1. Haʼátʼíísh kʼad bee nihił dahodéeszéeʼ doo?

TʼÁÁ ÁNÍILTSO nihił hashtʼehodítʼée doo daniidzin. Háálá “God bitsʼą́ą́dę́ę́ʼ bee achʼįʼ hózhǫ́ náhásdlı̨́įʼii” nihainíláago, baa ahééh daniidzin. Áko tʼáadoo ádił nidahodołchiłí. (Philippians 4:6, 7) Jiihóvah niheʼiinaʼ baa ádadiitʼą́ągo biniinaa “God bił nihitaʼgi kʼé náhásdlı̨́ı̨́ʼ.” Díí éí Jiihóvah áhą́dígo bił kʼé nihee hólǫ́ǫgo áhyiłní.—Romans 5:1.

2. Haʼátʼíísh biniinaa kʼad éí doo tʼáá íiyisíí nihił hodéeszéeʼ da? (Áłtsé eelkidígíí níníłʼı̨́.)

² God éí tʼahdoo hodéezyéelgo áháléeh da. Nihoogháahjįʼ yoołkáałgo nihił hoogááł, éí biniinaa nihichʼįʼ anídahaztʼiʼ. Doo yáʼádaashxónígíí bił kéédahwiitʼı̨́. (2 Timothy 3:1-4) Séítan dóó biyoochʼííd yee naʼnitinígíí éí yéigo bichʼįʼ nideiildzil doo. (2 Corinthians  10:4, 5) Łahda kʼé bił daʼahizhdiʼnínę́ę doo Jiihóvah dayoodlánígíí nihikʼijįʼ danilı̨́į doo. Díí átʼéego hade áhósin łeh. Łahda shı̨́ı̨́ tʼóó nihá nidahałtʼiʼ doodaiiʼ hakʼéí ałtsʼázhnínil yee nihikʼídahaʼáah doo. Áádóó ałdóʼ tʼahdoo nihichʼįʼ nanináhí neʼoodląʼ yóóʼadííníʼą́ągo, índída nihił yah nídíídááł danihiłníi doo. Ákoshąʼ, hakʼéí hakʼijįʼ danilı̨́įgo haitʼéego baa nitsíikees doo? Ákóhootʼįįhgo, haitʼéego lá tʼah hoł hodéeszéeʼ doo?

3. Jesus binaʼnitin haitʼéego idééłní?

³ Jesus bił bééhózingo bee nazhnitinígíí doo łaʼ deinízin da doo. Áádóó ałdóʼ hakééʼ naakaiígíí haʼahóní deinízin doo, háálá ląʼí hakʼijįʼ danilı̨́į doo. Díí éí hakʼéí kʼé bił daʼahizhdiʼnínę́ę ałtsʼádeidooniłgo átʼé. Jesus ání: “Nahasdzáán bikáaʼgi tʼáá kʼé hólǫ́ǫ dooleeł biniyé jiníyá tʼáadoo danohsingo shaa nitsídaahkeesí; kʼé hólǫ́ǫ dooleeł doo biniyé níyáa da, nidi diltłish nítą́. Háálá diné bizhéʼé yikʼijįʼ nilı̨́įgo, índa achʼéʼé nilíinii bimá yikʼijįʼ nilı̨́įgo, áádóó azhááʼáád nilíinii yizhááʼáád nilíní yikʼijįʼ nilı̨́įgo ádadeeshłííł biniyé níyá, áko diné tʼáá hó haʼáłchíní łaʼ hweʼanaʼí danilı̨́į doo.”—Matthew 10:34-36.

