1-3. а) Ки сави ситуација сине е Девлескоро народо кеда о Захарија почминѓа те пророкујнел? б) Соске о Јехова родинѓа таро пле слуге те иранен пе лесте?

ЈЕКХ свиток летинела, џувли со бешела ки корпа, дуј џувља со летинена пхакенцар со личинена сар штркоскере пхака. Акала тане несаве таро интересна визие со дикхља о Захарија (Зах. 5:1, 7-9). Соске о Јехова денѓа акала интересна визие пле пророкоске? Ки сави ситуација сине о Израелција ко адава време? Сар шај те користинен аменге акала визие?

² Ко 537 берш а.а.е., е Јеховаскоро народо сине бут бахтало. Пало 70 берша ропство ко Вавилон, ола сине ослободиме! Ола сине бахтале со шај те иранен пе ко Ерусалим те градинен о храми хем палем те служинен е Јеховаске адари. Јекх берш пало адава, о Израелција чхивѓе о темели е храмескоро. О мануша сине добором  бут бахтале со ленгере гласија шунѓовена сине бут дур (Езра 3:10-13). Ама, сине мануша кола со са повише хем повише противинена пе сине башо градибе е храмескоро. О Израелција бут обесхрабринѓе пе хем чхинавѓе те градинен о храми. Наместо те градинен о храми, ленге уло најважно те срединен пумаре кхера хем те керен бути ко пумаре ниве. Накхле дешушов берша, а е Јеховаскоро храми панда на сине завршимо. Ваљани сине некој те сетинкерел е Девлескере народо те иранел пе ко Јехова хем те чхинавел те мислинел само песке. О Јехова мангља ола палем те служинен леске храбро хем ревносно.

³ Адалеске, ко 520 берш а.а.е., о Јехова бичхалѓа е пророко е Захарија те поможинел е народо те сетинел пе соске сине ослободимо таро Вавилон. Интересно тано адава со о анав Захарија значинела „О Јехова сетинѓа пе“. Иако о Израелција бистерѓе со керѓа о Јехова ленге, ов панда сетинела пе сине ленде. (Читин Захарија 1:3, 4.) О Јехова ветинѓа ленге кај ка поможинел лен палем те служинен леске ко исправно начин. Ама, ов исто аѓаар предупрединѓа лен кај ка прифатинел лен само ако служинена леске цело вилеа. Те дикха и шовто хем и ефтато визија е Захаријаскири. Исто аѓаар, те дикха сар о Јехова поможинѓа е Израелцонге акале дује визиенцар хем сар шај ола те поможинен аменге авдиве.

4. Со дикхља о Захарија ки пли шовто визија? Соске и порака сине пишими таро солдуј стране ко свиток? (Дикх и прво слика ко почеток тари статија.)

⁴ О 5 поглавје таро лил Захарија почминела јекхе чудно визијаја. (Читин Захарија 5:1, 2.) О Захарија дикхља јекх свиток со летинела ко воздух. Акава свиток сине дугачко скоро 9 метре хем бувло 4,5 метре. Ов сине пхравдо хем ки лесте сине јекх порака (Зах. 5:3). Адаја сине јекх сериозно порака баши осуда. Ко пурано време, о мануша обично пишинена сине само ки јекх страна таро свиток. Ама, акаја порака сине бут важно, адалеске сине пишими таро солдуј стране ко свиток.

5, 6. Сар дикхела о Јехова ко чорибе?

⁵ Читин Захарија 5:3, 4. Са о мануша тане одговорна англо Девел башо пле постапке. Акава посебно важинела е Девлескере слугенге, соске ола пхиравена лескоро анав. Ола мангена ле хем џанена кај о чорибе анела лаџ лескере анавеске (Изр. 30:8, 9). Несаве мануша мислинена кај нане погрешно те чорен ако иси лен шукар причина. Ама, бизи разлика тари сави причина некој чорела, ов сикавела кај леске тани поважно лескири алчно желба, а на о Јехова, Лескоро анав хем Лескоро закони.

⁶ Дали приметинѓан кај ко Захарија 5:3, 4 пишинела кај и арман ка „кхувел ко кхер е чорескоро“ хем кај  „ка ачховел ко лескоро кхер хем ка уништинел ле“? Адава значинела кај о Јехова шај те откринел хем те осудинел секас со постапинела погрешно машкар лескоро народо. Чак ако некој со чорела шај те гаравел адава тари полиција, таро газда ки бути, таро старешине или таро родителија, нашти те гаравел таро Јехова. О Девел ка керел секова чорибе те овел откримо (Евр. 4:13). Амен уживинаја те ова машкаро мануша кола со трудинена пе те овен чесна ко са! (Евр. 13:18).

