1, 2. (a) Watwero bedo ki kuc i kare-ni nining? (b) Pingo pe twere me bedo labongo peko mo keken i kare-ni? (Nen cal ma tye i pot karatac man.)

WAN ducu wamito ni wabed ki kuc i kwowa, dok wamito ni wagwokke ki i bedo ki par. Pi meno, watye ki pwoc ni Jehovah miniwa “kuc.” Kuc man weko wabedo ma cwinywa opye mot dok gwokowa ki i bedo ki tam kacel ki par mapol. (Jo Pilipi 4:6, 7) Dok bene wabedo ki ‘kuc ki Lubanga’ pien dong wadyero kwowa bote. Man te lokke ni wabedo ki wat maber ki Lubanga.​—Jo Roma 5:1.

² Kadi bed kumeno, kare ma Lubanga bikelo kuc i wi lobo ducu peya oromo. Watye ka kwo i kare me agikki, pi meno wakemme ki pekki mapol ma weko wabedo ki par. Wakwo i lobo ma opong ki lutim gero. (2 Temceo 3:1-4) Dok mitte bene ni walweny i kom Catan kacel ki pwony gobane ma oromo kin piny woko. (2 Jo Korint 10:4, 5)  Ento gin ma twero keliwa par madit loyo aye obedo aunauna ma a ki bot wadiwa ma pe gubedo Lucaden pa Jehovah. Jo mukene giromo ngalowa pi niyewa nyo giwaco ni watye ka kelo apokapoka gang. Giromo bene wacone ni pe watwero medde ki bedo kacel ki jo me gang ka pe wagiko tic pi Jehovah. Dong myero wanen aunauna ma a ki bot jo me gangwa nining? Ki dok watwero medde ki bedo ki kuc nining ka gitye ka unowa?

3, 4. (a) Pwony pa Yecu onongo bigudo lupwonnyene nining? (b) Ngo ma onongo biweko bedo tek me lubo kor Yecu?

³ Yecu onongo ngeyo ni pe dano ducu gubiye pwonye. En bene onongo ngeyo ni myero kicuk cwiny lupwonnyene pien jo mukene bidagogi. Adegadega man onongo bibalo kuc ma tye i kin jo me ot. Yecu owaco ni: “Pe wutam ni abino me kelo kuc i lobo; an pe abino me kelo kuc, ento pala lucwan. Pien abino me poko kin dano woko ki wonne, nyako bipokke woko ki minne, ki ci-wod bene bipokke woko ki dane. Lukwor pa dano bibedo jo ma i pacone.”​—Matayo 10:34-36.

⁴ Ngo ma Yecu onongo mito ni Lupwonnyene gunge i kare ma owaco ni: “Pe wutam ni abino me kelo kuc”? En onongo mito ni dano gunge ni gibikemme ki pekki mapol ka gudoko lulub kore. Ki lok ada, miti pa Yecu onongo tye me pwonyogi ki lok ada madok i kom Lubanga ento pe me kelo apokapoka i kin jo me ot. (Jon 18:37) Ento lupwonnye onongo myero gunge ni pe bibedo yot me lubo kor Yecu, tutwalle ka laremgi mo macok nyo jo mogo ma i ganggi pe gujolo ada.

5. Ngo ma lulub kor Yecu guwok ki iye?

⁵ Yecu owaco ni adegadega ma a ki bot jo me ot tye i kin pekki ma lulub kore myero gubed atera me ciro. (Matayo 10:38) Me yomo cwiny Yecu, lulub kore guciro adegadega kacel ki ngala ma a ki bot jo ma i pacigi. Ento gunongo jami mabeco mapol makato ma gurwenyo.​—Kwan Marako 10:29, 30.

6. Ngo ma wiwa myero opo iye ka watye ka kemme ki adegadega ma a ki bot wadiwa?

⁶ Kadi bed ni wadiwa giunowa pien ni waworo Jehovah, pud wamedde ki marogi. Ento wiwa myero opo ni marwa pi Lubanga ki Yecu myero obed matek loyo marwa pi ngat mo keken. (Matayo 10:37) Myero bene wange ni Catan twero tic ki mar ma watye kwede pi jo me gangwa wek pe wabed lugen bot Jehovah. Kong dong wanyamo jami mogo ma twero timme i komwa ki kit ma watwero cirone kwede.

