1-3. (a) Lupwen Sekaraia a poputááni an angangen soufós, ifa nónnómun néún Jiowa kewe aramas? (b) Pwata Jiowa a tingorei néún kewe aramas ar repwe liwiniti?

 IKKEEI ekkóch mettóch Sekaraia a kúna lón an kewe lángipwi. Eché taropwe mi áás, emén fefin lón eú pasikit, me rúúemén fefin mi áás ren pépéén ásepwál fán péúkásiir usun péúkásin éré. (Sek. 5:1, 7-9) Pwata Jiowa a ékúna ngeni néún na soufós ekkena lángipwi mi amwarar? Ifa nónnómun ekkewe chón Israel lón ena atun? Me ifa usun sia tongeni káé seni ekkena lángipwi lón ei fansoun?

² Lón ewe ier 537 mwen Kraist, néún Jiowa kewe aramas ra fókkun pwapwa. Ra piin fétek ren 70 ier lón Papilon, nge iei ra ngaseló! Ra mwétéres le liwiniti Jerusalem pwe repwe aúsefálietá ewe imwenfel me fel ngeni Jiowa ikkena ie. Mwirin eú ier, ekkewe chón Israel ra féri lóngólóngun ewe imwenfel. Ekkewe aramas ra fókkun pwapwa, iwe “ngingir a  fokun leüömong, pwe aramas ra tongeni rongorong me toau.” (Esr. 3:10-13) Nge a chék péppéchékúleló án aramas ú ngeni ewe angangen kaú. Ekkewe chón Israel ra fókkun lichippúng, iwe ra úkútiw le aúetá ewe imwenfel. Ra poputá le nefótófót wóón ar aúetá pwisin imwer me féréchú ar kewe atake. Iwe a fen mwirin engol me wonu ier nge ese mwo wes án Jiowa we imwenfel. A lamot epwe wor kapasen áchem ngeni néún Kot kewe aramas pwe repwe liwiniti i me resap chúen ekieki chék pwisin iir. Jiowa a mochen ar repwe fel ngeni fán tinikken me tipepwora.

³ Iwe, lón ewe ier 520, Jiowa a tiinaaló néún we soufós Sekaraia an epwe álisi ekkewe aramas le chechchemeni ewe popun i a angasereló seni Papilon. Ewe it Sekaraia a wewe ngeni “Jiowa A Chechchemeni.” Jiowa a chúen chechchemeni ekkewe chón Israel inaamwo ika ra ménúki met a fen féri fán iter. (Álleani Sekaraia 1:3, 4.) Jiowa a pwon ngeniir pwe epwe álisiir le eliwinisefálieto fel mi enlet. Nge a pwal éúréúrer pwe epwe chék etiwa ar fel ika ra fang ngeni minne mi múrinné seni meinisin. Sipwe etittina awonuen me efisuen án Sekaraia lángipwi. Sipwe káé met Jiowa a féri le achchúngú letipen ekkewe chón Israel me ifa usun ekkena ruu lángipwi ra pwal tongeni álisikich lón ei fansoun.

4. Met Sekaraia a kúna lón an we awonuen lángipwi? Pwata a mak wóón iir me rúúepekin ewe taropwe? (Ppii ewe áeúin sasing lepoputáán ei lesen.)

⁴ Lepoputáán sópwun 5 lón ewe puken Sekaraia, a wor eú lángipwi mi sókkóló. (Álleani Sekaraia 5:1, 2.) Sekaraia a kúna eché taropwe mi áás feil. A arapakkan 30 fiit ttaman me 15 fiit chélapan. A suukuló ena taropwe, me a wor pwóróus mi mak lón. (Sek. 5:3) Ewe pwóróus mi mak lón ina eú kapwúng mi chou. Lón fansoun lóóm, aramas ra kan chék mak epekin ewe taropwe. Nge ena pwóróus a kon lamot ina pwata a mak wóón iir me rúúepekin ewe taropwe.

