1, 2. (a) Ndi ntendere upi wakuti tinakwanisa kukhala nawo? (b) Thangwi yanji ndi pyakunentsa kukhala na ntendere wandimomwene? (Onani cithundzithundzi cakutoma.)

TONSENE tisafuna ntendere mu umaso wathu, mbitikhonda kudzudzumika. Natenepa tisapereka takhuta kakamwe kuna Yahova thangwi yakutipasa “ntendere wa Mulungu.” Ntendere unoyu usaticitisa kukhala akukhurudzika mbiticalira manyerezero na mabvero akuipa. (Afilipi 4:6, 7) Nakuti taperekeka kwa Yahova, tisakhalambo na “ntendere wa Mulungu.” Pyenepi pisabveka kuti tisakhala na uxamwali wadidi na iye.—Aroma 5:1.

² Mbwenye, uno nee ndi ndzidzi toera Mulungu abwerese ntendere wandimomwene pa dziko yapantsi. Ife tikukhala mu ntsiku zakumalisa, natenepa pana nyatwa zizinji zinatidzudzumisa. Ife tazungulirwa na anthu akuipa. (2 Timoti 3:1-4) Pontho tisathimbana na Sathani na pipfundziso pyace pyauthambi. (2 Akorinto 10:4, 5) Mbwenye panango pinaticitisa kudzudzumika kakamwe ndi kutcingwa na acibale athu akuti nee  asatumikira Yahova. Anango a iwo panango asatiseka thangwi ya pinakhulupira ife peno kucitisa kusankhulana kwa acibale. Panango analonga kuti nee tinacita khundu ya banja tingakhonda kusiya kutumikira Yahova. Tisafunika kucitanji tingatcingwa na acibale athu? Pontho tinapitiriza tani kukhala a ntendere pyenepi pingacitika?

3, 4. (a) Kodi pipfundziso pya Yezu pyakhuya tani anyakupfundzace? (b) Ndi midzidzi ipi yakuti pinakhala pyakunentsa kakamwe kutowezera Yezu?

³ Yezu akhadziwa kuti nee ndi anthu onsene mbadatawira pipfundziso pyace. Iye akhadziwambo kuti anyakupfundzace akhafunika kukhala acipapo thangwi anango mbadaatcinga. Kutcingwa kweneku mbakudakhuya ntendere na acibale awo. Yezu alonga: ‘Lekani kunyerezera kuti ndabweresa ntendere pantsi pano; Nee ndabweresa ntendere, mbwenye supada. Ndabwera kudzamwaza munthu na babace, mwanankazi na mace, nkwenya na mebzwalace. Mwandimomwene, munthu wa panyumba ibodzi ene anadzakhala nyamalwa wace.’—Mateo 10:34-36.

⁴ Kodi Yezu akhafuna kulonganji pidalonga iye kuti ‘Lekani kunyerezera kuti ndabweresa ntendere?’ Iye akhafuna anthu adziwe kuti mbapadaoneka mikandzo inango angasankhula kukhala anyakupfundzace. Mwandimomwene, cifuniro ca Yezu cikhali kupfundzisa anthu undimomwene wa Mulungu, tayu kucitisa munthu kukhonda bverana na acibale ace. (Jwau 18:37) Mbwenye anyakupfundzace akhafunika kudziwa kuti pinakhala pyakunentsa kukhala atowereri ace, makamaka khala axamwali peno acibale awo nee asatawira undimomwene.

5. Kodi anyakupfundza a Yezu akhafunika kupiriranji?

⁵ Yezu alonga kuti mitcingo ya m’banja mbidakhala yakunentsa kakamwe kuna anyakupfundzace toera kupirira. (Mateo 10:38) Toera kukomeresa Yezu, anyakupfundzace akhafunika kupirira angatcingwa na acibale awo peno kuthamangiswa panyumba. Mbwenye iwo awina pizinji kupiringana pidaluza iwo.—Lerini Marko 10:29, 30.

6. Tisafunika kukumbukanji tingatcingwa na acibale athu?

⁶ Ngakhale kuti acibale athu asatitcinga thangwi yakulambira Yahova, ife tisapitiriza kuafuna. Mbwenye tisafunika kukumbuka kuti ufuni wathu kwa Mulungu na Kristu usafunika kukhala wakuwanga kupiringana munthu onsene. (Mateo 10:37) Pontho tisafunika kukumbuka kuti Sathani anakwanisa kuphatisira ufuni wathu kwa acibale toera tikhonde kukhala akukhulupirika kwa Yahova. Tendeni tidinge pinentso pingasi na kuona kuti tinapirira tani.

