1-3. (a) Engtik hun aṭangin nge Zakaria’n hrilh lâwkna a sawi ṭan a, Jehova mite dinhmun chu eng ang nge ni? (b) Engvângin nge Jehova’n a mite chu a hnêna kîr leh tûra a tih?

 LEHKHABU zial thlâwk, bâwm chhûnga hmeichhia, leh vacha thla ang neia boruaka thlâwk hmeichhe pahnih. Hêngte hi Zakaria inlârna hmuh phûr awm tak zînga ṭhenkhat a ni a. (Zakaria 5:1, 7-9) Engvângin nge Jehova’n hêng inlârna mak takte hi a zâwlnei a hmuhtîr? Chutih hun laia Israel mite dinhmun chu eng nge ni? Tûn laiah he inlârna hi engtin nge kan hlâwkpui theih?

² Krista pian hma kum 537-ah Jehova mite chu an hlim hle a. Babulon salah kum 70 an lo awm tawh a; mahse, tûnah chuan an zalên ta! Biak in sa ṭha leh a, Jehova be tûra Jerusalema kîr leh chu an châk hle a ni. Kum khat a liam hnuin, Israel mite chuan biak in lungphûm chu a phûm thei ta a. Mite  chu an hlim êm êm a, “ring takin an auh vak vak mai a, an thâwm chu hla tak aṭangin” a hriat theih a ni.” (Ezra 3:10-13) Mahse, biak in sak ṭhat lehna hna chu nasa taka dodâl a ni zêl a. Israel mite chu an beidawn avângin chu in sak chu an bânsan ta a. Tichuan, mahni in sakna leh huan siamna lam an ngaihsak ṭan ta a ni. A hnu kum sâwm leh parukah pawh Jehova biak in chu sak zawh a la ni lo va. Pathian mite chu Jehova hnêna kîr leh a, mahni tâna ngaihtuah lo tûra hriatnawntîr an ngai a. Jehova chuan ṭhahnemngai tak leh phûr taka amah be tûrin a duh a ni.

³ Jehova chuan a mite chu Babulon ata a chhuah zalên chhan hriattîr tûrin B.C.E. 520-ah a zâwlnei Zakaria chu a tîr a. Zakaria hming awmzia “Jehova’n A Hre Reng” tih hi ngaihven awm tak a ni. Israel mite’n an tâna Jehova thiltih chu theihnghilh mah se, Pathian chuan anni chu a hre reng a. (Zakaria 1:3, 4 chhiar rawh.) Jehova’n biakna thianghlim din ṭhat lehnaah a ṭanpui ang tih a tiam a ni. Mahse, an neih ṭha ber an pêk chauhvin an biakna a pawm ang tiin a vaukhân bawk. Tûnah, Zakaria inlârna hmuh parukna leh pasarihna chu i lo bih chiang ang u. Jehova’n Israel mite a chêttîr dân leh he inlârna pahnihin tûn laia min ṭanpui theih dân kan hria ang.

4. Zakaria chuan inlârnna paruknaah eng nge a hmuh? Engvângin nge lehkhabu zial chu phêk lehlam lehlama ziah a nih? (A thupui chunga milem 1-na en rawh.)

⁴ Zakaria bung 5-na chu inlârna danglam tak nên a inṭan a. (Zakaria 5:1, 2 chhiar rawh.) Zakaria chuan boruaka lehkhabu zial thlâwk duai duai chu a hmu a. He lehkhabu zial hi meter 9 (feet 30) vêla sei, meter 4.5 (feet 15) vêla hlai a ni. Lehkhabu zial chu inphelhsa a ni a, a lehlam lehlamah ziah khah a ni bawk. (Zakaria 5:3) Chu lehkha ziah chu rorêlna thuchah pawimawh tak a ni. Hmân laiin, mite chuan lehkhabu zial phêk lehlam chauhvah an ziak ṭhîn a. Mahse, he thuchah hi a pawimawh êm avângin a lehlam lehlama ziah a ni.