4. Hahgoshąʼ éí Jesus bikééʼ oodáłígíí nanitłʼah yileeh?

⁴ Jesus ání: ‘Kʼé hólǫ́ǫ dooleeł biniyé níyá tʼáadoo danohsiní.’ Haʼátʼíishąʼ áhyiłní? Jesus bikééʼ dadiidáahgo hweʼiinaʼ łahgóó átʼįįh. Jesus bikééʼ oodáałgo nanitłʼah, háálá hakʼis dóó hakʼéí éí Diyin Bizaad biiʼdę́ę́ʼ tʼáá aaníinii ádaatʼéii doo deinízin da. Jesus íiyisíí yiniyé níyáhígíí éí God yee naʼnitin, doo éí akʼéí ałtsʼéidoonił yiniyé níyáa da.—John 18:37.

5. Jesus bikééʼ dayíkáhígíí lá haa ádabiʼdoolʼįįd?

⁵ Jesus ání, shikééʼ deiyíkáhígíí tʼáá bí ádeinízingo hadaʼólníi doo, azhą́ shı̨́ı̨́ bikʼéí bá nidahałtʼiʼ dóó yóóʼadabidiitʼaah ndi. (Matthew 10:38) Jesus bił dahoniishǫ́ danízingo wołíbee hadaʼólníigo bee bikʼidahojidlí.—Mark 10:29, 30 yíníłtaʼ.

6. Nihikʼéí nihikʼijįʼ danilı̨́įgo, haʼátʼíísh béédeilniih doo?

⁶ Azhą́ nihikʼéí nihikʼijįʼ danilı̨́į ndi, ayóóʼádeíníiʼní. Ákondi, Jiihóvah dóó Jesus éí tsʼídá aláahdi ayóóʼádeíníiʼníi doo. (Matthew 10:37) Séítan éí Jiihóvah bitsʼázhdoogááł nihóʼní, áko nihikʼéí choidoołʼįįłgo átʼé. Díí nidaʼníłtłʼaii dóó haitʼéego hadaʼííníilníi dooígíí łaʼ baa nínáádadíitʼįįł.

7. Nichʼooní doo Jiihóvah yá ndaalʼaʼgóó nił hazʼą́ągi, haash yitʼéego baa nitsíníkees doo?

⁷ Diyin Bizaad ání: ‘Daʼohéehii nihichʼįʼ nidahwiiʼnáa doo.’ (1 Corinthians 7:28) Hachʼooní doo Jiihóvah yá naalʼaʼgóó ayóó baa hiní. Háálá Jiihóvah ałhéʼáskéhgi ayóó bił nilı̨́. Ní ałdóʼ ákónítʼée doo. Áádóó ánáádíʼní nichʼooní doo oodlánígíí biniinaa ałtsʼáoʼáásh lágo. (1 Corinthians 7:12-16) Ná hastiin doo Jiihóvah yá naalʼaʼgóó ndi, nił nilı̨́ dóó atsiiʼ jílı̨́įgo íínísin. Áádóó neʼasdzą́ą́ doo Jiihóvah yá naalʼaʼgóó  ndi, ayóóʼííníʼníigo baa áhólyą́ą doo.—Ephesians 5:22, 23, 28, 29.

8. Nichʼooní tʼáadoo ayóó Jiihóvah bá nanilʼaʼí niłníigoshąʼ, haʼátʼíísh ádi naʼídídííłkił?

⁸ Nichʼooní tʼáadoo ayóó Jiihóvah bá nanilʼaʼí niłníigo, haashąʼ díínííł? Łaʼ nihisister bá hastiin ábíłníí lá, ná íinisin góneʼ tʼéiyá hootahgóó nahólneʼ doo. Łahdaásh ákónidooʼniid? Díí ádi naʼídídííłkił: ‘Daʼ shichʼooníísh tʼáadoo Jiihóvah bikééʼ ánítʼéhé shiłní? Doo ákótʼéégóogo, shichʼooní yinízinígíísh beʼdeeshłííł?’ Hazhóʼó baa nitsíníkeesgo éí ahísółkéegi doo ayóó anáhóótʼiʼ da doo.—Philippians 4:5.

