1-3. (a) Uga situasi umat Jahwe paksa Sakaria jadi nabi? (b) Engkai maka ipindo Jahwe gelah mulihken umatNa ku Ia?

LIT sada gulungen si kabang, sekalak diberu si kundul bas tong, ras dua diberu si kabang janah kabengna bagi kabeng perik ondan ntah pe bangau. Enda me pengenehenen Sakaria. (Sakaria 5:1, 7-9) Engkai maka ibere Jahwe pengenehenen enda? Uga keadan kalak Israel paksa si e? Janah kai gunana pengenehenen enda man banta?

² Meriah kel ukur umat Dibata bas tahun 537 sope masehi. Nggo 70 tahun kalak e itaban bas Babilon, tapi gundari nggo bebas. Lanai ia sabar mulihken ku Jerusalem guna majekken mulihi rumah pertoton ras nembah Jahwe i je. Sada tahun kenca e, ibangun kalak e me fondasi rumah pertoton. Meriah kel ukur  kalak e, janah ”bage gejekna sora kalak ndai, seh maka terbegi i bas ingan si ndauh nari”. (Esra 3:10-13) Tapi terus reh buena tentangen bas dahin e. Dungna lanai kalak Israel ergiah-giah janah lanai iteruskenna. Si iutamakenna, mbangun rumahna ras ndahiken jumana. Nggo seh sepulu enem tahun pe, lalap lenga dung rumah pertoton e. Emaka perlu umat Jahwe ipersingeti gelah mulihken ku Ia, janah ula ngukuri kepentingenna saja. Ate Jahwe, pang min kalak e nembah Ia janah ergiah-giah.

³ Emaka bas tahun 520, iutus Jahwe me nabi Sakaria. IsuruhNa gelah ipersingetina kalak Israel kerna alasen kalak e ibebasken bas Babilon nari. Gelar Sakaria ertina ”Nggo Inget Jahwe”. Amin pe nggo ilupaken kalak Israel kai si nggo ilakoken Jahwe man bana, tapi tetap denga iinget Jahwe kalak e. (Oge Sakaria 1:3, 4.) Erjanji Jahwe maka pasti isampatiNa kalak e gelah mulihi nembah Ia alu cara si benar. Tapi gelah ialoken Jahwe ibadat kalak e arus bulat ukurna nembah Ia. Mari sibahas pengenehenen Sakaria si peenemken ras si pepituken. Sipelajari kari uga Jahwe ngiahken kalak Israel gelah semangat mulihi ras kai gunana pengenehenen enda man banta.

4. Kai si iidah Sakaria bas pengenehenen si peenemken? Engkai maka arah lebe ras pudi gulungen e lit tulisenna? (Nen gambar nomor sada pemena artikel.)

⁴ Pasal 5 buku Sakaria ibenai alu sada pengenehenen si luar biasa. (Oge Sakaria 5:1, 2.) Iidah Sakaria lit kabang sada gulungen. Gedangna 9 meter janah belangna 4,5 meter. Talang gulungen e janah lit tulisenna. (Sakaria 5:3) Isina kerna berita pengukumen. Biasana sada halamen ngenca lit tulisen bas gulungen. Tapi perban seh kel pentingna berita e bas balikna pe lit tulisenna.

5, 6. Uga tanggapen Jahwe adi nangko kita?

⁵ Oge Sakaria 5:3, 4. Kerina kalak arus ipertanggung jabapkenna perbahanenna man Dibata. Terlebih ka umat Jahwe, perban kalak e igelari alu gelarNa. (Kuan-kuanen 30:8, 9) Keleng kel atena Dibata, janah itehna maka adi nangko ia mela banna Dibata. Menurut piga-piga kalak labo salah nangko adi guna si mehuli. Tapi adi nangko ia ertina pentingen akapna sura-surana asangken Jahwe, gelarNa, bage pe hukumNa. Emaka, si mehulina kel pe alasenna nangko, tetap nge salah.

⁶ Nina Sakaria 5:3, 4 ’ibengketi sumpah me tep-tep rumah pinangko’ janah ”tading me sumpah e i bas rumah kalak e jenari radas ibahanna rumah e”. Emaka banci iidah  Jahwe ise si la jujur bas umatNa janah iukumNa. Amin gia banci ibunikenna bas polisi nari, bosna, pertua, ntah pe bas orang tuana, tapi la banci ibunikenna bas Jahwe nari. Emaka, kai pe si itangko janah uga pe carana pasti nge tereteh dungna. (Heber 4:13) Meriah ukurta banci jadi bagin i bas umat si iusahakenna ”lalap” jujur!​—Heber 13:18.

