1-3. (a) Te akamataanga ta Zekaria totou, eaa te turanga o te iti tangata o Iehova? (e) Eaa ra a Iehova i pati ei i tona iti tangata kia oki kiaia?

E POKAIKAI tuatua te rere ra, e vaine i roto i te āriki, e tetai nga vaine e peau to raua mei te kotuku te rere ra na roto i te mareva. Ko teia tetai au orama umere ta Zekaria i kite. (Zekaria 5:1, 7-9) Eaa ra a Iehova i oronga ai i teia au orama umere ki tana peroveta? Eaa te turanga o te ngati Iseraela i tera tuatau? E akapeea tatou e puapinga ai mei teia au orama i teia tuatau?

² I te mataiti 537 i mua ake ia Karaiti, kua rekareka maata te iti tangata o Iehova. Kua tuikaa ratou i Babulonia no tetai 70 mataiti, inara i teianei kua akarangatiraia ratou! Rekareka ratou i te oki ki Ierusalema i te akatu i te iero e te akamori ia Iehova. E tai mataiti i muri mai, kua akanoo ratou i te tango o te iero. Mataora tikai ratou, e “e maeva maata oki to te tangata, e kua tae rava te maorooro ki te mamao ke.”  (Ezera 3:10-13) Inara kua ketaketa ua atu te patoianga i te angaanga patu. Kua taitaia te ngati Iseraela e kua akamutu i te patu i te iero. Kua akamou ua ratou i te patu i to ratou uaorai are e te tanu i ta ratou aua kai. E 16 mataiti i muri mai, kare i oti ake te iero o Iehova. Kua anoanoia kia akamaara te iti tangata o te Atua kia oki kia Iehova e te akamutu i te akamanako ua ia ratou uaorai. Inangaro a Iehova ia ratou kia akamori iaia ma te maroiroi e te ngakau toa.

³ No reira i te mataiti 520, kua tono a Iehova i tana peroveta ko Zekaria kia tauturu i te iti tangata kia akamaara i te tumu i akaora mai ei Aia i te iti tangata mei Babulonia. E mea umere te aiteanga o te ingoa o Zekaria “Kua Maara ia Iehova.” Noatu kua ngaropoina te ngati Iseraela i ta Iehova i rave no ratou, kua maara rai te Atua ia ratou. (E tatau ia Zekaria 1:3, 4.) Taputou a Iehova i te tauturu ia ratou kia akatupu akaou i te akamorianga mou. Inara akamatakite katoa aia e ka āriki anake aia i ta ratou akamorianga me oronga i ta ratou ka rauka. Ka akara matatio ana tatou i te ono e te itu orama a Zekaria. Ka apii tatou akapeea a Iehova te akamaroiroi anga i te ngati Iseraela e akapeea teia nga orama me tauturu ia tatou i teia tuatau.

4. Eaa ta Zekaria i kite i roto i te ono orama? Eaa te tumu i tataia ai nga tua e rua o te pokaikai tuatua? (Akara i te tutu mua 1.)

⁴ Te akamata ra a Zekaria pene 5 ma tetai orama tuke ua ake rai. (E tatau ia Zekaria 5:1, 2.) Kite a Zekaria i tetai pokaikai tuatua, te rere ra na roto i te mareva. E 9 mita tona roa e e 4.5 mita te atea. Kua maeu ua te pokaikai, e kua tataia tetai karere ki runga. (Zekaria 5:3) E karere akavaanga puapinga to runga. I te tuatau taito, e tata ua ana te tangata e tai tua o te pokaikai. Inara e puapinga tikai teia karere, kua tataia nga tua e rua o te pokaikai.

5, 6. Eaa to Iehova manako i tetai ua atu angaanga keikeia?

⁵ E tatau ia Zekaria 5:3, 4. E apainga ta te tangata katoatoa i mua i te Atua no ta ratou i rave. E tika tikai teia no te iti tangata o Iehova, no te mea kua kapikiia ratou ma tona ingoa. Inangaro ratou iaia e kua kite e ka taakamaia tona ingoa e te angaanga keikeia. (Maseli 30:8, 9) Penei ka manako tetai pae, kare i te mea tarevake i te keia me e tumu meitaki tetai. Inara noatu eaa te tumu, ka akaari te tangata keikeia e e puapinga atu tona anoano noinoi ia Iehova, Tona ingoa, e Tana ture.

⁶ Kua kite ainei koe e te na ko ra a Zekaria 5:3, 4 “e tomo te [taumaa] ki roto i te are o te tangata keia,” e “ka vai tamou rai ki rotopu tikai i tona are, e akapou oki te reira”? No reira ka akakite e ka akava a Iehova i tetai ua atu angaanga tarevake i  rotopu i tona iti tangata. Noatu e ka uuna te tangata keia i tana e rave ra mei te au akava, te pu angaanga, te aronga pakari, me kore tona nga metua, kare e rauka i te uuna i te reira mei ia Iehova. Ka akapapu te Atua e ka akakite atea ke i tetai ua atu angaanga keikeia. (Ebera 4:13) Mataora tikai tatou i te piri atu ki tetai iti tangata tei rave i te tika “i te au mea katoa nei.”​—Ebera 13:18.