7. Myero ibed ki neno ango ka luoti pe woro Jehovah?

⁷ Baibul cikowa ni “jo ma nyomme gibinongo ayelayela me kwo me lobo man,” nyo pekki. (1 Jo Korint 7:28) Dok ka inyomme ki ngat ma pe woro Jehovah, ci twero medo pekki ki par mapol i kwo me otwu. Kadi bed  kumeno, pire tek ni inen kwo ma itye ka kato ki iye kit ma Jehovah neno kwede. En wacciwa ni pe myero wapokke nyo waket kenywa ki ngat ma wanyomme kwede pien ni pe woro Jehovah. (1 Jo Korint 7:12-16) Ka won oti pe tiyo pi Jehovah dok bene pe telo wi jo ma i ode i woro me ada, pud myero imedde ki nyutte woro macalo lawi ot. Dok ka dakoni pe woro Jehovah, pud myero imedde ki marre kun bene iparo pire.​—Jo Epeco 5:22, 23, 28, 29.

8. Lapeny mene ma myero ipenye kwede ka luoti otemo keto kigeng mogo i yub me woroni?

⁸ Gin ango ma myero itim ka luoti tye ka keto kigeng mogo i yub me woroni? Cwar laminwa mo owacce ni en twero cito i ticwa me pwony i nino mogo keken. Ka gin ma kit meno otimme i komi, penye kekeni ni: ‘Tika luotwa tye ka juka ni pe amedde ki woro Jehovah? Ka pe, ci tika atwero timo gin ma en mito ni atim?’ Ka inyuto niango, ci wubedo ki pekki manok i nyomwu.​—Jo Pilipi 4:5.

9. Lakricitayo twero pwonyo lutinogi me woro lanyodogi ma pe laye nining?

⁹ Twero bedo tek adada me pwonyo lutinowu ka luotwu pe woro Jehovah. Me labolle, mitte ni ipwony lutinowu me lubo cik me Baibul ma waco ni: “Wor woru ki meni.” (Jo Epeco 6:1-3) Ento gin ango ma myero itim ka luotwu pe kwo ma lubbe ki cik me Baibul? In itwero nyuto lanen maber pi lutinowu i miyo woro ki luotwu. Tam i kom kite mabeco, ci iwac bote ni itye ki pwoc pi jami mabeco ma en timo. Pe ilok marac i kom luotwu ka lutinowu tye. Ma ka meno, tit botgi ni ngat acel acel myero oyer pire kene ka ce ebitic pi Jehovah. Ka ipwonyo lutinowu me woro lanyodogi ma pe laye, ci lanengi maber-ri twero tugo cwinye me pwonyo lok ada madok i kom Jehovah.

10. Lunyodo ma Lukricitayo gitwero pwonyo lutinogi me maro Jehovah nining?

 ¹⁰ Jo mukene ma pe giworo Jehovah gitwero diyo lutinogi ni myero gukwer kwer mogo me goba nyo gupwony pwony me dini goba. Wegi lutino mukene gitwero gengo mongi ma luye ni pe gupwony lutinogi ki lok ada me Baibul. Ento kadi ka gin ma kumeno tye ka timme, megigi bitute matek me pwonyo lutinogi ki lok ada. (Tic pa Lukwena 16:1; 2 Temceo 3:14, 15) Me labolle, i kine mukene won ot pe mito ni dakone obed ki yub me kwano Baibul ki lutino nyo me terogi i cokke. Kadi bed ni en woro tam pa cware, ento pud twero tito pi niyene bot lutinogi ka kare mo keken owec. Ka en otimo meno, ci lutino gitwero pwonyo lok i kom Jehovah kacel ki cikke. (Tic pa Lukwena 4:19, 20) I nge kare mo, lutino gibimoko tamgi pigi kengi ka ce gibitic pi Jehovah nyo pe. * (Nen lok ma tye i tere piny.)​—Nwoyo Cik 30:19, 20.

