JEHOVHA i pimisele mupostoli Pawule lezvaku a tsala 9 wa matshamela ma tako hi ka moya wa ku basa. (Va Le Galatia 5:22, 23) A matshamela lawo yo saseka ma vitaniwa lezvaku ‘mihandzu ya moya.’ * (Wona tlhamuselo wa lahasi.) A matshamela lawo ma maha cipandze ca “munhu muswa” loyi a maKristu ma faneleko ku mu ambala. (Va Le Kolosi 3:10) A ku fana ni sinya yi pswalako mihandzu loku yi cheletelwa khwatsi mati, a munhu a ngo kuma matshamela lawo yo saseka loku a moya wa ku basa wu tira khwatsi wutomini gakwe. — Lisimu 1:1-3.

A tshamela go sangula legi Pawule a nga gi xaxameta lirandzo. Hi lihi a lisima la tshamela legi? Pawule i zile aku: ‘Loku ndzi nga hi na lirandzo, a ndzi nchumu.’ (1 Va Le Korinte 13:2) Kanilezvi cini lirandzo, niku hi nga li kumisa kuyini? Kona hi nga li kombisisa kuyini wutomini ga siku ni siku?

Hambu lezvi zvi karatako ku tlhamusela khwatsi ku a lirandzo cini, a Bhibhiliya ga tlhamusela lezvi zvi mahiwako hi munhu wa lirandzo. Hi cikombiso, gi wula lezvaku a munhu wa lirandzo ‘i na ni lihlazva-mbilu, mu nene’ niku ‘i tsakelana ni lisine.’ A munhu wa lirandzo ‘i nonoka ku zwata zvilo zvontlhe, a kholwa zvilo zvontlhe, a tsumba zvilo zvontlhe, a timisela zvilo zvontlhe.’ Wa khatala nguvhu hi van’wani niku munghana wo tsumbeka. Kanilezvi a munhu wo kala lirandzo, i na ni ciluse ni matshandza, i maha zvilo zvi nga faneliko, a ti lavela zvakwe basi, a tlhela a nga tsetseleli. Wutshan’wini ga kuva ni matshamela yo biha yo kota lawo, hi fanele ku kombisa lirandzo la lisine hi van’wani, la ku ‘a li ti laveli zva lona.’ — 1 Va Le Korinte 13:4-8.

‘Nungungulu lirandzo.’ (1 Johani 4:8) A mitiro yakwe yi komba lezvo. A ndlela ya hombe leyi a nga kombisa hi yona lirandzo hi vanhu ku rumela Jesu misaveni lezvaku a ta xaniseka a tlhela afa, na a fela hina. Mupostoli Johani i te: ‘A ku hi randza ka Nungungulu ku wonekelisilwe hi lezvi, Nungungulu i rumele a N’wana wakwe a belekilweko yece ata laha misaveni, kasi hina hi fela ku hanya ha yena. A lirandzo hi leli, a hi lezvaku hina hi mu randzile Nungungulu, kanilezvi hi yena a hi randzileko, a rumela N’wana wakwe a kuva ndzhiho wa zviwonho zva hina.’ (1 Johani 4:9, 10) Hi kota ya lirandzo la Nungungulu, ha zvi kota ku tsetselelwa zviwonho zva hina hi tlhela hiva ni kutsumba ni wutomi.

Jesu i kombile lezvaku wa va randza vanhu hi ku nyikela wutomi gakwe kasi ku maha kurandza ka Nungungulu. Mupostoli Pawule i ngalo: ‘Hi kurandza kwaloko hi basisilwe hi kunyikelwa ka miri wa Jesu Kristu kan’we ku mbhela.’ (Maheberu 10:9, 10) A ku na munhu a zvi kotako ku kombisa lirandzo lo hundza lelo. Jesu i te: ‘A ku na munhu a nga ni lirandzo la hombe lo hundza leli, lezvaku munhu a nyikela kuhanya kakwe hi kota ya maxaka yakwe.’ (Johani 15:13) Xana a vanhu  vo kala ku mbhelela va nga zvi kota ku pimanyisa a lirandzo la Jehovha na Jesu? Ina! A hi woneni lezvi hi nga mahisako zvona.