7. Akapeea tatou me kopae i te taumaa o te pokaikai tuatua e rere ra?

⁷ Tetai ua atu angaanga keikeia, ka akariri ia Iehova. E tika anga ngateitei to tatou kia kite e kia akono i ta Iehova au kaveinga no te mea tika e te tarevake, e kia akono i te tu oraanga kare e taakama i tona ingoa. Me akapera tatou, ka kopae tatou i ta Iehova akavaanga ki te aronga akarongo kore.

8-10. (a) Eaa te taputou? (e) Eaa te taputou ta te Ariki ko Zedekia i aati?

⁸ Aru mai, kua oronga te pokaikai tuatua e rere ra i te karere akamatakiteanga ki te aronga tei akatupu i te “taputou pikikaa” na roto i te ingoa o te Atua. (Zekaria 5:4) Ko te taputou, e tuatua tei akapapu e e tika tetai mea me kore e tia kia rave me kore kia kopae i tetai apinga.

⁹ Me rave i tetai taputou na roto i te ingoa o Iehova, e mea puapinga tikai. Ka kite tatou i teia mei tei tupu kia Zedekia, te ariki openga tei tutara i Ierusalema. Kua papau a Zedekia i te taputou na roto i to Iehova ingoa kia kauraro ki te ariki o Babulonia. Kare ra a Zedekia i rave ana i tana i taputou. Ko teia te tumu i karanga ai a Iehova no Zedekia “ei te ngai tikai i  nooia e te ariki, ko tei akariro iaia ei ariki ra, nana te taputou i akavaavaaia e ia ra, e nana te koreromotu i akaatikauia e ia ra, ei iaia rai ei rotopu ia Babulonia aia e mate ei.”​—Ezekiela 17:16.

¹⁰ Kua papau te Ariki ko Zedekia i te taputou na roto i te ingoa o te Atua, e kua tapapa a Iehova iaia kia rave i te reira. (2 Paraleipomeno 36:13) Inara kua aati a Zedekia i tana taputou e kua pati tauturu kia Aiphiti kia akamatara iaia mei ia Babulonia. Noatu ra, kare e rauka ia Aiphiti i te tauturu iaia.​—Ezekiela 17:11-15, 17, 18.

11, 12 (a) Eaa te taputou puapinga rava atu ta tatou ka rave? (e) Akapeea ta tatou akatapuanga me akakeu i to tatou oraanga i te au rā?

¹¹ Tei tupu kia Zedekia, ka apii tatou e te akarongo maira a Iehova i ta tatou au taputou i rave. Ei akamareka iaia, ka anoanoia kia akono i ta tatou i taputou. (Salamo 76:11) Ko te taputou puapinga roa atu ta tatou ka rave, ko te akatapuanga ia tatou kia Iehova. Me akatapu i to tatou oraanga kiaia, ka taputou tatou i te tavini iaia noatu eaa te ka tupu kia tatou.

¹² Akapeea tatou me akono i ta tatou i taputou kia Iehova? “I tera rā i tera rā,” e maata e te meangiti te au timataanga. Ka akaari tatou mei teaa te ketaketa i to tatou pirianga kia Iehova na roto i te tu me akono i teia au timataanga. (Salamo 61:8) Ei akaraanga, eaa taau ka rave me akamata tetai i te angaanga me kore i te apii i te akameamea ia koe? Ka kopae ainei koe i te reira ei akaari e ka inangaro koe i te akarongo kia Iehova? (Maseli 23:26) Akapeea ra me ko koe anake ua i roto i toou ngutuare tei akamori ia Iehova? Te pati ra koe ia Iehova no te tauturu kia akaari ua rai i te au tu Kerititiano? Noatu eaa toou turanga, ka akameitaki ainei koe ia Iehova i te au rā ravarai no tona aroa e te aratakianga? Te akanoo ra ainei koe i te taime no te tatau i te Pipiria i te au rā? Mei tera te tu, kua taputou tatou i te rave i teia au mea te akatapuanga i to tatou oraanga kia Iehova. Me akarongo kiaia e me oronga i ta tatou ka rauka, ka akaari tatou i to tatou inangaro no Iehova, e no te Atua rai tatou. Ta tatou akamorianga, e tu oraanga ia. No te mea ka vai tiratiratu tatou kia Iehova, te taputou mai nei aia i tetai oraanga mataora no tatou i te tuatau ki mua.​—Deuteronomi 10:12, 13.

