1, 2. Rosai snonkaku Yahudi ḇero Yerusalem sismana rofyor Zakharia myam fasasna ḇeḇefik ḇyeja?

ZAKHARIA nari kyara roi nabor kaku rofyor myam kwar fasasna ḇeḇefikya. Ine nafrur fa iryaḇ syadiwer snaro Yahwe ḇyeasas nari ḇyuk samamyai faro snonkaku ḇeankarkar sya. Ḇape, snonkaku ḇero ris ḇyedi sifadwer kenem sena ḇaim. Sino sisya sifrur roi ḇeḇarḇor ma sankarkar. Ramnai, ḇaḇebawes bait ro Yerusalem yakako namnai ḇaim. Rosai ḇefnai fa snonkaku Yahudi sisusu fasaw ma sifrur fararur Yahwe ḇyuk ḇe si werḇa? Imbude sibur ḇe Yerusalem insama sisewar fandandun mankun sena monda ke?

² Zakharia ifawi snonkaku Yahudi ḇekaḇer ḇe Yerusalem sima sisyom Yahwe I. Snonkaku sine ”Allah ḇekaku idif sne sena kwar fa siryaḇ”, inja sibur rum sena ma fararur sena ro Babilon. (Ezra 1:2, 3, 5) Sibur rum sena fa sra ḇe  moḇ sifawi ma smam ḇaimna. Faro snonkaku Yahudi sya, fararur ḇaḇebawes Yahwe bait Ḇyedi ima ḇyefandun kaku, inja simarisen simbran ḇinkwan kaku fanam ḇe kilometer ri 1.600 ro nyan ḇesamswen ma ḇeḇekaruina.

3, 4. Roi ḇedwarek rosai monda snonkaku Yahudi ḇebur ḇe Yerusalem sismana?

³ Kokarapan marandan ḇeḇinkwan ro Babilon ḇe Yerusalem. Snonkaku Yahudi sya sna oras nabor fa skara ma sawos kuker moḇ imbe sra roya. Snonkaku ḇeḇesinan kwar sya sifawar kuker padakduk ro Yerusalem ma bait ḇero dianya. (Ezra 3:12) Kosya kuker si ro marandan ani ido, na rariso sneḇaḇir koḇena rofyor komam randak Yerusalem? Rofyor komam bait ḇekerker ani aḇris nasuf wafwef i ma epenbam ḇyena nambros ra farmkirmkir ido, na koḇesneso ke? Sikara tembok ani imnis kuker tembok Babilon ḇenako ani. Ḇape, roi smamna iḇese raryano siryaḇ pdef. Rosai ḇefnai ya? Snaro, Yahwe ifnoḇek ma kyadaunwarek si ro marandan ḇeḇinkwan sena. Rofyor sisya kwar ro Yerusalem, sifrur rokef farsarser ro moḇ sbawes randak bait ani ma ro ras ḇe ras sfarser farsarser ḇe Yahwe I. (Ezra 3:1, 2) Siryaḇ kaku ma sifasos ḇeri fa sifararur. Inja, fararur ani nari namnai fasaw.

⁴ Rofyor ḇaḇebawes bait ani, snonkaku ansine fandun fa sbawes mnu ani ma rum sena. Si kako sifrur yaf fa sikaker insama sisma roḇean faro kina sesya. (Ezra 2:70) Fararur nabor nasya fandun fa sifrurna. Osower ido, ro swaf sfararur ya, mbroḇ sesya srama imbe sidwarek fararur sena. Sisma roi ḇedwarek taun ri 15, inja nafnai fa siryaḇ werḇa. (Ezra 4:1-4) Ro taun 522 SM, sisma roi ḇedwarek ḇesewer. Snaro raja Persia ḇyuk parenta insama ḇaḇebawes nakam ro Yerusalem sifrur awerna. Inja, rofafisu ani rya nari sibawes mnu ani werḇa.​—Ezra 4:21-24.

5. Rariso Yahwe ifnoḇek kawasa Ḇyesya?

⁵ Yahwe ifawi kawasa Ḇyesya sfandun samambraḇ ma ḇaḇeḇri. Inja, ḇyuk fasasna ḇepupes ḇe Zakharia fa ḇyuk kakakyar ḇe kawasa Ḇyesya snar iswar si ma ḇyesyowi roi sifrur fa sifarmyan ḇe I. Ḇyeasas, na kyadaunwarek si rofyor skaḇer fa sifrur fararur ḇyuk ḇe si na. Yahwe ikofen kuker ḇaḇebawes bait, doḇe, ”Roi anna nari nkaku rarirya—rofyor mkomnaf Yahwe, Allah mkoḇedi wos Ḇyena.”​—Zakharia 6:15.

