1, 2. (a) Kutululuka kuahi ku tuala na-ku lelu? (b) Mukonda diahi ki tuala luua ni kutululuka kua tenena?(Tala o foto ia dianga.)

ETU enioso tua mesena kutunga ni kutululuka, sé ima i tu bhekela o hele. Mu kiki, tu sakidila kiavulu mukonda Jihova ua tu bhana “o kutululuka” kuê. O kutululuka mba o paze íii, i tu langa ku ibanzelu iaiibha. (Filipe 4:6, 7) Kuma tua di bhakula kua Jihova, etu ue ‘tuala ku paze ni Nzambi.’ Kiki kilombolola kuila, tuala ni ukamba uambote ni muene.​—Loma 5:1

² Maji, o kithangana kia Nzambi kubheka o kutululuka kua tenena mu ixi, ki ki bhixila luua. Tuala mu izuua isukidila-ku, tu bhita ni maka avulu a tu bhekela hele. A tu kondoloka kuala isuéia. (2 Timote 3:1-4) Tua tokala ue kubhanga ioso, phala kubhânga ni Satanaji ni kutolola o milongi iê ia makutu. (2 Kolindo 10:4, 5) Maji, kioso o jindandu jetu kia tu fidisa kubheza Jihova, tu kala ni hele iavulu. Sai iá, a tena ku tu  sebhulula mukonda dia milongi i tu xikana, a mukuá a zuela kuila, o milongi ietu i muangununa o muiji. Sai bhabha, amba kuila, a-nda tu kaia ku bhata, se ki tuehela o kubheza Jihova. Mu kiki, kiebhi ki tu tena kumona o kizukutisu kia muiji uetu? Ni kiebhi ki tu tena kukala ku paze kioso ki bhita o maka enhá?

3, 4. (a) Ihi ieji bheka o milongi ia Jezú? (b) Mu ithangana iebhi kieji bhonza dingi kukaiela Kristu?

³ Jezú uejidile kuila, sai athu eji dituna o ilongesu iê. Muene uejidile ue kuila, o maxibulu mê eji bhinga kusuina, mukonda, eji kua zukutisa. O izukutisu ieji katula o kutululuka ku muiji. Jezú uambe: “Ki mu fikienu kuma ngeza mu bheka paze mu ngongo. Eme ki ngeza mu bheka paze, kana; ngeza mu bheka xibhata. Mbata eme ngeza mu ku bhangesa kuila diiala di di kuata ni tatâ, o mona muhatu u di kuata ni mam’â, mukaji-a-mona u di kuata ni ukou’ê. Kienhiki muthu, akua dibhata diê, ene a mu kala jinguma jê.”​—Matesu 10:34-36.

⁴ Ihi ia mesenene kuzuela Jezú, kioso kiambe kuila, “ki mu fikienu kuma ngeza mu bheka paze?” Muene ua mesenene kuijidisa o athu kuila, se a kituka maxibulu mê, eji dibhana ni izukutisu. Mu kidi, Jezú ua mesenene kulonga o kidi kia Nzambi ku athu. Muene ka mesenene ku muangununa o miji, kana. (Nzuá 18:37) Maji o maxibulu mê a tokalele kuijiia kuila, mu ku kaiela Kristu, eji dibhana ni ibhidi, benge-benge se o jindandu jâ ka xikina kudilonga o kidi kia Mak’â Nzambi.

5. Ihi ieji bhita ni maxibulu a Jezú mukonda dia kusidivila Jihova?

⁵ Jezú uambe kuila, o maxibulu mê eji kua zukutisa ku miji iâ, mukonda dia kiki a bhingile kukolokota. (Matesu 10:38) Phala ku mu sangulukisa, o maxibulu a bhingile kukolokota, né muene kioso kieji kua a xonguena kuala o jindandu jâ, mba kua bhana dikunda. Maji o mabesá eji tambula eji kala kota, o ima ieji xisa, ndenge.​—Tanga Marku 10:29, 30.

6. Ihi i tua tokala kulembalala, né muene se o jindandu jetu ja mu tu zukutisa?

⁶ Né muene se o jindandu jetu, ja mu tu zukutisa mukonda dia kubheza Jihova, etu tua-nda suluka mu ku a zola. Maji tua tokala kulembalala kuila, o henda ietu kua Nzambi ni kua Kristu, ia tokala kukala kota, o henda ietu ku muthu uoso-uoso ndenge. (Matesu 10:37) Tua bhingi ue kudilanga, mukonda Satanaji u tena ku tu fuinhisa kuzola dingi o jindandu jetu, Jihova ndenge. Tua-nda dilonga ia lungu ni ima ia bhonzo i tena kubhita ku muenhu uetu, ni kumona kiebhi ki tu tena kukolokota.