Pawule i hi byela lezvi: ‘Mahani vapimanyisi va Nungungulu, khwatsi hi vanana va randzekako, mu famba hi lirandzo kota lezvi Kristu a nga mu randza, a ti nyikela hi kota ya hina.’ (Va Le Efesusi 5:1, 2) Zvi wula yini a ku ‘famba hi lirandzo’? Zvi wula ku kombisa lirandzo contlhe cikhati. A hi ku wula basi hiku ha randza van’wani, kanilezvi ku zvi kombisa hi lezvi hi mahako. Johani i tsalile lezvi: ‘Vana vanga, hi nga randzi hi kuwulawula, kutani hi lirimi, kanilezvi a hi randzeni hi kumaha ni lisine.’ (1 Johani 3:18) Hi cikombiso, hi chumayela a mahungu yo saseka ya Mufumo hi ku randza Jehovha ni muakelani. (Mateu 24:14; Luka 10:27) Hi ‘famba hi lirandzo’ kambe loku hi kombisa lihlazva-mbilu, wunene, ni ku tsetselela. Hi ingisa a wusungukati ga Bhibhiliya gaku: ‘Kota lezvi Jehovha a nga mu tsetselela, n’winawu mahani zvalezvo.’ — Va Le Kolosi 3:13.

Kanilezvi a ku kawuka van’wani a zvi wuli ku kala hi nga hi na lirandzo. Hi cikombiso, kasi ku miyeta n’wanana a vapswali vo kari va maha ni cihi leci a ci lavako. Kanilezvi a mupswali loyi hakunene a randzako n’wana wakwe wa mu kawuka loku zvi laveka. Hi kufanana, Nungungulu lirandzo, hambulezvo ‘wa tsayisa loyi a mu randzako.’ (Maheberu 12:6) Hikwalaho, a ku kawuka munhu hi fanelo ku mu randza. (Mavingu 3:11, 12) Kanilezvi alakanya lezvaku hontlheni hi vawonhi; ha tolovela ku nga kombisi lirandzo. Hikwalaho, hontlheni hi fanele ku ti karatela ku engetela lirandzo la hina. Hi nga zvi mahisa kuyini? A hi woneni tindlela tinharu.

Co ranga, kombela Nungungulu lezvaku a ku nyika moya wakwe wa ku basa, lowu wu pswalako lirandzo. Jesu i te Jehovha wa nyika “moya wa ku basa ka lava va mu kombelako.” (Luka 11:13) Hikwalaho, hi nga tiyiseka lezvaku loku hi kombela moya wa ku basa hi tlhela hi wu tsika wu hi vhuna, hi taya hi engetela kuva ni lirandzo. (Va Le Galatia 5:16) Hi cikombiso, loku u hi dhota, u nga kombela moya wa ku basa kasi wu ku vhuna ku kombisa lirandzo a cikhati u nyikako wusungukati hi ku tirisa Bhibhiliya. Loku u hi mupswali, u nga kombela lezvaku a moya wa Nungungulu wu ku vhuna ku kawuka vana va wena hi lirandzo, wutshan’wini ga ku va kawuka na u zangarile.

Ca wumbiri, ehleketa khwatsi hi lezvi Jesu a nga kombisisa zvona lirandzo hambu ka cikhati leci a nga xanisiwa hi van’wani. (1 Pedro 2:21, 23) Loku a wokari a ku khunguvanyisa kutani ku ku mahela zvobiha, ti wutise ku ‘Loku ku wa hi Jesu, i wa ta ku yini?’ A makabye wo kari wa ku hi Leigh i polile lezvaku a ku ti maha ciwutiso leco zva mu vhuna ku ranga hi ku ehleketa loku a lava ku maha nchumu. I ngalo: “Ka siku go kari, a mun’we wa vatiri-kuloni i rumele mahungu ka van’wani na ma wulawula kubiha hi mina ni ntiro wa mina. A zvi no ku ndzi bayisa. Kanilezvi ndzi ti wutisile ku, ‘Ndzi nga mu pimanyisisa kuyini Jesu ka mhaka leyi?’ Andzhako ka ku ehleketa hi lezvi Jesu a nga wa ta maha, ndzi bohile ku zvi tsika zvi hundza. Hi ndzhako ka cikhati, ndzi yile ndzi ya tiva ku a wasati loye i wa hi ni cikarato ca hombe ca mababyi; i wa hi kukaratekeni ka hombe nguvhu. Lezvo zvi ndzi mahile ndzi ti byela ku kuzvilava lezvi a nga tsala a hi zvona a nga lava ku wula. A ku ehleketa hi cikombiso ca Jesu ca ku kombisa lirandzo hambu loku hi swirekile zvi ndzi vhunile ku kombisa lirandzo hi mutiri-kuloni.” Loku hi pimanyisa Jesu, contlhe cikhati hi ta kombisa lirandzo ka van’wani.