6. (a) Rosai Zakharia myam ro fasasna ḇeḇewarya? (Mam sonin ro randak artikel ine.) (b) Rosai ḇefnai fa kuda ansya sisnai ḇesisye?

⁶ Imbude fasasna ḇepupes Zakharia ḇyeja, isoine fasasna ḇeḇewar, ima ḇeyun samambraḇ ro kakyar ya. (Wasya Zakharia 6:1-3.) Kwarapan kada rosai Zakharia myamna. Kereta rifiak sisae ”rofandu bon risuru” ḇeḇefrur ro kansai. Kuda-kuda ansya sisnai ḇesisye, inja napyan fa simamḇir si. Zakharia ifuken, ”Rosai knam ro roi nanekam?” (Zakharia 6:4) Ko kako komarisen kofawi fasasna ani snaro nun fainda faro ko.

7, 8. (a) Rosai ḇeḇefasnaḇadir kuker bon risuru Zakharia myam ani? (b) Rosai ḇefnai fa bon ansuya ḇeḇefrur ro kansai?

 ⁷ Ro Refoya, bon ima fyasnaḇair ḇe Karajan ḇaido ḇaḇesasoser oso. Bon risuru Zakharia myam ansuya, imnis kuker bon risuru ḇeḇefas ro Daniel ḇardadi ḇyedi. Bon ḇerandak fyasnaḇair ḇaḇesasoser ḇekain fyoro Yahwe Ḇyeja faro supswan ḇesiper. Ramnai bon ḇesuru fyasnaḇadir Karajan Mesias ma Raja ḇyeja isoine Yesus i. (Daniel 2:35, 45) Rofyor Yesus ḇyeraja ro paik Oktober 1914, ro fafisuya bon risuru ansuine suyores kwar ma sumbranser fararur ḇefandun kaku insama Allah marisen Ḇyena nḇedarirya ro supswan.

⁸ Rosai ḇefnai fa bon ine neḇefrur ro kansai? Kansai ima logam ḇekakur ma ḇesnaper. Yahwe dor insama er Israel sya sbawes tabernakel ma bait ro Yerusalem kuker kansai. (Keluaran 27:1-3; 1 Raja-Raja 7:13-16) Bon risuru ḇeḇefrur ro kansai ine fyasnaḇadir roi ḇeḇemaeja ro Yahwe ḇaḇesasoser Ḇyeja ma Karajan Mesias, nari nafrur snonkaku sya sikenem kuker payamyum ma nḇuk ḇesi barakas nabore.

9. Rosai ḇeḇefasnaḇadir kuker ḇeyek kereta kuda ansya, ma rosai sifrurna?

⁹ Rosai ḇeḇefasnaḇadir kuker kereta kuda ma ḇeyek ansya? Ḇeyek sya iso malaikat sya, ma imbude srama ro raryur malaikat ḇeḇese. (Wasya Zakharia 6:5-8.) Sisae ro ”barpon Tuan ro supswan ine bori”, kuker fararur ḇepyum kaku. Malaikat sine siwan si ḇe moḇ skur kwarna insama sikadaunwarek Allah kawasa Ḇyesya, iba syadiwer ro ”sup bar wambrur” isoine Babilon. Kuker fasasna ine Yahwe ikofenḇair ḇe kawasa Ḇyesya snar nari sḇewomen werḇa ro Babilon. Kakuḇae, ine nafrur fa snonkaku Yahudi ḇebawes bait ro fafisu Zakharia ḇyedi sisma sneprei kaku. Sifawi snar mbroḇ sesya nari sidwarek fararur sena ḇa.

10. Fainda rosai kosma ro Zakharia bardadi ḇyedi kuker kereta kuda ma ḇeyek ansya?

¹⁰ Baboine, Yahwe iwan kaker malaikat Ḇyesi fa skadaunwarek ma sisambraḇser kawasa Ḇyesi. (Maleakhi 3:6; Ibrani 1:7, 14) Ro 1919, Allah kawasa Ḇyesi simkeibur ḇaḇewanan ro Babilon Ḇeba. Rofafisuya, mbroḇ sesya sḇesewar kaku fa ibadat ḇekakuya nasur pdef awer. (Wahyu 18:4) Ḇape, sisma bonoḇa. Inja, ko kako komkak awer agama ḇekakuḇa sewanan ko, snaro malaikat sya sikadaun pdef Yahwe organisasi Ḇyedi. (Mazmur 34:7) Mboi, nari kosma aski pdef ma komyaren syadiwer ro farsamsyom koḇena faro Yahwe I. Zakharia bardadi ḇyeja nafnoḇek ko fa kokyar nari kosma payamyum ma kadaun ro bon risuru ansuya.

