1, 2. Yɛɛ Chuwaa wa Chulusɛlɛmnda wa yɛ tosaa teleŋ Sɛkalaya chii yilaŋii ŋɔmmɛu ve dimi wo?

MƐƐ Sɛkalaya chii yilaŋii ŋɔmmɛu ve dimi, ndoo nɔ sɔɔŋ tau le yiyaŋndo. Mi ndoo sɔla dɔɔ yoomuaŋ mɛɛ Chɛhowa dimi maa o cho hunɔɔ wanaa sendu le wa tɛɛmbuu. Kɛ nyɛ o nyɛ ndoo siŋgaŋ te. Wanaa bɔɔbɔɔ wa wɔ hiouwɔɔ lachi a dɛnɛ wɔɔŋndo tosaa vɛlɛ a sɔɔŋ lakafaŋ. Nduyɛ maaŋ nda wa taŋgullo Chulusɛlɛmndo ndoo chuu wɔ le. Le sabu yɛɛ Chuuwa ndaa mallɛ wali Chɛhowa ke nda wo chɔ chɔ? Baa le yoomula ndalaŋ tosaa la kɛndɛ ndaa miiŋgu Chulusɛlɛm ni?

² Mi Sɛkalaya sina maa Chuwaa miiŋgu Chulusɛlɛmnda wa Chɛhowa piɛiyo. Nda wa “wanaa Mɛlɛka soo . . . o lakɔl” le chiɛila ndalaŋ a yulale ndaleŋ mɛiyo Babilɔŋ nda ni. (Ɛsilua 1:​2, 3, 5) Ma mɛi fondaŋ ndaa sina nyɛkɛndɛiyo le kɔlaŋ o lɛŋnde a bɔɔbɔɔ ndaa chi wɔ paale pilɛ bɛɛ a lehɔl te leŋ niŋ. Maaŋ Chɛhowaa taŋgullo wa nyɛ sɔviɔɔ le Chuwaa kaŋ ni. Le sabu koŋ, ndaa nɔ yeemɛi le tiŋndo bulioo le kilolaŋ 1,600 (mɛɛliilaŋ 1,000) o nɛila wɔɔŋndaŋ choo.

3, 4. Simulta kuɛɛ Chuwaa ndaa miiŋgu wa sɔla yɛ?

 ³ Yiyaŋndɔ a tiŋ levil koŋ, chɔŋ Babilɔŋ le kɔlaŋ Chulusɛlɛm. Wanaa kaŋ ndaa nɔ teleŋndo tau le yiyaŋndo a baltaŋ dɔuwɔɔ a chalta ndalaŋ o chilaŋ niŋ okɔɔ. Mi bɛnduaa yuuwa nda tɛɛŋ dimul nda mɛɛ Chulusɛlɛm a maaŋndo wa paandu o kɛndɛ yɛ. (Ɛsilua 3:​12) Te num oo wa pɛ kɔlaŋ a nda latulu, vɛɛ ŋ wa yɛ yiyaŋ te num oo che pɛ Chulusɛlɛm o tase ndɔ? Baa a wa pa kɔllo tambu le chɔɔ bembela billo vil lechoo laŋ, kpakila kombɛilaŋ, a sooŋnda bɛnda diola kpakilaŋ a bandulaŋ la wa lasisi laŋ? Kɛlɛŋgaa a wa tuu kpakila kombɛila laŋ a kpakila kala kalalaŋ o Babilɔŋ niŋ. Kɛ Chuuwa ndaa tembu kɔl te. Le yɛɛ? Kanifuule, tuma nda wa tiŋ levillo bulioo wo, mi Chɛhowa mala nda nduyɛ mbo manda nda. Mɛɛ nda fuuluu dɔɔ Chulusɛlɛm, ma baŋ bandu luamaa salaa naa maaŋndo wa isisi wa, nduyɛ ma kandu salalaŋ solioo o Chɛhowa lo lepaa o lepaa. (Ɛsilua 3:​1, 2) Ndaa nɔ dialuŋ fulaŋ tau nduyɛ ndaa yeema le wallo.