5, 6. Rûkrûkna reng reng chu Jehova’n engtin nge a ngaih?

⁵ Zakaria 5:3, 4 chhiar rawh. Mi zawng zawng chu an thiltihte avângin Pathian hmaah an la ding ang. He hi A hming putu Jehova mite tân a dik lehzual a. Anni chuan Pathian an hmangaih a, rûkrûknain Pathian hming a tihliau tih an hria a ni. (Thufingte 30:8, 9) Mi ṭhenkhatin chhan ṭha a awm chuan rûkrûk chu thil sual ni lovah an ngai mai thei a. Chhan ṭha angin lang mah se, rûkrûtu chuan a duhâmna chu Jehova, A hming, leh A dânte aia pawimawh zâwkah a dah a ni.

⁶ Zakaria 5:3, 4 chuan ânchhia chu ‘rûkru inah a lûta,’ tichuan ‘in chhûngah chuan a awm reng ang a, a tiral vek ang’ tih a sawi hi i lo chhinchhiah em? Chuvângin, Jehova chuan a mite zînga thil sual eng pawh chu hai langin a hrem thei a ni. Rûkrûtu chuan a thiltih chu police te, a hna thawhna pu te, upa te, a nih loh leh nu leh pate lakah a  thup thei a nih pawhin Jehova lakah erawh a thup thei lo. Pathian chuan eng ang rûkrûkna pawh ni se, a hai lang dâwn a ni. (Hebrai 4:13) “Engkimah” fel taka tih tum tlattute nia kan awm thei chu kan va lâwm tak êm!—Hebrai 13:18.

7. Engtin nge lehkhabu zial thlâwka chuang ânchhia chu kan pumpelh theih?

⁷ Jehova chuan rûkrûkna reng reng chu a hua a. Thil dik leh dik lo chungchânga Jehova thu bulte kan hriain, kan zawm bâkah a hming tihliau lo tûr zâwnga kan nung thei hi kan tân chawimawina a ni. Chutianga kan tih chuan a thu zâwm lotute chunga Jehova rorêlna chu kan pumpelh ang.

8-10. (a) Chhechham chu eng nge ni? (b) Lal Zedekia’n eng chhechham nge a bawhchhiat?

⁸ A dawtah, lehkhabu zial thlâwk chuan Pathian hming chhâla ‘dik lo taka chhechhamtute’ tâna vaukhânna thuchah pawh a sawi bawk a. (Zakaria 5:4) Chhechham tih chu a dikzia nemngheh nâna thusawi, a nih loh leh thil engemaw kan ti dâwn leh dâwn loh chungchânga intiamkamna a ni.

⁹ Jehova hming chhâla chhechham chu thil khûnkhan tak a ni a. Hei hi Jerusalem awptu lal hnuhnûng ber Zedekia chunga thilthleng aṭangin kan hre thei a ni. Zedekia chuan Babulon lal hnêna a inpêk tûr thu chu Jehova hming chhâlin chhia a chham a. Mahse, a thutiam chu a vawng lo. Chuvângin, Zedekia chu “lala siamtu chênna ngeiah chuan a chhechham te hmusit leha, a thuthlungte bawhchhiaa, ama hnên ngeiah Babulon-ah chuan a thi ang,” tiin Jehova’n a sawi a ni.—Ezekiela 17:16.

¹⁰ Lal Zedekia chuan Pathian hming  chhâlin chhia a chham a, Jehova chuan a chhechham anga ti tûrin a beisei a ni. (2 Chronicles 36:13) Mahse, Zedekia chuan a thutiam chu a bawhchhia a, Babulon aṭanga zalên tûrin Aigupta hnênah ṭanpuina a dîl a. Mahse, Aigupta chuan a ṭanpui thei chuang lo.—Ezekiela 17:11-15, 17, 18.

11, 12. (a) Thutiam azawngah eng thutiam nge pawimawh ber? (b) Engtin nge kan inpumpêkna chuan kan nî tin nun a nghawng ang?

