1-3. (1) Vaavaa Sakariya aapacenryeiye oloherya, tuuvi waari mukhalelo wa achu a Yehova? (2) Ntakhara heeni Yehova aahaaveka achu awe wi emukookele?

NLIIVURU nawuupaanyiwa nivavaka, muthiyana mmoha ori mmucankani, nave athiyana eeli ekusiwe ni echeku evavaka ni makuphelo oolikana ni a napipi. Iha saari sawoona ikina sootikhiniha seiyo oonihiwe Sakariya. (Zakariya 5:1, 7-9) Ntakhara heeni Yehova aamooniha saawoona seiha sootikhiniha mulipa a miririmu awe? Tuuvi waari mukhalelo wa Aisarayeli mu elukuluku yeele? Nave nni niphure hai sawoona seiha olelo?

² Yaari eyaakha ya 537 E.E.K., nave achu a Yehova yaari oohakalala. Awo yaari mookapuroni o Papulu mu iyaakha 70, nyenya vano awo yaahitaphuliwa! Awo yaari oohakalala wi ekookele o Yerusalemu wi yaateke wanaawiili empa ya Muluku nave emulapeleke Yehova mwemmo. Eyaakha emoha ohoolo waya,  Aisarayeli yaahipaka mathipelo a empa ya Muluku. Achu yaahitepa ohakalala vancipale, nave “onyakula wa muloko w’atxhu wànatepa ovuwa ophiyerya otxiwene.” (Esdra 3:10-13) Nyenya ohiihiwa muteko wa oteka waamvira otepaka. Aisarayeli yaahikhulumuwa ophiyerya omaala oteka empa ya Muluku. Opwaha yeeyo, awo yaateteiwe mu oteka ipa saya ni olima soolya saya. Iyaakha khumi nathanu nammoha ohoolo waya, empa ya Muluku nlelo yiiha ehikwaaxiwe otekiwa. Achu a Muluku yaanachuna wuupuseryiwa wi emukookele Yehova nave ehiye wiisuupuwelela mukhataaya. Yehova aachuna wi emulapeleke mwamvai ni moolipa murima.

³ Mwawiihiiha mu eyaakha ya 520, Yehova aahimurumiha mulipa a miririmu awe Sakariya wi aakhaviherye achu wuupuwelela ntakhara heeni Yehova aawooponleiye o Papulu. Ela ti yoophwanelela woona wi nsina na Sakariya nnataphulela wi “Yehova Onnuupuserya.” Naamwi Aisarayeli yaacuwanle yeeyo Yehova aaweerenleiye, Muluku nlelo aanawuupuwela. (Mwaalakhanye Zakariya 1:3, 4.) Yehova aahaaroromeliha waakhaviherya okookiherya malapelo aweela. Nyenya owotho aahaalopola wi aahaala weemererya malapelo aya pahiru wakhala wi awo aamvaha owetha waya. Hankooni nthokororye sawoona sa neethanu nammoha ni neethanu napiili sa Sakariya. Nnahaala ohuserya mukhalelo Yehova aaceenyenreiye Aisarayeli ni mukhalelo sawoona seiya piili ineeraaya inikhaviherye olelo.

4. Tiheeni Sakariya onneiye mu yawoona ya neethanu nammoha? Ntakhara heeni nliivuru naarepiwaaya makupa oomeeli? (Moone eruku yoopacerya 1.)

⁴ Ecima 5 ya Zakariya enapacerya ni yawoona emoha yootikhiniha. (Mwaalakhanye Zakariya 5:1, 2.) Sakariya aahoona nliivuru nawuupaanyiwa nivavaka osulu. Nliivuru nlo naarino imeetru 9 sa orekama ni imeetru 4.5 wunnuwa waya. Nliivuru nlo naahikhunuliwa nave waarempwavo muchaka. (Zakariya 5:3) Owo waari muchaka woothoriha. Mu ilukuluku sakhalai, wiiliwiili achu yaarepa pahiru nikupa nimoha na nliivuru. Nyenya muchaka ole waari woochuneyaxa ophiyerya wi makupa oomeeli a nliivuru waahirepiwavo.

