1, 2. (α) Σο ειρήνη μπορίνασα τι τθεράς ακανά; (β) Σόσκε να μπορίνασα τι τθεράς τέλεια ειρήνη ακανά; (Ντικχ ι φωτογραφία σο ισί κι αρχή)

ΣΑΡΕ μανγκάσα τι τζουβντιάς με ειρήνη χωρίς τι τθεράς ανησυχίες. Οτθάρ, ισινάμ πφερντέ εκτίμηση σο ο Ιεχωβά ντέλα-αμέν ι «ειρήνη ι Ντεβλέσκι». Ανταγιά ειρήνη ισί η ηρεμία σο αρακχαβέλα-αμέν κατά σκέψεις ντα κατά αισθήματα σο αναστατώνενα-αμέν. (Φιλιππησίους 4:6, 7) Επειδή αφιερωντάμ αμαρό νεαυτός κο Ιεχωβά, τθεράσα επίσης «ειρήνη ι Ντεβλέσαρ». Ανταβά μανγκέλα τι βακερέλ ότι τθεράσα εκ λατσσί φιλία λέσαρ.​—Ρωμαίους 5:1.

² Όμως, ο καιρός σο ο Ντεβέλ κα ανέλ τέλεια ειρήνη κι πφουβ να αβιλό ατζέκ. Τζουβντιάσα κο τελευταία ντιβεσά, οτθάρ υπαρχίντιβενα μπουτ προβλήματα σο ανένα αμένγκε ανησυχίες. Ο τζενέ χάνα-πες ο εκ ι γιαβερέσαρ. (2 Τιμόθεο 3:​1-4) Επίσης, πρέπει τι πολεμίνας ι Μπενγκές ντα ο ψεύτικα πράγματα σο σικλιαρέλα. (2 Κορινθίους 10:4, 5) Αλλά ανταβά σο μπορεί τι ανέλ αμένγκε ι πιο μπαρί ανησυχία ισί όταν αμαρέ τζενέ, σο να υπηρετίνενα ι Ιεχωβάς, τζάνα αμέντζαρ κόντρα. Μερικοί λένταρ μπορεί τι πρασάνα οντουλά σο πακιάσα ή τι βακερένα ότι αντάμ  διχόνοια κι φαμιλί. Μπορεί ατζέ-ντα τι βακερέν ότι, άμα να τσσιναντάμ τι υπηρετίνας ι Ιεχωβάς, να μανγκένα-αμέν κι φαμιλί. Άρα, σο πρέπει τι τζανάς όταν αμαρί φαμιλί τζάλα αμέντζαρ κόντρα; Ντα σαρ μπορίνασα τι ατσσικιαράς αμαρί ειρήνη όταν αβέλα-πες ανταβά;

3, 4. (α) Σαρ επηρεάνενα ι τζενέν οντουλά σο σικλιαρντάς ο Ιησούς; (β) Κάνα κα αβέλας μπουτ δύσκολος τι ακολουθίνελ εκ τζενό ι Ιησούς;

³ Ο Ιησούς τζανέλας ότι να κα δεχτίνενας σαρέ ο τζενέ οντουλά σο σικλιαρέλας. Επίσης, τζανέλας ότι λέσκε μαθητές κα χρειαζίντιβενας θάρρος επειδή μερικοί κα τζάνας λέντζαρ κόντρα. Ανταβά κα μπορίνελας τι επηρεάνελ ι ειρήνη λένγκε φαμιλίντε. Ο Ιησούς βακερντάς: «Μα αμντίνεν ότι αβιλόμ τι ανάβ ειρήνη κι πφουβ· να αβιλόμ τι ανάβ ειρήνη, αλλά σπαθίς. Επειδή αβιλόμ τι χωρίναβ ι τζενές πι νταντέσταρ, ντα ι τσσαγιά πι νταγιάταρ, ντα ι μποριά πι σασάταρ. Κι πραγματικότητα, ο ντουσμάνια ι τζενέσκε κα αβέν αντράλ λέσκε φαμιλιάταρ».​—Ματθαίος 10:​34-36.