¹¹ Zedekia chunga thilthleng aṭangin, Jehova chuan kan thutiamte chu a ngaithla tih kan hria a. A lâwm zâwng mi ni tûr chuan, kan thutiamte kan vawng tûr a ni. (Sâm 76:11) Kan thutiam azawnga pawimawh ber chu Jehova hnêna kan inpumpêkna hi a ni a. A hnêna kan inpumpêk hian, kan nunah eng thil pawh thleng se, a rawng kan bâwl ang tiin thu kan tiam a ni.

¹² Engtin nge Jehova hnêna kan thutiam chu kan vawn theih ang? “Ni tin” hian fiahna lian leh tê kan tâwk reng a. Chûng fiahnate kan chinfel dân aṭangin Jehova nêna kan inlaichînna a nghehzia kan lantîr a ni. (Sâm 61:8) Entîr nân, hnathawhnaah leh school-ah tuemawin a rawn chhai che a nih chuan eng nge i tih ang? Thlêmna chu dovin Jehova thu i zâwm duh tih i lantîr ang em? (Thufingte 23:26) A nih loh leh, inchhûngkuaah nangmah chauh Jehova betu ni ta la eng nge i tih ang? Kristian anga nung tûrin Jehova hnênah ṭanpuina i dîl ang em? Eng dinhmunah pawh awm mah la, Jehova hmangaihna leh a kaihhruaina avângin nî tin a chungah i lâwm ang em? Nî tin Bible chhiar nân hun i pe em? Dik tak chuan, Jehova hnêna kan inpumpêk lai khân chûngte chu titûrin kan intiam a ni. Jehova thu kan âwih a, theih tâwp kan chhuah hian, amah kan hmangaihin a ta kan ni tih kan lantîr a ni. Kan biakna hi nun kawng pakhat a ni a. Jehova chunga kan rinawm avângin, ani chuan nakin hun ṭha tak min tiam a ni.—Deuteronomy 10:12, 13.

13. Zakaria hmuh inlârna parukna aṭangin eng nge kan zir theih?

¹³ Zakaria inlârna hmuh paruknain Jehova kan hmangaih chuan thil kan rû lo vang a, kan thutiam kan bawhchhe lo vang tih hre thiam tûrin min ṭanpui a. Israel mite chuan thil sual tam tak ti mah se, Jehova’n a thutiamte chu a vawngin, a mite a kalsan ngai lo tih pawh kan hria a. Hmêlmate hual vêla an awm avângin an dinhmun chu a harsa tih a hre thiam bawk. A entawn tûr siamte hmangin, Jehova chuan kan thutiamte vawng tûrin min zirtîr a. Chutianga ti tûrin min ṭanpui ang tih kan chiang thei a ni. Jehova min ṭanpui dân kawng khat chu nakin hun atâna beiseina min pe hi a ni a. Nakin lawkah, leilung ata suahsualna zawng zawng a tibo tawh ang. Chu beiseina chungchâng chu a dawta Zakaria hmuh inlârnaah kan chhiar thei a ni.

14, 15. (a) Zakaria chuan inlârna pasarihnaah eng nge a hmuh? (A thupui chunga milem 2-na en rawh.) (b) Bâwm chhûnga hmeichhia chu tu nge ni? Engvângin nge vântirhkohvin bâwm chu a chhin leh?

¹⁴ Zakaria’n lehkhabu zial thlâwk a hmuh hnuah, vântirhkoh pakhatin: “I mit han lên chho la,” tiin a hrilh a. Tichuan, Zakaria chuan “ephah,” tia koh bâwm chu a hmu a ni. (Zakaria 5:5-8 chhiar rawh.) Chu bâwm chhîn chu suan a ni a. Bâwm chhîn hawn a nih chuan, ‘hmeichhe pakhat ṭhu,’ a hmu a. Vântirhkohvin Zakaria hnênah bâwm chhûnga hmeichhe chu ‘Suahsualna’ a ni tih a hrilh a. Zakaria’n bâwm chhûng aṭanga hmeichhe rawn chhuah tum a hmuh laia a hlau tûrzia mai chu han mitthla teh! Mahse, vântîrhkoh chuan hmeichhia chu ephah chhûngah a nem lût vat a, a chhîn suan rit tak chuan a chhîn leh ta a ni. Chu chuan eng awmzia nge an neih?