5, 6. Yehova onoona hai mukhalelo vyakala wa ompava?

⁵ Mwaalakhanye Zakariya 5:3, 4. Achu oothene aakhalano murici vamiithoni va Muluku ntakhara saweera saya. Ela eparipari xaxaxa wa achu a Yehova, nthowa nawi awo aniichaniwa mwa nsina nawe. Awo annamusivela nave annasuwela wi wiiya onnanyemuliha nsina nawe. (Masiposipo 30:8, 9) Achu akina anamuupuwela wi wiiya tahi woonanara wakhala wi aakhalano nthowa noophwanelela. Nyenya moohipwacha ophwanelela wa nthowa nno, muchu oniiya onooniherya wi nrima nawe ti nookhweleyaxa ompwaha Yehova, nsina Nawe, ni nlamulo Nawe.

⁶ Apwanne moowerya woona wi Zakariya 5:3, 4 onaloca wi nuulumelo naahaala ovolowa “mwitxhekoni mwa mpava ti mpava” ni ‘okhala nave onanariha sothene’? Mwawiihiiha  Yehova onanwerya wuupulula ni othoriha saweera soonanara variyari va achu awe. Naamwi muchu yoowo oniiya aweryaka ovitha yeeyo onapakeiye vamiithoni va mapilisa, asipwiya awe, atokweene a muloko, naari wa asitiithi, owo hawerya ovitha vamiithoni va Yehova. Muluku onahaala weeriha wi ompava vyakala okhale wawooneya. (Ahebri 4:13) Ninnahakalala chiryene okhala ni achu yaawo anapaka owetha waya wi ekhale awookololowa “mwa sothene”!​—Ahebri 13:18.

7. Nni nsepe hai nuulumelo na nliivuru nnavava?

⁷ Mukhalelo vyakala wa ompava onnamunanara Yehova. Ti yoocicimiheya wa hiyo osuwela ni wiiwelela malakiheryo a Yehova vooloca sa yaphaama ni yoonanara ni okhala mmukhalelo ohinuuliha muru nsina nawe. Mu weerano yeela nnahaala osepa othoriha Yehova onahaaleiye oweerela achu yaawo ahinamwiiwelela.

8-10. (1) Olipela tiheeni? (2) Olipela taani Mwene Setekiya aananarinheiye?

⁸ Voocharela, nliivuru naavava naahikhalano muchaka wa waalopola yaale “analipela yothaka” mu nsina na Muluku. (Zakariya 5:4) Olipela ari masu anooniherya wi yeeyo nnalocaahu ti yeeparipari, naari yoororomeliha etokweene ya weera echu naari ohipaka echu yammoori.

⁹ Olipela mwa nsina na Yehova mwaha mutokotoko. Ninnahuserya yeela orweela mwa yeeyo yeeren’ye ni Setekiya, mwene ookuchula aalamulela o Yerusalemu. Setekiya aahilipela mwa nsina na Yehova wi aahaala omwiiwelela mwene o Papulu. Nyenya Setekiya haakhwanihenrye nroromeliho nawe. Wa nthowa na yeela, Yehova aahiloca wi Setekiya aahaala ‘okhwa o Babilóniya, elapo ya  mwene àmukirathin’he v’ehitxeni y’omwene. Txhiri owo ànyemula olipela ni ànanariha watàna ni mwene o Babilóniya.’—Ezekiyeli 17:16.

¹⁰ Mwene Setekiya aahilipela mwa nsina na Yehova, nave Yehova aaweherya wi owo akhwaaniherye olipela wawe. (2 Matharihelo 36:13) Nyenya Setekiya aahinanariha yoororomeliha awe nave aahimveka mwene o Yikuputu wi amoopole o Papulu. Naamwi hiiha, mwene o Yikuputu haamukhavihenrye.​—Ezekiyeli 17:11-15, 17, 18.

11, 12. (1) Yoororomeliha taani yookhweleyaxa nnahaalaahu opaka? (2) Wiiveleela wahu onaphwanela ovolowela hai okumi ahu wa nihiku ti nihiku?