⁴ Teleŋ Chuuwa wa maaŋndo miŋgioo taŋgullo wo, ndaa nɔ vɛlɛ ma taŋgul chieeŋ ndaŋ a chiɛila ndalaŋ. Ndaa nɔ ma tosa chiɔɔŋ le yuŋgula ndalaŋ baloo dɔuwɔɔ. (Ɛsilua 2:​70) Wallo pila ndaa nɔ le tosaa ni. Kɛ o viu bɛɛ le mi yaamɔɔwaa ndaa kindiŋ le nda kuunaa. Mi simul koŋ chua wɔsilaŋ 15, nduyɛ mi Chuuwa kandu kɔllo tambei o pɔm pɔmbɔ. (Ɛsilua 4:​1-4) Ma sɔla simul cheleŋ a wɔsi 522, teleŋ masa Paasiaŋnda kuuna taŋgultaŋ kpou o Chulusɛlɛm niŋndo. Mii yɔŋnuŋ maa chioo ve taŋgulɔŋ te.—Ɛsilua 4:​21-24.

5. Vɛɛ Chɛhowa ndoo mala yɛ wanaa nduaa?

⁵ Chɛhowa ndoo sina maa wanaa nduaa yeema yoomuaŋ a kɔl dɛɛniaa. Mbo ke Sɛkalaya yilaŋii mɛɛlɛi le waŋnda tiindaŋndo kioo maa o kaala nda nduyɛ maa o hini kɔl a kindi kindiŋ nda cho le ndu piɛiyo wo. Mi Mɛlɛka mɛi lediom maa o cho nda manda te a miiŋgu wali o ke nda wo tosaa pɛ. Mi Chɛhowa dimul nda a maaŋndo miŋgioo taŋgullo okɔɔ aa, “Nyɛ Mɛlɛka Yaawɛɛ, Mɛlɛka nyaa o dimul nya wo, te la tusiŋ o ndu bɛŋgu pɛ, muŋ kpou ŋ cho yɔnɔŋ mɛɛ o dimi yɛ.”—Sɛkalaya 6:​15.

6. (a) Vɛɛ yilaŋii ŋɔmaa Sɛkalaya ve kanduŋ yɛ? (Tofa fotueiyo o peele naŋ kandu leŋ choo.) (b) Le yɛɛ suaa ndaa nɔ yɛ kɔɔle pilɛ le?

⁶ Kɛlɛŋgaa yilaŋii ŋɔmaa kpɔŋ Sɛkalaya ve ndii hiou waŋnda yoomuaŋ ke kpou. (Nuawɔ Sɛkalaya 6:​1-3, NW.) Yiyaŋndɔ a nyɛ Sɛkalaya ndoo che wo. Mi Sɛkalaya cha nyɛm nyaanaŋ suaa naŋndoŋ ŋ hiɔɔlu “o pemboŋ ŋmuuŋ tɛɛŋ.” Suaa kaŋ ndaa nɔ kɔɔle pilɛ le. Nduyɛ, hei wa tɛtɛlɛ le sinaa wanaa wa nyaanɔŋndo o suaa kaŋ choo wa. Mi Sɛkalaya nyuna aa, “Le yɛɛnɛ nyɛlaŋ ndaŋ la sim yɛ?” (Sɛkalaya 6:​4) Naa bɛɛ yeema miŋ sina kanifuule, yilaŋnde hei piiliaŋ naa.

7, 8. (a) Yɛɛ pembuŋ muuŋ ndoŋ muŋ sim yɛ? (b) Le yɛɛ pemboŋ muŋ cho yɛ pembuŋ bulɔŋsiiyoŋ?

⁷ O Baabuiyo niŋ, pemboŋ sim le masɛi. Nyɛ pilɔɔ kpe pembuŋ Sɛkalaya che woŋ a pembuŋ muuŋ cho o yau Daaniɛɛ wo niŋndo cho ni. Pembei hei ipilɛ sim le masale fafɛɛŋnde Chɛhowaleŋ le chieeŋndo kpou. Nduyɛ pembei i pilɛi sim le Masale Mɛsayanɔɔ, le Chiisu cho wa Masaa wo. (Daaniɛɛ 2:​35, 45) Pembuŋ muuŋ ndoŋ kpou wa niŋ tuupa mi Chiisu simnuŋ Masaa a wɔsi 1914. Nduyɛ mi pemboŋ muŋ  sɔla wali teŋgeŋndo le sabu Mɛlɛkaa peeloo le chieeŋndo.

