1-3. (a) Di tɛm we Zɛkaraya bigin in wok as prɔfɛt, wetin bin de apin to Gɔd in pipul dɛn? (b) Wetin mek Jiova tɛl in pipul dɛn fɔ tɔn bak to am?

WAN rol pepa ɔ skrol we de flay, wan uman we sidɔm insay baskit we gɛt lod, tu uman de flay ɛn dɛn fɛda tan lɛk da bɔd we dɛn kin kɔl kaw enjɛl. Dis na sɔm vishɔn dɛn we Zɛkaraya bin si. (Zɛkaraya 5:​1, 7-9) Wetin mek Jiova bin gi dɛn vishɔn dɛn ya to in prɔfɛt? Wetin bin de apin to di Izrɛlayt dɛn da tɛm de? Aw wi go bɛnifit frɔm dɛn vishɔn dɛn ya tide?

² Na bin di ia 537 bifo Krays, ɛn Jiova in pipul dɛn bin rili gladi. Dɛn bin kɛr dɛn go as slev na Babilɔn fɔ 70 ia, bɔt naw dɛn dɔn fri! Dɛn gladi fɔ go bak na Jerusɛlɛm fɔ go bil di tɛmpul bak fɔ wɔship Jiova. Wan ia afta dat, di Izrɛlayt dɛn le di fawndeshɔn fɔ di tɛmpul. Di pipul  dɛn bin gladi, ɛn “di nɔys bin so plɛnti dat . . . dɛn wan dɛn we bin de fawe sɛf yɛri di nɔys.” (Ɛzra 3:​10-13) Bɔt pipul dɛn bin de du ɔlkayn tin fɔ stɔp di bildin wok. Dis mek di Izrɛlayt dɛn at pwɛl ɛn dɛn stɔp fɔ bil di tɛmpul. So dɛn pe atɛnshɔn fɔ bil dɛn yon os dɛn ɛn fɔ mek fam. Sikstin ia afta dat, dɛn nɔ bin dɔn stil dɔn fɔ bil Jiova in tɛmpul. Nid bin de fɔ mɛmba Gɔd in pipul dɛn fɔ tɔn bak to Jiova ɛn fɔ stɔp fɔ tink bɔt dɛnsɛf nɔmɔ. Jiova want lɛ dɛn gɛt maynd ɛn wɔship am wit zil.

³ So insay di ia 520, Jiova sɛn in prɔfɛt Zɛkaraya fɔ mɛmba di pipul dɛn bɔt di rizin we mek i fri dɛn frɔm Babilɔn. I fayn fɔ no se Zɛkaraya in nem min “Jiova dɔn Mɛmba.” Pan ɔl we di Izrɛlayt dɛn dɔn fɔgɛt bɔt wetin Jiova bin dɔn du fɔ dɛn, Gɔd bin stil de mɛmba dɛn. (Rid Zɛkaraya 1:​3, 4.) Jiova prɔmis fɔ ɛp dɛn fɔ bigin wɔship am bak di rayt we. Bɔt i wɔn dɛn bak se i go gladi fɔ di we aw dɛn de wɔship am if dɛn du dɛn bɛst. Lɛ wi tɔk bɔt di siks ɛn sɛvin vishɔn we Zɛkaraya bin si. Wi go lan bɔt aw Jiova bin ɛp di Izrɛlayt dɛn ɛn aw dɛn tu vishɔn dɛn ya go ɛp wi tide.

4. Wetin Zɛkaraya si na di nɔmba siks vishɔn? Wetin mek dɛn rayt na ɔl tu di say dɛn pan di skrol? (Luk pikchɔ 1 nia dis atikul in taytul.)

⁴ Insay chapta 5, Zɛkaraya bigin wit wan vishɔn. (Rid Zɛkaraya 5:​1, 2.) Zɛkaraya bin si wan skrol de flay ɔp di skay. Dis skrol bin lɔng lɛk 9 mita (30 fit) ɛn i bin wayd lɛk 4 ɛn af mita (15 fit). Di skrol bin opin, ɛn dɛn rayt wan mɛsej pan am. (Zɛkaraya 5:​3) Na bin siriɔs jɔjmɛnt mɛsej. Trade trade, i nɔ kɔmɔn fɔ lɛ pipul dɛn rayt na di tu say dɛn pan skrol, na wan say nɔmɔ dɛn bin de rayt. Bɔt dis mɛsej bin rili impɔtant, na dat mek dɛn rayt na ɔl tu di say dɛn.

