1-3. (a) Nsaka niromile ovuhulela Zakariya, ana Izrayel ana yimelelo gani? (b) Yehova walogela nni wila nlogo naye nimwiyelele?

NIPAPI navava, muyana bagilatile mwirudduni, vina ayana eli avavihiwaga na pevo, ana makapwa ninga a mutakologwe. Esi dhipaddi dha dhilobo dhowumiha mulomo dhoonile Zakariya. (Zakariya 5:1, 7-9) Yehova wamonihele nni namavuhulela oddu dhilobo dhowumiha milomo ninga esi? Yimelelo gani yana ana Izrayel nsakanene nttile? Txini empurelamo iyo ovanene na woneyeliwa oku wana Zakariya?

² Eji epadduwile yaka ya 537 Kristu ahinabaliwa, nanda nlogo na Mulugu nali n’ohagalala. Awene ahitxedheliwa o Babilónia mwari mwa vyaka 70, mbwenye ovanene awene ahifuruliwa! Ahizuzuma sabwa eyelela mu Jeruzalemi wi avenyihedhe mparha w’omwebedhamo Yehova. Yaka modha musogorhomwa awene ahiroma mabasa a otiba  maleje a mparhaya. Nlogo nahagalala vaddiddi, nanda “onyagula wawa waniweya wolapa-wene.” (Ezdra 3:10-13) Mbwenye amwiddani afuna wakoddiha omaga mparha aninjivavi. Ana Izrayel ahiroma wundeya guru mpaka ofiyedha ottiya omagawa mparha. Ottiya odidela mabasa abo, awene aroma ozuzumela omaga numba dhawa vina olima mundda dhawa. Mabasa omaga agonela vyaka kumi na tanu na modha. Txibarene nlogo na Mulugu nanfuna wila nubutxedhiwe omwiyelela Yehova, ottiya ovitanaalela anyene. Yehova wafuna wila awene amwebedhe na murima wotene, vina noliba murima.

³ Mbwenye yaka ya 520, Yehova wahimuruma namavuhulela waye Zakariya wila obutxedhe nlogo sabwa yavuniliye o Babilónia. Johagalaliha oziwa wila nzina na Zakariya nintapulela ‘Yehova ohawubuwela.’ Masiki ana Izrayel vadduwalilani dhetene dhapama dhakosile Yehova, iyene kadduwalile. (Kengesa Zakariya 1:3, 4.) Yehova wahiloga wila agahakamihedha ovenyihedha webedha webaribari. Masiki dhawene wahawaddela eraga wila agarumeela webedha wawa agakosa na murima wotene. Ndowe nitanaalele woneyeliwa wotanu n’omodha, vina wotanu n’owili wana Zakariya. Ninele osunza mukalelo wapangarhazile Yehova ana Izrayel, vina mukalelo onnikamihedha dhonihedho eso ovanene.

4. Woneyeliwa w’otanu n’omodha, Zakariya woonile nni? Nipapina nalebeliwe nni dhipaddi dhobili? (Koona foto eli omaromo 1.)

⁴ Va kapitulu 5 ya nivuru na Zakariya, vanologa dhorohedha dhowumiha milomo. (Kengesa Zakariya 5:1, 2.) Zakariya wahoona nipapi nivavaga. Elapi ya nipapina ntto yali ya metru kumi, egwagwanyi matanu. Nipapina ntto nali nofuguliwene, nanda museluya walebiwe oku-noku. (Zakariya 5:3) Muselu obo waloga dha ottonga wa Yehova. Masaka a mundduni attu anziveliwa oleba epaddi modha ya nipapi. Mbwenye muselu obo walebiwe dhipaddi dhobili dha nipapi, nttile.

5, 6. Yehova onoonamo dhavi na merelo a ombava?

⁵ Kengesa Zakariya 5:3, 4. Attu ali otene anele wakula vamentoni va Yehova sabwa ya merelo awa. Ejo ebaribari makamaka wa abale ali a nlogo na Yehova sabwa bawene ankuweliwa na nzina naye. Awene anomukwela nanda anoziwa wila wiya onomutotela manyazo Yehova. (Gano 30:8, 9) Attu eena anubuwela wila wiya kayo elobo yabure ttabwattabwa akala eloboya jokoddela. Mbwenye masiki eloboya obe muttuya akaane sabwa yaderetu y’owiya, enolagiha wila muttu oniya efunelo yaye y’okosa obure enddimuwa opitta omwebedha Yehova, Nzina na Malamulo aye.

⁶ Onowubuwela wila va Zakariya 5:3, 4 vanloga wi Yehova agafugula ntowa wi “nivolowe mba mwa ambava” wi “nikalege mwenemo, nitolotxe dhetedhene: miri  na maluguyá”? N’eji, Yehova wahivuhulela mukalelo w’ottongana nlogo naye sabwa ya obure wanani. Muttu oniya masiki akala onowavitela asupayi, anddimuwa a mulogo obe amambali aye, muttuya oddo kanawodhe onvitela Yehova merelo aye. Mulugu okaana ebaribari yawi merelo etene a wiya anele ovituliwa. (Ahebreu 4:13) Ninosanzaya okala vari va attu anivilibihedha wi akose dhilobo dholigana ‘mwa dhotene’!—Ahebreu 13:18.