11. Gin ango ma twero kelo peko i kinwa ki wadiwa ma pe giworo Jehovah?

¹¹ Twero bedo ni i kare ma wacako kwano Baibul ki Lucaden pa Jehovah, pe wawaco ki jo ma gangwa. Ento ka niyewa medde ki dongo, wacako niang ni myero watit botgi mitiwa me tic pi Jehovah. (Marako 8:38) Twero bedo ni peko obedo tye i kin in ki jo me pacowu macalo adwogi me cungoni matek pi niyeni i kom Jehovah. Kong wanyam jami mogo ma iromo timogi me gwoko kuc kun nongo imedde ki bedo lagen bot Jehovah.

12. Pingo wadiwa giromo kwerowa, ento gin ango ma watwero timone me nyutigi ni waparo pigi?

¹² Temme me niang kit ma wadini ma pe gin luye giwinyo kwede. Cwinywa yom adada pien wangeyo lok ada me Baibul. Ento, wadiwa gitwero bedo ki tam ni gwok nyo gitye ka bwolowa nyo wadonyo i dini mo ma kite pe niango wi dano. Gitwero bedo ki tam ni pe dong wamarogi pien pe waribbe kwedgi i kwer mogo. Gitwero bedo ki lworo ni gin mo marac bitimme i komwa ka wato. Myero watemme me niang kit ma giwinyo kwede kun watero itwa me winyo gin ma giwaco wek waniang pingo giwinyo kit meno. (Carolok 20:5) Lakwena Paulo otemme me niang ‘kit pa dano ducu’ wek etit botgi lok me kwena maber. Ka watemme me niang tam pa jo me gangwa, ci man twero konyowa me ngeyo kit me pwonyogi ki lok ada.​—1 Jo Korint 9:19-23.

13. Myero walok ki wadiwa ma pe giworo Jehovah nining?

 ¹³ Lok ki mwolo. Baibul waco ni: “Lok ma wuloko myero obed lok mamit.” (Jo Kolocai 4:6) Timo man pe twero bedo gin mayot. Myero waleg Jehovah pi cwiny maleng wek okonywa me bedo jo ma mwol bot wadiwa dok wek wagam lokgi ki woro. Pe myero walar lok kwedgi i kom niyegi. Ka guwaco nyo gutimo gin mo ma ocwero cwinywa, watwero lubo lanen pa lukwena. Paulo owaco ni: ‘ka dano giyetowa, wan walamo gum i komgi; ka giunowa, wan waciro acira; ka gibalo nyingwa, wan wagamo giwa ki mwolo.’​—1 Jo Korint 4:12, 13.

14. Adwogi maber ango ma bino ka kitwa ber?

¹⁴ Kiti obed ber. Pingo man pire tek? Kadi bed ni lok ki mwolo twero konyowa me bedo ki kuc i kinwa ki wadiwa, bedo ki kit maber dok twero konyo makato. (Read 1 Petero 3:1, 2, 16.) Wek wadini gunen ki boti ni Lucaden pa Jehovah gibedo ki yomcwiny i kwo me otgi, gigwoko lutinogi maber, gikwo ma lubbe ki cik me Baibul, dok gikwo kwo maber. Kadi bed ni wadiwa pe gujolo ada, pud wabibedo ki yomcwiny me ngeyone ni bedo ki kit maber yomo cwiny Jehovah.

15. Watwero goyo pulan con nining wek pe wadony i laro lok ki wadiwa?

¹⁵ Go pulan con. Tam con i kom jami mogo ma twero kelo laro lok ki wadini. Ci dong imok tammi i kom gin ma ibitimo. (Carolok 12:16, 23) Meno aye gin ma lamego mo ma a ki i Australia otimo. Kwarone onongo deg lok ada me Baibul dok onongo i kine mukene kiniga make matek. Ma peya laminwa-ni gin ki cware gugoyo cim, onongo kong gilego bot Jehovah wek okonygi me gamo lokke ki mwolo. Onongo gitamo i kom lok mogo ma twero yomo cwinye. Dok onongo gigwokke pe me lok pi kare malac ma twero kelo laro lok i kom dini, giketo cawa ma myero giter me lok kwede.