5, 6. Met meefien Jiowa usun solá meinisin?

⁵ Álleani Sekaraia 5:3, 4. Aramas meinisin repwe etittin me ren Kot wóón minne ra féri. Nge ena mettóch a ákkáeúin weneiti néún Jiowa kewe aramas, pokiten ra iteit seni itan we. Ra tongei me ra silei pwe solá epwe eitengawa. (SalF. 30:8, 9) Eli ekkóch ra ekieki pwe ese wor ngawen solá ren eú popun mi lamot. Nge inaamwo ika me rer a wor popun mi éch ar repwe solá, nge mi chék ngaw, pún ra pwáraatá pwe ra akkomwa ar mochenia lap seni Jiowa, itan we, me an allúk.

⁶ Ka kúna án Sekaraia 5:3, 4 erá pwe ewe anúmamaú “epwe tolong lon imwen ewe chon solä,” me “epwe nonom lon imwer o ataretiu”? Iwe a fókkun ffat pwe Jiowa a tongeni ápwáraaló me apwúngú meinisin féfférmwáál lein néún kewe aramas. Ikaamwo emén chón solá a tongeni aopaaló  seni ekkewe polis, néún boss, ekkewe mwán mi ásimaw, are seman kewe me inan minne a féri, nge ese tongeni aopaaló seni Jiowa. Kot epwe fókkun féri pwe féfférún solá meinisin epwe pwápwáló. (Ipru 4:13) Sia enletin pwapwa le nóm lein chókkewe mi achocho úkúkún ar tongeni le wenechar “fansoun meinisin”!​—Ipru 13:18.

7. Ifa usun sia tongeni ttiisenikich kapwúngún ewe taropwe mi áás?

⁷ Jiowa a oputa féfférún solá meinisin. Sia meefi pwe sia fókkun feiéch pokiten sia silei me álleasochisi án Jiowa kewe kapasen emmwen usun minne mi pwúng me mwáál, me manaweni ewe sókkun manaw ese eitengawa i. Ach féri ena, a eppetikich seni ewe esin kapwúng Jiowa epwe atoto ngeni chókkewe rese álleasochisi i.

8-10. (a) Met weween akkapél? (b) Ifa ewe pwon fán akkapél King Setekia a atai?

⁸ Mwirin, ewe taropwe mi áás a pwal awora eú kapasen éúréúr ngeni chókkewe ‘mi akapelmwäli’ iten Kot. (Sek. 5:4) Akkapél a wewe ngeni eú kapasen alúkúlúk usun pwúngún eú mettóch are eú pwon mi lap ren án emén epwe féri are esap féri och mettóch.

⁹ Án emén akkapélú iten Kot we Jiowa ina eú mettóch mi fókkun lamot. Minne a fis ngeni Setekia, ewe sáingoon king mi nemenem seni Jerusalem, a pwári usun ena mettóch. Setekia a akkapélú iten Kot pwe epwe álleasochisi ewe kingen Papilon. Nge ese apwénúetá an na pwon. Ren ena popun, Jiowa a apasa pwe Setekia epwe “fokun mäla lon Papilon, lon lenien ewe  chök king a seikätä lon wisan wisen king, pun a aücheangaua o atai an we pwonen atipeeu a eäni fän akapel ngeni.”​—Is. 17:16.

¹⁰ King Setekia a akkapélú iten Kot we, iwe Jiowa a mochen epwe apwénúetá met a eáni akkapél. (2 Kron. 36:13) Nge Setekia a atai an we pwon me a tingor álillis seni Isip pwe epwe tongeni ngaseló seni fán nemenien Papilon. Nge ewe mwúún Isip ese tongeni álisi.​—Is. 17:11-15, 17, 18.

11, 12. (a) Ifa ewe pwon mi lamot seni meinisin sia tongeni eáni? (b) Ifa usun ach fangóló manawach a kkúú féfférúch iteiten rán?