9. Haitʼéego haʼáłchíní éí hachʼooní doo Jiihóvah yá naalʼaʼgóó bił nilı̨́įgo bee nazhnitin doo?

⁹ Hachʼooní doo Jiihóvah yá naalʼaʼgóó, haʼáłchíní Jiihóvah ayóóʼáyóʼníi dooígíí bee nazhdínóotı̨́ı̨́łígíí nanitłʼah. Ákondi tʼáá íiyisíí Jiihóvah bibee hazʼáanii yikʼeh dahółʼı̨́į doogi bee nanitin doo. Éí ánihiłní: “Nizhéʼé índa nimá nił nilı̨́įgo íínísin.” (Ephesians 6:1-3) Nichʼooní éí God Bizaad doo yikʼeh hółʼı̨́ı̨́góó, haash díínííł? Naʼáłchíní binááł yáʼátʼéehgo dahinohná, dóó nichʼooní nił nilı̨́įgo ííshjání íínísin. Yáʼátʼéehgo éʼéłʼínígíí baa nitsíníkees, haʼátʼííshı̨́ı̨́ ádeiłʼínígíí baa ahééh nínízin. Naʼáłchíní binááł doo tʼáá ádzaagóó  hachʼooní baa yájíłtiʼ. Ákondi naʼáłchíní bee bił hólneʼgo, tʼáá hó Jiihóvah bá nijilʼaʼ jiniizįįh. Naʼáłchíní éí nichʼooní bił nilı̨́į dooígi bee nanitin. Áko naʼáłchíní yáʼátʼéehgo dahiináago, nichʼooní Jiihóvahda yaa íhwiidoołʼáałgo átʼé.

10. Haitʼéego nihaʼáłchíní Jiihóvah ayóóʼáyóʼníigo bee nidanohtin doo?

¹⁰ Achʼooní łaʼ doo Jiihóvah yá ndaalʼaʼgóó éí baʼáłchíní Késhmish dóó díí ádaatʼéhígíí atah danilı̨́, áádóó doo tʼáá aaníinii ádaatʼéii yídahodoołʼááł deinízin. Áádóó ałdóʼ, łaʼ ahastiin doo Jiihóvah yá naalʼaʼgóó éí beʼasdzą́ą́ tʼáadoo nihaʼáłchíní Diyin Bizaad bee nanitiní deiłníi łeh. Ákondi eʼasdzą́ą́ haʼáłchíní tʼáá bohónéedzání góneʼ, Jiihóvah bee nazhnitin doo. (Acts 16:1; 2 Timothy 3:14, 15) Łaʼ ahastiin doo Jiihóvah yá naalʼaʼgóó, haʼáłchíní Diyin Bizaad yídahodoołʼááł dóó áłah náʼádleehgóó ałnánákah doo yá yinízin da. * (Footnote níníłʼı̨́.) Eʼasdzą́ą́ éí ájínínígíí bił nilı̨́į ndi haʼáłchíní tʼáá há náhootʼaah góneʼ nazhnitin doo. Áko Jiihóvah dóó bibee hazʼáanii yídahoołʼaah. (Acts 4:19, 20) Ákótʼée ndi, áłchíní tʼáá bí Jiihóvah bá nidajilʼaʼgo dajiniizįįh.—Deuteronomy 30:19, 20.

11. Haʼátʼíí biniinaa achʼįʼ nahwiiłná haleeh?

¹¹ Jiihóvah Yá Dahalneʼé nanítingo, doo shı̨́ı̨́ tʼáá akǫ́ǫ́ nikʼéí bił hólneʼ da. Ndi neʼoodląʼ niłdzil silı̨́įʼgo, Jiihóvah bá naashʼaʼ nínízingo éí nikʼéí bił hólneʼgo baa ákoninizı̨́ı̨́ʼ. (Mark 8:38) Jiihóvah bá nanilʼaʼgo shı̨́ı̨́ biniinaa nikʼéí bił achʼįʼ anáhóótʼiʼ hazlı̨́ı̨́ʼ. Haitʼéego nił hodéeszéeʼgo Jiihóvah bá nanilʼaʼgo baa nídadíitʼįįł.