7. Musafunika kucitanji khala ndzanu wa m’banja nee asatumikira Yahova?

⁷ Bhibhlya isaticenjeza kuti munthu onsene anamanga banja ‘anadzathimbana na nyatwa.’ (1 Akorinto 7:28) Khala mwamanga banja na munthu wakuti nee asatumikira Yahova, pyenepi panango pinathimizira nyatwa m’banja mwanu. Mbwenye, ndi pyakufunika kakamwe kuona nyatwa zenezi ninga munaziona Yahova. Iye alonga kuti nee tisafunika kumwazana peno kumalisa banja, basi ene thangwi ndzathu wa m’banja nee asatumikira Yahova. (1 Akorinto 7:12-16) Khala mamunanu nee asatumikira Yahova, musafunika kupitiriza kumulemedza ninga  nsolo wa banja. Pontho khala nkazanu nee asatumikira Yahova, musafunika kupitiriza kunfuna na kuntsalakana.—Aefesi 5:22, 23, 28, 29.

8. Ndi mibvundzo ipi isafuna imwe kucitika khala ndzanu wa m’banja asayesera kupingiza ulambiri wanu?

⁸ Musafunika kucitanji khala ndzanu wa m’banja asayesera kupingiza ulambiri wanu? Mulongo unango apangwa na mamunace kuti nee asafunika kuenda mu utumiki ntsiku zinango za sumana. Khala muli m’makhaliro anewa, bvundzikani: ‘Kodi iye andikhondesa kulambira Yahova kwenda na kwenda? Khala nkhabe, ndinacita pidandipanga iye?’ Mungakhala na maonero akulinganira, nee munadzathimbana na nyatwa zizinji m’banja mwanu.—Afilipi 4:5.

9. Akristu anapfundzisa tani anawo kulemedza nyakubala wakuti nee asatumikira Yahova?

⁹ Pisakhala pyakunentsa kupfundzisa ana khala ndzanu wa m’banja nee asatumikira Yahova. Mwacitsandzo, musafunika kupfundzisa ananu toera kubvera ntemo wa Bhibhlya: ‘Lemedza babako na mako.’ (Aefesi 6:1-3) Kodi munacitanji khala ndzanu wa m’banja nee asatowezera midida ya Bhibhlya? Imwe munakwanisa kupangiza citsandzo cadidi kuna ananu mukulemedza ndzanu wa m’banja. Nyerezerani makhaliro adidi a ndzanu wa m’banja, pontho mpangeni kuti musakomerwa kakamwe na makhaliro ace adidi. Lekani kulonga mwakuipa ndzanu wa m’banja pamaso pa ananu. M’mbuto mwace, afokotozereni kuti munthu onsene asafunika kusankhula ekha kutumikira Yahova. Mungapfundzisa ananu toera kulemedza nyakubalawo wakuti nee asatumikira Yahova, panango citsandzo cawo cadidi cinacitisa ndzanu wa m’banja kufuna kupfundza pya Yahova.

10. Kodi anyakubala Acikristu anapfundzisa tani anawo toera kufuna Yahova?

¹⁰ Anyakubala anango akuti nee asatumikira Yahova panango asafuna kuti anawo acite khundu m’maphwando a dziko peno pipfundziso pya mauphemberi authambi. Mulongo panango anakhondeswa na  mamunace wakuti nee asatumikira Yahova kupfundzisa Bhibhlya anawo. Ngakhale m’makhaliro anewa, mulongo anacita pyonsene pinakwanisa iye toera kupfundzisa anace undimomwene. (Machitiro 16:1; 2 Timoti 3:14, 15) Mwacitsandzo, panango mulongo anakhondeswa na mamunace kupfundzisa Bhibhlya anace peno kuenda nawo kumisonkhano. Mu ndzidzi unalemedza iye cisankhulo ceneci, iye anakwanisa kupitiriza kucedza na anace thangwi ya pinakhulupira iye. Munjira ineyi, ana anakwanisa kupfundza pya Yahova na midida yace yakulungama. (Machitiro 4:19, 20) Mukupita kwa ndzidzi, iwo anadzasankhula okha khala asafuna kutumikira Yahova. * (Onani cidzindikiro capantsi.)—Deuteronomyo 30:19, 20.

