Bann Kales ek enn Kouronn Protez Twa
“Sa pou arive, si vremem zot ekout lavwa Zeova zot Bondie.”—ZEKARIA 6:15.
KANTIK: 17, 136
1, 2. Dan ki sitiasion bann Zwif ti ete kan setiem vizion Zekaria ti fini?
SETIEM vizion Zekaria pe fini ek Zekaria ena boukou kitsoz pou reflesi. Zeova inn promet ki Li pou pini bann dimounn malonet. Sirman sa bien fortifie Zekaria. Me ziska ler, nanye pankor sanze. Boukou Izraelit pe kontign fer bann move kitsoz ek zot malonet, ek konstriksion tanp dan Zerizalem pankor fini. Kifer bann Zwif vit-vit finn aret fer travay ki Zeova inn donn zot? Eski zot inn retourn Zerizalem zis pou amelior zot prop lavi?
2 Zekaria kone ki bann Zwif ki’nn retourn Zerizalem zot bann adorater Zeova. Vre Bondie inn “motiv zot lespri” pou ki zot kit zot lakaz ek zot komers dan Babilonn. (Ezra 1:2, 3, 5) Zot inn kit enn landrwa ki zot bien kone pou al viv dan enn pei ki laplipar parmi zot zame finn trouve. Rekonstrir tanp Zeova telman inportan pou sa bann Zwif-la, ki zot inn aksepte fer enn long vwayaz anviron 1,600 kilomet dan enn rezion sovaz ek danzere.
3, 4. Ki bann difikilte bann Zwif inn gagne?
3 Esey mazinn long vwayaz ki bann Zwif inn bizin fer ant Babilonn ek Zerizalem. Zot ena boukou letan pou pans ek pou koz lor zot pei. Bann ki pli aze pe rakont zot kouma Zerizalem ek so tanp ti bien zoli avan. (Ezra 3:12) Si to ti pe vwayaz avek bannla, ki to ti pou resanti kan to trouv Zerizalem pou premie fwa? Eski to ti pou tris pou trouv bann batiman ki’nn tom an rwinn, ki’nn kouver avek bann laliann? Ouswa pou trouv bann miray lavil ki’nn kraz-kraze ek bann gro-gro trou kot lontan ti ena bann laport ek bann latour? Sirman to ti pou konpar sa bann miray kas-kase la ar bann miray Babilonn ki bien gran ek solid. Me bann Zwif pa dekouraze. Kifer? Parski pandan zot long vwayaz, Zeova finn ed zot ek finn protez zot. Deswit kouma zot ariv Zerizalem, zot aranz enn lotel kot tanp ti ete avan ek sak zour zot ofer Zeova bann sakrifis. (Ezra 3:1, 2) Zot bien zele ek pare pou travay. Koumadir nanye pa pou kapav dekouraz zot.
4 Bann Zwif bizin rekonstrir tanp ek osi zot bann lavil ek zot bann lakaz. Zot bizin plante pou kapav nouri zot fami. (Ezra 2:70) Zot ena boukou travay pou fer. Enn tigit letan apre, zot bann lennmi vini ek esey fer zot aret sa travay-la. Pandan 15 an, bann Zwif gagn lopozision avek zot bann lennmi ek tigit-tigit sa dekouraz zot. (Ezra 4:1-4) An 522, zot gagn enn lot difikilte. Lerwa Pers donn lord pou aret tou konstriksion dan Zerizalem. Koumadir zame zot pou reisi rekonstrir lavil Zerizalem.—Ezra 4:21-24.
5. Kouma Zeova ti ed so pep?
5 Zeova ti kone ki so pep ti bizin kouraz ek lafors. Akoz sa, Li ti donn Zekaria enn dernie vizion pou rasir So pep. Li ti montre zot ki Li kontan zot ek apresie zefor ki zot pe fer pou servi Li. Li ti promet ki Li pou protez so pep si zot rekoumans travay ki Li’nn donn zot. Konsernan rekonstriksion tanp, Zeova ti dir: “Sa pou arive, si vremem zot ekout lavwa Zeova zot Bondie.”—Zekaria 6:15.
ENN LARME ANZ
6. (a) Par ki kitsoz witiem vizion Zekaria ti koumanse? (Get zimaz dan koumansman lartik.) (b) Kifer bann seval-la ti diferan kouler?
6 Witiem ek dernie vizion ki Zekaria inn gagne se kitfwa vizion ki plis fortifie nou lafwa. (Lir Zekaria 6:1-3. *) Esey mazinn seki Zekaria inn trouve. Li trouv bann seval ki pe ris kat kales pe vini. Zot sorti “ant de montagn” an kwiv. Bann seval-la zot diferan kouler, ek gras-a sa li fasil pou fer diferans ant zot bann kavalie. Zekaria demande: “Ki sa bann kales-la reprezante?” (Zekaria 6:4) Nou osi nou anvi kone ki zot reprezante, parski sa vizion-la konsern nou.
7, 8. (a) Ki sa de montagn-la reprezante? (b) Kifer sa de montagn-la zot an kwiv?
