Qamutit niaqorullu illersuutigaatit
“Taama pisoqassaaq Naalagaq Guutersi naalakkussiuk.” – ZAK 6:15.
1, 2. Zakariap takorruukkami arfineq-aappaat takoreeraa pissutsit Jerusalemimiittut qanoq ippat?
ZAKARIA takorruukkami arfineq-aappaat takoreerlugu eqqarsaatissarpassuaqarsimassaaq. Jehovap unneqqaserluttunik pillaanissaminik neriorsuutaa Zakariap nakussatsissutigisimassavaa. Kisianni pissutsit allanngorsimanngillat. Inuppassuit suli ajortuliorlutillu unneqqaserlupput, Jerusalemimilu naalaffiup sanaqqinneqarnera suli naammassineqanngilaq. Sooq juutit Jehovap suliassiissutaa naammassinagu unitsippaat? Inuunerminni atugarissaarnerulernissartik siunertariinnarlugu Jerusalemimut uterpat?
2 Zakariap nalunngilaa juutit Jerusalemimut utertut Jehovamik pallorfiginnittuusut. Taakku tassaapput angerlarsimaffimminnik niuertarfiutiminnillu Babylonimiittunik qimatsinissaminnut ‘Guutimit kajumissisinneqartut’. (Ezra 1:2, 3, 5) Nunamiit ilisimalluakkaminniit nunamut amerlanersamik takusimanngisaannagaannut nuupput. Juutit taakkua Jehovap naalaffiata sanaqqinneqarnissaa ima pingaartitsigaat allaat kajumillutik aqqulluttukkoorlutik kilometerit 1.600-it ingerlavigalugit.
3, 4. Juutit Jerusalemimut utertut sunik unamminiagassaqarpat?
3 Babylonimiit Jerusalemimut angalanerat isorartooq takorlooruk. Angerlarsimaffissatik nutaat pillugit eqqarsaatiginninnissaminnut oqaloqatigiinnissaminnullu piffissaqarluarput. Utoqqaat oqaluttuartarsimassapput Jerusalemi tassanilu naalaffik qanoq kusanartigisimasut. (Ezra 3:12) Illit angalaqatigigaluarukkit Jerusalemi takoqqaarukku qanoq misigissagaluarpit? Illukut naasupilullit illoqarfiullu qarmarsui, napasuliartai isaaffissuilu aserorsimasut takullugit aliasussagaluarpit? Immaqa illukut taakku Babylonip qarmarsuinut silittorsuarnut naleqqiussimassavatit. Juutilli nikallunngillat. Sooq? Angalaneranni isorartuumi Jehovap ikiorlugillu illersormagit. Jerusalemimut apuuteqqammerlutik naalaffiup tunngavigisimasaani pilliiviliorput Jehovamullu ullut tamaasa pilliisalerlutik. (Ezra 3:1, 2) Aallussilluaqaat nikalluutissaqarpasigatillu suliassaminnut piareersimapput.
4 Naalaffiup sanaqqinneqarnissaata saniatigut juutit illoqarfinnik pilersitseqqillutillu illutik sanaqqittariaqarpaat. Aamma ilaquttatik pilersorniarlugit narsaatitik naggorissartariaqarpaat. (Ezra 2:70) Suliassarpassuaqaqaat. Sivitsunngitsorli sanaartornerat akeqqanit unitsinniarneqalerpoq. Ukiuni 15-ini juutit akerlilersorneqarput, nikalloraluttuinnarpullu. (Ezra 4:1-4) Ukiumi 522-mi allamik unamminiagassaqalerput Perserit kunngiat peqqusimmat Jerusalemimi sanaartorneq unitsinneqassasoq. Illoqarfiup sanaqqinneqarnerata naammassinissaa takorlooruminaaqaaq. – Ezra 4:21-24.
5. Jehovap innuttani qanoq ikiorpai?
5 Jehovap nalunngilaa innuttani nakussatsinneqarnissamik sapiissuseqalersinneqarnissamillu pisariaqartitsisut. Jehovap innuttani asallugit suliaallu pingaartillugit qularunnaarsinniarlugit Zakaria naggammik takorruuisippaa. Neriorsorpai suliassiissutigisaminik aallusseqqilerpata illersorumaarlugit. Jehovap qularunnaarsippai Guutimut naalappata naalaffik sanaqqineqarumaartoq. – Zak 6:15.
INNGILIT SAKKUTOOQATIGIIT
6. (a) Zakariap takorruugaasa arfineq-pingajuat qanoq aallartippa? (Allaaserisap aallaqqaataani assiliaq takuuk). (b) Sooq hestit assigiinngitsunik qalipaateqarpat?
