pedro 5:9) Ife tisagumana ufuni unoyu basi ene pakati pa atumiki a Mulungu.

• NTENDERE: ‘Kupirirana mwaufuni’ kusaticitisa kutsandzaya na ‘kuphatana mu ntendere.’ (Aefesi 4:2, 3) Ife tisaona ntendere unoyu m’misonkhano yathu ya mpingo, ya cisa na ya gawo. Nee musatawira kuti ntendere unoyu ndi wandimomwene n’dziko ino yakugawika? (Masalmo 119:165; Izaiya 54:13) Tingakhazikisa ntendere na anango, tisapangiza kuti mwandimomwene tisaafuna na tisakomeresa Babathu wakudzulu.—Masalmo 133:1-3; Mateo 5:9.

Paulu alemba: ‘Ufuni usamangirira.’ (1 Akorinto 8:1) Kodi mafala anewa asabvekanji? 1 Akorinto kapitulu 13, yakuti anango asaicemera “Salmo do Amor,” Paulu afokotoza kuti ufuni usamangirira tani. Ufuni usasaka pyakufuna pya anango. Ufuni usatsalakana pyakufuna pya anango. (1 Akorinto 10:24; 13:5) Pontho, nakuti ufuni usanyerezera mwadidi, usatsalakana, usapirira na ndi wakukoma ntima, usacitisa mabanja na mipingo kukhala pyakuphatana.—Akolose 3:14.

Pana njira zizinji toera kupangiza ufuni kuna anango, mbwenye ufuni wathu kwa Mulungu ndi wakufunika kakamwe kupiringana pyonsene. Thangwi yanji? Thangwi ufuni wathu kwa iye usaticitisa kukhala akuphatana! Anthu a makhaliro onsene, ntundu na pilongero asalambira pabodzi Yahova na ‘kuntumikira phewa na phewa.’ (Sofoniya 3:9) Tendeni tikhale akutonga toera kupangiza n’khaliro unoyu wakufunika kakamwe ntsiku zonsene wakuti ndi nsapo wa nzimu wa Mulungu.