⁸ Le yɛɛ pemboŋ muŋ cho yɛ pembuŋ bulɔŋsiiyoŋ? Chiliŋii ŋɛlɛŋgi ŋɛlɛŋgi baa kalɛi bulɔŋsiiye cho ni. Mi Chɛhowa dimul pɛɛŋ Isɔluɛiya le ma soliŋ bulɔŋsiiyoŋ kpeku le tɛndiiyo taŋgullo, okoŋ kɔɔli, a maaŋndo o Chulusɛlɛm niŋ. (Ɛsɔdɔɔ 27:​1-3; Masaa Bɛnduaa Tasiaa 7:​13-16) Le mɛɛ pemboŋ muŋ cho pembuŋ bulɔŋsiiyoŋ yɛ, lelaŋ ŋ kindila suliŋ kɛndɛ bɛndu kpuluŋgumayɛi Chɛhowɛi a Masale Mɛsayanɔɔ ni. Masɛi hei cho tosa mi waŋchieeya wa hɛnɛkɛ nduyɛ mii chuu nda tɔnɔlaŋ tau.

9. Nɛɛ yaa cho yɛ nyaanɔŋndo a nyɛm nyaanaŋ suaa naŋndoŋ, nduyɛ wali kuɛɛ nda ke yɛ nda?

⁹ Yɛɛ nyɛm nyaanaŋ suaa naŋndoŋ a wanaa cho nyaanɔŋndo a muŋ nda sim yɛ? Maalikɛiya wanaa cho nyaanɔŋndo a muŋ nda cho ni, kɛlɛŋgaa maalikɛiyaa kundala yɛ yiaa. (Nuawɔ Sɛkalaya 6:​5-8.) A cho chɔnɔŋndo “Masanɔɔ Mɛlɛka nɔ chieeŋndo hoo kpou wo lachi” nduyɛ mbo ke nda wali teŋgeŋndo le tosaa. O vem maalikɛiya o fondaŋnda teŋgeŋndaŋ le wanaa Mɛlɛkaa mandaa, taama taama Babilɔŋ o ba, “lɛŋnde cho ba luaŋndo leŋ.” Chɛhowa soliŋ yilaŋnde hei kpeku le mi wanaa nduaa sina maa kposoŋ bɛɛ a cho lɛ wa o chɛleŋ niŋ Babilɔŋ o ba bɛŋgu le. Yiyaŋndɔ mɛɛ hei wa suɛi kɔl dɛɛniaa le wanaa wa maaŋndo taŋgullo o palɛi Sɛkalaya ve niŋndo yɛ! Ma sina maa yaamɔɔwaa ndaa nɔla ma kuuna nda le.

10. Vɛɛ yilaŋii Sɛkalaya ve a nyɛm nyaanaŋ suaa naŋndoŋ okɔɔ vɛlɛ a wanaa cho nyaanɔŋndo a muŋ nda mala yɛ naa hau?

¹⁰ Hau, Chɛhowa cho wɔ maalikɛiyaa nduaa soliŋndo kpeku le wanaa nduaa mandaa a nda yoomuaŋ lueiyo. (Malakai 3:​6; Hibuluiya 1:​7, 14) Kanduŋ a wɔsi 1919, teleŋ wanaa Chɛhowaa fula o biyɔɔ niŋ Babilɔŋ Tɔɔ Bɛndoo o ba wo, yaamɔɔwaa ndaa kindiŋ niŋ kpoke le piɛile tonyaleŋ kuunaa hiouwɔɔ lachi a pɛŋgɛlaŋndo. (Sɔɔŋ Chɔɔmaŋndoŋ 18:​4) Kɛ a tiuwɔ ba le keŋ tosaa le. Le mɛɛ maalikɛiya cho kɔɔna Chɛhowaa mandaa yɛ, ŋ nɔ miŋ wa a isiooŋ maa piɛile lachoowaleŋ le cho vɛlɛ wanaa Chɛhowaa siiŋguu chiaa le. (Sam 34:​7) Kɛ, ŋ nɔ miŋ hiou lachi a nyaaloo nɔɔ nduyɛ miŋ wa a tuandaŋ kekelee o Chɛhowa piɛiyo niŋ. Nyɛ Sɛkalaya dimi wo mala naa le sinaa maa pembuŋ muuŋ ndoŋ cho naa mandaa.

