UA TURAI Iehova i te aposetolo Paulo ia papai no nia i na iva huru maitatai ta te varua moˈa e faatupu. (Gal. 5:22, 23) Ia amuihia, e parauhia teie mau huru maitatai te hotu o te varua. * E tuhaa atoa teie mau huru maitatai o “te huru taata apî” ta te mau Kerisetiano e tia ia ahu mai. (Kol. 3:10) Mai te hoê tumu raau o te faahotu i te maa ia pîpî-maitai-hia oia, e faaohipa te hoê taata i teie mau huru maitatai ia ohipa maite te varua moˈa i roto i to ˈna oraraa.—Sal. 1:1-3.

Te huru maitai matamua ta Paulo i faahiti, o te here ïa. Eaha te faufaaraa o teie huru maitai? Ua parau Paulo e aita anaˈe e here, “mea faufaa ore anaˈe ïa” te ohipa ta ˈna e rave. (Kor. 1, 13:2) Eaha râ te here, e e nafea tatou e nehenehe ai e faatupu e e faaite i te reira i te mau mahana atoa?

Noa ˈtu mea fifi roa ia faataa maitai eaha te here, te faahiti ra te Bibilia e nafea te hoê taata î i te here e feruri e e haa ˈi. Ei hiˈoraa, e “faaoromai e e hamani maitai” te hoê taata î i te here, e e “oaoa . . . i te parau mau.” Ia faaite te hoê taata i te here, “e tapoˈi” oia “i te mau mea atoa, e tiaturi i te mau mea atoa, e tiai i te mau mea atoa e e faaruru i te mau mea atoa.” E here mau to ˈna no vetahi ê, e tâuˈa oia ia ratou e e hoa papu atoa oia. Aita anaˈe râ e here to te hoê taata, e pohehae oia, e faaoru, e rave i te mea au ore, e miimii oia e eita oia e faaore i ta vetahi ê hapa. Eita tatou e faaite i tera mau huru iino, e faaite râ tatou i te here mau ia vetahi ê, eita tera here “e imi i to ˈna iho maitai.”—Kor. 1, 13:4-8.

“E here te Atua.” (Ioa. 1, 4:8) Te haapapu ra ta ˈna mau ohipa atoa e haaraa i te reira. Te faaiteraa rahi roa ˈˈe o to ˈna here i te huitaata, o te tonoraa ïa ia Iesu i te fenua nei ia mauiui e ia pohe oia no tatou. Ua parau te aposetolo Ioane: “I teie i faaitehia mai ai te here o te Atua ia tatou: ua tono mai te Atua i ta ˈna Tamaiti otahi i te ao nei ia noaa ia tatou te ora na roto ia ˈna. Teie te here o te Atua, e ere o tatou tei here i te Atua, o ˈna râ tei here mai ia tatou e tei tono mai i ta ˈna Tamaiti ei tusia taraehara no ta tatou mau hara.” (Ioa. 1, 4:9, 10) Maoti te here o te Atua, e nehenehe ta tatou mau hara e faaorehia e e nehenehe tatou e fanaˈo i te tiaturiraa e te ora.

Ua faaite Iesu e ua here oia i te huitaata ma te pûpû i to ˈna ora no te rave i to te Atua hinaaro. Te parau mai ra te aposetolo Paulo: “No teie ‘hinaaro’ i haamoˈahia ˈi tatou na roto i to Iesu Mesia pûpûraa i to ˈna tino hoê roa pûpûraa.” (Heb. 10:9, 10) Aita hoê aˈe taata e nehenehe e faaite i te here rahi aˈe. Ua parau Iesu: “Ia horoa te hoê taata i to ˈna ora no to ˈna mau hoa, tera te here rahi aˈe.” (Ioa. 15:13) E nehenehe anei ei taata tia ore e pee i te here o  ta Iehova e Iesu i faaite? E! E hiˈo mai tatou e nafea ia na reira.