¹¹ Minne a fis ngeni Setekia a áiti ngenikich pwe Jiowa a aúseling ngeni ekkewe pwon sia eániir. Ren ach sipwe apwapwaai i, a lamot sipwe apwénúetá ach kewe pwon. (Kölf. 76:11) Ewe pwon mi kon lamot seni meinisin sia tongeni eáni ina ach pwonen fangóló manawach ngeni Jiowa. Ach fangóló manawach ngeni a wewe ngeni pwe sia pwonei pwe sipwe angang ngeni ese lifilifil met epwe fis lón manawach.

¹² Ifa usun sia tongeni apwénúetá ach pwon ngeni Jiowa? “Iteiten rän” sia kan kúna sóssótuch mi watte are mi kúkkún. Féfférúch atun a fis ekkena sóssót a tongeni pwáraatá úkúkún péchékkúlen ach riri ngeni Jiowa. (Kölf. 61:8) Áwewe chék, met kopwe féri ika emén chienom chón angang are chón sukul a poputá le sike ngonuk? Kopwe oput an sike ngonuk me pwáraatá pwe ka mochen álleasochisi Jiowa? (Kölf. 128:1) Are met kopwe féri ika en chék ka fel ngeni Jiowa lón óm we famili? Ka kan tingorei Jiowa an epwe álisuk le sópweló le eáni féfférún Chón Kraist? Ka kan kilisou ngeni Jiowa iteiten rán ren an tong me emmwen, ese lifilifil met a fis lón manawom? Ka awora fansoun le álleani ewe Paipel iteiten rán? Sia tongeni erá pwe sia pwon ngeni Jiowa ach sipwe féri ekkena mettóch lupwen sia fangóló manawach ngeni. Lupwen sia álleasochisi me fang ngeni met mi múrinné seni meinisin, sia pwár ngeni pwe sia tongei me manawach a nóm fán nemenian. Unusen manawach a kapachelong lón ach fel ngeni. Me pokiten sia tuppwél ngeni Jiowa, a pwon ngenikich pwe manawach lón mwachkkan epwe fókkun múrinné.​—Tut. 10:12, 13.

13. Met sia tongeni káé seni án Sekaraia we awonuen lángipwi?

¹³ Án Sekaraia we awonuen lángipwi a álisikich le weweiti pwe ika sia tongei Jiowa, iwe sisap solá are atai ach kewe pwon. Sia pwal káé pwe inaamwo ika ekkewe chón Israel ra mwáálliló fán chómmóng, nge Jiowa a apwénúetá an pwon me ese likitiireló. A weweiti pwe ra nóm fán watteen weires ren chómmóngun chón oputer mi rokopwáliireló. Ren án Jiowa leenien áppirú, a áiti ngenikich pwe sipwe apwénúetá ach kewe pwon. Me sia tongeni lúkúlúk pwe i epwe álisikich le féri ena. Eú mettóch  Jiowa a féri pwe epwe álisikich ina an ngenikich ewe ápilúkúlúk fán iten mwachkkan. Ekiseló chék epwele asopwaló féfféringaw meinisin wóón fénúfan. Sia tongeni álleani usun ena ápilúkúlúk lón án Sekaraia ei lángipwi mwirin.

14, 15. (a) Met Sekaraia a kúna lón an we efisuen lángipwi? (Ppii ewe oruuen sasing lepoputáán ei lesen.) (b) Ié ewe fefin lón ewe pasikit? Pwata ewe chónláng a éppúngaaló ewe pasikit?

¹⁴ Mwirin án Sekaraia kúna ewe taropwe mi áás, emén chónláng a ereni: “Kopwe netä.” Iwe, Sekaraia a kúna eú pasikit. (Álleani Sekaraia 5:5-8.) Éppúngún ewe pasikit a ffér seni piloom. Lupwen ewe pasikit a suukutá, Sekaraia a kúna “eman fefin a mot lon.” Ewe chónláng a ereni Sekaraia pwe ewe fefin lón ewe pasikit a liosuetá “föföringau.” Anchangei rúkéén Sekaraia lupwen a kúna án ewe fefin sótun towu! Nge ewe chónláng a mwittir tisefálielong ewe fefin lón ewe pasikit me éppúngatiw ren éppúngún we mi chou. Met weween ena?

