1, 2. Nemene la pengöne la angetre Iudra e Ierusalema ngöne la pune la hnaasevenen hna meköle goeën hnei Zakaria?

KOLA nyipune la hnaasevenen hna meköle goeën hnei Zakaria, nge nyimutre la itre ewekë nyine tro angeic a lapa mekun. Eje hi laka, hna acatrene la lapaune i angeic hnene la hna perofetane hnei Iehova, ene la troa nyithupen kowe la itre ka huliwa atrekënö. Ngo, tha saze pi kö la atr. Alanyimu pala hi la itre ka kuca la ngazo, me huliwa atrekënö, nge tha hna afenesine kö la uma ne hmi e Ierusalema. Pine nemene matre canga nuetrije pi angetre Iudra la huliwa hna ahnith koi angatr? Angatre kö a bëeke a tro Ierusalema göi troa eatrëne la sipu aja i angatr?

² Atre hnyawa hi Zakaria ka hape, itre hlue i Iehova ka nyipici lo angetre Iudra ka bëek a tro Ierusalema. “Angat’ asë lo hnei Akötesie hna enijëne la ite hni” matre troa trotrije la itre uma i angatr, me itre jëne thele manie i angatr e Babulona.  (Ezera 1:2, 3, 5) Ame itre xan e angatr, hna feke qa ngöne la götrane hnë mele ka loi kowe la ketre nöj hna thatre. Ka tru koi angatr la troa acile hmaca la uma ne hmi i Iehova, matre tha cile hnö kö angatr troa trongëne la 1 600 lao kilomet. Ketre, ka ngazo la itre gojeny, nge ka hetre ethanyin.

3, 4. Nemene la itre jol ka ej thene la itretre Iudra la angatr a bëek?

³ Pane mekune ju la itre ijine angatr a trongëne la itre gojenyi qa Babulona a tro Ierusalema. Hetre itre ijin angatr a mekun, me ce ithanatane la pengöne la mele i angatr elanyi ngöne la nöje i angatr. Hnei angatr hna drenge la itre qatr e ithanatane la emingömingö i Ierusalema ekö, memine la uma ne hmi. (Ezera 3:12) Maine ka sine ju fe eö la tronge i angatr, nemene la ewekë ka ej e kuhu hni eö la eö a xötrei öhn e Ierusalema? Eje hi laka, tru la hleuhleu thei eö pine laka, pëhë uma ka cil, itre etë pe hi, me hnitr, nge hna thë fe lo ngöne hag. Nge, kola mama la itre gaa kaqa ne ej, e cili hi lo hnen lo itre qanahag ekö, me itre hnë thup. Maine jë eö a mekune hmaca lo ingöne hag ka catre i angetre Babulona. Ngo, tha kucakuca kö la angetre Iudra ke, ame ngöne la tronge i angatr, hnei Iehova hna xatua angatr me thupë angatr. Tha qea kö thupene la angatr a traqa e Ierusalema, angatr a xup la ita ne huuj ngöne lo hnen la uma ne hmi ekö. Ame hnei angatr hna nyiqaane huuj koi Iehova o drai. (Ezera 3:1, 2) Atraqatre la aja i angatr, nge ka hnëkë angatr troa huliwa. Kösë pëkö ketre ewekë ka troa ajolë angatr.

⁴ Nyipiewekë fe tro la angetre Iudra a xup la traon, me itre uma. Tro fe angatr a eëny matre troa hetre a i angatr me hnepe lapa i angatr. (Ezera 2:70) Matre, kösë ketre huliwa ka tru la nyine tro angatr a kuca. Tha qea ju kö thupene lai, hnene la itre ithupëjia hna sewe angatr troa xup la uma ne hmi. Traqa koi 15 lao macatre ne icilekeu angatr, ame hna traqa la kucakuca kowe la angetre Iudra. (Ezera 4:1-4) Ame la ketre jol ka traqa lo macatre 522 tre, hna wathebone hnene la joxu ne Peresi troa xupi uma e Ierusalema. Kösë, tha tro jë pi kö a hetre traon.—Ezera 4:21-24.

5. Nemene la aqane xatuane Iehova la itre hlue i Nyidrë?

⁵ Atre hnyawa hi Iehova ka hape, itre hlue i Nyidrë a ajane troa thue trengecatre i angatr. Matre hnei Nyidrëti hna amamane koi Zakaria la itre iatr tixenuë nyine anyipicine kowe la nöje ka hape, ka tru angatr koi Nyidrë. Nge ketre, ka tru koi Nyidrë la itre huliwa hnei angatr hna kuca matre troa nyihlue i Nyidrë. Hnei Nyidrëti hna ahnith amë ka hape, tro Nyidrëti a isigöli angatr, e tro angatr a xejë hmaca la huliwa hna ahnithe koi angatr. Öni Iehova göne la uma ne hmi hna xup hmaca ka hape: “Troa eate lai, maine nyipunie a denge hnyawa la aqane ula i Iehova Akötesi nyipunie.”—Zakaria 6:15.