⁴ Σο μανγκέλας τι σικαβέλ ο Ιησούς όταν βακερντάς: «Μα αμντίνεν ότι αβιλόμ τι ανάβ ειρήνη»; Μανγκέλας τι τζανέν ο τζενέ ότι, άμα κα αβένας μαθητές λέσκε, κα τθερένας δυσκολίες. Βέβαια, ο σκοπός ι Ιησούσκο ισινέ τι σικλιαρέλ ι τζενέν ι αλήθεια ι Ντεβλέσκε, όχι τι ανέλ διχόνοια κο φαμιλιά. (Ιωάννης 18:​37) Όμως, λέσκε μαθητές έπρεπε τι τζανέν ότι να κα αβέλας πάντα εύκολος τι ακολουθίνεν-λες, ειδικά άμα λένγκε αμαλά ή λένγκε τζενέ να κα δεχτίνενας ι αλήθεια.

5. Σο ντικχένα πουμαρέ ζωγιάτε ο μαθητές ι Ιησούσκε;

⁵ Ο Ιησούς βακερντάς ότι εκ κατά πράγματα σο πρέπει τι αβέν έτοιμοι τι νταϊντίνεν λέσκε μαθητές ισί ο δυσκολίες σο αβένα όταν λένγκι φαμιλί τζάλα λέντζαρ κόντρα. (Ματθαίος 10:​38) Για τι κερέν λέσκο γκι τι χαιρίνελ, ο μαθητές ι Ιησούσκε νταϊντίνενα όταν λένγκε φαμιλιά πρασάνα-λεν ή ατζέ-ντα όταν κερένα-λεν πέρα. Αλλά ο πράγματα σο χασαρντέ ισί μπουτ χάνικ ανγκλάλ οντουλέντε σο κερδιντέ.​—Διαβάνεν Μάρκος 10:​29, 30.

6. Σο πρέπει τι ντας-αμέν γκοντί άμα αμαρέ τζενέ τζάνα αμέντζαρ κόντρα;

⁶ Ατζέ-ντα άμα αμαρέ τζενέ τζάνα αμέντζαρ κόντρα επειδή υπηρετίνασα ι Ιεχωβάς, αμέν συνεχίνασα τι μανγκάς-λεν. Αλλά πρέπει τι ντας-αμέν γκοντί ότι η αγάπη σο τθεράσα ι Ντεβλέσκε ντα ι Χριστόσκε πρέπει τι αβέλ πιο ζουρανί κατά αγάπη σο τθεράσα σαρέ ι γιαβερένγκε. (Ματθαίος 10:​37) Πρέπει επίσης τι τζανάς ότι ο Μπενγκ κα μπορίνελας τι χρησιμοποιήνελ ι αγάπη σο τθεράσα αμαρέ φαμιλιάκε για τι κερέλ-αμέν μα τι αβάς αφοσιωμέ κο Ιεχωβά. Για τι συζητίνας μερικές δύσκολες καταστάσεις ντα τι ντικχάς σαρ μπορίνασα τι νταϊντίνας.

7. Σαρ πρέπει τι ντικχέν οντουλά σο νακχένα άμα τουμαρό ρομ ή τουμαρί ρομνί να υπηρετίνελα ι Ιεχωβάς;

⁷ Η Αγία Γραφή προειδοποιήνελα-αμέν ότι οντουλά σο παντρίνενα «κα τθερέν στεναχώρια», ή γιαβέρτουλους προβλήματα. (1 Κορινθίους 7:​28) Άμα ισινέν παντριμέ εκχέ τζενέσαρ σο να υπηρετίνελα ι Ιεχωβάς, ανταβά μπορεί τι ανέλ πιο μπουτ άγχος ντα ανησυχία τουμαρέ παντριάτε. Όμως, ισί σημαντικός τι ντικχέν οντουλά σο νακχένα σαρ ντικχέλα-λεν ο Ιεχωβά. Βοβ βακερέλα ότι να μπορίνασα τι χωρίνας ή τι λας διαζύγιος απλώς επειδή αμαρό ρομ ή αμαρί ρομνί να υπηρετίνελα ι Ιεχωβάς. (1 Κορινθίους 7:​12-16) Άμα τουμαρό ρομ να υπηρετίνελα ι Ιεχωβάς ντα να λέλα ι ευθύνη σο τθερέλα τι σικλιαρέλ ι Ντεβλέσκε πράγματα κι φαμιλί,  πρέπει τι συνεχίνεν τι σεβάνεν-λες επειδή ισί ο σορό τουμαρέ φαμιλιάκο. Ντα άμα τουμαρί ρομνί να υπηρετίνελα ι Ιεχωβάς, πρέπει τι συνεχίνεν τι μανγκέν-λα ντα τι φροντίνεν-λα.​—Εφεσίους 5:​22, 23, 28, 29.