7. Ninarabele dhavi ntowa nilebiwe va nivuruni navava?

⁷ Muttu oniya, onomusilidhiha Yehova. Joriheya mwa iyo oziwa vina ovirihamo malamulo a Yehova a ozinddiyela obure na oderetu, vina okalawo na mukalelo ohintakaliha nzina naye. Mwa okosa ejuwene, ninorabela ottongiwa vamodha na abale ankodda omwiwelela Yehova.

8-10. (a) Koddi oddubela txini? (b) Yoddubela gani yakosile Mwene Zedekiya nanda nomala bafudha?

⁸ Va nipapini ntto navava, vahikala muselu wasisigula abale “anddubelela yovi” nzina na Mulugu. (Zakariya 5:4) Oddubela onolagiha wila eloboya elogiwe, jebaribari-wene, obe dholibela-dha sokuluveleya-wene.

⁹ Oddubela na nzina na Yehova elobo yohivegana. Ninosunzavo elobo n’ejile yampadduweli Zedekiya mwene womariha olamulela mu Jeruzalemi. Zedekiya wahiddubela na nzina na Yehova akosaga nipagano na mwene wo Babilonia. Mbwenye musogorhomwa ofudha yapikirheliye. Sabwa ya ejene, Yehova wahiddubela eraga: “Iyene oner’okwa m’Babilonia, mwilaboni ya mwene omuthomele mpaddo, vowi ofudha yapikirheliye.”—Ezekiyel 17:16.

 ¹⁰ Mwene Zedekiya waddubelile na nzina na Mulugu, nanda Yehova wajeedha wila iyene akwanihe eddubeliye. (2 Mapadduwo 36:13) Zedekiya ofudha nipikirhelo nakoseliye, baroma watamela akadda Ejipitu wila amukamihedhe ogwadda mandano na mwene w’oBabilónia. Yokubanyihaya jawi akadda Ejipitu kawodhile omukamihedha.—Ezekiyel 17:11-15, 17, 18.

11, 12. (a) Nipikirhelo gani namakamaka nikosile iyo notene? (b) Oviperheka wehu wa Yehova ompatta dhavi egumi yehu ya labo na labo?

¹¹ Ejile empadduweli Zedekiya enlagiha wila Yehova onowiwa naddubelaga. Noona wila nimuhagalalihe, ninofuniwana ovirihamo dhotene dhiddubelihu. (Masalmo 76:11) Yoddubela yamakamaka ekosile iyo ku operheka egumi yehu wa Yehova. Muttu oniviperheka wa Yehova onolagiha wi yogana yaye jokosa ofuna vina omulabela Yehova masiki epadduwe dhorutxa mwigumini mwaye.

¹² Ninawodhe dhavi ottiddelavi empikirhelihu Yehova? ‘Malabo ali otene ninogumanana magudulano orutxa obe ohirutxa. Ninolagiha oliba wa nroromelo nehu vina mandano ehu na Yehova modhela mukalelo onkwaranya iyo magudulano abo.’ (Masalmo 61:8) Motagiha ogakosile nni kowiliwa muttu mmodha womabasani obe oskola onoroma wugayela? Onele okodda dhinkosiye wila omulagihe wi weyo onimwiwelela Yehova? (Gano 23:26) Obe onakose nni ogaziwa wila munamudhini mwawo ddi weyo bahi onimulabela Yehova? Onele omukumbirha Yehova wila okamihedhe okalawo na yimelelo y’Okristu? Masiki akala oli mmasosoni obe mufuruni, onowodha omutamaalela Yehova malabo etene sabwa ya okwela na malago aye, anuvahiye? Onotamelaga mudhidhi wila omwengese Bibilia malabo etene? Dhilobo esi nipikirela okosa oroma labo nisakulilehu operheka egumi yehu wa Yehova. Nigamwiwelela ninolagiha wila ninomukwela, nili attu aye vina ninofuna okosa ofuna waye na murima wetene. Omwebedha wehu ji dila yapama ya mwigumini. Sabwa yokala attu ororomela, Yehova onivaha njedhelo nokuluveleya na musogorho.—Olibiha 10:12, 13.