5, 6. Aw Jiova de si pɔsin we de tif?

⁵ Rid Zɛkaraya 5:​3, 4. Ɔlman gɛt fɔ ansa to Gɔd fɔ wetin i du; mɔ Jiova in pipul dɛn bikɔs dɛn gɛt in nem. Dɛn lɛk am ɛn no se tif de briŋ badnem pan am. (Prɔvabs 30:​8, 9) Sɔm pipul dɛn tink se i nɔ bad fɔ tif wans yu gɛt gud rizin fɔ du am. Bɔt ilɛk us rizin pɔsin gɛt, if i tif, dat de sho se di we aw i want ɔltin fɔ insɛf impɔtant to am pas Jiova, In nem, ɛn In lɔ.

⁶ Yu notis se insay Zɛkaraya 5:​3, 4 swɛ go “de insay di tifman in os” ɛn i go kɔntinyu fɔ “de insay di os dɔn nain go pwɛl di os kpatakpata”? So Jiova go mek ɔlman no bɔt ɛni bad tin we in pipul dɛn de du ɛn i go jɔj dɛn. Ilɛksɛf pɔsin we de tif ayd wetin i de du frɔm polis, di wan dɛn we i de wok fɔ, ɛlda dɛn, ɔ in mama ɛn papa, i nɔ go ebul ayd am frɔm  Jiova. Gɔd go mek shɔ se pipul dɛn no bɔt ɛnikayn tif we pɔsin tif. (Di Ibru Pipul Dɛn 4:​13) Wi kin rili gladi fɔ de wit pipul dɛn we de du ɔl dɛn bɛst fɔ ɔnɛs “ɔltɛm”!—Di Ibru Pipul Dɛn 13:​18.

7. Aw wi go avɔyd Jiova in jɔjmɛnt agens pipul dɛn we nɔ de obe am?

⁷ Jiova et ɛnikayn tif. Na big big ɔnɔ wi gɛt fɔ no ɛn obe wetin Jiova want we i kam to wetin rayt ɔ wetin rɔng ɛn fɔ liv wi layf di we we nɔ go briŋ badnem to am. We wi du dis wi go avɔyd Jiova in jɔjmɛnt agens pipul dɛn we nɔ de obe am.

8-10. (a) Wetin na oth? (b) Us prɔmis Zɛdikaya nɔ bin kip?

⁸ Nɛks, di skrol we de flay wɔn pipul dɛn we de yuz Gɔd in nem fɔ “lay ɛn swɛ” ɔ fɔ tek oth. (Zɛkaraya 5:​4) Oth na wɔd we pɔsin tɔk fɔ pruv se sɔntin na tru, ɔ na siriɔs prɔmis we pɔsin mek fɔ se i go du sɔntin ɔ i nɔ go du am.

⁹ Fɔ yuz Jiova in nem fɔ tek oth na siriɔs tin. Wi lan dis frɔm wetin apin to Zɛdikaya, we na di las kiŋ we rul na Jerusɛlɛm. Zɛdikaya yuz Jiova in nem fɔ tek oth se i go sɔrɛnda to di kiŋ na Babilɔn. Bɔt Zɛdikaya nɔ bin kip to in prɔmis. Dat bin mek Jiova tɛl Zɛdikaya se bikɔs i nɔ rɛspɛkt di swɛ we i bin dɔn swɛ to di kiŋ na Babilɔn “di wan we nain Kɔvinant i brok, na Babilɔn i go day.”—Izikɛl 17:​16.

 ¹⁰ Kiŋ Zɛdikaya bin yuz Gɔd in nem fɔ mek prɔmis, ɛn Jiova bin want mek i du wetin i dɔn prɔmis. (Sɛkɛn Kronikul 36:​13) Bɔt Zɛdikaya bin brok di promis we i mek ɛn i bin aks fɔ lɛ Ijipt ɛp am fɔ kɔmɔt ɔnda Babilɔn. Bɔt stil, Ijipt nɔ bin ebul fɔ ɛp am.—Izikɛl 17:​11-15, 17, 18.

11, 12. (a) Us prɔmis we impɔtant pas ɔl? (b) Aw wi layf we wi gi to Jiova fɔ afɛkt wi ɛvride?