8. Σο μπορίνενα τι πουτσέν τουμαρό νεαυτός άμα τουμαρό ρομ ή τουμαρί ρομνί προσπαθίνελα τι τσσουβέλ όρια κο πράγματα σο κερένα ι Ιεχωβάσκε;

⁸ Σο πρέπει τι κερέν άμα τουμαρό ρομ ή τουμαρί ρομνί προσπαθίνελα τι τσσουβέλ όρια κο πράγματα σο κερένα ι Ιεχωβάσκε; Ο ρομ εκχέ πφενιάκο βακερντάς λάκε ότι μπορίνελας τι τζαλ κο έργος σάντε συγκεκριμέ ντιβεσά κι εβδομάδα. Άμα αντιμετωπίνενα τουμέν-ντα κάτι ασακό, πουτσέν τουμαρό νεαυτός: “Μήπως μο ρομ ή μι ρομνί μανγκέλα τι τσσιναβάβ τι υπηρετίναβ ι Ιεχωβάς; Αν όχι, μήπως μπορίναβα τι κεράβ οντουβά σο μανγκέλα μάνταρ;” Άμα ισινέν λογικοί, κα τθερέν πιο χάνικ προβλήματα τουμαρέ παντριάτε.​—Φιλιππησίους 4:5.

9. Σαρ μπορίνενα ο Χριστιανοί τι σικλιαρέν πουμαρέ τσσαβέν τι σεβάνεν πουμαρέ νταντές ή νταγιά σο νανέ κι αλήθεια;

⁹ Μπορεί τι αβέλ δύσκολος τι σικλιαρέν τουμαρέ τσσαβέν άμα τουμαρό ρομ ή τουμαρί ρομνί να υπηρετίνελα ι Ιεχωβάς. Για παράδειγμας, χρειαζίντιβελα τι σικλιαρέν-λεν τι ντεν καν κι εντολή κι Γραφιάκι σο βακερέλα: «Σέβανε τι νταντές ντα τι νταγιά». (Εφεσίους 6:​1-3) Αλλά σο πρέπει τι κερέν άμα τουμαρό ρομ ή τουμαρί ρομνί να ακολουθίνελα ο κανόνες ι Γραφιάκε; Μπορίνενα τι ντεν ο λατσσό παράδειγμας τουμαρέ τσσαβέντε άμα σικαβένα σεβασμός λέσκε ή λάκε. Τι σκεφτίνεν ο λατσσέ ιδιότητες σο τθερέλα ντα τι βακερέν λέσκε ή λάκε ότι εκτιμίνενα σαρέ ο λατσσέ πράγματα σο κερέλα. Μα κατηγορίνεν τουμαρέ ρομές ή τουμαρέ ρομνιά ανγκλάλ τουμαρέ τσσαβέντε. Αλλά τι εξηγίνεν λένγκε ότι ο κάθε τζενό πρέπει τι τραμπίνελ άμα κα υπηρετίνελ ι Ιεχωβάς. Άμα κα σικλιαρέν τουμαρέ τσσαβέν τι σεβάνεν πουμαρέ νταντές ή πουμαρέ νταγιά σο νανέ κι αλήθεια, λένγκο λατσσό παράδειγμας μπορεί τι κερέλ τουμαρέ ρομές ή τουμαρέ ρομνιά τι μανγκέλ τι σικλιόλ ι Ιεχωβάσκε.