12. Haʼátʼíí biniinaa nihikʼéí nihikʼijįʼ danilı̨́? Haitʼéego bídę́ęʼgo bá baa nitsíikeesígíí ííshjání ííníilzin doo?

¹² Bídę́ę́ʼ bá baa nitsíníkees. Tʼáá aanínígíí nihił béédahózingo ayóó baa nihił dahózhǫ́. Ákondi nikʼéí éí nindaʼazloʼ doodaiiʼ haʼátʼííshı̨́ı̨́ dayoodlánígíí bidiniyá danízin łeh. Doo ayóóʼádanihííníʼníi da sínílı̨́ı̨́ʼ, biniinaa doo Késhmish dóó díí ádaatʼéhígíí yę́ę doo nihaa nánídáah da deinízin. Bídę́ę́ʼ bá baa nitsíikeesgo hazhóʼó íísínííltsʼą́ąʼgo, haʼátʼíí biniinaa nihąąh dabíniʼgo nihił bééhodoozįįł. (Proverbs 20:5) Yilʼaadii Paul “tʼáá ałtsojįʼ tʼáá ádzíłtso” bídę́ę́ʼ bá baa nitsézkéezgo áko haneʼ yáʼátʼéhígíí bee nazhnitin. Nikʼéí bídę́ęʼgo bá baa nitsíníkees, áko éí Diyin Bizaad biiʼdę́ę́ʼ naʼnitinígíí daatsʼí bee bíká adiilwoł.—1 Corinthians 9:19-23.

13. Nihikʼéí doo Jiihóvah yá ndaalʼaʼ da, haitʼéego bichʼįʼ yádeiltiʼ doo?

¹³ Ajoobaʼ bee yáníłtiʼ. Diyin Bizaad ání: “Tʼáá áłahjįʼ ajoobaʼ saad . . .  bee yádaałtiʼ.” (Colossians 4:6) Díí ayóó nanitłʼah. Jiihóvah biníłchʼi diyinii bíká sodadiilzin áko nihikʼéí bił kʼé niidzingo yee nihíká adoolwoł. Bidaʼoodląʼígíí biniinaa doo bił ałhináázhdiijah da. Doo aaníígóó ánihiʼdiilyaago doodaiiʼ bikʼeʼashchʼíiʼgo nihichʼįʼ haʼoodzíiʼgo, daalʼaadii beʼdiilnííł. Paul ání: “Danihódziihii bá sodadiilzin; atídanihiʼdilʼı̨́įgo hadaʼííníilní; tʼáá ádzaagóó nihaa dahaneʼgo kʼé nidahwiidleʼgo yádeiiltiʼ.”—1 Corinthians 4:12, 13.

14. Yáʼátʼéehgo dahiniiʼnáago, haitʼéego bee nihikʼihojídlíi doo?

¹⁴ Yáʼátʼéehgo dahinohná. Haʼátʼíí biniinaa ílı̨́? Azhą́ shı̨́ı̨́ nikʼéí joobaʼgo bee bichʼįʼ yáníłtiʼ ndi, yáʼátʼéehgo hiniiʼnáago éí tsʼídá aláahgo kʼé bee ííshjání áníłʼı̨́. (1 Peter 3:1, 2, 16 yíníłtaʼ.) Yáʼátʼéehgo bee sínízı̨́. Jiihóvah Yá Dahalneʼé nílínígíí nikʼéí yee daníłʼı̨́, ałhéʼáskéhígi ił hózhǫ́, baʼáłchíní yaa áhályánígi, Diyin Bizaad bibee hazʼáanii yikʼeh dahółʼı̨́įgi, dóó hoł dahózhǫ́ǫgi. Azhą́ shı̨́ı̨́ nihikʼéí tʼáadoo Jiihóvah yá ndaalʼaʼ doo ndi, nihił dahózhǫ́ǫgo yáʼátʼéehgo dahiniiʼnánígíí bee Jiihóvah baa dahwiiʼniih.