¹¹ Frɔm wetin apin to Zɛdikaya, wi lan se Jiova de lisin to di prɔmis dɛn we wi de mek. Wi fɔ kip wi prɔmis fɔ mek Jiova gladi fɔ wi. (Sam 76:​11) Di prɔmis we impɔtant pas ɔl na di wan we wi go mek fɔ gi wi layf to Jiova. We wi gi wi layf to am, wi de prɔmis se wi go sav am ilɛk wetin apin to wi.

¹² Aw wi go kip wi prɔmis we wi dɔn mek to Jiova? “Ɛvride” wi gɛt difrɛn kayn tɛst dɛn. Wetin wi kin du we wi gɛt dɛn kayn tɛst dɛn ya go sho if wi padi biznɛs tayt wit Jiova. (Sam 61:​8) Fɔ ɛgzampul, wetin yu go du if sɔmbɔdi na yu wokples ɔ skul bigin fɔ mek lɛk se i lɛk yu? Yu go disayd nɔ fɔ pe atɛnshɔn to am ɛn sho se yu want fɔ obe Jiova? (Sam 119:​113) Ɔ wetin yu go du if na yu wangren de na yu famili we de wɔship Jiova? Yu go beg Jiova fɔ ɛp yu fɔ kɔntinyu fɔ biev lɛk Kristian? Ilɛk uskayn prɔblɛm de mit yu, yu kin tɛl Jiova tɛnki ɛvride fɔ we i lɛk yu ɛn de gayd yu? Yu de fɛn tɛm fɔ rid di Baybul ɛnide? We wi bin de gi wi layf to Jiova, wi bin prɔmis fɔ du dɛn tin dɛn de. We wi obe Jiova ɛn gi am wi bɛst, wi de sho Jiova se wi lɛk am ɛn na in gɛt wi. Di we aw wi de liv wi layf de sho di we aw wi de wɔship Gɔd. Ɛn bikɔs wi fetful to Jiova, i prɔmis wi se tin go fayn fɔ wi tumara bambay.—Ditarɔnɔmi 10:​12, 13.

13. Wetin wi go lan frɔm di nɔmba siks vishɔn we Zɛkaraya bin si?

¹³ Di nɔmba siks vishɔn we Zɛkaraya si de ɛp wi fɔ ɔndastand se if wi lɛk Jiova, wi nɔ go tif ɔ brok wi prɔmis we wi dɔn mek. Wi lan bak se pan ɔl we bɔku tɛm di Izrɛlayt dɛn bin de mek mistek, Jiova kip in prɔmis ɛn i nɔ bin kɔmɔt biɛn in pipul dɛn. I ɔndastand se tin nɔ bin izi fɔ in pipul dɛn we dɛn ɛnimi dɛn de rawnd dɛn. Jiova in ɛgzampul we i sɛt, de tich wi se wi fɔ kip to wi prɔmis. Ɛn wi shɔ se i go ɛp wi fɔ du dat. Wan we we Jiova de du dat, na bay we i gi wi op fɔ tumara bambay. I nɔ go te igen, i go mek bad tin dɛn nɔ de igen na di wɔl. Wi go rid bɔt dis op insay Zɛkaraya in nɛks vishɔn.

14, 15. (a) Wetin Zɛkaraya si insay di nɔmba sɛvin vishɔn? (Luk pikchɔ 2 nia dis atikul in taytul.) (b) Udat na di uman we bin de insay di baskɛt? Wetin mek di enjɛl lɔk di baskɛt?

¹⁴ Afta we Zɛkaraya bin si di skrol we de flay, wan enjɛl bin tɛl am fɔ “es in ed ɔp ɛn si wetin de bi.” Zɛkaraya si wan baskɛt we dɛn de kɔl ifa. (Rid Zɛkaraya 5:​5-8.) Di baskɛt bin gɛt rawnd kɔba we dɛn mek wit lɛd. We dɛn opin di baskɛt, Zɛkaraya si “wan uman sidɔm insay di baskɛt.” Di enjɛl ɛksplen to Zɛkaraya se di uman we de insay di baskɛt na “Wikɛdnɛs.” Imajin di kayn we aw Zɛkaraya go dɔn fred we i si di uman de tray fɔ kɔmɔt! Bɔt di enjɛl bin put di uman bak insay di baskɛt kwik kwik wan ɛn lɔk di baskɛt wit di ebi kɔba. Wetin dis min?