10. Σαρ μπορίνενα ο νταντά ντα ο νταγιά σο ισί Χριστιανοί τι σικλιαρέν πουμαρέ τσσαβέν τι μανγκέν ι Ιεχωβάς;

¹⁰ Μερικά νταντά ντα νταγιά σο νανέ κι αλήθεια μπορεί τι μανγκένα τι κερέν  γιορτές πουμαρέ τσσαβέντζαρ ή τι σικλιαρέν-λεν ο πράγματα σο βακερένα ο ψεύτικες θρησκείες. Επίσης, μερικά μουρσά μπορεί μα τι μουκχέν πουμαρέ ρομνίν, σο ισί κι αλήθεια, τι κερέν λάφι ι Γραφιάκε κο τσσαβέ. Αλλά ατζέ-ντα σε εκ ασακί κατάσταση, εκ ντάι κα κερέλ ο πιο λατσσό σο μπορίνελα για τι σικλιαρέλ πι τσσαβέν ι αλήθεια. (Πράξεις 16:1· 2 Τιμόθεο 3:​14, 15) Για παράδειγμας, ο ρομ εκχέ πφενιάκο μπορεί μα τι μουκχέλα-λα τι κερέλ μελέτη κο τσσαβέ ή τι λελ-λεν κο συναθροίσεις. Όμως, παρόλο σο σεβάνελα λέσκι απόφαση, μπορίνελα τι βακερέλ λένγκε οντουλένγκε σο πακιάλα κάθε φαρ σο ντιντιόλα-λα η ευκαιρία. Αντικάς, κα μπορίνεν τι σικλιόν ι Ιεχωβάσκε ντα για το κανόνες λέσκε σο σικαβένα ο σωστός ντα ο λάθος. (Πράξεις 4:​19, 20) Κο τέλος, ο τσσαβέ πρέπει τι αποφασίνεν άμα κα υπηρετίνεν ι Ιεχωβάς. * (Ντικχ ι υποσημείωση)​—Δευτερονόμιο 30:​19, 20.

11. Σο μπορεί τι ανέλ προβλήματα κο σχέσεις σο τθεράσα αμαρέ τζενέντζαρ σο να υπηρετίνενα ι Ιεχωβάς;

¹¹ Όταν αρχισάλαμ τι κεράς μελέτη με τους Μάρτυρες του Ιεχωβά, μπορεί μα τι βακερντάμ-λες αμαρέ φαμιλιάτε. Αλλά καζόμ μπαριόλας αμαρί πίστη, αγαντάμ ότι έπρεπε τι βακεράς λένγκε ότι μανγκάσα τι υπηρετίνας ι Ιεχωβάς. (Μάρκος 8:​38) Τουμαρί αφοσίωση κο Ντεβέλ μπορεί τι αντάς προβλήματα κο σχέσεις σο τθερένα τουμαρέ φαμιλιάσαρ. Για τι ντικχάς κάποια πράγματα σο μπορίνενα τι κερέν για τι ατσσικιαρέν ι ειρήνη ντα τι ατσσόν πιστοί κο Ιεχωβά.

12. Σόσκε μπορεί τι τζάνα αμέντζαρ κόντρα αμαρέ τζενέ, αλλά σαρ μπορίνασα τι σικαβάς λένγκε ότι ενδιαφερίντιβασα οντουλένγκε σο νιωθίνενα;

¹² Προσπαθίνεν τι αγαβέν σαρ νιωθίνενα τουμαρέ τζενέ σο νανέ κι αλήθεια. Ισινάμ μπουτ χαρούμενοι σο τζανάσα ι αλήθεια κατά Γραφή. Όμως, αμαρέ τζενέ μπορεί τι πακιάνα ότι χουχάντιλαμ ή ότι μπλεξάλαμ με εκ παράξενη θρησκεία. Μπορεί τι αμντίνενα ότι ακανά να μανγκάσα-λεν επειδή να κεράσα λέντζαρ γιορτές. Ή μπορεί ατζέ-ντα τι νταρένα ότι ο Ντεβέλ κα τιμωρίνελ-αμέν μετά κατά μεριπέ. Πρέπει τι προσπαθίνας τι αγαβάς σαρ νιωθίνενα ντα τι ασουνάς προσεκτικά σο βακερένα για τι αγαβάς σόσκε ανησυχίνενα αμένγκε. (Παροιμίες 20:5) Ο απόστολος Παύλος προσπαθίνελας τι αγαβέλ “σαβέ τι μανγκές τζενέν” για τι μπορίνελ τι σικλιαρέλ-λεν ο λατσσέ αμπέρια. Άμα προσπαθίνασα τι αγαβάς ι κάθε εκχές αντρέ αμαρέ φαμιλιάτε, ανταβά μπορεί τι βοηθίνελ-αμέν τι αγαβάς σαρ τι σικλιαράς-λεν ι αλήθεια.​—1 Κορινθίους 9:​19-23.

