1-3. (a) Kuchi apwile atu ja Yehova muze Zekaria aputukile mulimo wenyi wa uprofeto? (b) Mumu liaka Yehova echile atu jenyi hanga afune kuli iye?

ZEKARIA yaamusolwela yuma yili ngwe, chivungo chinahehuka mutetela, pwo unatwama muchima lia chikwachilo, ni mapwo aali anahumuka waze ali ni mapulwa ngwe a chitokola. (Zekaria 5:1, 7-9) Mumu liaka Yehova amwenesene profeta yenyi usolwelo wacho? Kuchi A-Izalele te ali ha shimbu liacho? Yika mba mutulilongesa ha usolwelo wacho?

² Mu mwaka 537, shimbu kanda Kristu eze, atu ja Yehova te kali akuwahilila. Kapwile mu undungo mu Babilonia ha miaka 70, mba haliapwila haatusulamo! Kevwile kuwaha kufuna ku Yerusaleme ni kutungulula tembele yo ni kuwayila Yehova cheka nawa. Mukwapalika mwaka umuwika, A-Izalele yasa fundamentu ya tembele. Atu yevwa kuwaha chinji, mba “akololokele ni liji linene ni zungo liacho alivwile kusuku.”  (Ezera 3:10-13) Alioze akwa-kole yanunga ni kwaakanjisa hanga eche kutunga. A-Izalele yaputuka kuhonga, chocho yecha kutunga tembele. Yasa mbunge yo kukutunga mazuwo jo ni kulima minda yo. Hanyima lia miaka yisambano, nihindu tembele ya Yehova te kanda achihwisa kuyitunga. Atu ja Zambi kafupiwile kweewulula hanga afune kuli Yehova ni kuhona kunyonga wika ha yuma ya ayo-ene. Yehova kafupile amuwayile chinji ni hamu.

³ Kashika, mu mwaka 520, Yehova yatuma profeta Zekaria hanga akwase atu, ewuluke yize achijililile mu Babilonia. Chili kushimwoka ha kunyingika ngwo jina lia Zekaria lialumbunuka, “Yehova Hewuluka.” Chipwe ngwe A-Izalele te havulama yize alingilile kuli Yehova, alioze Zambi te uchili ni kwaewuluka. (Tanga Zekaria 1:3, 4.) Yehova yalakenya kwaakwasa hanga aputuke cheka uwayilo wamwenemwene. Alioze yaatoweza ngwenyi mahasa wika kutayiza uwayilo wo nyi mamwaha yize yahiana kuwaha. Tuhengwolenu usolwelo wamu chisambano ni wamu shimbiali wa Zekaria. Mutulilongesa chize Yehova akwashile A-Izalele ni chize usolwelo uno waali muuhasa kutukwasa musono.

4. Yika amwene Zekaria mu usolwelo wamu chisambano? Mumu liaka chivungo chino achisonekene sali lieswe liali? (Tala chizulie 1 ha uputukilo.)

⁴ Kapitulu 5 wa Zekaria kakuputuka ni usolwelo walipwila. (Tanga Zekaria 5:1, 2.) Zekaria kamwene chivungo chinahehuka mutetela. Chivungo chacho chapwile ni tando 9 muusuhwe, ni tando 4.5 hautohwe. Chivundo chacho chapwile chakuvungulula, nawa kasonekeho jimwe sango. (Zekaria 5:3) Sango jacho japwile sango jilemu ja upatwilo. Ku shakulu, atu te kakusoneka chivungo sali limuwika wika. Alioze sango jino te jilemu chinji, kashika ajisonekene ha chivungo sali lieswe liali.

5, 6. Kuchi Yehova akwivwa ha mutapu weswe wa kwiya?

⁵ Tanga Zekaria 5:3, 4. Zambi makapatwila atu eswe kulita ni yitanga yo. Achi chili chamwenemwene, chipi-chipi kuli atu ja Yehova mumu kakwaavuluka mu jina lienyi. O kamuzanga, nawa kananyingika ngwo kwiya chakupihisa jina lienyi. (Yishima 30:8, 9) Atu amwe kakunyonga ngwo kwiya hi chipi ko nyi kuli chitela chize mutu aneyila. Alioze chipwe ngwe kuli chitela, nihindu mutu meya kakusolola ngwo mbunge yenyi ya chipululu yili yilemu kuhiana Yehova, jina lienyi ni shimbi Jenyi nawa.

⁶ Nwamona ngwenu Zekaria 5:3, 4, unambe ngwo upatwilo “muujila mu zuwo lia mwiji” ni kutwama “mu zuwo lienyi nikulilia lieswe,” nyi ngwami? Achi chinalumbunuka ngwo Yehova mahasa kusolola yitanga yipi hakachi ka atu jenyi ni kwaapatwila. Chipwe ngwe mutu meya ni kuswekela mapulisha, miata jenyi a mulimo, makulwana amu chikungulwila ni yisemi jenyi, nihindu  Yehova mamumona. Kulutwe Yehova masolola yitanga yenyi ya wiji. (A-Hepreu 4:13) Twakwivwa kuwaha kupwa mukachi ka atu waze akusa tachi hanga asolole umwenemwene “ku yuma yeswe”!—A-Hepreu 13:18.