¹⁵ Dis vishɔn mek wi biliv tranga wan se Jiova nɔ go alaw in pipul dɛn fɔ kɔntinyu fɔ du ɛnikayn bad tin. If Jiova si bad tin, i go du sɔntin kwik kwik wan fɔ stɔp am. (Fɔs Lɛta Fɔ Kɔrint 5:​13) Di enjɛl sho dis we i bin lɔk di baskɛt kwik kwik wan wit di ebi kɔba.

16. (a) Wetin bin apin to di baskɛt? (Luk pikchɔ 3 nia dis atikul in taytul.) (b) Usay di uman dɛn we gɛt fɛda bin kɛr di baskɛt go?

¹⁶ Afta dat, Zɛkaraya si tu uman dɛn we gɛt strɔng fɛda lɛk wan bɔd we dɛn de kɔl kaw enjɛl. (Rid Zɛkaraya 5:​9-11.) Dɛn uman dɛn ya rili difrɛn frɔm di uman we de insay di baskɛt. Dɛn yuz dɛn fɛda dɛn we gɛt pawa fɔ es di baskɛt we “Wikɛdnɛs” de ɛn flay go  wit am. Usay dɛn kɛr am go? Dɛn kɛr di baskɛt go insay Shina, we na bin “Babilɔn.” Wetin mek dɛn kɛr am go de?

17, 18. (a) Wetin mek Babilɔn na bin di “rayt ples” fɔ “Wikɛdnɛs”? (b) Wetin yu dɔn mekɔp yu maynd fɔ du?

¹⁷ Di Izrɛlayt dɛn we bin de insay Zɛkaraya in tɛm bin ɔndastand wetin mek Babilɔn na bin di rayt ples fɔ kɛr “Wikɛdnɛs.” Dɛn bin no se da wikɛd siti de ful-ɔp wit pipul dɛn we de du mami ɛn dadi biznɛs di we aw Gɔd nɔ want ɛn dɛn de wɔship lay lay gɔd dɛn. Zɛkaraya ɛn ɔda Ju pipul dɛn we bin dɔn de de bin de tray tranga wan ɛvride fɔ lɛ dɛn nɔ put an pan ɛni tin we gɛt fɔ du wit pegan wɔship. So dis vishɔn de sho klia wan se Jiova go mek in pipul dɛn wɔship am di rayt we.

¹⁸ Di vishɔn bin mɛmba di Ju pipul dɛn bak se dɛnsɛf fɔ kɔntinyu fɔ wɔship Jiova di rayt we. Jiova nɔ go mek pipul dɛn we de du bad fɔ de ɔ alaw dɛn fɔ de wit in pipul dɛn. Tide, Jiova dɔn briŋ wi insay in klin ɔganayzeshɔn, usay i de protɛkt wi ɛn sho se i lɛk wi. Wi ɔl gɛt di wok fɔ kip am klin. Jiova in pipul dɛn nɔ fɔ de du wikɛd tin.

19. Wetin di vishɔn we Zɛkaraya bin gɛt min fɔ wi tide?

¹⁹ Zɛkaraya in nɔmba siks ɛn nɔmba sɛvin vishɔn dɛn gɛt siriɔs wɔnin fɔ dɛn wan dɛn we de du bad. Jiova nɔ go alaw wikɛd tin dɛn fɔ kɔntinyu. As in savant dɛn, wi fɔ et wikɛd tin dɛn. Dɛn vishɔn dɛn ya bin sho bak se if wi tray tranga wan fɔ du di tin dɛn we go mek wi Papa gladi, i nɔ go swɛ wi bɔt i go blɛs ɛn protɛkt wi. Pan ɔl we i nɔ go izi fɔ mek wi nɔ du bad insay dis wikɛd wɔl, Jiova go ɛp wi fɔ tinap tranga wan! Bɔt wetin go mek wi shɔ se tru wɔship go kɔntinyu fɔ de? Ɛn as di tɛm de nia fɔ mek di big trɔbul bigin, aw wi go no se Jiova go protɛkt in pipul dɛn? Wi go tɔk bɔt dɛn kwɛstyɔn dɛn ya insay di nɛks atikul.