Ua faaitoito mai Paulo: “A pee i te haerea o te Atua mai te tamarii herehia. E ei haerea here noa to outou, mai te Mesia atoa i here ia tatou e i horoa ia ˈna iho no tatou.” (Eph. 5:1, 2) Eaha te auraa o te parau “ei haerea here noa to outou”? O te faaiteraa ïa i te here i te mau taime atoa. Eita noa tatou e parau e mea here na tatou ia vetahi ê. E faaite atoa râ tatou i te reira na roto i ta tatou e rave. Ua papai Ioane: “Ta ˈu mau tamarii here, ia here tatou, eiaha ïa ei parau noa, ei here ohipa râ e te parau mau.” (Ioa. 1, 3:18) Ei hiˈoraa, e poro tatou i “te parau apî oaoa o te Faatereraa arii” no to tatou here ia Iehova e to tatou taata tupu. (Mat. 24:14; Luka 10:27) E pee atoa tatou i te hoê “haerea here noa” ia faaoromai, ia hamani maitai e ia faaore tatou i te hapa. E faaohipa tatou i te aˈoraa Bibilia: “Mai ia Iehova i faaore noa mai i ta outou ra [mau hapa], ia na reira atoa ˈtu outou.”—Kol. 3:13.

Teie râ, ia aˈo tatou ia vetahi ê, e ere ïa te auraa e aita tatou e here ra ia ratou. Ei hiˈoraa, ia ore te tamarii e taˈi faahou, e rave te tahi mau metua i te mau mea atoa ta te tamarii e hinaaro. Area te hoê metua o te here mau ra i ta ˈna tamarii, eita o ˈna e farii noa i ta te tamarii e ani. Hoê â huru no te Atua, noa ˈtu e here te Atua, “e aˈo . . . Iehova i te feia mea here na ˈna.” (Heb. 12:6) No reira, e haerea î i te here ia aˈo, mai te peu e titauhia. (Mas. 3:11, 12) A haamanaˈo râ, e taata rave hara anaˈe tatou e mea pinepine, eita ta tatou e nehenehe e faaite i te here. E nehenehe ïa tatou pauroa e haamaitai mai i to tatou huru faaiteraa i te here. E nafea tatou e na reira ˈi? E hiˈo mai tatou e toru ravea.

A tahi, a ani i te Atua ia horoa mai i ta ˈna varua moˈa, o te faahotu i te here. Ua parau Iesu e e horoa Iehova i “te varua moˈa na te feia e ani atu ia ˈna.” (Luka 11:13) Ia papu maitai ïa ia tatou e ia pure tatou no te fanaˈo i te varua moˈa e ia vaiiho tatou i te reira ia tauturu mai ia tatou, e rahi atu â to tatou here. (Gal. 5:16) Ei hiˈoraa, mai te peu e matahiapo oe, e nehenehe oe e ani i te varua moˈa no te tauturu ia oe ia faatupu i te here ia aˈo oe ia vetahi ê ia au i te Bibilia. Aore ra mai te peu e metua oe, e nehenehe oe e ani ia tauturu te varua o te Atua ia oe ia aˈo i to tamarii, eiaha na roto i te riri, na roto râ i te here.

A piti, a feruri maite mea nafea Iesu i te faaite-noa-raa i te here noa ˈtu ua hamani ino vetahi ê ia ˈna. (Pet. 1, 2:21, 23) Ia inoino oe ia vetahi ê aore ra ia faaruru oe i te tahi ohipa parau-tia ore, a ui ia oe, ‘Eaha ta Iesu e rave ahani o ˈna tera?’ Ua parau te hoê tuahine o Leigh te iˈoa, e ua tauturu te feruriraa i tera uiraa ia ˈna ia feruri hou a ohipa ˈi. Te parau ra oia: “I te hoê mahana, ua hapono te hoê rave ohipa i te hoê poroi roro uira i te tahi atu mau rave ohipa no te faaite atu i te tahi mau mea tano ore no nia ia ˈu e te ohipa ta ˈu e rave ra. Ua mauiui roa vau. Ua ui râ vau ia ˈu iho, ‘E nafea vau e nehenehe ai e pee i te hiˈoraa o Iesu ia paraparau vau ia ˈna?’ I muri aˈe i to ˈu feruriraa i ta Iesu e rave ahani o ˈna to roto i to ˈu tupuraa, faaoti atura vau e vaiiho noa e eiaha e haapao faahou i te reira. I muri aˈe, ua faaroo vau e e maˈi rahi to teie rave ohipa, e e hepohepo rahi atoa ta ˈna e faaruru ra. Tapea noa ˈtura vau i te manaˈo e peneiaˈe aita oia i manaˈo aˈe i te mea ta ˈna i papai. Ua tauturu mai te haamanaˈoraa i to Iesu hiˈoraa no nia i te faaiteraa i te here noa ˈtu te haamauiuiraa, ia faaite i te hoê â here i to ˈu hoa rave ohipa.” Mai te peu e pee tatou i to Iesu hiˈoraa, e tamau noa tatou i te faaite i te here ia vetahi ê.