6. (a) Nemene la aqane nyiqaane la hnaaeitrene hna meköle goeën? (Wange ju la pane iatr.) (b) Pine nemene matre isa hane kö la itre hos?

⁶ Ketre ixatua ka tru la hnaaeitrene hna meköle goeëne hnei Zakaria koi angatr asë. (E jë la Zakaria 6:1-3.) Pane mekune ju la ewekë hna goeën hnei Zakaria. “Qa ngöne la akawane la lue wet [kopa],” kola fetra la eke ikariota, nge hna hnëkën kowe la isi. Ame la itre hos ka hul itre ej tre, ka isa hane  kö. Celë hi ka aisapengönen itre ej. Öni Zakaria, ‘Itre nemene cahu?’ (Zakaria 6:4) Easa fe a ajan troa atre la aliene ke, ka hetre thangane lai koi së.

7, 8. (a) Nemene la hna nyihatren hnene la lue wetr? (b) Nemene la aliene la lue wetre kopa?

⁷ Ame e hnine la Tusi Hmitrötr, hna nyihatrene la itre baselaia, maine itre mus hnene la itre wetr. Ame la lue wetr hna goeën hnei Zakaria tre, ceitune hi memine lo lue wetr ka mama ngöne la hna perofetan hnei Daniela. Ame la ketre, kola qajaqaja la musi cile i Iehova, mus ka epine palua. Nge, ame la ketre, kola qajaqaja la Baselaia laka, Iesu la joxu. (Daniela 2:35, 45) Qaane lo 1914, lo kola acili joxu Iesu, hna ce huliwa la lue wetr cili göi troa eatrëne la aja i Akötresie kowe la fen.

⁸ Nemene la aliene la lue wetre kopa? Ame la kopa tre, ketre ifao ka melemel, nge ka tru thupene catr. Hnei Iehova lo hna upe la angetre Isaraela troa huliwane la kopa lo kola cane la uma ne heta, nge thupene lai lo uma ne hmi e Ierusalema. (Esodo 27:1-3; 1 Ite Joxu 7:13-16) Matre, ame la lue wetre kopa, kola amamane hnyawa la edraiëne la musi cile i Iehova, memine la Baselaia hna cilën hnei Iesu, lo ka troa hamën la tingeting me itre manathith ka nyimutre kowe la itre atr.

9. Drei la itre ka ti hos, nge nemene la huliwa i angatr?

⁹ Nemene la hna nyihatrene hnene la itre ikariota memine la itre ka ti hos? Ame la itre ka ti hos tre, itre angela. Kola qaja la itre gurupe ne angela ka isapengön. (E jë la Zakaria 6:5-8.) Angatr la “itete tro qa hna cile xajawa i Joxu ne la fene hnengödrai asë” fë la isa huliwa i angatr. Hna upe la itre angela kowe la itre götrane hna isa upi angatre kow, matre troa isigöline la nöje i Iehova göne “la nöje he ailopi,” ene Babulona. Jëne la hna meköle goeëne celë, Iehova a qaja amamane kowe la nöje i Nyidrë ka hape, tha tro hmaca kö angatr a lapa fene la musi Babulona. Ketre ixatua ka tru lai kowe la itre ka xup la uma ne hmi lo ijine i Zakaria! Xecie hnyawa koi angatr ka hape, tha tro jë pi kö la itre ithupëjia a acilëne la huliwa.

10. Hna xatua së tune kaa hnene la hna perofetan hnei Zakaria?

¹⁰ Iehova pala hi enehila a isigölin, me thue trengecatrene la itre hlue i Nyidrë jëne la itre angela. (Malaki 3:6; Heberu 1:7, 14) Qaane lo 1919, lo kola lö pi la nöje i Iehova qaathei Babulona Atraqatr, hnene la itre ithupëjia hna thele jëne matre tha tro kö la hmi ka wië a kökötr. (Hna Amamane 18:4) Ngo, tha ie kö la itre huliwa i angatr. Pine laka, itre angela a isigöline la nöje i Iehova, haawe, tha tro pi kö sa xouene laka, tro la nöje i Iehova elanyi a lapa hmaca fene la hmi ka thoi. (Salamo 34:7) Tro pe sa catre madrin, me kuca catrëne la huliwa i Iehova. Jëne la hna perofetane hnei Zakaria, xecie koi së laka, easa lapa tingeting, me lapa hnyawa jëne lo lai lue wetr.