Ca wunharu, gondza ku kombisa lirandzo la ku rangisa zva van’wani. A lirandzo lelo hi leli li tivekisako a valandzeli va lisine va Jesu. (Johani 13:34, 35) Yena i wa hi nalo lirandzo lelo, niku i hi vekele cikombiso co mbhelela. Hi ndlela muni? Hi ku suka le tilweni, a “ti maha wa nyalidede” hi kota ya hina, “kala kufeni.” (Va Le Filipi 2:5-8)  Loku hi pimanyisa a lirandzo la Jesu, a mapimo ya hina ni timbilu ta hina zvi taya zvi fana nguvhu ni lezvi zvakwe, niku hi ta rangisa zva van’wani mahlweni ka lezvi zva hina venyi.

A mabhindzu ya ku kombisa lirandzo ma tele. Wona mambiri ya kona:

• KUVA NI VAMAKABYE MISAVENI YONTLHE: Hi kota ya lezvi hi randzanako, ha zvi tiva lezvaku kova ni kwihi lomu hi yako, a vamakabye va hina va ta hi amukela hi mandla mambiri. Hakunene makatekwa ya hombe a ku tiva lezvaku wa randziwa hi ‘vamakabye va wena vontlhe va nga lomu misaveni’! (1 Pedro 5:9) A lirandzo lelo hi li kuma cikari ka vanhu va Nungungulu ntsena.

• KUVA NI KURULA: A ku ‘timiselana hi lirandzo’ zvi maha ku hi ‘bohana hi kurula.’ (Va Le Efesusi 4:2, 3) Hi kuma kurula loko mitlhanganweni ya bandla ni ya cipandze, ni migotsovanyanweni. A wu kholwi ku a kurula loko ka kala nguvhu tikweni legi go tala hi maguwa ke? (Lisimu 119:165; Isaya 54:13) Loku hi hlota kurula ni van’wani, hi komba lezvaku hakunene ha va randza, niku lezvo zvi tsakisa Papayi wa hina wa le tilweni. — Lisimu 133:1-3; Mateu 5:9, Tradução do Novo Mundo.

Pawule i tsalile lezvaku a ‘lirandzo la aka.’ (1 Va Le Korinte 8:1) Zvi wula yini lezvo? Ka bhuku ga 1 Va Le Korinte cipimo 13, legi a vokari va gi vitanako ku “Lisimu la Lirandzo,” Pawule i tlhamusela lezvi a lirandzo li akisako zvona. A lirandzo li rangisa zva van’wani. Li chela kota hi zvilaveko zva van’wani. (1 Va Le Korinte 10:24; 13:5) Niku kota lezvi li alakanyelako van’wani, li zwela wusiwana, li hi ni lihlazva-mbilu ni wunene, li aka mingango yi nga ni lirandzo ni mabandla ma nga ni kuzwanana. — Va Le Kolosi 3:14.

Ku na ni tindlela to tala ta ku kombisa lirandzo hi van’wani, kanilezvi a lirandzo la hina hi Nungungulu hi lona lo ranga hi lisima ni kuaka ka lona. Hikuyini? Hi ku a lirandzo la hina hi yena li hi maha hi bohana! A vanhu va midhawuko yontlhe, ni tihlonge, ni tirimi va khozela Jehovha va tlhela va mu tirela ‘hi mbilu yin’we.’ (Zefania 3:9) A hi ti yimiseleni ku kombisa tshamela legi ga lisima nguvhu gi pswaliwako siku ni siku hi moya wa ku basa wa Nungungulu.