13. Woneyeliwa wotanu n’omodha wa Zakariya onnisunziha nni?

¹³ Woneyeliwa wotanu n’omodha, Zakariya onikamihedha ononelamo wila akala ninomukwela Yehova, kaninafudhe nipikirhelo nehu. Nisunza vina wila masiki ana Izrayel vakosani dhottega gwé, Yehova wahikalela ntidi wakwaniha dholibela dhaye, vowi kanyanyalile nlogo naye. Iyene wannonelamo wila nlogo naye nela wawova amwiddani abale arijile. Na yotagiha yaye, Yehova ononisunziha wila japama ovirihamo dhopikirhela dhehu. Nikaane ebaribari yawi Yehova onele onikamihedha wakwaniha dhopikirheladha. Mukalelo mmodha onlabihedha Yehova wila anikamihedhe ku  onivaha njedhelo na musogorho. Mohigoneela onele ogomiha obure na opanga wotene mwilaboni. Ninele wengesa dholibela esi va woneyeliwa enfwarela.

14, 15. (a) Va woneyeliwa wotanu n’owili txini yonile Zakariya? (Koona foto eli omaromo 2.) (b) Muyana wagilatile mwirudduni, watapulela nni? Kito mungelo wafugele nni erudduyá momaguva-mwene?

¹⁴ Mmaleli Zakariya woona nivuru ninvava, mungelo walivo ologa: “Kañgana.” Venevo Zakariya ohoona elobo yina eniliwa “eruddu.” (Kengesa Zakariya 5:5-8.) Erudduyá yakuneliwa na ekunelo ya muttove. Vafuguliwani erudduya, Zakariya omoonile “muyana wagilatilemo.” Venevo mungelo omutapulela Zakariya wila “muyana oddu, ezinddiyelo ya obure.” Kobuwela mukalelo wagurumela Zakariya mmooneliye muyana oddule afunaga obudduwa! Momaguva-mwene mungelo omuttidda muyanaya, onfugela na ekunelo ya muttove. Ejiya yatapulela nni?

¹⁵ Woneyeliwa oku, onolagiha wila Yehova txipo kanattiye obure okalawovi munlogoni mwaye. Yehova agoona wila munlogoni mwaye mukala mutakali, onomburutxamo momaguva. (1 Korinto 5:13) Mungelo olagihile ejuwene mudhidhi wafugiliye erudduyá mwali muyana.

16. (a) Txini epadduwile na eruddu ejile? (Koona foto eli omaromo 3.) (b) Ayana abale ana makapwa ovadda attukulele wuvi erudduyá?

¹⁶ Novenya, Zakariya ohawoona ayana eeli ana makapwa ovadda ninga makapwa a mutakologwe. (Kengesa Zakariya 5:9-11.) Ayana aba ahittiyana vaddiddi  na muyana oddule woroma. Na makapwa awa ovadda ahiwodha otteba eruddu mwali “obure” bavavelana wolapela wene. Awene adhowilena wuvi? Adhowile ottiya ‘mwilaboni y’o Sennaár’ kuloga o Babilónia. Amuttukulelini mpaka wenewale?

17, 18. (a) Babilónia wakaleli nni ‘mburo wofwanyeela’ ottiyawo “Obure”? (b) Txini eganile weyo okosa oromana ovanene?

¹⁷ Ana Izrayel akalilewo mmasakani a Zakariya, annonelamo yakalelani yofwanyeela Babilónia okala mburo wodhowanawo “Obure” obule. Awene anziwa sabwa Babilónia wali niparha na mararuwo vina webedha wottambi. Zakariya vamodha na Ayuda akalile mu kwatti ejile, ankosa guru wila awanena vina apemberhe mapakelo a elaboya. N’eji elagiha wila Yehova wafuna wila webedha waye okale wotxena.

¹⁸ Woneyeliwa oku vina ohakamihedha ayuda woona wila anfwanyela otxeniha webedha wawa. Obure, txipo kunfuniwa vina kunarumeeliwe okala vari va nlogo na Mulugu. Ddabuno, Yehova, onikuwelela mmulogoni mwaye mwenemo munfwanyihu murenddele na nibarelo. Noona muttu-muttu wa iyo okaana gari yotxenihavi webedha oko. Obure kulogiwege nne kuwoneyege vari va nlogo na Yehova.

19. Woneyeliwa wa wumiha milomo wana Zakariya ontapulela nni mwa iyo ovanene?

¹⁹ Woneyeliwa w’otanu n’omodha vina w’otanu n’owili, wahikaana muselu woliba makamaka wa abale aziveliwana okosa obure. Mbwenye Yehova kanattiye obureya okalagawovi. Emeleli aye anowidda kakamwe obure. Woneyeliwa oku ononipangarhaza voziwa wila nigakosa guru wi nimulabele Babi wehu wokwela iyene txipo kananigwihedhe ntowa, mbwenye onele onivuna vina onibarela. Masiki egali yorutxa okala wotxenene mwilaboni ejino edhalile obure, na nikamihedho na Yehova enowodheya opemberha! Ninawodhe dhavi okaana ebaribari yawi webedha wa txibarene onele oviluwa? Nigafiya nsaka na goi enddimuwa, ninakaane dhavi ebaribari yawi Yehova onele ovuna nlogo naye? Ninele osekeserha nivuzo ntti mmutomani onfwarela.