11. Pine nemene matre tha tro kö sa xouene la kola traqa troa lepe la nöje i Iehova?

¹¹ Easenyi catre hë matre tro la itre politik ne la fen a cas matre troa lepe apatrene la  nöje i Iehova. (Ezekiela 38:2, 10-12; Daniela 11:40, 44, 45; Hna Amamane 19:19) Ame ngöne la hna perofetan hnei Ezekiela, kola lapane la fen hnene la itre trongene isi ne ej, ceitu me itre iaw. Angatr a ti hos, me traqa fë elëhni troa lepe la nöje i Iehova. (Ezekiela 38:15, 16) * (Wange ju la ithuemacany.) Tro kö sa xoue angatr? Ohea! Thei easë la trongene isi i Iehova. Ame ngöne la ijine akötr atraqatr, tro la itre angela a isigöline la nöje i Nyidrë, me lepe apatrene la nöjei ka icilekeu memine la musi Iehova. (2 Thesalonika 1:7, 8) Drei lai ketre drai ka tru! Ngo, drei la ka troa elemekene la trongene isi i Iehova e hnengödrai?

12, 13. (a) Nemene la hna upi Zakaria troa kuca hnei Iehova? (b) Nemene la ka amamane ka hape, ame lo atr hna hën ka hape, Zine tre, Iesu Keriso?

¹² Zakaria hmekuje hi la atre goeëne la eitr lao hna meköle goeëne celë. Ngo, thupene lai, hetre ewekë hnei angeic hna kuca, nge ka xatuane la itre ka xupe hmaca la ēnē, maine uma ne hmi Iehova. (E jë la Zakaria 6:9-12.) *(Wange ju la ithuemacany.)Kola traqa  qa Babulona hnene la köni atr, Heledai, Tobia, me Iedaia. Iehova a upi Zakaria troa xome la sileva me gol qaathei angatr, me xup itre ej matre troa kuca la “ketre korona ka tru.” (Zakaria 6:11, MN) Hapeu, thatraqai Zerubabela Gavena la korona cili, atre ka xulu qa ngöne la tribu Iudra, nge matra i Davita? Ohea. Hnei Iehova hna upi Zakaria troa atë la korona hune la he i Iosua, atre huuj ka sisitria. Eje hi laka, ketre ewekë lai ka ketre pengön kowe la itre ka goeën.

¹³ Hapeu, joxu fe hë Iosua la kola të la korona hune la he i angeic? Ohea. Tha ketre matra i Davita kö angeic, matre tha ijiji angeice kö troa joxu. Ame la korona i angeic tre, kola nyihatrene la ewekë ka troa traqa elany, me kowe la joxu, lo atre huuj, nge ka epine palua. Celë hi hna hën ka hape, Zine. Öni Tusi Hmitrötr, Iesu Keriso la Zine.—Isaia 11:1; Mataio 2:23 * (Wange ju la ithuemacany.).

14. Nemene la huliwa i Iesu, lo Joxu me Atre Huuj Ka Sisitria?

¹⁴ Iesu la Joxu me Atre Huuj Ka Sisitria. Nge, nyidrëti la ka elemekene la itre angela, lo trongene isi Iehova. Haawe, tro nyidrëti lai a thele jën matre tro la nöje i Iehova a lapa tingeting ngöne la fene ka iakötrë celë. (Ieremia 23:5, 6) Easenyi catre hë matre tro Keriso a ngaan la itre mus, ngöne la nyidrëti a isigöline la musi Iehova, memine la nöje i Nyidrë. (Hna Amamane 17:12-14; 19:11, 14, 15) Qëmekene la ijine cili, atraqatre la huliwa nyine tro Iesu, lo Zine a kuca.

15, 16. (a) Nemene la aqane acile hmaca la nöje i Iehova, me nyidrawane ej enehila, nge hnei drei? (b) Nemene la pengöne la fen elanyi ngöne la kola nyipune lo Musi Keriso Ka Ca Thauzan Lao Macatre?