7. Kai si perlu silakoken gelah la kita kena sumpah si lit bas gulungen?

⁷ Ceda kel ukur Jahwe adi kita nangko. Sieteh kai si ngena ras si la ngena ateNa, emaka sipatuhilah perentahNa janah teruslah siusahaken gelah perbahanenta la erban ceda gelar Jahwe. Adi silakoken e, la kita iukum Jahwe bali bagi kalak si la patuh man baNa.

8-10. (a) Kai kin sumpah e? (b) Sumpah kai si ilanggar Raja Sedekia?

⁸ Kenca e, ibaba gulungen e berita pengukumen man kalak si mbelasken ”sumpah palsu” i bas gelar Dibata. (Sakaria 5:4) Sumpah eme kata-kata si tujunna erban kalak tek maka kai si ikatakenna e benar, ntah pe janji guna ngelakoken ntah pe la ngelakoken sada hal.

⁹ Ersumpah i bas gelar Jahwe, tuhu-tuhu serius. Enda terbukti arah kai si terjadi bas Sedekia, raja terakhir si merentah i Jerusalem. Ersumpah ia i bas gelar Jahwe maka nggit ia patuh man raja Babilon. Tapi la itepati Sedekia janjina. Akibatna,  ikataken Jahwe maka ”la banci lang mate [Sedekia] i Babilon, erkiteken ilanggarna sumpah ras padan si ibahanna ras raja Babilon si ngangkat ia jadi raja”.​—Esekiel 17:16.

¹⁰ Ersumpah Raja Sedekia i bas gelar Jahwe, janah ate Jahwe itepati Sedekia min sumpahna e. (2 Kronika 36:13) Ilanggar Sedekia janjina janah ipindona penampat Mesir gelah banci bebas bas Babilon nari. Tapi la banci isampati Mesir ia.​—Esekiel 17:11-15, 17, 18.

11, 12. (a) Janji kai si seh kel pentingna si nggo siban? (b) Perban nggo sibere geluhta man Jahwe, uga arusna perbahanenta tep-tep wari?

¹¹ Erlajar kita arah Raja Sedekia nari maka ibegi Jahwe adi kita erjanji. Gelah keleng ate Jahwe kita, arus sitepati janjinta. (Masmur 76:11) Janji si pentingna kel si nggo siban eme sanga sibaktiken dirinta man Jahwe. Paksa si e, erjanji kita maka silayani Ia la soal kai si terjadi bas geluhta.

¹² Uga carana nepati janji man Jahwe? ”Tep-tep wari” kita iuji, lit si mesera si man adapen, lit si lang. Arah caranta ngatasi ujin e banci sieteh rembak ntah lang kita ras Jahwe. (Masmur 61:8) Uga adi igoda teman sada dahinndu ntah pe teman sekolahndu kam gelah ngerondong? Itulakndu nge, janah buktikenndu maka patuh atendu man Jahwe? (Kuan-kuanen 23:26) Ntah, uga adi kam ngenca bas keluargandu si nembah Jahwe? Ipindondu nge penampat Jahwe gelah teridah arah perbahanenndu maka kam kalak Kristen? Uga pe keadanndu, ngata bujur nge kam man Jahwe perban nggo ikelengiNa janah itegu-teguNa kam tiap wari? Ibanndu nge waktundu ngoge Pustaka tiap wari? Situhuna, nggo erjanji kita ngelakoken si enda kerina sanga sibereken geluhta man Jahwe. Adi patuh kita man Jahwe janah silakoken asa ngasupta guna ngelayani Ia, sibuktiken maka keleng ateta Ia. Ibadatta man Jahwe arus tuhu-tuhu silakoken bas geluhta. Janah adi setia kita man baNa, meriah me geluhta bas wari si pepagi.​—Ulangen 10:12, 13.