11. Le yɛɛ siooŋii nɔ mi wa naa le mɛɛ nda cho hunɔɔ wanaa Mɛlɛkaa chiŋalaŋ yɛ le?

¹¹ Teleŋndo bendu lɛ le mi puaa chɔuwaa chieeŋ leyala Setanaa hiŋ diompilɛ le ma kindiŋ le wanaa Mɛlɛkaa tɛɛmboo. (Isikiaa 38:​2, 10-12; Daaniɛɛ 11:​40, 44, 45; Sɔɔŋ Chɔɔmaŋndoŋ 19:​19) O yau Isikiaa wo niŋ, wanaa cho haa hunɔɔ wanaa Mɛlɛkaa chiŋalaŋ nda cho maa hueiyii kpaayɛi bɛnduei. A cho hunɔɔ a kɔl tuu bɛndoo o suaa choo le wanaa Mɛlɛkaa chiŋalaŋndo a sɔŋgɔɔ. (Isikiaa 38:​15, 16) * (Tofa tɛɛsiaa amatau.) Baa ŋ nɔ  pa miŋ yɔŋ siooŋnde le nda? Sako! Ŋ nɔ puaa chɔuwaa Chɛhowaa kpeŋgii nɛi. A boondii nyɛpalaa bɛndoo, maalikɛiyaa Chɛhowaa cho wanaa nduaa manda nduyɛ ma tɛɛmbuu wana o wana cho masale Chɛhowaleŋ simullo. (Tɛsaloniaŋ Diiŋ Ndɔɔ 1:​7, 8) Paale tɔɔma leŋ pila wa niŋ leŋ ni! Kɛ nɛɛ cho yɛ lasisi puaa chɔuwaa Chɛhowaa o choo choo niŋ lachi?

12, 13. (a) Yɛɛ cheleŋ Chɛhowa ndoo dimullɛ Sɛkalaya le tosaa? (b) Vɛɛ naŋ looku yɛ sina maa po nda veelu a Chiyii Puiyɛi yo cho Chiisu Kiliti ni?

¹² Sɛkalaya ndupilɛ kpe che yilaŋuŋ ŋɔmaa woŋ muŋ ni. Kɛ mbo tosa isɔɔ okoŋ kɔɔli, i wanaa cheleŋnda ndaa nɔ ma che nduyɛ mi ndii dɛɛniaa wanaa wa maaŋ Mɛlɛkaa miŋgioo taŋgullo wa kɔltaŋ ndo. (Nuawɔ Sɛkalaya 6:​9-12.) Puaa a yaa, Hɛlidai, Tobicha, a Chɛdayaa, fulaa Babilɔŋ. Mi Chɛhowa dimul Sɛkalaya le mbo bii kaniŋ humboŋ a kooliiyoŋ puaa haa o ba nduyɛ mbo soliŋ muŋ kpeku le “mɔsil lemasaa” toosiaa. (Sɛkalaya 6:​11) Baa le Masa Ibuŋgaa Sɛlubabɛl, o fula o kaale Chudaleŋ choo a pulale Deeveleŋ ndo mɔsil koŋ wa ni? Sako. Mi Chɛhowa dimul Sɛkalaya le mbo wou Masa Wanaa Soliaa Lasalaa, Chɔɔsuaa mɔsil koŋ. Mi kaamaa bii wanaa wa nuaa wa.

¹³ Baa mi mɔsil lemasa nda wou koŋ Chɔɔsuaa, Masa Wanaa Soliaa Lasalaa  wo siiŋguu ndu masa? Sako. Chɔɔsuaa ndoo fula o pulale Deeveleŋ choo le. Lelaŋ, ndoo suliŋ mbo wa masa le. Mɔsil lemasa nda wou ndu koŋndo sim le nyɛ wa yɔŋnɔŋ wana ndoo simnuŋ niŋ masaa a wana soliaa lasala fafɛɛŋndo o chilaŋ niŋndo, o nda veelu aa Chiyii Puiyɛi yo. Baabuiyo tɛɛsiaa maa Chiyii Puiyɛi keŋ cho Chiisu Kiliti ni.—Aisaya 11:​1; Maatiu 2:​23.