15. Haitʼéego hazhóʼó baa nitsídíikos, áko ałhindidootłʼíłígíí bitsʼąą ánítʼée doo?

¹⁵ Hazhóʼó Baa Nitsíníkees. Nikʼéí ábididííniiłígíí hazhóʼó baa nitsídíikos, áko ałhindidootłʼíłígíí bitsʼąą ánítʼée doo. Haitʼéego ádeeshłííł jinízingo ádíílííł. (Proverbs 12:16, 23) Díí ákótʼéego nihisister łaʼ Australiadę́ę́ʼ ákójiidzaa. Bizhááʼáád jílínígíí éí Jiihóvah Yá Dahalneʼé yéigo bikʼijįʼ yájíłtiʼ. Łahda báháchįįh. Tʼahdoo bichʼįʼ hojilneʼgóó bí dóó bichʼooní Jiihóvah bichʼįʼ sodilzingo ání, nihíká anilyeed áko saad joobaʼ bee yéiiltiʼ doo. Áádóó yáʼádaatʼéhígíí bizhááʼáád jílínígíí bee bichʼįʼ yájíłtiʼígíí yaa ntsídookos. Áádóó tʼáá kónígháníjįʼ ahił nidahozhdoolnihgo, ákótʼéego oodląʼ chʼíidooʼááłígíí doo baa yázhdoołtih da.

16. Ánítʼínígíí nikʼéí doo bił yáʼádaatʼéeh da ndi, haash yitʼéego doo niʼdiiłʼáa da?

¹⁶ Nikʼéí doo Jiihóvah yá ndaalʼaʼígíí saad bił ałhaʼditʼáah dooígíí łahda haleeh. Saad bił ałghazhʼditʼáahgo niʼdiiłʼáa łeh, jó nikʼéí ayóóʼííníʼní. Ndi béénílniih, Jiihóvah aláahgo ayóóʼííníʼní. Díí yeeʼ Jiihóvah bá nanilʼaʼígíí aláahgo nił nilı̨́įgo nikʼéí yaa ákodadínóozįįł. Diyin Bizaad tʼáá aanííjí bee naʼnitinii łaʼda tsı̨́įłgo nídadoołé bidiníigo bíniilchéeh da doo. Ákondi Jiihóvah bikʼeh honíłʼı̨́įgo haitʼéego níká eelwod bee ííshjání íínísin. Tʼáá ákótʼéego Jiihóvah éí nikʼéí yíká adoolwołgo átʼé. Náasdi Jiihóvah bá nijilʼaʼ dooleełgo átʼé.—Isaiah 48:17, 18.

17, 18. Nikʼéí łaʼ Jiihóvah yitsʼágháahgo, haʼátʼíísh níká adoolwoł?

¹⁷ Hakʼéí łaʼ Jiihóvah yitsʼágháahgo, éí yéigo nanitłʼah łeh. Doo  chohooʼínígóó hajéí neezgaigo áyiiłʼįįh, béésh baa ajííłgeed nahalin. Azhą́ yéigo nił honeezgai ndi, tʼáá haʼjólníi doo.