13. Pelajaren kai si banci sidat arah pengenehenen Sakaria si peenemken?

¹³ Pelajaren si banci sidat arah pengenehenen Sakaria si peenemken eme adi keleng ateta Jahwe, ula kita nangko janah arus sitepati janjinta. Sipelajari ka maka amin gia megati kalak Israel erban salah, tetap itepati Jahwe janjiNa janah la itadingkenNa umatNa. IangkaiNa maka mesera iakap kalak e, perban melala musuh  i sekelewetna. Arah kai si nggo ilakoken Jahwe, iajariNa kita gelah sitepati ka janjinta. Janah tek kita pasti isampatiNa. Contohna, ibere Jahwe kita arapen kerna wari si pepagi. Kentisik nari, imasapkenNa me kerina kejahaten. Banci kari sipelajari kerna si e arah pengenehenen Sakaria si pepituken.

14, 15. (a) Kai si iidah Sakaria i bas pengenehenen si pepituken? (Nen gambar nomor dua pemena artikel.) (b) Ise diberu si kundul bas tong? Engkai maka itutup malekat e mulihken tong ndai?

¹⁴ Kenca iidah Sakaria gulungen si kabang, nina malekat man bana, ”Nehenlah!” Kenca e, iidah Sakaria ka sada tong. (Oge Sakaria 5:5-8.) Tong e kibul tutupna, janah iban i bas timah nari. Sanga italangi Sakaria tong e, idahna ”kundul sekalak diberu” i bas. Ikataken malekat e man Sakaria maka diberu e ”nggambarken Kejahaten”. Cuba bayangkenndu, pasti mbiar kel Sakaria paksa ndarat ate diberu e bas tong nari! Tapi mis isorongken malekat e mulihken ia ku tong ndai janah mis itutupna. Kai maksud pengenehenen e?

¹⁵ Arah pengenehenen e, tek kita maka la ipediat Jahwe lit kejahaten i bas umatNa. Adi idah Jahwe kai si la mehuli pasti mis imasapkenNa. (1 Korinti 5:13) Enda me si ilakoken malekat sanga mis itutupna tong ndai.

16. (a) Uga iban dua diberu si erkabeng tong ndai? (Nen gambar nomor telu pemena artikel.) (b) Ku ja babana tong e?

 ¹⁶ Kenca e, idah Sakaria dua diberu si megegeh kabengna bagi perik ondan ntah pe bangau. (Oge Sakaria 5:9-11.) Diberu enda beda kel ras diberu jahat si lit bas tong ndai. Perban megegeh kabengna, iangkatna me tong si risiken ”Kejahaten” janah ibabana ”ku Babilon”. Engkai maka ibabana ku je?

17, 18. (a) Engkai maka cocok Babilon jadi ingan ”Kejahaten”? (b) Kai si arus silakoken?

¹⁷ Pasti iangkai kalak Israel bas jaman Sakaria ngkai maka cocok Babilon jadi ingan ”Kejahaten”. Kuta e dem alu perbahanen seks si salah ras penembahen berhala. Erusaha kel Sakaria ras kalak Jahudi si debanna si tading i je gelah ula terpengaruh. Enda sada jaminen maka penembahen man Jahwe pasti bersih.

¹⁸ Pengenehenen e ngingetken kalak Israel maka ia pe ertanggung jabap njaga ibadat man Jahwe tetap bersih. La banci lit kejahaten bas umat Dibata. Gundari, kita nggo bas organisasi Jahwe si bersih, ikelengiNa kita i je janah ilindungiNa. Janah kerina kita lit tugasta guna njagasa. Ula min sempat lit kejahaten bas umat Jahwe.

19. Kai si banci sieteh arah pengenehenen Sakaria?

¹⁹ Pengenehenen Sakaria si peenemken ras pepituken eme persinget si tegas man kalak si ngelakoken kai si jahat. Pasti imasapken Jahwe kejahaten. Emaka arus segat ate umat Jahwe kejahaten. Arah pengenehenen e sieteh maka adi meriah siban ukur Bapanta, labo ibanNa kita cilaka tapi ilindungiNa janah ipasu-pasuNa kita. Mesera tetap bersih i bas doni si jahat enda, tapi alu penampat Jahwe banci silakoken. Tapi kai si erbanca kita tek maka ibadat man Jahwe pasti tetap lit? Lanai ndekah reh me kiniseran si mbelin, kai buktina maka pasti ilindungi Jahwe organisasiNa? Artikel si reh kari njabapsa.