A toru, a haapii i te faaite i te here haapae. Teie te huru here o te faaite e e pǐpǐ mau tatou a Iesu. (Ioa. 13:34, 35) Ua faatupu atoa Iesu teie huru here e ua vaiiho mai oia i te hiˈoraa tia roa no tatou. Mea nafea? Ua faarue oia i te  raˈi, “ua haapae . . . ia ˈna iho” e ua tae roa oia “i te pohe” no tatou. (Phil. 2:5-8) Ia pee tatou i to Iesu here haapae, e tuea ˈtu â to tatou mau manaˈo e huru aau i to ˈna, e e tuu tatou i to vetahi ê mau hinaaro na mua i to tatou iho.

Mea rahi te maitai ta tatou e ite ia faaite tatou i te here. E hiˈopoa mai tatou e piti hiˈoraa:

• HOÊ HUITAEAE NA TE AO ATOA NEI: No to tatou here te tahi i te tahi, ua ite tatou e e farii maitai mai te mau taeae e tuahine no te mau amuiraa atoa ta tatou e ratere atu na te ao atoa nei. Auê ïa haamaitairaa ia ite e te herehia ra oe e to oe “fetii taeae na te ao nei”! (Pet. 1, 5:9) I roto noa i te nunaa o te Atua e itehia ˈi tera huru here.

• TE HAU: E ite tatou i “te hau e tahoê” “ia faaoromai” tatou “i ta te tahi e te tahi ra hapa.” (Eph. 4:2, 3) E ite tatou i teie hau i ta tatou mau putuputuraa e tairururaa. E farii iho â paha oe ia parau e mea otahi mau teie hau i roto i teie ao amahamaha. (Sal. 119:165; Isa. 54:13) Ia tapi tatou i te parahi hau noa e vetahi ê, e faaite tatou e mea here mau iho â na tatou ia ratou, e e mauruuru to tatou Metua i te raˈi i te reira.—Sal. 133:1-3; Mat. 5:9.

Ua papai Paulo: “E faaitoito . . . te here.” (Kor. 1, 8:1) Eaha te auraa? I roto i te Korinetia 1 pene 13, o ta vetahi e pii “te Salamo o te here,” te faataa ra oia e nafea te here e faaitoito ai. E imi te here i te maitai o vetahi ê. E haapao te here i te hinaaro o vetahi ê. (Kor. 1, 10:24; 13:5) Inaha hoi e haapao maitai, e faaoromai e e hamani maitai te here, e faaitoito ïa te reira i te mau utuafare e e tahoê atoa te reira i te mau amuiraa.—Kol. 3:14.

Mea rahi te ravea no te faaite i te here ia vetahi ê, o to tatou râ here i te Atua te mea faufaa roa ˈˈe e te faaitoito roa ˈˈe. No te aha? E tahoê to tatou here no ˈna ia tatou. E haamori amui te feia no e rave rau huru oraraa, nunaa, e reo, ia Iehova, a tavini noa ˈi ia ˈna “ma te aau hoê.” (Zeph. 3:9) E faaitoito anaˈe ïa i te faaite i teie huru maitai faufaa rahi o te hotu o to te Atua varua moˈa i te mau mahana atoa.