¹⁵ Ena lángipwi a alúkúlúkúkich pwe Jiowa esap mut ngeni féfféringaw an epwe nóm lein néún kewe aramas. Ika Jiowa a kúna och féffér mi ngaw, iwe epwe mwittir péútaaló. (1 Kor. 5:13) Ewe chónláng a alúkúlúkú ngenikich pwúngún ena lupwen a mwittir éppúngaaló ewe pasikit ren éppúngún we mi chou.

16. (a) Met a fis ngeni ewe pasikit? (Ppii ewe aúlúngátin sasing lepoputáán ei lesen.) (b) Ia ekkewe fefin mi wor péúkásiir ra uwealó ie ewe pasikit?

¹⁶ Mwirin, Sekaraia a kúna rúúemén fefin fán péúkásiir mi péchékkúl, usun péúkásin  éré. (Álleani Sekaraia 5:9-11.) Ekkena fefin ra unusen sókkóló seni ewe fefin mi ngaw lón ewe pasikit. Ra ekii ewe pasikitin “föföringau,” me changóló fan. Ia ra uwealó ie? Ra uwealó ngeni “ewe fanü Papilon.” Pwata ra uwealó ikena?

17, 18. (a) Pwata Papilon ina ewe leeni mi fich fán iten “föföringau”? (b) Met ka tipeppós le féri?

¹⁷ Ekkewe chón Israel lón fansoun Sekaraia we ra weweiti pwata a fich án Papilon epwe ewe leeni “föföringau” epwe nóm ie. Ra silei pwe ina eú telinimw mi ngaw mi uren féfférún sikepwach me fel mi chofona. A lamot án Sekaraia me ekkewe ekkóch chón Jus mi piin nónnóm ikena ie repwe fókkun achocho iteiten rán le ú ngeni etipetipaen fel mi chofona. Iwe, ena lángipwi a alúkúlúkú ngeniir pwe Jiowa epwe túmúnú liméchún fel mi enlet.

¹⁸ Ena lángipwi a pwal áchema ngeni ekkewe chón Jus pwe wiser ar repwe pwal túmúnú liméchún ar fel. Ese mumutá féfféringaw lein néún Kot kewe aramas. Ikenái, Jiowa a atolongakich lón an we mwicheich mi limeliméch, ikewe sia meefi an tong me túmún. Emén me emén leich a wor wisach ach sipwe álillis le túmúnú liméchún. Ese fókkun mumutá féfféringaw lein néún Jiowa kewe aramas.

19. Met weween ngenikich ikenái án Sekaraia kewe lángipwi mi amwarar?

¹⁹ Án Sekaraia awonuen me efisuen lángipwi iir éúréúr mi chou ngeni chókkewe mi féri minne mi ngaw. Jiowa esap mut ngeni féfféringaw an epwe sópwósópwóló. Kich néún chón angang, iwe a lamot ach sipwe oputa féfféringaw. Ekkena lángipwi ra pwal alúkúlúkú ngenikich pwe ika sia achocho le apwapwaai Semach we mi tong, iwe esap anúmamaúwakich nge epwe túmúnúkich me efeiéchúkich. Inaamwo ika a tongeni weires ach sipwe akkamwéchú liméchúch lón ei ótót mi ngaw, nge sia tongeni sópwéch ren án Jiowa álillis! Nge ifa usun sia tongeni lúkúlúk pwe fel mi enlet esap móróló? Atun sia feil ngeni ewe riáfféú mi lapalap, ifa usun sia tongeni silei pwe Jiowa epwe túmúnú an we mwicheich? Sipwe pwóróus wóón ekkena kapas eis lón en lesen mwirin ei.