7. Сар шај те избегина и „арман“ таро свиток со летинела?

⁷ О Јехова мрзинела о чорибе. Аменге тано чест те живина спрема е Јеховаскере мерилија башо адава сој исправно а сој погрешно хем те пазина те на кера ништо со ка анел лаџ е Девлескере анавеске. Ако кераја аѓаар ка избегина и „арман“ или и осуда со ка анел ла о Јехова упро окола со на шунена ле.

8-10. а) Сој тани и заклетва? б) Сави заклетва пхагља о Седекија?

⁸ О свиток со летинела ингарела јекх предупредување околенге со дена „ховавни заклетва“ е Девлеске ко анав (Зах. 5:4). Заклетва тано кеда некој дела совли те шај те сикавел кај адава со вакерела тано чаче, или кај ка керел или нане те керел несави бути.

⁹ Те дел пе заклетва ко е Јеховаскоро анав тани бут сериозно бути. Асавки заклетва денѓа о Седекија, о последно цари со владинѓа ко Ерусалим.  Ов денѓа заклетва ко е Јеховаскоро анав кај ка овел послушно е цареске таро Вавилон. Ама, о Седекија на икерѓа пе ки пли заклетва хем пхагља о сојуз со керѓа ле е вавилонско цареа. Адалеске, о Јехова вакерѓа кај о Седекија ка мерел ко Вавилон (Езек. 17:16).

¹⁰ О Јехова аџикерѓа о Седекија те икерел пе ки заклетва со денѓа ла ко лескоро анав (2. Лет. 36:13). Наместо адава, о Седекија пхагља пли заклетва хем родинѓа таро Египет те поможинел леске те ослободинел пе таро Вавилон. Ама, о Египет нашти сине те керел адава (Езек. 17:11-15, 17, 18).

11, 12. а) Кова тано о најважно ветување со даја ле? б) Сар шај секова диве те живина спрема о завет со денѓем ле е Јеховаске?

¹¹ Таро адава со случинѓа пе е Седекијаске сикљоваја кај о Јехова шунела о ветувања со даја лен. Ако мангаја те кера лескири волја, ваљани те кера адава со ветинаја (Пс. 76:11). О најважно ветување со шај те да ле тано амаро завет кај ка служина леске засекогаш, бизи разлика со ка случинел пе аменге ко живото.

¹² Сар шај те икера амаро ветување со денѓем е Јеховаске? „Таро диве ко диве“ аракхљоваја ко баре или тикне испитија. О начин сар реагиринаја ко акала испитија сикавела кобор тано зорало амаро амалипе е Јеховаја (Пс. 61:8). На пример, со ка кере ако некој ки бути или ки школа почминела те флертујнел туја? Дали ка авел туке шукар асавко внимание или ка одбине ле хем ка сикаве кај мангеа те шуне е Јехова? (Изр. 23:26). Или со ако само ту тари тли фамилија служинеа е Јеховаске? Дали молинеа е Јехова те поможинел тут понадари да те постапине сар со мангела ов? Бизи разлика ки сави ситуација сиан, дали секова диве сиан благодарно е Јеховаске башо лескоро мангипе хем водство? Дали секова диве одвојнеа туке време те читине и Библија? Ко несаво начин, акава тано дело таро амаро завет со денѓем ле е Јеховаске. Кеда шунаја е Девле хем даја ле амаро најшукар, сикаваја кај мангаја ле хем кај сием лескере слуге. Те обожавина е Јехова тано амаро начин сар живинаја. Адалеске со сием верна е Јеховаске ов ветинела аменге бут шужи иднина (5. Мој. 10:12, 13).

13. Со шај те сикљова тари шовто визија со дикхља о Захарија?