7. Kuchi mutuhasa kwehuka upatwilo wa chivungo chize chinahehuka?

⁷ Kwiya cheswe chakuvwisa Yehova kupihia. Chili kuyuka chinene kunyingika shimbi ja Yehova jinatale ku yuma yipema ni yipi, ni kujikaula hanga tuchine kusawisa jina lienyi. Achi muchitukwasa twehuke upatwilo wa Yehova hali waze eswe keshi kumwononokena.

8-10. (a) Kulishinga yika chinalumbunuka? (b) Shingo lika alingile Mwanangana Zedekia?

⁸ Chikwo nawa, chivungo chize chinahehuka chapwile ni upatwilo wa waze te a “kulishinga ni mahuza” mu jina lia Zambi.” (Zekaria 5:4) Kulishinga chili kwamba amwe maliji akusolola ngwo chuma chili chamwenemwene, hanji maliji alemu akulakenya kulinga hanji kuhona kulinga chimwe chuma.

⁹ Kulishinga mu jina lia Yehova chili chikuma chilemu chinji. Twakulilongesa chino ku yuma yize yalingiwile kuli Zedekia, mwanangana wakasula kuyula mu Yerusaleme. Zedekia kalishingile mu jina lia Yehova ni kulakenya ngwenyi mazeyela mwanangana wa Babilonia. Alioze Zedekia kakafungile chilakenyo chenyi. Hachino, Yehova yamba ngwenyi, Zedekia “mu Babilonia mafwila,” kuze te ‘kwatwama mwanangana yoze wamupwishile mwanangana, yoze alelesele shingo lienyi, ni usendo uze alingile nenyi uze atangwile.’—Ezekiele 17:16.

 ¹⁰ Mwanangana Zedekia kalishingile mu jina lia Zambi, mba Zambi yashimbwila alinge yize alakenyene. (2 Sango ja Mianangana 36:13) Alioze Zedekia ya makuna chilakenyo chenyi ni kwita A-Engitu hanga amukwase kukatuka mu Babilonia. Nihindu, A-Engitu yahona kumukwasa.—Ezekiele 17:11-15, 17, 18.

11, 12. (a) Chilakenyo chika lilemu chinji chize twakulinga mu mwono wetu? (b) Kuchi twatamba kutwama kulita ni kulihana chetu?

¹¹ Yuma yalingiwile kuli Zedekia yatulongesa ngwo Yehova kakwivwa yeswe yize twakulakenya. Kashika, twatamba kufunga yilakenyo yetu mba tumuvwise kuwaha. (Samu 76:11) Chilakenyo chilemu twakulinga chili cha kulihana kuli Yehova. Hakulihana yetwene kuli Yehova, twakumulakenya ngwetu mutumulingila, kukushi mulonga chipwe ngwe mutumona yeswayo mu mwono wetu.

¹² Kuchi mutuhasa kufunga chilakenyo chetu kuli Yehova? “Matangwa eswe” twakumona yeseko yinene ni yikehe. Twakusolola ngwetu usepa wetu ni Yehova uli ukolo, hachize twakunyongonona ha yeseko yacho. (Samu 61:8) Chakutalilaho, kuchi mulinga nyi umwe ku mulimo hanji ku shikola maputuka kukutenya-tenya? Shina mumwehuka ni kusolola ngwe unazange kwononokena Yehova? (Yishima 23:26) Mba kuchi mutwamba, nyi mu usoko we yena wika mwe wakuwayila Yehova? Shina wakwita Yehova akukwase hanga ununge kupwa ni ndako ja Ukristu? Hita chuma mupalikamo, shina wakusakwilila Yehova tangwa ha tangwa ha zango ni usongwelo wenyi? Kutala wakuwana kama mashimbu a kutanga Mbimbiliya hita tangwa? Yino ye twakulakenya Yehova muze twakulihana kuli iye. Nyi mutumwononokena ni kumwaha yize yahiana kupema, mutusolola ngwetu twakumuzanga nawa tuli atu jenyi. Kumuwayila we mwono wetu. Hachino, nyi twashishika kuli Yehova, iye kanatulakenya yuma yipema kulutwe.—Shimbi Yamuchiali 10:12, 13.

13. Yika twalilongesa ha usolwelo wamu chisambano wa Zekaria?

¹³ Usolwelo wa Zekaria wamu chisambano wakutukwasa kunyingika ngwetu kutuchi kwiya hanji kumakuna yilakenyo yetu nyi chamwenemwene twakuzanga Yehova. Twalilongesa nawa ngwo chipwe ngwe A-Izalele kalingile amwe tupalia, nihindu Yehova yafunga chilakenyo chenyi, chakuhona kwehuka atu jenyi. Iye kanyingikine ngwenyi kali mu lamba linene muze A-Izalele apwile mukachi ka akwa-kole jo. Chilweza cha Yehova chinatulongesa tupwa ni kufunga yilakenyo yetu. Hachino, tuli ni shindakenyo ngwetu matukwasa hakuchilinga. Jila yimwe a kutukwashilamo yili wika yakutwaha kutalatala cha kulutwe. Kwasala hakehe mahwisa ungulungulu weswe hano hashi. Mututanga ha  kutalatala chacho mu usolwelo ukwo wa Zekaria.