¹¹ Orweela wa yeeyo yeeren’ye ni Setekiya, ninnahuserya wi Yehova onnawiriyana soororomeliha nnapakaahu. Wi nimuhakalalihe nnaphwanela okhwaaniherya soororomeliha sahu. (Salumu 76:12) Yoororomeliha yookhweleyaxa nnaphwanelaahu opaka ori wiiveleela wahu wa Yehova. Vaavaa nniivelelaahu wa yoowo, nnapaka yoororomeliha wi nnahaala omurumeela moohipwacha yeeyo enahaala weereya muukumini mwahu.

¹² Nni nikhwaaniherye hai yoororomeliha ahu wa Yehova? “Mahiku othene” ninnakhalano saweeha ikhaani naari itokotoko. Ninnooniherya ophiyerya mweeryo taani onthamwene ahu ni Yehova oryaaya woolipa moorweela wa mukhalelo nnahoolelaahu saweeha seiyo. (Salumu 61:9) Ntoko yootakiherya, tiheeni munahaalaanyu weera wakhala wi muchu oomutekoni naari osikola oopacerya owooseelelaani? Apwanne munahaala okhooca ni wooniherya wi munachuna omwiiwelela Yehova? (Masiposipo 23:26) Naari hanka wakhala veemusini muri meekhinyu munamulapela Yehova? Apwanne munnavekela wa Yehova wi ookhaviheryeeni otitelela weeca mmukhalelo Weekristu? Moohipwacha mukhalelo taani muryaanyu, apwanne munnamuthamalela Yehova mahiku oothene ntakhara osivela ni ohoolela wawe? Apwanne munniilipixerya omwaalakhanya Piipiliya mahiku oothene? Naahaala oloca wi naahiroromeliha opaka ichu seiha vaavaa niiveleenlaahu wa Yehova. Vaavaa nnamwiiwelelaahu ni omvaha owetha wahu, ninnamooniherya Yehova wi ninnamusivela nave wi na awawe. Malapelo ahu etila ya okumi. Nave woona wi nri oororomeleya wa Yehova, owo onnaniroromeliha omwaahiyu woohakalaliha.​—Malamulo 10:12, 13.

13. Tiheeni nnahuseryaahu orweela wa yawoona yaneethanu nammoha ya Sakariya?

¹³ Yawoona yaneethanu nammoha ya Sakariya ennanikhaviherya wiiwexexa wi wakhala wi ninnamusivela Yehova, hinni niiyeke naari ohikhwaaniherya soororomeliha sahu. Noohuseryatho wi naamwi Aisarayeli yaanahesa ikwaha sincipale, Yehova aahikhwaaniherya yoororomeliha awe nave haahin’ye nloko nawe. Owo aahiiwexexa wi vaya yaari mmukhalelo woovila woona wi yaarukureryiwe ni amwiicani. Moorweela wa yootakiherya awe, Yehova onnanihusiha wi nnaphwanela okhwaaniherya yoororomeliha ahu. Nave ninnaroromela wi owo onahaala onikhaviherya  weerano hiiha. Mukhalelo mmoha Yehova onanikhaviheryeiye ori onivaha ewehereryo ya omwaahiyu. Moohilekela, owo onahaala omaliha ootakhala woothene veelaponi yavathi. Nnanwerya waalakhanya vooloca sa ewehereryo yeela mu yawoona yoocharela ya Sakariya.

14, 15. (1) Tiheeni Sakariya onneiye mu yawoona awe yaneethanu napiili? (Moone eruku yoopacerya 2.) (2) Muthiyana ole aari mmucankani aari taani? Ntakhara heeni munkeelo aaciyela mucanka?