13. Σαρ πρέπει τι κεράς λάφι αμαρέ τζενέντζαρ σο νανέ κι αλήθεια;

¹³ Κερέν λάφι με ηρεμία. «Τουμαρό λάφι πάντα τι αβέλ γκουλντό», βακερέλα η Γραφή. (Κολοσσαείς 4:6) Ανταβά μπορεί μα τι αβέλ εύκολος. Μπορίνασα τι μανγκάς κατά Ιεχωβά λέσκο άγιος πνεύμας για τι βοηθίνελ-αμέν τι αβάς ήρεμοι ντα λατσσέ αμαρέ τζενέντζαρ. Δεν πρέπει τι προσπαθίνας  τι απαντίνας σαρέ κο πράγματα σο βακερένα για τι σικαβάς λένγκε ότι οντουλά σο πακιάνα ισί ψεύτικα. Άμα πληγώνενα-αμέν οντουλέντζαρ σο βακερένα ή κερένα, μπορίνασα τι κεράς οντουβά σο κερντέ ο απόστολοι. Ο Παύλος βακερντάς: «Όταν προσβαλίνενα-αμέν, ευλογίνασα· όταν τζάνα αμέντζαρ κόντρα, νταϊντίνασα με υπομονή· όταν κατηγορίνενα-αμέν ψεύτικε λαφίντζαρ, απαντίνασα με ηρεμία».​—1 Κορινθίους 4:​12, 13.

14. Καλά λατσσέ αποτελέσματα αβένα όταν τθεράσα λατσσί συμπεριφορά;

¹⁴ Συνεχίνεν τι τθερέν λατσσί συμπεριφορά. Σόσκε ισί σημαντικός ανταβά; Όταν κεράσα λάφι με ήρεμος τρόπος, βοηθίντιβασα τι ατσσικιαράς ι ειρήνη αμαρέ τζενέντζαρ, αλλά αμαρί λατσσί συμπεριφορά μπορεί τι τθερέλ ατζέ πιο μπαρί δύναμη. (Διαβάνεν 1 Πέτρου 3:1, 2, 16) Μουκχέν τουμαρέ τζενέν τι αγαβέν τουμαρέ παραδειγμάσταρ ότι ο Μάρτυρες του Ιεχωβά τθερένα ευτυχισμέ παντριές, φροντίνενα λατσσές πουμαρέ τσσαβέν, τζουβντιόνα σαρ βακερένα ο συμβουλές ι Γραφιάκε ντα λένγκι ζωή ισί πφερντί νόημας. Ατζέ-ντα άμα αμαρέ τζενέ να κα δεχτίνεν ποτές ι αλήθεια, μπορίνασα τι τθεράς χαρά επειδή τζανάσα ότι αμαρί λατσσί συμπεριφορά κερέλα ι Ιεχωβάς τι χαιρίνελ.