11. Ninji pinafuna kuticitisa kukhonda bverana na acibale athu akuti nee asatumikira Yahova?

¹¹ Mu ndzidzi udatoma ife kupfundza na Mboni za Yahova, panango nee tadziwisa acibale athu. Mbwenye mu ndzidzi ukhathambaruka ife, tadzindikira kuti tisafunika kuapanga kuti tisafuna kutumikira Yahova. (Marko 8:38) Ufuni wanu kwa Mulungu panango unakucitisani kukhonda bverana na acibale anu. Tendeni tidinge pinthu pingasi pyakuti munakwanisa kupicita toera kukhazikisa ntendere na kupitiriza kukhala wakukhulupirika kwa Yahova.

12. Thangwi yanji acibale athu asatitcinga, pontho tinapangiza tani kuti tisatsalakana mabvero awo?

¹² Yeserani kubvesesa mabvero a acibale anu akuti nee asatumikira Yahova. Ife tiri akutsandzaya kakamwe thangwi yakudziwa undimomwene wa Bhibhlya. Mbwenye, acibale athu panango ananyerezera kuti tikutaika peno tikucita khundu ya uphemberi wakukhonda dziwika. Panango ananyerezera kuti nee tisaafuna thangwi yakukhonda cita khundu ya maphwando a dziko. Panango iwo asagopa kuti cinthu cinango cinacitika kwa ife tingafa. Ife tisafunika kuyesera kubvesesa mabvero awo na kubvesera mwadidi pinalonga iwo toera kudziwa kuti thangwi yanji asadzudzumika na ife. (Misangani 20:5) Mpostolo Paulu ayesera kubvesesa “anthu onsene” toera akwanise kuapfundzisa mphangwa zadidi. Tingayesera kubvesera acibale athu, pinatiphedza toera kudziwa kuti tinaapfundzisa tani undimomwene.—1 Akorinto 9:19-23.

13. Tisafunika kulonga tani na acibale athu akuti nee asatumikira Yahova?

¹³ Longani mwakukhurudzika. Bhibhlya isalonga kuti ‘mafala anu adzipe ninga akuikhwa munyu.’ (Akolose 4:6) Pyenepi ndi pyakunentsa kakamwe. Ife tinakwanisa kuphemba nzimu wakucena wa Yahova toera utiphedze kukhala anthu akukhurudzika na akukoma ntima kuna acibale athu. Nee tisafunika kuketesana nawo thangwi ya pinakhulupira  iwo. Tingaipirwa na pinthu pinacita iwo peno pinalonga iwo, tinakwanisa kutowezera citsandzo ca apostolo. Paulu alonga: ‘Tingaxolwa, tisalonga udidi; tingatcingwa, tisapirira; tingapambizirwa, tisatawira mwakukhurudzika.’—1 Akorinto 4:12, 13.

14. Makhaliro adidi asabweresa nkhombo zipi?

¹⁴ Khalani na makhaliro adidi. Thangwi yanji ndi pyakufunika? Maseze kulonga mwakukhurudzika kunatiphedza toera kukhazikisa ntendere na acibale athu, makhaliro athu adidi ndi akufunika kakamwe. (Lerini 1 Pedro 3:1, 2, 16.) Citisani kuti acibale anu aone kubulukira mu citsandzo canu kuti Mboni za Yahova ziri na mabanja akutsandzaya, zisatsalakana anawo, zisaphatisira midida ya Bhibhlya, pontho ziri na umaso wakutsandzaya. Maseze acibale athu akhonde kutawira undimomwene, ife tinakwanisa kukhala akutsandzaya mukudziwa kuti makhaliro athu asakomeresa Yahova.

15. Tinacita tani masasanyiro mwanyapantsi toera kucalira kuketesana na acibale athu?

¹⁵ Citani masasanyiro mwanyapantsi. Nyerezerani pinthu pyakuti panango pinakucitisani kuketesana na acibale anu. Buluka penepo sankhulani pinafuna kucita imwe. (Misangani 12:16, 23) Pyenepi ndi pidacita mulongo unango wa ku Australia. Tebzwalace akhatcinga undimomwene, pontho akhaipirwa kazinji kene. Natenepa, mbadzati kum’menyera ntokodzi, iye na mamunace aphemba Yahova toera kuaphedza kucalira kuntawira mwaukali. Iwo asankhula pinthu pyakuti mbadakwanisa kucedza naye. Pontho, toera kucalira kucedza naye ndzidzi uzinji pinthu pyakuti mbapidaacitisa kulonga pya uphemberi, iwo acedza naye ndzidzi wakucepa.