13. Eaa ta tatou ka apii mei te ono orama a Zekaria?

¹³ Tauturu te ono orama a Zekaria ia tatou kia mārama e no to tatou inangaro ia Iehova, kare tatou e keia e kare e aati i ta tatou au taputou. Apii katoa tatou e noatu e maata te tarevake ta te ngati Iseraela i rave, kua akono a Iehova i tana i taputou e kare i akaruke i tona iti tangata. Kua mārama Aia e tei roto ratou i te turanga ngata no te mea kua koropiniia ratou e te au enemi. Te apii maira a Iehova na roto i tona akaraanga kia akono tatou i ta tatou i taputou. Papu ia tatou e ka tauturu  aia ia tatou kia pera. Tetai mataara te tauturu nei a Iehova ia tatou, kua oronga mai aia i te manakonakoanga no te tuatau ki mua. Kare e roa, ka akakore takiri aia i te kino i te enua nei. Ka tatau tatou i teia manakonakoanga i roto i ta Zekaria orama ka aru mai.

14, 15 (a) Eaa ta Zekaria i kite i roto i tana itu orama? (Akara i te tutu mua 2.) (e) Koai te vaine i roto i te āriki? Eaa te tumu i tapiri ei te angera i te āriki?

¹⁴ Muri ake te kite anga a Zekaria i te pokaikai tuatua e rere ra, akakite te angera kiaia: “Ka nānā ana i to mata.” Kite akera a Zekaria i tetai āriki tei kapikiia “e epha.” (E tatau ia Zekaria 5:5-8.) E tapoki punupunu to te reira tei maaniia ki te toka tapou. I te kiriti anga te tapoki, kua kite a Zekaria i “tetai vaine te noo ra ki roto.” Akamārama te angera kiaia no runga i te vaine i roto i te āriki e, “Ko te kino teia.” Tamanako ana i to Zekaria mataku te kite anga i teia vaine te tauta anga i te aere mai ki vao! Inara kua uri atu te angera i te vaine ki roto i te āriki epha, e kua tapiri akera i te tapoki teiaa ki runga i te reira. Eaa tona aiteanga?

¹⁵ Te oronga maira te orama i te akapapu anga e kare a Iehova e akatika i tetai ua atu kino i rotopu i tona iti tangata. Me kite a Iehova i tetai mea kino, ka viviki aia i te akaatea i te reira. (1 Korinetia 5:13) Kua akaari te angera i teia i te tapiri viviki anga i te tapoki teiaa ki runga i te āriki.

16. (a) Eaa tei tupu ki te āriki? (Akara i te tutu mua 3.) (e) Kua apai te nga vaine e peau to raua i te āriki kiea?

¹⁶ Aru mai, kua kite a Zekaria e rua vaine  e peau to raua mei te peau o te kotuku. (E tatau ia Zekaria 5:9-11.) E tuke takiri teia nga vaine ki te vaine kino i roto i te āriki. Ma to raua peau ririnui, maranga akera ia raua te āriki epha ra ko te “kino” to roto, e kua rere na roto i te mareva. Kua apai raua i te reira kiea? Apai raua i te āriki “ki te enua ra ki Sinara,” koia oki ko Babulonia. Eaa te tumu i apai ei raua i te vaine ki reira?

17, 18 (a) Eaa te tumu ko Babulonia te ngai tau kia apai i “te kino”? (e) Eaa taau ka tauta i te rave?

¹⁷ Kua mārama te ngati Iseraela i to Zekaria tuatau i te tumu ko Babulonia te ngai tau kia apai i te “kino.” Kua kite ratou e e oire kino te reira tei ki i te ainga tau kore e te akamorianga pikikaa. Kua tauta pakari a Zekaria e te ngati Iuda tei noo ki reira i te patoi atu i te au akakeu anga etene i te au rā katoa. No reira kua akapapu teia orama e ka akono a Iehova i tana akamorianga mā.

¹⁸ Akamaara katoa te orama i te ngati Iuda e e apainga ta ratou kia akono i te akamorianga mā. Kare te kino e akatikaia i rotopu i te iti tangata o te Atua. I teia rā, kua akaputuputu mai a Iehova ia tatou ki roto i tana akaaerenga mā, i te ngai i kite ei tatou i tona aroa e te paruru anga. E apainga ta tatou tataki tai kia tauturu kia vai mā ua te reira. Auraka te kino e tupu i rotopu i te iti tangata o Iehova.

19. Eaa te aiteanga o ta Zekaria au orama umere no tatou i teia tuatau?

¹⁹ E akamatakite anga pakari te ono e te itu orama a Zekaria no te aronga rave kino. Kare a Iehova e akatika i te kino kia tupu ua atu. Ei au tavini nona, kia rikarika tatou i te kino. Akapapu katoa teia orama e me tauta i te akamareka i to tatou Metua aroa, kare aia e taumaa ia tatou, mari ra ka paruru e ka akameitaki ia tatou. Noatu e ngata kia vai mā ua i roto i teia ao kino, ka autu tatou ma te tauturu a Iehova! Inara eaa tatou i papu ei ka vai ua rai te akamorianga mou? Ia tatou e vaitata ra ki te mate maata, akapeea tatou i kite ei ka paruru a Iehova i tana akaaerenga? Ka uriuri tatou i teia nga uianga i te atikara ka aru mai.