7. Ihi i ua tokala kubhanga se kaza dié ka mu sidivila Jihova?

⁷ O Bibidia i tu dimuna kuila, oso a kazala-phe “andù kala ni jingongo mu xitu,” mba jiphaxi. (1 Kolindo 7:28) Se ua kazala ni muthu ka mu sidivila Jihova, nange o hadi ivula dingi mu ukaza ué. Maji, kima kiambote kutala o ima kala ki tala Jihova. Nzambi ua zembe o ukexilu ua kudixisa, né muene se muthu u ki bhanga mukonda kaza diê ka sidivila Jihova.  (1 Kolindo 7:12-16) Né muene se muadi ué ki mubhezi ua Jihova, ua bhingi ku mu xila mukonda muéne o mutuameni ua muiji. Kiene ue kimoxi, se muhatu’é ki mubhezi ua Jihova, eie ua tokala ku mu zola, ni ku mu langa ni henda ioso.​—Efezo 5:22, 23, 28, 29.

8. Ihi i u tena kudibhuidisa se kaza dié u ku tangela kiebhi ki ua tokala kungastala o kithangana mu sidivisu ia Jihova?

⁸ Ihi i ua tokala o kubhanga se o dikaza dié u ku tangela kiebhi ki ua tokala kungastala o kithangana mu sidivisu ia Jihova? Mu kifika, o muadi ua phang’ietu, ua mu tangela kuila sai izuua ia semana muene ka tokalele kutunda mu sidivisu ia kuboka. Se ua mu dibhana ni maka iâ, dibhuidise: ‘O kuila muadi uami ua mesena kuila, ngi xisa o kilunga kia Jihova? Se muene uene ku ng’iehela kubheza Nzambi, o kuila ki ngi tena kubhanga o kima kia mesena muene?’ Se u bhanga nguzu phala ku belesela muadi ué, ki ua-nda kala ni maka avulu mu ukaza.​—Filipe 4:5.

9. Kiebhi ki u tena kukuatekesa o tuana tuê kuxila o tata ka sidivila Jihova?

⁹ Se kaza dié ka sidivila Jihova, kua-nda ku bhonza dingi kulonga o tuana tué ia lungu ni Jihova. Mu kifika, eie ua tokala kulonga o tuana tué kubelesela o kitumu kia Nzambi kiamba: “Xila tat’enu ni mam’enu.” (Efezo 6:1-3) Maji ihi i ueji bhanga se kaza dié ka kaiela o itumu ia Bibidia? Eie u tena kubhana phangu iambote ku tuana tué, mu kuxila kaza dié. Xinganeka mu idifua iê iambote, sota ku mu sakidila mu ima iambote iene mu bhanga. Kana kuzuela ima iaiibha ia lungu ni muene, ku pholo ia tuana. Mu veji dia kiki, tangela o tuana tué kuila, kala muthu mudietu muéne ua tokala kusola se ua-nda sidivila Jihova, mba kana. Se u longa o tuana tuê kuxila o tata, ka sidivila Jihova, o phangu iâ iambote mu kubelesela o tata, i tena ku mu suinisa kudilonga ia lungu ni Jihova.

10. Kiebhi o tata mba mama Mbangi ia Jihova, u tena kulonga o tuana kuzola Jihova?

¹⁰ Sai bhabha, o dikaza ka sidivila Jihova  u mesena kuila, o mona u bhanga ue o jifesa ja mundu. Sai maiala a fidisa o ahatu kulonga o tuana ia lungu ni Jihova. Né muene mu ithangana kála iii, o muhatu ua bhingi kubhanga ioso, phala kulonga o itumu ia Jihova ku tuana tuê. (Ikalakalu 16:1; 2 Timote 3:14, 15) Mu kifika, o diiala ka sidivila Jihova, nange ka xikina kuila, o muhatu’ê u longa o tuana tuê, mba u a ambata mu iônge. O muhatu ua-nda sota kuxila munumi’ê, maji kioso kia mona kithangana, ua-nda longa o tuana ia lungu ni Jihova. Mu kubhanga kiki, o tuana a-nda tena kuijiia Jihova, ni kudilonga o itumu iê ia lungu ni kiauabha ni kiaiibha. (Ikalakalu 4:19, 20) Mu kusuka-ku, o tuana ene a-nda sola, se a-nda sidivila Jihova mba kana. * (Tala ku luiji.)​—Matendelelu 30:19, 20.