14, 15. (a) Yika Zekaria amwene mu usolwelo wamu chishimbiali? (Tala chizulie 2 ha uputukilo.) (b) Pwo wapwile muchima lia chikwachilo yika analumbunuka? Mumu liaka mungelo wafukile ku chikwachilo chacho?

¹⁴ Muze te Zekaria hamona chivungo chinahehuka, mungelo yamulweza nawa ngwenyi: “Hetula meso je umone.” Mba Zekaria yamona chimwe chikwachilo apwile ni kuvuluka ngwo “efa.” (Tanga Zekaria 5:5-8.) Chikwachilo chacho chapwile ni chifukilo cha shumbu. Muze achifukwile, Zekaria yamona “pwo unatwama muchima.” Mungelo yalumbunwina Zekaria ngwenyi pwo wacho te kanalumbunuka “Ungulungulu.” Uchinyongenu ha woma uze evwile Zekaria hakumona yoze pwo kanazange kutuhuka. Alioze mungelo yamukona cheka muchima ni kufuka chikwachilo chacho ni chifuko chilemu cha shumbu. Ayi yika yinalumbunuka?

¹⁵ Usolwelo uno unatwehe ushindakenyo ngwo Yehova kechi katayiza ungulungulu mukachi ka atu jenyi. Nyi Yehova mamona yuma yipi, kawashi-washi kakuyichizamo. (1 A-Korindu 5:13) Mungelo kasolwele chino hakufuka kawashi-washi chikwachilo ni chifuko chilemu cha shumbu.

16. (a) Yika yalingiwile kuli chize chikwachilo? (Tala chizulie 3 ha uputukilo.) (b) Kulihi mapwo apwile ni mapulwa atwalile chize chikwachilo?

¹⁶ Zekaria yamona nawa mapwo aali waze apwile ni mapulwa akolo ngwe a chitokola. (Tanga Zekaria 5:9-11.) Mapwo jacho kapwile alisa chinji ni pwo wa chingulungulu yoze wapwile mu chikwachilo. Ayo ni mapulwa jo a tachi, yazundula chikwachilo muze mwapwile “Ungulungulu” ni kuchina.  Kuli atwalile pwo wacho? Katwalile chize chikwachilo “ku chifuchi cha Shinare,” che kwamba ngwo Babilonia. Mumu liaka amutwalile kukuze?

17, 18. (a) Mumu liaka Babilonia yapwile ‘chihela chalita’ cha “Ungulungulu”? (b) Yika twatamba kusa tachi hanga tulinge?

¹⁷ A-Izalele apwile ha matangwa ja Zekaria kanyingikine mumu liaka te chalita kutwala “Ungulungulu” ku chifuchi cha Babilonia. O kanyingikine ngwo chifuchi chacho chazalile ni ungulungulu wakulinga utanji ni kuwayila tuzambi amahuza. Zekaria ni A-Yunda akwo waze te atwamamo yasa tachi jinji hanga achine kwaapiangula. Kashika, usolwelo uno wahanyine shindakenyo ngwo Yehova mafunga uwayilo wenyi hanga upwe walinanga.

¹⁸ Usolwelo uno wewulwishile nawa A-Yunda ngwo no kapwile ni mulimo wakufunga uwayilo wamwenemwene. Atu ja Zambi kakatambile kulinga hanji kutayiza ungulungulu mukachi ko. Ni musono, Yehova kanatuse mu ululikiso wenyi walinanga, muze twakwivwa zango ni ufunge wenyi. Tulieswe tuli ni mulimo wakufunga uwayilo wenyi upwe walinanga. Kutwatambile kwecha ungulungulu mukachi ka atu ja Yehova.

19. Kuchi usolwelo upema amwene Zekaria muuhasa kutukwasa musono?

¹⁹ Usolwelo wamu chisambano ni wamu chishimbiali wa Zekaria uli ni utowezo ulemu kuli waze akulinga yuma yipi. Yehova kechi kwecha ungulungulu hanga ununge lume. Ni yetu tuvumbi twenyi twatamba kuvwila lwaji ungulungulu. Usolwelo uno weswe watwaha nawa shindakenyo ngwo nyi mutusa tachi hanga tuvwise kuwaha Tata yetu wa zango, iye keshi katushinga, alioze makatufunga ni kutupala chinji. Chipwe tuhu chili chikalu kupwa ni yitanga yipema muno mu chifuchi chipi, nihindu Yehova matukwasa hanga tuhase kupwa nayo. Mba kuchi mutuhasa kupwa ni shindakenyo ngwetu uwayilo wamwenemwene muununga lume? Nawa muze tunakundama ku luyinda munene, kuchi tunanyingika ngwetu Yehova mafunga ululikiso wenyi? Mutushimutwina yihula yacho mu mutwe uze muusulaho.