14. Le mɛɛ Chiisu cho Masaa mbo wa vɛlɛ Masa Wanaa Soliaa Lasalaa yɛ, wali yɛɛ o cho yɛ tosaa?

¹⁴ Masaa a Masa Wana Soliaa Lasalaa Chiisu cho ni. Ndu cho chilaŋ chuaa le puaa chɔuwaa Chɛhowaa ni. Nduyɛ o cho kindiŋndo kpoke le wanaa Mɛlɛkaa mandaa o chieeŋ niilu latandaa hoo niŋ. (Chɛluimaya 23:​5, 6) Teleŋndo bendu lɛ le mi Kiliti yem kaalaŋ kpou. O cho masale Mɛlɛkaleŋ tooloo nduyɛ mbo wa wanaa Mɛlɛkaa mandaa. (Sɔɔŋ Chɔɔmaŋndoŋ 17:​12-14; 19:​11, 14, 15) Kɛ tuupa mi teleŋ koŋ fuuluu, Chiisu, ɔɔ Chiyii Puiyɛi, nɔ wallo tau le tosaa.

15, 16. (a) Vɛɛ wanaa Mɛlɛkaa miiŋgu yɛ o foofu ndaa nduyɛ ma sɔla diondɔɔ hau? Nduyɛ nɛɛ tosa yɛ keŋ? (b) Vɛɛ chieeŋndo cho yɛ simnɔŋ te wɔsila Waa Pilɛ Kiliti cho wa o Masaleŋ Choo Laŋ la chuu pɛ?

¹⁵ Maa Masaa a Masa Wanaa Soliaa Lasalaa, ma ke Chiisu wallo le mbo taŋgul “chiɛi . . . Mɛlɛka Yaawɛɛ wo.” (Nuawɔ Sɛkalaya 6:​13.) O wɔsi 1919 niŋ, mbo tosa wallo le wanaa Mɛlɛkaa solioo o piɛile lachoowaleŋ niŋ, Babilɔŋ Tɔɔ Bɛndoo. Mi Chiisu miŋgi kunda leKilisiɔŋndo o foofu ndɔɔ nduyɛ mbo yulu “buɛi cho sakpo, nduyɛ, mbo wa buɛi kɔl kalu wo” iso. Kunda puaapiliaa pɔyaŋnda haa cho wali sɔvɛ cho tosaŋndo o chieeŋndo choo wo nɛiyo chɔmndo o maaŋ bɛndu Mɛlɛkaa, o wana chi hoo a lehɔl te wo niŋ. (Maatiu 24:​45) Chiisu cho wanaa Mɛlɛkaa dindioo, nduyɛ mbo wa nda malaa le Mɛlɛka piɛiyo o nɛi diandaa choo.—Malakai 3:​1-3.

¹⁶ Chiisu nda ŋwaŋ 144,000 cho chaaŋaa nduaa masaa a wanaa soliaa lasalaa wa cho wa o masaleŋ choo le wɔsilaŋ waa pilɛ. A teleŋ koŋ, a cho waŋchieeyaa cho tiindaŋndo dɔuwɔɔ o Mɛlɛka niŋnda mala le ma simnuŋ walaŋ. Te masaa a wanaa soliaa lasalaa haa chii pɛ wallo hoo tosa, wanaa cho Chɛhowa piɛiyo o tonyaa choo wa koni cho lo o chieeŋndo choo ni. O mɛɛlulaŋ kpɔŋ, piɛile tonyaleŋ le cho miiŋgu o foofu ndɔɔ!