¹⁵ Jehova chuan a mite zîngah eng suahsualna mah awm a phal lo tih ring tûrin inlârnain min ṭanpui a. Jehova’n thil ṭha lo engemaw a hmuh chuan, thai bo tûrin a che nghal vat ang. (1 Korinth 5:13) Chu chu vântirhkohvin bâwm chu a chhîn rit tak maia a chhin leh vatna chuan a târ lang a ni.

16. (a) Bâwm chu engtia tih nge a nih? (A thupui chunga milem 3-na en rawh.) (b) Thla nei hmeichhiate khân bâwm chu khawiah nge an thlawhpui?

¹⁶ A dawt lehah, Zakaria chuan vacha thla anga thla chak tak nei hmeichhia pahnih a hmu a. (Zakaria 5:9-11 chhiar rawh.) He hmechhia pahnihte hi bâwm chhûnga hmeichhe sual lakah chuan an danglam hle a ni. An thla chak tak nên chuan bâwm  chhûnga awm ‘Suahsualna’ chu an chawi kânga an thlawhpui ta a ni. Khawi lamah nge an thlawhpui? Chu bâwm chu ‘Sinar ramah’ an dah a, chumi hmun chu Babulon a ni. Engvângin nge chutah chuan an thlawhpui?

17, 18. (a) Engvângin nge Babulon chu ‘Suahsualna’ awmna ‘hmun tûr reng’ a ni kan tih theih? (b) Eng nge tih i tum tlat?

¹⁷ Zakaria hun laia Israel mite chuan Babulon chu ‘Suahsualna’ awmna hmun tûr reng a nih chhan an hre thiam ngei ang. Nungchang bawlhhlawhnaa khat leh biakna dik lo khawpui a ni tih an hria a. Chumi hmuna awm Zakaria leh Juda mi dangte chuan chûng milem biate thununna chu nî tin theih tâwp chhuahin an do ngei ang. Chuvângin, Jehova chuan a biakna thianghlim chu a vawng reng ang tih he inlârna hian a nemnghet a ni.

¹⁸ Inlârna chuan Juda mite pawh an biakna thianghlim vawng reng tûrin mawhphurhna an nei tih a hriatnawntîr a. Suahsualna chu Pathian mite zîngah awm phâl a ni lo va, a awm tûr pawh a ni bawk hek lo. Tûn laiah, Jehova chuan a pâwl thianghlimah min hruai lût a, a hmangaihna leh humhimna kan dawng a ni. Chu chu vawng thianghlim reng tûrin mi mal tin hian mawhphurhna kan nei a ni. Suahsualna chu Jehova mite zîngah a awm tûr a ni lo.

19. Zakaria hmuh inlârna phûr awm takte chuan tûn laiah kan tân eng awmzia nge a neih?

¹⁹ Zakaria hmuh inlârna parukna leh pasarihna chu thil ṭha lo titute tân vaukhânna khauh tak a ni a. Jehova chuan suahsualna awm zawm zêl chu a phal lo vang. A chhiahhlawhte kan nih angin, keini pawh suahsualna kan haw tûr a ni. Hmangaihnaa khat kan Pa duhzâwng kan tih chuan, kan chungah ânchhia a lawh lo vang a, min humhimin mal min sâwm zâwk ang tih hêng inlârnate hian min rinnghehtîr a ni. He suahsualna khawvêlah hian thianghlimna vawn reng chu a harsa a; mahse, Jehova ṭanpuinain kan hlawhtling thei a ni! A nih leh, biakna dik chu a awm reng ang tih engtin nge kan chian theih? Hrehawm nasa tak kan hnaih telh telh lai hian, Jehova’n a inawpna pâwl chu a humhim ang tih engtin nge ka hriat theih? A dawta thuziakah chûng zawhnate chu kan sawiho vang.