¹⁸ Yéigo Jiihóvah bá nanilʼaʼ. Tʼah ndi nił hodiniihgo, neʼoodląʼ niłdzilgo íínísin. Diyin Bizaad tʼáá áłahájįʼ yííníłtaʼ. Áłah aleeh bá hashtʼe áníʼdiilʼįįhgo akǫ́ǫ́ ałnanádááh. Nahólneʼ, dóó Jiihóvah bichʼįʼ sonídílzįįh. Éí bee nidziil doo, yee níká análwoʼgo bee haʼíínílníi doo. (Jude 20, 21) Azhą́ díí tʼáá átʼé áníłʼı̨́į ndi, nił honeezgaiígíí łahda doo tsxı̨́įłgo nahjįʼ kódooníił da. Ákótʼée ndi niʼ kólééh lágo! Yéigo Jiihóvah bá nanilʼaʼ. Tʼahádóó, nił hodiniih yę́ę hazhóʼó nitsíndidiikos. Psalm 73 ályaaígíí baa nitsíníkees. Díí łah yéigo bide áhootʼéé ńtʼééʼ, doo hazhóʼó nitsíjíkees da. Ákondi Jiihóvah tʼáá bá nijilʼaʼ. Éí bee yáʼátʼéehgo nizhdeezghal nahalin. (Psalm 73:16, 17) Ní ałdóʼ Jiihóvah bá nanilʼaʼgo yee níká adoolwoł.

19. Jiihóvah hashkéego bee naʼnitinígíí haitʼéego nił nilı̨́į doo?

¹⁹ Jiihóvah hashké bee nazhnitinígíí nił nilı̨́į doo. God hashké bee naʼnitinígíí tʼáá ałtso hódéétʼiʼígíí bíká adoolwoł, Jiihóvah yitsʼáníyáhígíí tʼáá bił. Azhą́ shı̨́ı̨́ ayóóʼííníʼnínígíí łaʼ hashké bee nabidiʼneestą́ąʼgo, yéigo bikʼeʼashchʼííʼ ndi, éí bee bíká adoolwołgo Jiihóvah yaa nídoodááł. (Hebrews 12:11 yíníłtaʼ.) Kʼad éí Jiihóvah bikʼeh honíłʼı̨́. Diyin Bizaad ání: Jiihóvah yitsʼáníyáhígíí “tʼáadoo hoł ałtaołdeehí.” (1 Corinthians 5:11-13) Díí nanitłʼah ndi, tʼáadoo béésh bee haneʼé bee bichʼįʼ yáníłtiʼí dóó naaltsoos tʼáadoo bichʼįʼ áníłʼíní. Áádóó text messages, e-mails, dóó social media tʼáadoo bił áníłʼíní.

20. Haʼátʼíishąʼ bee chodahooʼı̨́į doo?

²⁰ Nił chohooʼı̨́ niʼ kónílééh lágo! Ayóóʼóʼóʼníinii éí “tʼáá ałtsojįʼ bił chohooʼı̨́.” Áko ayóóʼííníiʼnínígíí Jiihóvah yaa nídoodáałgo yee nił chohooʼı̨́. (1 Corinthians 13:7) Nikʼéí łaʼ hashtʼe nínáádoodááł bá sodoolzingo Diyin Bizaad yee bidziilgo ánídoolnííł, dóó Jiihóvah “shichʼįʼ ninánídááh” ánínígíí yikʼeh hodoołʼįįł.—Isaiah 44:22.

21. Jesus bikééʼ yínáałgo nikʼéí nikʼijįʼ danilı̨́įgo, haa díínííł?

²¹ Jesus ánihiłní, bílaʼashdlaʼii tʼáá biláahdi ayóóʼádashíínóhʼníi doo. Jesus bił bééhózin ídahooʼaahígíí doo ninádahinílyées da. Azhą́ shı̨́ı̨́ bikʼéí bikʼijįʼ danilı̨́į ndi, ayóóʼádaʼahóʼníi doo. Áko Jesus bikééʼ yínáałgo nikʼéí nikʼijįʼ danilı̨́įgo, Jiihóvah baʼíínílí. Jiihóvah bichʼįʼ sonídílzįįhgo, bee haʼíínílníi doo. (Isaiah 41:10, 13) Jiihóvah dóó Jesus bił nihóshǫ́ áádóó neʼoodląʼ yee nikʼihojidlíi doo. Díí biniinaa nił hózhǫ́ǫ doo.