17. Tiindaŋ cheleŋ kuɛɛ Chɛhowa ndoo ke yɛ Chuuwa, nduyɛ vɛɛ yooŋgu ndɔɔ ndoo piiliaŋ yɛ nda?

¹⁷ Vɛɛ yooŋgu Sɛkalaya wo ndoo piiliaŋ yɛ Chuuwa a teleŋ koŋ? Mi Chɛhowa mɛi lediom maa o cho nda mala nduyɛ mbo manda nda le halikpeŋ ma chii maaŋndo taŋgul. Mi diomnde o mɛi leŋ ndeŋ le ke nda tiindaŋndo. Kɛ kaamaa wa wɔ nda te wanaa cho faŋga le wa nɔla pɛ ma tosa wali koŋ kpou. Lelaŋ, mi Sɛkalaya dimul nda suɛi ipum i ndii faŋa nda niŋ siooŋnde a kiisaŋndo wo. Mi waŋnda atiŋ mɛɛ Hɛlidai, Tobicha, a Chɛdayaa cho naa yɛ huŋ le nda malaa. Nduyɛ mi Chɛhowa dimi vɛlɛ maa wanaa bɔɔbɔɔ cheleŋ cho fula o fondaŋnda leviltaŋ “ma hiŋ le chiɛi Mɛlɛka Yaawɛɛ wo malaa miŋgi taŋgullo.” (Nuawɔ Sɛkalaya 6:​15.) Chuuwa ndaa nɔ tiindaŋndo maa Chɛhowa wa wali ndaa tooloo. Ma sɔla kɔl sikpaa le miiŋgoo maaŋndo taŋgullo, mi che bɛɛ mi masa Paasiaŋnda ndoo kuuna wali koŋ. Hei wa ko maa ipembu nda lachi, kɛ mi Chɛhowa faŋa ndi chɔ chɔ. O mɛɛlulaŋ kpɔŋ, mi maaŋndo chuu taŋgul a wɔsi 515 tuupa mi Kiliti vialuŋ. (Ɛsilua 6:​22; Sɛkalaya 4:​6, 7) Kɛ, mi diomnda Chɛhowalaŋ ndaŋ la tɛɛsiaa nyɛ tɔɔma bɛndu ndoo nɔ le yɔŋnɔŋndo hau wo.

18. Vɛɛ Sɛkalaya 6:​15 cho yɛ hau peelɔŋndo?

¹⁸ Hau waŋnda o miiliɔŋndaŋ niŋ cho Chɛhowa piɛiyo. A cho a kɔl kɛndɛ le ‘nyɛm ndaŋ sulaŋ’ yɔŋgoo, mɛɛ teleŋ ndaa, yoomuma ndaŋ, a nyɛm kɛŋ ndaŋ cho naa yɛ. O nɛiyo hoo choo nda cho maaŋ bɛndu Mɛlɛkaa, o wana chi hoo a lehɔl te wo tooloo ni. (Pulɔwaa 3:​9) Nduyɛ ŋ nɔ tiindaŋndo maa Chɛhowa che lo lechoo naŋ cho chɔmndo le tooloo yɔŋgoo wo o sɔvɛ. Loonuŋ maa mi Hɛlidai, Tobicha, a Chɛdayaa huŋ a kaniŋ humboŋ a kooliiyoŋ. Nduyɛ mi Sɛkalaya soliŋ muŋ kpeku le mɔsil lemasaa toosiaa. Mɔsil lemasaa hoo wa nda “loonɔŋndo” a chuuŋgiaa puaa yaa wa haa yɔŋgu le piɛile tonyaleŋ ndo. (Sɛkalaya 6:​14) Fɛɛŋ bɛɛ Chɛhowa puɛɛnuŋ wali naŋ cho tosaa le ndu vɛlɛ a kaala naŋ cho ndu chɔmndo wo le.—Hibuluiya 6:​10.

19. Vɛɛ yilaŋuŋ Sɛkalaya woŋ piiliaŋ yɛ naa?

¹⁹ O palɛi mɛɛlɛi hei niŋ, wanaa Chɛhowaa tiu niŋ ba le wallo tosaa tau. A tiuba le hei tosaa le mɛɛ Chɛhowa cho nda salaa dɔuwɔɔ nduyɛ mi Chiisu wa chilaŋ chuaa yɛ. Ŋ cho a kɔl kɛndɛ le waa o kɔɔna wana nɔla hiiluu le wo niŋ, o Mɛlɛka cho mandaa, nduyɛ mbo wa lefafɛɛŋndo. Vɛlɛ ŋ sina maa sabu Chɛhowaa le piɛile tonyaleŋ cho peelɔŋ. Lelaŋ, chɔm balika melaa le fondaŋ ŋ nɔ wanaa Chɛhowaa tɛɛŋndo, nduyɛ ma wa nilaŋ yaŋɔɔ o nyɛ Chɛhowa cho num dimullo wo. Okoŋ, wana cho Masaa nduyɛ mbo wa vɛlɛ Masa Wanaa Soliaa Lasalaa wo a maalikɛiya cho num manda. Tosa nyɛ o nyɛ ŋ tiuba le piɛile tonyaleŋ tooloo. Chɛhowa cho num manda o palɛi mɛɛlɛi hei niŋ, nduyɛ lefafɛɛŋ!