15. Σο μπορίνασα τι σκεφτίνας πιο τζανγκλέ για μα τι χας-αμέν αμαρέ τζενέντζαρ;

¹⁵ Σκεφτίνεν πιο τζανγκλέ σο κα κερέν. Σκεφτίνεν σο κα μπορίνελας τι κερέλ-τουμέν τι χαν-τουμέν τουμαρέ τζενέντζαρ. Σοράν, αποφασίνεν σο κα κερέν. (Παροιμίες 12:​16, 23) Ανταβά κερντάς εκ πφεν κι Αυστραλία. Λάκο σαστρό τζάλας μπουτ κόντρα κι αλήθεια ντα μερικές φορές νευριάνελας μπουτ. Οτθάρ βόι ντα λάκο ρομ, πριν τι λεν-λες τηλέφωνος, μανγκένας κατά Ιεχωβά τι βοηθίνελ-λεν για μα τι απαντίνεν λέσκε χολιάσαρ. Σκεφτίνενας πιο τζανγκλέ σουκάρ θέματα σο κα μπορίνενας τι συζητίνεν. Ντα για μα τι ασταρέν μπαρέ συζητήσεις σο κα κερένας-λεν τι χαν-πες ι θρησκειάκε, κανονίνενας καζόμ σαάτι κα κερένας λέσαρ λάφι.

16. Σο μπορίνενα τι κερέν άμα τθερένα τύψεις ότι στεναχωρίνενα τουμαρέ τζενέν;

¹⁶ Σίγουρα, όμως, ναστί συμφωνίνενα σαρέ κο πράγματα όταν κερένα λάφι τουμαρέ τζενέντζαρ. Οτθάρ, μπορεί τι τθερένα τύψεις επειδή μανγκένα τουμαρέ τζενέν ντα μανγκένα τι κερέν-λεν τι χαιρίνεν. Αλλά τι ντεν-τουμέν γκοντί ότι τουμαρί αφοσίωση κο Ιεχωβά πρέπει τι αβέλ πιο μπαρί κατά αγάπη σο τθερένα τουμαρέ φαμιλιάκε. Όταν τουμαρέ τζενέ κα ντικχέν-λες ανταβά, μπορεί τι αγαβέν καζόμ σημαντικός ισί τι υπηρετίνεν ι Ιεχωβάς. Να μπορίνενα τι κερέν καεκχές ζορίσαρ τι δεχτίνελ ι αλήθεια. Μπορίνενα όμως τι μουκχέν ι γιαβερέν τι ντικχέν καζόμ βοηθίντιλεν επειδή πφιρένα κι Ιεχωβάσκο ντρομ. Ντα κι πραγματικότητα, ο Ιεχωβά ντέλα-λεν ι ίδια ευκαιρία σο ντέλα αμέντε-ντα, δηλαδή τι τραμπίνεν άμα κα υπηρετίνεν-λες.​—Ησαΐας 48:​17, 18.

17, 18. Σο μπορίνελα τι βοηθίνελ-τουμέν άμα εκ τζενό τουμαρέ φαμιλιάταρ κα μουκχέλ ι Ιεχωβάς;

¹⁷ Άμα εκ τζενό τουμαρέ φαμιλιάταρ ισί αποκομμέ ή αποσυνταυτισμέ, ανταβά  μπορεί τι αβέλ μπουτ δύσκολος τουμένγκε. Μπορεί τι ανέλ τουμένγκε αζόμ μπαρί ντουκχ σαρ τι ντένα-τουμέν σπαθίσαρ. Σαρ μπορίνενα τι νταϊντίνεν ανταγιά ντουκχ;

¹⁸ Ατσσόν αφοσιωμέ κι υπηρεσία κι Ιεχωβάσκι. Άμα τθερένα ασακί ντουκχ, χρειαζίντιβελα τι μπαριαρέν τουμαρί πίστη. Τι διαβάνεν ι Γραφή κάθε ντιβές, τι προετοιμάντιβεν ι συναθροισιένγκε ντα τι παρακολουθίνεν-λεν, τι συνεχίνεν τι τζαν κο έργος ντα τι προσευχίντιβεν κο Ιεχωβά τι ντελ-τουμέν ζορ για τι νταϊντίνεν. (Ιούδα 20, 21) Αλλά σο αβέλα-πες άμα κερένα-λεν σαρέ ανταλά αλλά η ντουκχ να νασέλα; Μα σταματίνεν! Ατσσόν αφοσιωμέ κι υπηρεσία κι Ιεχωβάσκι. Σιγά σιγά, ανταβά κα βοηθίνελ-τουμέν τι κερέν κουμάντος οντουλά σο σκεφτίνενα ντα νιωθίνενα. Ανταβά αβιλό-πες οντουλέ τζενέσκε-ντα σο γραφιντάς ο Ψαλμός 73. Για κάποιος καιρός, ισινέ δύσκολος λέσκε τι κερέλ κουμάντος οντουλά σο σκεφτίνελας ντα νιωθίνελας. Αλλά επειδή συνεχιντάς τι υπηρετίνελ ι Ιεχωβάς, μπορισάλο τι ντικχέλ πάλι ο πράγματα με το σωστός τρόπος. (Ψαλμός 73:​16, 17) Ο ίδιος μπορεί τι αβέλ-πες τουμένγκε-ντα.