16. Gin ango ma twero konyi wek pe iwiny marac ka ce ineno calo pe itye ka yomo cwiny wadini?

¹⁶ Ngene kene ni olo to wang ma winye manok obedo tye i kin in ki wadini ma pe luye, dok man twero weko iwinyo marac pien imaro wadini dok imito yomo cwinygi. Ento wi myero opo ni marwa pi Jehovah myero obed matek makato pi wadiwa. Ka wadini gungeyo man, ci gitwero niang kit ma tic pi Jehovah pire tek kwede boti. Pe itwero diyo ngat mo keken me ye ada. Ento itwero weko jo mukene gineno kit ma lubo cik pa Jehovah okonyi kwede. Dok Jehovah ominigi kare me yero ka ce gibitic pire kit ma bene ominiwa kwede-ni.​—Icaya 48:17, 18.

17, 18. Gin ango ma twero konyi ka wati mo oweko woro Jehovah?

¹⁷ Cwinywa twero cwer adada ka kiryemo watwa mo ki i kacokke nyo oa woko ki i ada. Watwero winyo arem cwiny malit adada calo iwacci ngat mo ocobi ki pala. Itwero kanyone nining?

¹⁸ Ket cwinyi i ticci pi Jehovah. Ka itye ki arem ma kit meno, ci mitte ni myero ijing niyeni i kom Jehovah. Kwan Baibul kare ducu, yubbe pi cokke dok ibed tye iye, medde ki tito kwena, ki dong leg bot Jehovah pi teko wek idi cwinyi. (Juda 20, 21) Gin ango ma itwero timone ket kong ni itye ka timo jami magi ducu ento arem ma itye kwede pe ka dok? Pe iil cingi woko! Medde ki tic pi Jehovah ki cwinyi ducu. Ka kare woto ki kato, man bikonyi me bedo ki neno kacel ki tam matir. Meno aye gin mutimme i kom laco Jabuli 73. En owok ki i kwo matek ma oweko en obedo ki tam marac. Ento woro Jehovah okonye me bedo ki neno matir kit macon. (Jabuli 73:16, 17) Man bene twero timme i kome.

19. Itwero lubo cik ma Jehovah omiyo madok i kom jo ma kiryemogi ki i kacokke nining?

¹⁹ Lub tira ma Jehovah miyo. Lubanga ngeyo ni tira ma en emiyo keliwa adwogi maber, kadi wa ngat ma kiryemo ki i kacokke. Kadi bed ni wawinyo malit ka kiryemo ngat ma wamaro ki i kacokke, ento man twero konye me dwogo cen ka woro Jehovah i anyim. (Kwan Jo Ibru 12:11.) Ento ka pud pe gudwogo cen, myero walub tira pa Jehovah kun ‘pe waribbe’ kwedgi. (1 Jo Korint 5:11-13) Timo man pe yot. Ento myero pe wakubbe kwedgi ki cim, mecej, waraga, nyo intanet labongo tyen lok mo ma pire tek.

20. Gin ango ma myero wamedde ki bedo ki gen iye?

²⁰ Pe irweny genni! Mar “bedo ki gen i kare ducu,” pi meno wamedde ki bedo ki gen ni jowa me amara gibidwogo cen ka woro Jehovah. (1 Jo Korint 13:7) Ka ineno ni wati ma kiryemo-ni tye ka loko tamme, itwero lega pire wek onongo teko ma a ki i Baibul ci oye lwongo pa Jehovah ni: ‘Dwog cen bota.’​—Icaya 44:22.

21. Gin ango ma myero itim ka wadini gukweri pien ni itye ka lubo kor Yecu?

²¹ Yecu mito ni wamarre makato kit ma wamaro kwede ngat mo keken. Dok en onongo ngeyo ni lupwonnyene gibigwoko gennegi kadi bed wadigi kwerogi. Pi meno, ka wadini gidagi pien ilubo kor Yecu, medde ki jenge i kom Jehovah. Lege wek okonyi me cirone. (Icaya 41:10, 13) Bed ki yomcwiny pien Jehovah gin ki Yecu cwinygi yom i komi dok gibimini mot pi genneni.