16. Munakunda tani mabvero akugopa kutsukwalisa acibale anu?

¹⁶ Mwandimomwene, imwe nee munakwanisa kucalira kukhonda bverana konsene na acibale anu akuti nee asatumikira Yahova. Natenepa, mu ndzidzi unaipirwa iwo, panango munapasika mulando thangwi musafuna acibale anu, pontho musafuna kuakomeresa. Mbwenye kumbukani kuti kukhulupirika kwanu kwa Yahova kusafunika kukhala kwakuwanga kupiringana kufuna kwanu acibale anu. Acibale anu angadzindikira pyenepi, panango anabvesesa cinakucitisani kutumikira Yahova. Imwe nee musafunika kukakamiza munthu toera kupfundza undimomwene. Mbwenye citisani anango kuona kuti kutowezera kwanu midida ya Yahova kusakuphedzani tani. Mwakukhonda penula, Yahova aapasa mwai ubodzi ene udatipasa iye, wakusankhula kuntumikira.—Izaiya 48:17, 18.

17, 18. Ninji cinafuna kukuphedzani khala m’bodzi wa pabanja panu asiya Yahova?

¹⁷ Khala m’bodzi wa pabanja pathu  abuluswa mu mpingo peno abuluka ekha, pisapha kakamwe. Pisakhala ninga munthu unango atitema na supada. Ninji cinafuna kukuphedzani m’makhaliro anewa?

¹⁸ Ikhani manyerezero anu m’basa ya Yahova. Mu ndzidzi unathimbana imwe na makhaliro anewa, musafunika kuwangisa cikhulupiro canu. Kuleri Bhibhlya mwakukhonda phonya, kukhunganyika na kuenda kumisonkhano, kumwaza mphangwa na kuphembera kuna Yahova pinakupasani mphambvu toera kupirira. (Yuda 20, 21) Mphapo khala mwacita pyenepi pyonsene, mbwenye musapitiriza kukhala wakutsukwala? Lekani kubwerera nduli! Ikhani manyerezero anu m’basa ya Yahova. Mukupita kwa ndzidzi, pyenepi pinakuphedzani toera kukhala na manyerezero na mabvero akulinganira. Pyenepi ndi pidacitikira mulembi wa Masalmo 73. Iye akhali na maonero akuphonyeka thangwi ya pinthu pinango pyakuti pikhandzudzumisa. Mbwenye kulambira Yahova kwamphedza toera kuona pontho pinthu munjira yadidi. (Masalmo 73:16, 17) Pyenepi pinakwanisa kucitikambo kuna imwe.

19. Munapangiza tani kuti musalemedza njira inatonga Yahova atumiki ace?

¹⁹ Lemedzani kutonga kwa Yahova. Mulungu asadziwa kuti kutonga kwace kunaphedza onsene, kuphatanizambo ule adabuluswa mu mpingo. Maseze pisapha kakamwe munthu angabuluswa mu mpingo, mbwenye pinamphedza toera kubwerera kwa Yahova ntsogolo. (Lerini Ahebere 12:11.) Natenepa, tisafunika kulemedza kutonga kwa Yahova mukucalira “kubverana” na ale adabuluswa mu mpingo. (1 Akorinto 5:11-13) Pyenepi ndi pyakunentsa kakamwe. Mbwenye tisafunika kucalira kucedza nawo mukuphatisira ntokodzi, kuatumizira mphangwa, kulemberana matsamba, e-mail, peno redes sociais.

20. Tisafunika kukhala na cidikhiro cipi thangwi ya ale adabuluswa mu mpingo?

²⁰ Lekani kuluza cidikhiro! Ufuni ‘usadikhira pinthu pyonsene,’ natenepa tisapitiriza kudikhira kuti anyakufunika athu anabwerera kuna Yahova. (1 Akorinto 13:7) Mungaona kuti wacibale wanu adabuluswa mu mpingo akucinja makhaliro ace akuipa, munakwanisa kuphembera toera akwanise kugumana mphambvu yakuleri Bhibhlya na kutawira ncemerero wa Yahova: ‘Bwerera kuna ine.’—Izaiya 44:22.

21. Musafunika kucitanji khala musatcingwa na acibale anu thangwi yakukhala kwanu nyakupfundza wa Yezu?

²¹ Yezu alonga kuti tisafunika kunfuna kakamwe kupiringana munthu onsene. Pontho iye akhali na cinyindiro cakuti anyakupfundzace mbadakhala na cipapo cakupitiriza kukhala akukhulupirika kwa iye, maseze atcingwe na acibale awo. Natenepa, khala acibale anu asakutcingani thangwi yakufuna kwanu Yezu, nyindirani Yahova. Phembani ciphedzo cace toera mukwanise kupirira. (Izaiya 41:10, 13) Khalani akutsandzaya mukudziwa kuti Yahova na Yezu asakomerwa na imwe, pontho anadzakupasani nkhombo thangwi yakukhulupirika kwanu.