19. Σαρ μπορίνενα τι σικαβέν σεβασμός για το τρόπος σο διορθώνελα ο Ιεχωβά πι λαός;

¹⁹ Τι σεβάνεν ι διόρθωση σο ντέλα ο Ιεχωβά. Ο Ντεβέλ τζανέλα ότι λέσκι διόρθωση κα βοηθίνελ εμ ι τζενές σο χαλάς αποκοπή αλλά ι γιαβερέν-ντα. Παρόλο σο ανέλα αμένγκε μπαρί ντουκχ όταν εκ τζενό σο μανγκάσα-λες λέλα διόρθωση, ανταβά μπορίνελα τι βοηθίνελ-λες τι βουρτίνελ κο Ιεχωβά. (Διαβάνεν Εβραίους 12:​11) Όμως, μέχρι τι αβέλ-πες ανταβά, πρέπει τι σεβάνας ι οδηγία ι Ιεχωβάσκι σο βακερέλα “τι τσσιναβάς τι κεράς παρέα” οντουλέντζαρ σο ισί αποκομμέ. (1 Κορινθίους 5:​11-13) Ανταβά νανέ εύκολος. Αλλά δεν πρέπει τι επικοινωνίνας λέντζαρ κατά τηλέφωνος, με μηνύματα, γράμματα, e-mail ή κατά κοινωνικά δίκτυα.

20. Καλέ πραγμάσκε μπορίνασα τι συνεχίνας τι τθεράς ελπίδα;

²⁰ Ποτές μα χασαρέν τουμαρί ελπίδα! Η αγάπη «τθερέλα ελπίδα σαρέ ι πραγματένγκε», οτθάρ συνεχίνασα τι τθεράς ι ελπίδα ότι αμαρέ αγαπημέ τζενέ κα βουρτίνεν κο Ιεχωβά. (1 Κορινθίους 13:7) Άμα ντικχένα ότι εκ τζενό τουμαρέ φαμιλιάταρ αλλάνελα ντα αβέλα πιο λατσσό, κα μπορίνενας τι προσευχίντιβεν λέσκε για τι λελ ζορ κατά Γραφή ντα τι δεχτίνελ ι πρόσκληση ι Ιεχωβάσκι, σο βακερέλα: «Βούρτινε μάντε».​—Ησαΐας 44:22.

21. Σο πρέπει τι κερέν άμα τουμαρί φαμιλί τζάλα τουμέντζαρ κόντρα επειδή ακολουθίνενα ι Ιησούς;

²¹ Ο Ιησούς βακερντάς ότι πρέπει τι μανγκάς-λες πιο μπουτ σαρέ κατά τζενέ. Ντα ισινέ σίγουρος ότι λέσκε μαθητές κα τθερένας ο θάρρος τι ατσσόν αφοσιωμέ λέστε ατζέ-ντα άμα λένγκι φαμιλί κα τζάλας λέντζαρ κόντρα. Άρα, άμα τουμαρί φαμιλί τζάλα τουμέντζαρ κόντρα επειδή ακολουθίνενα ι Ιησούς, τι στηρίντιβεν κο Ιεχωβά. Μανγκέν λέσταρ τι βοηθίνελ-τουμέν τι νταϊντίνεν. (Ησαΐας 41:​10, 13) Τι χαιρίνεν επειδή τζανένα ότι ο Ιεχωβά ντα ο Ιησούς ισί ευχαριστιμέ τουμέντζαρ ντα κα ευλογίνεν-τουμέν επειδή ατσσόνα πιστοί.