6 Zakariap takorruugaasa arfineq-pingajuat kingullerlu immaqa uppernikkut nakussatsissutaanerpaajuvoq. (Zakaria 6:1-3 atuakkit). Zakariap takusaa takorlooruk. “Qaqqat marluk” kanngussaasut akornanni qamutit sisamat hestinik qimuttullit takkupput. Qimussersut immikkoortinneqaruminarneruniassammata hestit assigiinngitsunik qalipaateqarput. Zakaria ima aperivoq: “Tamanna qanoq isumaqarpa?” (Zak 6:4) Uaguttaaq tamanna paaserusupparput takorruugaq uagutsinnut attuumassuteqarmat.
7, 8. (a) Qaqqat marluk sumut assersuutaappat? (b) Sooq qaqqat kanngussaappat?
7 Qaqqat Biibilimi naalagaaffinnut naalakkersuisunulluunniit assersuunneqartarput. Zakariap takusai qaqqanut marlunnut Danielip siulittuutigisaanut assingupput. Dan 2:35, 45) Qaqqaq eqqaaneqartoq kingulleq 1914-imi ukiartoq Jiisusi kunnginngormat piulerpoq. Taamanimiilli qaqqat taakku marluullutik Guutip nunarsuarmut siunertaata naammassineqarnissaanut pingaaruteqarluinnarput.
Qaqqap aappaa Jehovap qilammi nunamilu naassaanngitsumik naalakkersuineranut assersuutaavoq aappaalu naalagaaffimmut Missiarsimit, kunngimit Jiisusimit, naalakkersuiffigineqartumut assersuutaalluni. (Ullumikkuttaaq Jehovap inngilini aqqutigalugit innuttani illersorlugillu nakussatsittarpai
8 Sooq qaqqat taakku kanngussaappat? Kanngussak saviminiuvoq qillaarissoq akisooq. Jehovap Israelikkut Tupermik Naapeqatigiittarfimmik kingusinnerusukkullu Jerusalemimi naalaffimmik sanaqqugamigit kanngussammik atueqquai. (2 Mos 27:1-3; 1 Kng 7:13-16) Qaqqat taakku kanngussaammata Jehovap qilammi nunamilu kisimi oqartussaanerata naalagaaffiullu Missiarsimit naalakkersuiffigineqartup pitsaalluinnassusiat erseqqissarneqarpoq. Naalagaaffiit taakkua marluk naalakkersuineranni inuit toqqissisimallutillu pilluaqquneqangaassapput.
9. Qimussersut kikkuuppat, sumillu suliassaqarpat?
9 Qamutit qimussersullu sumut assersuutaappat? Qimussersut inngiliupput, ilimanarporlu inngilit eqimattat assigiinngitsuusut. (Zakaria 6:5-8 atuakkit). ‘Nunarsuup tamarmi Naalagaata saanit’ aallarput immikkut ittumik suliassaqarlutik. Inngilit sumiiffinnut aalajangersimasunut aallartinneqarput Guutip innuttai pingaartumik Babylonimit, ‘Avannaata nunaanit’, illersorniarlugit. Takorruugaq tamanna aqqutigalugu Jehovap innuttani paasitippai Babylonimi inussiaataaqqinngisaannassasut. Takorlooruk Zakariap nalaani naalaffiliortut tamanna qanoq tuppallersaatigitigisimassagaat! Nalunngilaat akeqqaminnit unitsinneqarnaviaratik.
10. Zakariap qamutit qimussersullu pillugit siulittuutaa ullumikkut qanoq iluaqutigisinnaavarput?
10 Ullumikkuttaaq Jehovap inngilini aqqutigalugit innuttani illersorlugillu nakussatsittarpai. (Mal 3:6; Hebr 1:7, 14) 1919-imiilli, Jehovap innuttaasa Babylonersuarmi anersaakkut parnaarussaaqqanerminnit iperagaaneranniilli, akeraasut pallorfiginninnerup ilumoortup ineriartornissaanik unitsitsiniaallutik ilungersorsimapput. (Saqq 18:4) Iluatsinngillalli. Jehovap peqatigiissortai inngilinit illersorneqarmata Jehovap innuttaasa upperisarsiornermit eqqunngitsumit anersaakkut parnaarussaaqqinngisaannarnissaat qularutiginngilluinnarsinnaavarput. (Tuss 34:8) Nuannaarlutalu aallussilluarluta Jehovamut kiffartortuarusuppugut. Zakariap siulittuutaata eqqarsaatigeqqissaarneratigut paasivarput qaqqat marluk illersuutigalugit.