¹⁵ Ketre, hna upi Iesu fe troa “xupe la ēnē i Iehova.” (E jë la Zakaria 6:13.) Ame lo 1919, nyidrëti a eatrëne lai, la nyidrëti a nuamacan la nöje i Akötresie qa ngöne la hmi ka thoi, ene Babulona Atraqatr. Hnei Iesu hna eköthe hmaca la ekalesia, me acile la “hlue ka nyipici me ka inamacan.” Kola amekötine hnene la neköi lapa ne la itre trejin hna iën la huliwa ka tru hna kuca e celë fen, ketre igötranene la uma ne hmi ka tru i Iehova. (Mataio 24:45) Hnei Iesu mina fe hna nyidrawane la nöje i Iehova, me xatua angatr troa pë ethan la aqane troa nyihlue i Nyidrë.—Malaki 3:1-3.

¹⁶ Tro Iesu memine lo ala 144 000 joxu me itretre huuj a musi koi ca thauzane lao  macatre. Nge, ame ngöne la ijine cili, tro angatr a xatuane la itre atr ka mele nyipici troa pexej. Ame hë la kola fenesi elanyi la huliwa celë hnene la itre joxu me itretre huuj, tro hmekuje pë hë la itre sipu atre i Iehova a lapane pe la ihnadro. Ame hë e cili, cile hnyawa hmaca ha la hmi ka wië!

17. Nemene la hnei Iehova hna sisinyi kowe la angetre Iudra, nge nemene la thangane lai koi angatr?

¹⁷ Nemene la thangane la maca i Zakaria kowe la angetre Iudra ngöne la ijine cili? Hnei Iehova hna sisinyi troa xatuan, me isigöli angatr utihë afenesine angatr la uma ne hmi. Celë hi ka thue mejiune i angatr. Ngo, hetre itre atr ka thel ka hape, ‘Nemene la aqane tro la ala xalaithe hi a eatrëne la huliwa ka tru cili?’ Hetre ewekë hnei Zakaria hna qaja, nge ka apatrene thei angatr la xou me luelu. Traqa ha Heledai, Tobia, me Iedaia troa xatua angatr, nge öni Iehova, alanyim pala kö la itre ka troa “traqa me xupe la ēnē i Iehova.” (E jë la Zakaria 6:15.) Tha luelue kö kowe la angetre Iudra laka, tro Iehova a sajuëne la huliwa i angatr. Angatr a bëeke jë troa xupe la uma ne hmi, ngacama hna wathebone hë hnene la joxu ne Peresi. Kösë iwetr ka tru qëmeke i angatr la wathebo cili, ngo hnei Iehova hna canga apatren. Ame hë e cili, hna umuth la uma ne hmi lo macatre 515 qëmeke i Keriso. (Ezera 6:22; Zakaria 4:6, 7) Ngo, hetre ketre aliene kö la itre trengewekë i Iehova, nge ka eatr enehila.

18. Nemene la aqane eatr la hna qaja ngöne Zakaria 6:15 enehila?

¹⁸ Ame enehila, itre milio lao atr ka nyihlue i Iehova. Hetre madrine i angatr troa nu asë koi Nyidrë la hnei angatr hna hetreny. Kola qaja la traem, me trengecatr, me itre mo i angatr. Celë hi aqane sajuëne angatre la hmi Iehova. (Ite Edomë 3:9) Nge, tha luelue kö së laka, ka tru koi Iehova la itre huliwa hne së hna kuca. The thëthëhmine kö laka, hnei Heledai, Tobia, me Iedaia hna traqa fë sileva me gol, lo hnei Zakaria hna xom matre troa xup lo korona. Matre ame lo “korona ka tru” hna qaja hnei Zakaria tre, “nyine amekunëne” la itre ahnahna hna hamën thatraqane la hmi ka wië. (Zakaria 6:14, MN) Haawe, tha tro pi kö Iehova a thëthëhmine la huliwa hne së hna kuca, memine la ihnim hne së hna amamane koi Nyidrë.—Heberu 6:10.

19. Nemene la thangane la itre hna meköle goeëne hnei Zakaria koi së?

¹⁹ Ame asë hi la itre hna kuca thatraqane la hmi ka wië ngöne la itre drai tixenuë celë tre, hatrene la manathithi Iehova, memine la ixatua i Keriso. Hetre madrine së troa sine la nöje ka tingeting, me ka cile hut. Nge, tro pala kö a eatr elanyi la aja i Iehova göne la hmi ka wië. Haawe, tha tro pi kö sa wangacone la göhne së ngöne la nöje i Iehova, nge troa “denge hnyawa la aqane ula i Iehova.” Ame hë e cili, tro ha isigöli së hnene la joxu së lo atre huuj ka sisitria, memine fe la itre angela. Isa catre jë së sajuëne la hmi ka wië. Tro hë Iehova a thupëne la mele së ngöne la itre drai tixenuë celë uti hë epine palua!