11. Rosai ḇefnai fa komkak awer faro mamamun nari ḇeḇejadi ro fafisu iyama?

¹¹ Fyoro werḇa, er-er polotik ro Setan dunya ḇyeja nari sḇeoser fa sembroḇ  Allah kawasa Ḇyesya. (Yehezkiel 38:2, 10-12; Daniel 11:40, 44, 45; Wahyu 19:19) Ro bardadi Yehezkiel, er polotik ansine simnis raris mandep ḇekawef supswan. Siyek kuda kuker masasor ḇeba fa sembroḇ Allah kawasa Ḇyesya. (Yehezkiel 38:15, 16) * (Mam fas-fas kasun ro sop.) Na komkak faro si ke? Oroḇa! Snar Yahwe sordade Ḇyesya simarisen sifnoḇek ko. Iba syadiwer, rofafisu ḇaḇekandera ḇebaya, Yahwe malaikat Ḇyesya nari sikadaunwarek kawasa Ḇyesya ma nari smun mansei monda ḇedwarek Yahwe ḇaḇesasoser Ḇyedi. (2 Tesalonika 1:7, 8) Ras ani nari nun marasrisen ḇeba kaku! Ḇape, mansei nari ḇeḇukor ro Yahwe sordade Ḇyesya?

12, 13. (a) Parenta rosai Yahwe ḇyuk ḇe Zakharia i? (b) Rariso kofawi Up ani nkur ḇe Yesus Kristus i?

¹² Zakharia i monda ḇemam fasasna riwar ani. Ḇape kirine, ifrur roi oso na bisa snonkaku smamna, ma ine nari nsambraḇser si ro fararur ḇebawes Allah bait Ḇyedi. (Wasya Zakharia 6:9-12.) Snon rikior ḇerama ro Babilon, isoine Heldai, Tobiya, ma Yedaya. Yahwe dor Zakharia fa dun sarak ma brawen ro si, ramnai ifrur na ḇe ”wower ḇebasyadi” oso. (Zakharia 6:11, fas-fas kasun ro sop) Ifrur wower ine  ḇe Gubernur Zerubabel ḇerama ro keret Yehuda ma up ro Daud i ke? Aroḇa. Ḇape, Yahwe dor Zakharia i fa ḇyuk wower ḇe Imam Ḇeba ani, Yosua i. Inja, snonkaku ḇemam sya sikandor fafayaḇa.

¹³ Ine kyurfasna Imam Ḇeba Yosua ḇyeḇekanow ḇe raja ke? Aroḇa. Snaro Yosua ima Daud up ḇyedi ḇa. Inja, na jadifa ḇye raja ḇa. Roi ḇeḇejadi ine fyasnaḇair rosai nari ḇeḇejadi ro fafisu iyama faro raja ma imam oso ḇeḇeyap ḇe Up. Refoya fyasnaḇair Up ani isoine Yesus Kristus.​—Yesaya 11:1; Matius 2:23, fas-fas kasun ro sop.

14. Rosai nari Yesus ifrurna ḇe Raja ma Imam Ḇeba?

¹⁴ Yesus ima Raja ma Imam Ḇeba. Ḇyebukor ro sordade malaikat Yahwe Ḇyesi ma ḇyensewar kaku fa kyadaunwarek Allah kawasa Ḇyesya ro dunya ḇeḇarḇor ine. (Yeremia 23:5, 6) Kristus i kako isaramper Allah ḇaḇesasoser Ḇyeja ma kyadaunwarek kawasa Ḇyesya. Fyoro werḇa, nari kyafyo er nakam. (Wahyu 17:12-14; 19:11, 14, 15) Ḇape, rofyor ifrur roi nane ḇaim, fararur ḇeba nasya faro Up ḇaido Yesus i.

15, 16. (a) Rariso Allah kawasa Ḇyesya nari sisren ma sisya pdef, ma mansei nari ḇefrur roi nane? (b) Imnis rariso supswan ine, rofyor Ḇaḇepapoik Taun Syaran Oser Kristus ḇyedi imnai kwar?