¹⁴ Sakariya amanle woona nliivuru nenlo naavava, munkeelo mmoha aahimuleela ariki: “Weha!” Evinyaka Sakariya aahoona mucanka. (Mwaalakhanye Zakariya 5:5-8.) Mucanka owo waahikhalano eciyelo yoorukurerya yaapakiwe ni muthipo. Vaavaa mucanka waakhunuliwaaya, Sakariya aahimoona “muthiyana mmoha.” Munkeelo aahimuleela Sakariya wi muthiyana ole aari mmucankani waari “otakhala.” Nkaanyiheryani mukhalelo Sakariya aatikhinneiye vaavaa aamoonneiye muthiyana ole eereryaka okhumamo! Nyenya munkeelo mwawaakuveya aahimunyapareryamo muthiyana ole mmucankani nave aahiciyela mucanka ni eciyelo aya yoolimela ya muthipo. Tiheeni ela enataphulelaaya?

¹⁵ Yawoona ela ennanivaha nroromelo wi Yehova hani eemererye mukhalelo vyakala woonanara variyari va achu awe? Wakhala wi Yehova ohoona echu vyakala yoonanara, owo onahaala weeravo echu mwawaakuveya wi aviihevo. (1 Korinto 5:13) Munkeelo aahooniherya yeela vaavaa aaciyenleiye mwawaakuveya mucanka ole ni eciyelo yoolimela ya muthipo.

16. (1) Tiheeni yeeren’ye ni mucanka? (Moone eruku yoopacerya 3.) (2) Ti woowi yaakerinhaayawo mucanka?

 ¹⁶ Voocharela, Sakariya aahiwoona athiyana eeli yaawo yaarino makuphelo akuru ntoko a napipi. (Mwaalakhanye Zakariya 5:9-11.) Athiyana ale yaari oohiyana ni muthiyana ole aari mmucankani. Ni makuphelo aya akuru, awo yaakusa mucanka ole waarimo “otakhala” nave yaahivavano. Ti woowi awo yaakerinhaayawo? Awo yaakeriha mucanka ole “o Babilóniya.” Ntakhara heeni yaakerinhaaya weiwo?

17, 18. (1) Ntakhara heeni o Papulu waaryaaya “nipuro noophwanelela” na “otakhala”? (2) Tiheeni nyuwaano mulakelenlaanyu weera?

¹⁷ Aisarayeli yaawo yaakhanle mmahiku a Sakariya yaahiiwexexa ntakhara heeni o Papulu waaryaaya woophwanelela okerihiwawo “otakhala.” Awo yaahisuwela wi eyo yaari elapo yeeyo yaasaren’ye ni ocapaheya ni malapelo atheru. Sakariya ni akina yaawo yaakhala weiwo yaaneererya mahiku oothene osepa ovoloweliwa ni mukhalelo ole woonanara. Mwawiihiiha yawoona ele yaahaaroromeliha wi Yehova aahaala weeliha malapelo awe.

¹⁸ Yawoona ela yaahiwuupuxerya Ayuta wi awotho yaahikhalano murici wa weeliha malapelo aya. Onanara honachuneya nave honeemereryiwa variyari va achu a Muluku. Olelo, Yehova oonivoliiha mmarehereryo awe aweela, mummo nnoonaahu osivela wawe ni okhala ookhapeleleya. Mmoha ti mmoha a hiyo ookhalano murici wa okhaviherya weeliha marehereryo yaala. Otakhala honaphwanela okhala variyari va achu a Yehova.

19. Sawoona sootikhiniha sa Sakariya inataphulela eheeni wa hiyaano olelo?

¹⁹ Sawoona sa neethanu nammoha ni neethanu napiili sa Sakariya soolopola sawoopiha wa yaale aneera soonanara. Yehova hani eemererye wi otakhala otitelele. Ntoko arummwa awe, nnaphwanela wiica sootakhala. Sawoona seihatho sinnaniroromeliha wi wakhala wi ninnawetha wi nimucicimihe Tiithiihu oosivela, owo hani anuulumele, nyenya onahaala onikhapelela ni onireeliha. Naamwi okhalaka woovila otitelela okhala aweela mu elapo yeela yoonanara, nnikhaviheryo na Yehova nnanwerya okhumelela phaama! Nyenya nni nroromele hai wi malapelo eeparipari anahaala okophola? Nave vaavaa nnaacamelaahu mu ekoi etokotoko, nnasuwela hai wi Yehova onahaala okhapelela marehereryo awe? Nahaala othokororya nikoho nenla mmwaha onacharela.