11. Ihi i tena ku kubhekela maka ni jindandu jé ka sidivila Jihova?

¹¹ Kioso ki tua mateka kudilonga o Bibidia ni Jimbangi ja Jihova, nange ki tu tangela o jindandu jetu. Maji, kioso o kixikanu kietu kiexile mu kula, tua mono kuila, tua bhingile kua tangela kuila, tua mesenene kubheza Jihova. (Marku 8:38) O ufiiele ué kua Nzambi, nange u tena ku kubhekela maka ni jindandu jé. Tu mone, ihi i tua tokala kubhanga phala kukala ni kutululuka ku muiji ni kukolokota mu ufiiele uetu kua Jihova.

12. Mukonda diahi sai bhabha, o jindandu jetu, ka mesena kuila, tu sidivile Jihova? Kiebhi ki tu tena kulondekesa kuila, tu tendela o ibanzelu iâ?

¹² Sota kutendela kiebhi kia divua o jindandu jé. Tua sanguluka kiavulu mukonda, tuejiia o kidi kia Bibidia. Maji, o jindandu jetu, nange a banza kuila, a mu tu nganala, mba a mu tu jijidika kubelesela kijila kia muthu. Mba a banza kuila, ki tua a zolo dingi mukonda, ki tuene mu bhanga dingi o jifesa ja mundu. Mukonda dia kixikanu kiâ, nange a banza kuila, kioso ki tua-nda fua, tua-nda tala hadi. Mu kiki, tua bhingi kutendela kiebhi kia mu divua, ni ku a evuidila kiambote, phala kuijiia se mukonda diahi ene a thandanganha n’etu. (Jisabhu 20:5) Poxolo Phaulu ua kexile mu tendela ‘athu a ifua ioso,’ phala kua bokela o njimbu iambote. Se tu sota kuijiia kiambote o ibanzelu ia jindandu jetu, tua-nda ku a longa kiambote o kidi kia Bibidia.​—1 Kolindo 9:19-23.

13. Kiebhi ki tua tokala kuzuela ni jindandu jetu ka sidivila Jihova?

¹³ Zuela mu ukexilu ua lenduka. O Bibidia iamba: “O kuzuela kuenu ku kale kua ujitu.” (Kolose 4:6) Sai bhabha kibhonza. Tua bhingi o nzumbi ikola ia Jihova, phala ku tu kuatekesa kuzuela ni kulenduka kuoso  ni jindandu jetu. Ki tua tokala kuzoka nau mukonda dia milongi iâ, ia makutu. Se a zuela kima kia tu luualesa, tua bhingi kukaiela o phangu ia jipoxolo. O poxolo Phaulu uambe: “Ela a tu xinga, etu tu benzela. Ela a tu zukutisa, etu tu kolokota ni kinhenge. Ela a tu lebhula, etu mu kuvutula tu dionda.”​—1 Kolindo 4:12, 13.

14. Mbote iebhi i tu katula mu kukala ni uendelu uambote?

¹⁴ Kala ni uendelu uambote. Mukonda diahi kima kiambote kukala ni uendelu uambote? Sumbala o kuzuela ni kulenduka, ku tena ku tu kuatekesa kukala ni kutululuka ni jindandu jetu, o uendelu uetu uambote u tena kubeta dingi kota. (Tanga 1 Phetele 3:1, 2, 16.) Bhu kaxi ka uendelu uetu, tua tokala kubhangesa o jindandu jetu kumona kuila, o Jimbangi ja Jihova, a zediua mu ukaza, a langa kiambote o tuana tuâ, a belesela o itumu ia Bibidia, ni kuila, a sanguluka ku muenhu. Né muene se o jindandu jetu ka xikina o kidi kia Mak’â Nzambi, tu sanguluka mu kuijiia kuila, o uendelu uetu uambote u sangulukisa Jihova.

15. Kiebhi ki tu tena kuxinganeka o ima i tena ku tu bhangesa kuzoka ni jindandu?

¹⁵ Xinganeka o ima i tena ku kubhangesa kuzoka ni jindandu jé. Kubhanga kiki, kua-nda tu kuatekesa kulenga o kiluezu kiki. (Jisabhu 12:16, 23) Kiki kiene kia bhangele phange ia muhatu mu ixi ia Austrália. Ukou’ê uexile mua zukutisa kiavulu. Mu kiki, phala ka mu tambuijile mu ukexilu uaiibha, ande dia ku mu xinda, muene ni muadi’ê akexile mu samba kua Jihova. Ene akexile mu banza ia lungu ni ima iambote ieji zuela n’ê. Kuma ejidile kiá kuila, se a zuelele maka a lungu ni Nzambi, eji zoka, ene akexile mu banza kiambote mu ima ieji zuela, ni thembu kuxi ieji zuela n’ê.