¹⁵ Ifrur fararur ḇyeja ḇe Raja ma Imam Ḇeba monda ḇa, ḇape Yesus i kako isma fararur fa ”byawes Yahwe bait ḇyedi”. (Wasya Zakharia 6:13.) Inja, ro 1919, ifrur fararur ḇaḇebawes ine kuker ḇyuk ḇaḇemkei faro Allah kawasa Ḇyesya ro awyaye agama ḇekaku ḇa ḇaido Babilon Ḇeba. Ma Yesus i kako ifrur sren sidang ma ryem ”manfamyan ḇeḇesyowi ma ḇefawi nananem”. Naek ḇeḇeryem ansine sifarkin fararur ḇefandun kaku ro supswan ine, ḇeḇebar ro bait rohani ḇeba syadi. (Matius 24:45) Rofafisu ine, Yesus i kako myamwarek saranden ro Allah kawasa Ḇyesya ma ifnoḇek si fa sifrur farsamsyom ḇesren sena.​—Maleakhi 3:1-3.

¹⁶ Yesus ma 144.000 raja ma imam ḇepoik kayam kuker i nari sḇepoik ro swaf taun syaran oser. Ro swaf ani, nari sifnoḇek snonkaku ḇesouser sya fa sḇesnonkaku ḇenapes. Rofyor raja ma imam ansine sifrur fararur sena kwar,  nari snonkaku ḇesyom Yahwe sya monda na ḇebarek ro supswan ine. Inja, ibadat ḇekaku ine nari iso monda ḇero supswan ine!

17. Rosai Yahwe ikofenwer, ma fainda rosai faro snonkaku Yahudi sya?

¹⁷ Fainda rosai ro Zakharia anun ḇyeja faro snonkaku Yahudi sya? Yahwe ḇyeasas kwar nari ifnoḇek ma kyadaun si insama fararur ḇaḇebawes bait Ḇyedi imnai. Asas ine nḇuk kakakyar ḇe si. Ḇape, imbude sḇeḇirḇar na fararur ine bisa imnai kuker fafnoḇek snonkaku ḇeḇeso monda. Zakharia ikofen roi ḇesambraḇser si ma ḇefnoḇek si fa simkak werḇa. Yahwe ikofen nari sisya sibor ”sakso ro babawes Yahwe bait ḇyeja”. Imnis raris Heldai, Tobiya, ma Yedaya ḇerama ḇefnoḇek fararur ani. (Wasya Zakharia 6:15.) Snonkaku Yahudi sikyar Yahwe nari isaramper fararur sena. Raja Persia idwarek fararur sena raryano, sḇeḇri ma sibawes ḇeri bait ya. Randakya, roi ḇedwarek ine imnis ra bon karui ḇeba kaku ḇedwarek si, ḇape Yahwe ifrur fa ikrenbur si. Inja, bait ani imnai ro taun 515 SM. (Ezra 6:22; Zakharia 4:6, 7) Ḇape, Yahwe wos Ḇyenane kako nun farkarkor ḇeba kaku faro ko ro kirine.

18. Rariso Zakharia 6:15 nḇerarirya ro kirine?

¹⁸ Baboine, snonkaku syaran ma syaran sisya sisyom Yahwe I. Simarisen snar bisa sḇuk ”robebor ḇepyum” raris oras, samambraḇ ma arasai sena. Kuker sifrur rarirya, sisaramper bait rohani ḇeba syadi Yahwe Ḇyeja. (Amsal 3:9) Ko kako bisa kokyar Yahwe ḇyesyowi kaku fafnoḇek koḇena. Imnis raris Heldai, Tobiya, ma Yedaya sḇuk sarak ma brawen sena fa Zakharia ifrurna ḇe wower. Wower ani ima, ”swarapepen” faro rosai sifrur ḇe ibadat ḇekaku. (Zakharia 6:14) Yahwe nari ḇyefnder ḇaḇeri saswar ma fararur marḇak koḇena faro I.​—Ibrani 6:10.

19. Fainda rosai kosma ro Zakharia fasasna ḇyedi?

¹⁹ Ro ras ḇepupes ine, Yahwe kawasa Ḇyesya sifrur fararur ḇeba kaku. Fararur inekam bisa nambran snaro barakas ro Yahwe ma nyan Kristus ḇyuk farkankin. Komarisen kaku snar koisya ro organisasi ḇefamfnom ḇa, ḇeknon, ma ḇekain fyoro. Ko kako kofawi Yahwe marisen Ḇyedi fa ifrur sren ibadat ḇekakuya nari ndarirya. Inja, komarisen koḇesyowi fararur koḇena ro organisasi Yahwe Ḇyedi. Ma ’komnaf Yahwe wos ḇyena’ pdef. Kofrur rarirya ido, nari Raja ma Imam Ḇeba koḇedi ma malaikat sya nari sikadaunwarek ko. Komarisen kofrur rosai riryakam fa kosaramper ibadat ḇekakuya. Yahwe nari myamwarek ko isof pupes ma iba syadiwer isof fyoro-fyoro bis!