¹³ И шовто визија таро Захарија поможинела амен те хаљова кај ако мангаја е Јехова, нане те чора хем ка икера амен ко адава со ветинѓем. Исто аѓаар, сикљоваја кај иако о Израелција керѓе бут грешке, о Јехова ачхило ко пло лафи хем на мукхља пле народо. Ов халило кај ола сине ки пхари ситуација соске живинѓе машкар о душмања. О Јехова денѓа аменге пример кај ваљани те исполнина амаре ветувања. Шај те ова сигурна кај ов ка поможинел аменге те кера адава. Јекх начин сар поможинела  аменге тано адава со дела амен надеж баши иднина. Панда хари, ов ка чхивел крајо са е лошнипаске ки Пхув. Акаја надеж тани истакними ки јавер визија со дикхља о Захарија.

14, 15. а) Со дикхља о Захарија ки ефтато визија? (Дикх и дујто слика ко почеток тари статија.) б) Кој сине и џувли со бешела сине андре ки корпа хем соске о ангели пханља и корпа?

¹⁴ Откеда о Захарија дикхља о свиток со летинела, јекх ангели вакерѓа леске: „Дикх упре“. Тегани о Захарија дикхља јекх корпа со викинела пе „ефа“. (Читин Захарија 5:5-8.) Ла сине ла округло капако кердо таро олово. Кеда о капако пхравдило, о Захарија дикхља кај андре ки лате бешела сине јекх џувли. О ангели објаснинѓа е Захаријаске кај и џувли ки корпа тани о „Лошнипе“. Замислин туке кобор дарандило о Захарија кеда дикхља кај и џувли мангља те икљол тари корпа! Ама, о ангели сигате гуринѓа е џувља андре ки корпа хем пханља и корпа е пхаре капакоја таро олово. Со значинела акава?

¹⁵ Акаја визија уверинела амен кај о Јехова нане те мукхел те керел пе лошнипе машкар е Девлескоро народо. Ако о Јехова дикхела нешто лошно, ов сигате ка цидел ле (1. Кор. 5:13). О ангели сикавѓа акава адалеа со сигате пханља и корпа е пхаре капакоја таро олово.

16. а) Со уло е корпаја? (Дикх и трито слика ко почеток тари статија.) б) Коте ингарѓе и корпа о џувља е пхакенцар?

¹⁶ Пало адава о Захарија дикхља дуј џувља со сине лен зорале пхака сар штркоскере пхака. (Читин Захарија  5:9-11.) Акала џувља сине бут појавер тари лошно џувли со сине ки корпа. Ола але, ваздинѓе и корпа е „Лошнипаја“ хем летинѓе. Коте ингарѓе и корпа? „Ки пхув Сенар“, или ко Вавилон. Соске ингарѓе ла адари?

17, 18. а) Соске о Вавилон сине тхан со одговоринела башо „Лошнипе“? б) Со сиан одлучно те кере?

¹⁷ Ко време е Захаријаскоро е Израелцонге сине локхо те хаљовен соске о „Лошнипе“ сине ингардо ко Вавилон. Ола џанена сине кај адаја лошно диз тани пхерди неморал хем идолопоклонство. О Захарија хем о јавера Евреија со живинена сине адари секова диве боринена пе сине против о паганско влијание. Адалеске, акаја визија сине гаранција кај о Јехова нане те дозволинел и чачутни религија те мељарѓовел.

¹⁸ И визија исто аѓаар сетинкерѓа е Евреен кај лен да иси лен одговорност те ачховен духовно чиста. Е Девлескере слуге на смејнена хем нане те мукхен те овел лошнипе машкар ленде. О Јехова анѓа амен ки лескири чисто организација, коте со осетинаја лескоро мангипе хем заштита. Секова јекх амендар иси ле одговорност те поможинел ој те ачховел чисто. Машкар е Девлескоро народо нане тхан башо лошнипе.

19. Со значинена аменге авдиве о визие со дикхља о Захарија?

¹⁹ И шовто хем и ефтато визија со дикхља о Захарија тане сериозно предупредување околенге со керена лошна буќа. О Јехова нане те мукхел о лошнипе те постојнел засекогаш. Амен ваљани те мрзина о лошнипе соске сием лескере слуге. Акала визие исто аѓаар уверинена амен кај ако трудинаја амен те кера амаре Дадескири волја, ов ка заштитинел амен хем ка дел амен берекетија. Иако нане локхо те ачхова чиста ко акава лошно свето, шај те успејна ко адава соске поможинела амен о Јехова! Ама, сар шај те ова сигурна кај и чачутни религија ка ачховел? Котар џанаја кај о Јехова ка заштитинел пли организација ки бари неволја? Башо акала пучиба ка кера лафи ки статија со авела.