11. Sooq Guutip innuttaasa saassunneqarnissaat ernumagissanngilarput?
11 Qanittuararsuakkut Saatanip silarsuaani politikkikkut pissaanillit suleqatigiillutik Ez 38:2, 10-12; Dan 11:40, 44, 45; Saqq 19:19) Ezekielip siulittuutaa naapertorlugu taakku nuissatut majortutut nuna tamakkissavaat. Aamma allappoq taakkua kamallutik Guutip innuttai hesterlutik saassutissagaat. (Ez 38:15, 16) * Ersigissavavut? Naamerluinnaq! Jehovammi sakkutuui illersuisoraavut. Annikilliornartussarsuarmi Jehovap inngiliisa Guutip innuttai illersorumaarpaat Jehovallu naalakkersuineranut akerliusut tamaasa piuneerutissallugit. (2 Th 1:7, 8) Ullussarsuaq taanna pissanganaqaaq! Kinali Jehovap sakkutooqatigiivinut qilammiusunut naalagaassava?
Guutip innuttaanik suujunnaarsitseriaraluassapput. (JEHOVAP KUNNGIULLUNILU PALASIUSOQ NIAQORUSERPAA
12, 13. (a) Jehovap Zakaria soqquaa? (b) Qanoq nalunngilarput angut ‘naanermik’ taaneqartoq Jiisusi Kristusiusoq?
12 Zakariap takorruukkat arfineq-pingasut taakku kisimi takuai. Kingornali allat takusinnaasaannik Guutillu naalaffianik sanaqqiisut qiimmassaatigisassaannik iliuuseqarpoq. (Zakaria 6:9-12 atuakkit). Angutit pingasut, Heldaji, Tobia Jedajalu, Babylonimit tikipput. Jehovap Zakaria peqquaa angutinit taakkunannga sølvimik kuultimillu katersuissasoq katersukkaminillu ‘niaqorusiussasoq’. (Zak 6:11) Taanna tassaava naalagaatitap Zerubbabelip, naggueqatigiinnit Judameersup Daavillu kinguaavata, niaqorutaa? Naamik. Zakariap palasiuneq Josva Jehovap peqqusineratut niaqoruserpaa. Isiginnittut Zakariap taamaaliornera tupigusuutigisimassavaat.
13 Palasiuneq Josva niaqorusigaanermigut kunnginngorpa? Naamik. Josva Daavip kinguaarinngimmani kunnginngorsinnaanngilaq. Taassuma niaqorusigaanera siunissami naassaanngitsumik kunngiullunilu palasiusussamut, ‘naanermik’ taaneqartumut assersuutaavoq siulittuutaasoq. Biibilimi nassuiarneqarpoq “naaneq” taanna tassaasoq Jiisusi Kristusi. – Es 11:1; Matt 2:23. *
14. Jiisusi kunngitut palasiunertullu sussava?
14 Jiisusi kunngiullunilu palasiuneruvoq. Jehovap sakkutooqatigiivinut inngiliusunut naalagaavoq Guutillu innuttai silarsuarmi nakuuserfiusumi toqqissisimatinniarlugit ilungersorluni. (Jer 23:5, 6) Kristusi Guutip naalakkersuineranik tapersersuillunilu Jehovap innuttaanik illersuisoq qanittukkut inuiaqatigiinnut ajugaassaaq. (Saqq 17:12-14; 19:11, 14, 15) Ullussarli taanna nalliutsinnagu Jiisusi, “naaneq”, suliassarpassuaqarpoq.
NAALAFFILIORUMAARPOQ
15, 16. (a) Guutip innuttai ullumikkut qanoq aamma kimit pilerseqqinneqarlutillu minguiarneqarpat? (b) Kristusip ukiuni tuusintini naalakkersuinera naappat nunarsuarmi pissutsit qanoq issappat?
15 Jiisusip kunngiullunilu palasiunerusup Jehovap “naalaffissaa sanajumaarpaa”. (Zakaria 6:13 atuaruk). 1919-imi sanaartorneq tamanna aallartippaa Guutip innuttaanik upperisarsiornerup eqqunngitsup, Babylonersuup, sunniineranit aniguisitsinermigut. Ilagiit kristumiut pilerseqqippai ‘inussiarlu aalajaallunilu silatooq’ toqqarlugu. Angutit tanitat eqimattat taakku naalaffiup anersaakkut ittup ilaani nunarsuarmiittumi sulinermut pingaarutilimmut siulersuisuupput. (Matt 24:45, NW) Aamma Jiisusip Guutip innuttai minguiarpai minguitsuullutik pallorfiginnissinnaaqqullugit. – Mal 3:1-3.