16. Ihi i tena ku kukuatekesa, phala ku divue kuila, uala ni kikuma se o jindandu jé a zoka n’eie?

¹⁶ Mu kidi, o jindandu jé, ka-nda xikina o ima ioso i u bhanga. Mu kiki, kioso ki u zoka ni jindandu jé, nange u banza kuma, kikuma kié mukonda, eie ua a zolo kiavulu, ua mesena ue kua sangulukisa. Sumbala ua zolo kiavulu o jindandu jé, lembalala kuila, o henda ié kua Jihova ia tokala kubeta dingi kota. Se o jindandu jé a mona kiki, nange a-nda tendela kuila, o kusidivila Jihova kima kiala ni valolo phala eie. Kana kujijidika muthu kuxikina o kidi kia Nzambi. Eie u tena kubhangesa akuenu kumona kuila, o kubelesela o itumu ia Jihova kua mu ku kuatekesa. Mu kidi, Jihova u bhana ufôlo ku athu oso. Ene a sola se a-nda mu sidivila mba kana.​—Izaia 48:17, 18.

17, 18. Ihi i tena ku kukuatekesa se ndandu ié ua xisa Jihova?

¹⁷ Kioso muthu ua tokala ku muiji uetu, u  xa o kilunga, mba a mu kaia mu kilunga, tu divua kiiabha. Mu kubhita ni maka iâ, kiebhi ki tu tena kutolola o kikote?

¹⁸ Suluka mu ku sidivila Jihova. Phala kutolola o kikote, ua bhingi kukolesa o ukamba ué ni Jihova. Tanga o Bibidia izuua ioso, pelepalala kiambote, ni kuia mu iônge, suluka mu kuboka, samba kua Jihova mu kubhinga nguzu, phala kukolokota. (Juda 20, 21) Ihi i ua tokala kubhanga se o ndolo ki ia mu bhita? Kana kubhuila! Suluka mu kusidivila Jihova. Kubhanga kiki, kua-nda ku kuatekesa kulanga o ibanzelu ié. Kiene kia bhitile ni musoneki ua Salámu 73. Sai ithangana, muene ua kexile mu bhita mu ibhidi iavulu, mukonda dia kiki, ua kexile ni kikote ku muxima. Maji o kusuluka mu kusidivila Jihova, kua mu kuatekesa kumona dingi o ima mu ukexilu uambote, ni kuzubha o kikote. (Jisálamu 73:16, 17) Kiki ki tena ue kubhita n’eie.

19. Kiebhi ki u tena kulondekesa kuila, u xikina o ukexilu ua Jihova ua kubazela o mundu uê?

¹⁹ Sota kuxila o ukexilu ua Jihova, ua kubatula o maka. Nzambi uejiia kuila, o kibazelu kiê kia-nda kuatekesa katé muene o muthu a mu kaie mu kilunga. Sumbala tu divua kiaiibha kioso muthu u tua mu zolo kiavulu a mu kaia mu kilunga, maji o kibazelu, ki tena ku mu kuatekesa kuvutuka kua Jihova. (Tanga Jihebeleu 12:11.) Kuma muene ka vutuka luua mu kilunga, tua tokala kukaiela o kitumu kia Jihova kia lungu ni kukamba ku “di tambulula” mba kudibhana, ni muthu a mu kaie mu kilunga. (1 Kolindo 5:11-13) Kiki, kibhonza kiavulu. Maji ki tua tokala kudizuelesa ni muene, kikale bhu kaxi ka mutelembe, ku tumikisa jinjimbu, mikanda, mba mu internete.

20. Ihi i tua tokala kudielela?

²⁰ Dielela kuila, o ndandu ié ua-nda vutuka! O Bibidia i tu tangela kuila o henda, “i dielela mu ima ioso.” Mukonda dia kiki, tu dielela kuila o jindandu jetu a xisa o kilunga, a-nda vutuka kua Jihova. (1 Kolindo 13:7) Se u mona kuila, ndandu ié, ua mu lungulula o ukexilu uê, u tena kusamba, phala muene kuehela o milongi ia Bibidia kutula ku muxima uê, ni kuxikina o kixanu kia Jihova, kioso kiambe: “Vutuka kokuami.”​—Izaia 44:22.

21. Ihi i ua-nda bhanga se o jindandu jé a ku zukutisa mukonda dia ku kaiela Jezú?

²¹ Jezú uambe kuila, tua bhingi ku mu zola dingi, muthu uoso-uoso, ndenge. Jezú ua dielele kuila, o maxibulu mê eji kolokota mu ufiiele uâ kua muene, né muene se a a zukutisile ku jindandu jâ. Mu kiki, se a mu kuzukutisa ku muiji mukonda dia kukaiela Jezú, dielela kua Jihova. Bhinga o kikuatekesu kié, phala kukolokota mu izukutisu. (Izaia 41:10, 13) Ejiia kuila, Jihova ni Jezú, a sanguluka mu kumona o kukolokota kuê. Ene a-nda kubesoala kiavulu, mukonda dia ufiiele ué.