16 Jiisusi taassumalu kunngioqatai palasioqataalu 144.000-t ukiuni tuusintini naalakkersuissapput. Tamatuma nalaani inuit aalajaatsut naammalluinnartunngornissaannut ikiussavaat. Kunngit palasillu taakkua suliassaq tamanna naammassippassuk Jehovamik pallorfiginnittut ilumoortut kisimik nunarsuarmi inuujumaarput. Kiisami pallorfiginninneq ilumoortoq tamakkiisumik pilerseqqinneqassaaq!
ANERSAAKKUT SANAARTORNERMUT PEQATAAGIT
17. Jehovap juutit qanoq tuppallersarpai, tuppallersaaneralu qanoq sunnerneqaatigaat?
17 Juutit Zakariap tusarliussaa taamani qanoq sunnerneqaatigaat? Naalaffik naammassiniassammassuk Jehova neriorsuivoq ikiorumallugit illersorumallugillu. Neriorsuut tamanna neriulersitsivoq. Eqqarsaatigisimassavaalli taama ikitsigalutik suliassarpassuatik naammassisinnaassanerlugit. Taamaattumik Zakaria taakkua ernumajunnaassutigisaannik qularunnaassutigisaannillu oqaaseqarpoq. Jehova oqarpoq ikiuilereersut, soorlu Heldajip, Tobiap Jedajallu, saniatigut inuit allarpassuit ‘aggerumaartut Jehovap naalaffissaanik sanaqataajartorlutik’. (Zakaria 6:15 atuaruk). Juutit upperilluinnarpaat sulinerminni Jehovamit tapersersorneqarlutik. Perserit kunngiat suliamik inerteqqutaatitsigaluartoq sapiillutik naalaffiup sanaqqinneqarnera ingerlateqqippaat. Sivitsunngitsoq Jehovap inerteqqut tamanna atorunnaarsippaa. Kiisami ukiumi 515-imi Kr.in.si. naalaffik naammassineqarpoq. (Ezra 6:22; Zak 4:6, 7) Jehovap oqaasii taakku aamma ullumikkut annertunerusumik pisumut eqquupput.
18. Zakaria 6:15 qanoq ullumikkut eqquuppa?
18 Nalitsinni inuit millionillit Jehovamik pallorfiginnipput. Kajumillutik ‘pisuussutiminnik’, soorlu piffissaminnik, nukiminnik pigisaminnillu, Jehova tunisarpaat. Taamaaliornermikkut Jehovap naalaffissua anersaakkut ittoq tapersersortarpaat. (Uss 3:9) Nalunngilarpullu ilumoorfiginnilluta tapersersuinerput Jehovap pingaartikkaa. Eqqaamajuk Heldaji, Tobia Jedajalu sølvimik kuultimillu tunisisut Zakarialu tamakkuninnga niaqorusiortoq. Niaqorut tamanna pallorfiginninnermik ilumoortumik tapersersuinerannut ‘eqqaaniutaavoq’. (Zak 6:14) Jehovap pilluni suliarput imminillu asanninnerput puiunngisaannassavaa. – Hebr 6:10.
Peqatigiiffimmut aalajaatsumut, toqqissisimanartumut naassaanngitsumillu atasussamut ilaanerput nuannaarutigaarput
19. Zakariap takorruugai qanoq sunnerneqaatigissavavut?
19 Ulluni kingullerni makkunani Jehovap innuttai sulinerminni angusarpassuaqarsimapput. Jehovap pilluaqqusinera Kristusillu siulersuinera pissutigalugit taamatut angusaqarsinnaapput. Peqatigiiffimmut aalajaatsumut, toqqissisimanartumut naassaanngitsumillu atasussamut ilaanerput nuannaarutigaarput, nalunngilarpullu Jehovap pallorfiginninnermut ilumoortumut siunertarisaa piviusunngorumaartoq. Taamaattumik Jehovap innuttaanut ilaanerit pingaartiguk ‘Jehovalu Guutit naalallugu’. Taava kunngitsinnit palasiunitsinnillu inngilinillu illersorneqarumaarputit. Pallorfiginninnermik ilumoortumik tapersersuiumallutit sapinngisannik iliuuseqarit. Jehovap pissutsit aaqqissuussaaneranni ajortumi matumani – aamma naassaanngitsussamut – illersorumaarpaatit!
^ par. 11 Paasisaqarnerorusukkuit takuuk “Atuartartut apeqqutaat”, Napasuliaq Alapernaarsuiffik maajip 15-iat 2015-imoortoq, qupp. 27-28.
^ par. 13 Taaguut ‘nazaræeri’ oqaatsimit hebræerisuumit ‘naanermik’ isumalimmit aallaaveqarpoq.