7 Dan Labib, bann montagn kapav reprezant bann rwayom, ouswa bann gouvernman. Bann montagn ki Zekaria ti trouve resanble de montagn ki nou lir dan profesi Daniel. Enn sa bann montagn-la reprezant souverennte Zeova ki iniversel ek eternel, ek lot-la reprezant Rwayom Mesianik kot Zezi limem Lerwa. (Daniel 2:35, 45) Depi ki Zezi inn vinn Lerwa an 1914, ena de montagn ek toulede ena enn rol spesial dan realizasion proze Bondie konsernan later.
Zeova ankor pe servi so bann anz pou protez ek fortifie so pep
8 Kifer sa de montagn-la zot an kwiv? Kwiv se enn metal ki ena enn gran valer ek ki briye. Zeova ti demann bann Izraelit pou servi kwiv kan zot ti konstrir tabernak ek plitar kan zot ti konstrir tanp dan Zerizalem. (Exod 27:1-3; 1 Lerwa 7:13-16) Lefe ki sa de montagn-la zot an kwiv, sa montre ki souverennte iniversel Zeova ek Rwayom Mesianik zot vremem siperyer. Zot pou fer bann dimounn viv an sekirite ek gagn boukou benediksion.
9. Kisannla ki reprezant bann kavalie, ek ki mision zot inn gagne?
9 Ki bann kales ek zot kavalie reprezante? Bann kavalie-la reprezant bann anz, kitfwa diferan group anz. (Lir Zekaria 6:5-8. *) Zot sorti “devan Segner later antie” ek zot ena enn mision spesial. Bondie avoy sa bann anz-la dan bann plas bien presi pou protez so pep, sirtou kont Babilonn, “pei lenor.” Atraver sa vizion-la, Zeova pe fer so pep kone ki zame zot pa pou al an esklavaz dan Babilonn ankor. Esey mazine kouma sa ti rekonfort bann ki ti pe konstrir tanp dan lepok Zekaria! Zot ti kone ki zot bann lennmi pa pou kapav aret zot.
10. Kouma profesi Zekaria konsernan bann kales ek zot kavalie kapav ed nou zordi?
10 Azordi, Zeova ankor pe servi so bann anz pou protez ek fortifie so pep. (Malaki 3:6; Ebre 1:7, 14, NW.) An 1919, pep Zeova ti libere ar Gran Babilonn sinbolik. Depi sa lepok-la, zot bann lennmi finn fer tou pou anpes vre ladorasion kontign progrese. (Revelasion 18:4) Me zot zefor finn tom dan dilo. Eski nou bizin per tansion pep Zeova re-vinn esklav fos relizion? Non. Kifer? Parski bann anz pe protez lorganizasion Zeova. (Psom 34:7) Okontrer, nou pou kontign res zwaye ek bien okipe dan servis Zeova. Profesi Zekaria fer nou konpran ki nou an sekirite ek bien proteze ant de montagn.
11. Kan bann lennmi pou atak pep Bondie, kifer fode pa nou per?
11 Biento, bann pwisans politik lemond Satan pou zwenn ansam ek pou esey detrir pep Bondie. (Ezekiel 38:2, 10-12; Daniel 11:40, 44, 45; Revelasion 19:19) Dan profesi Ezekiel, nou trouv sa bann pwisans-la pe kouver later kouma bann niaz. Zot lor bann seval ek zot pe vini avek enn gran koler pou atak pep Bondie. (Ezekiel 38:15, 16) * (Get not.) Eski nou bizin per zot? Non! Nou ena larme Zeova dan nou kote. Pandan gran detres, bann anz pou protez pep Zeova ek pou detrir tou bann ki opoze ar souverennte Zeova. (2 Tesalonisien 1:7, 8) Sa zour-la pou extraordiner! Me kisannla ki pou diriz larme Zeova ki dan lesiel?
ZEOVA KOURONN SO LERWA EK PRET
12, 13. (a) Ki lord Zeova ti donn Zekaria? (b) Kouma nou kone ki sa kikenn ki apel Bourzon la reprezant Zezi Kris?
12 Zis Zekaria tousel ki ti trouv sa wit vizion-la. Me apre sa, li ti fer enn kitsoz ki lezot ti pou trouve ek ki ti pou ankouraz bann ki pe rekonstrir tanp. (Lir Zekaria 6:9-12. *) Trwa zom, Elday, Tobiya, ek Yedaya inn sorti Babilonn inn vini. Zeova donn Zekaria lord pou pran larzan ek lor ar sa bann zom-la, ek pou servi sa pou fer “enn zoli kouronn.” (Zekaria 6:11, not) Eski inn fer sa kouronn-la pou gouverner Zorobabel, ki sorti dan tribi Zida ek ki enn desandan David? Non. Zeova demann Zekaria pou met sa kouronn-la lor latet Gran Pret Yoshoua. Bann ki ti pe get sa, sirman ti etone.
13 Kan ti met sa kouronn-la lor latet Gran Pret Yoshoua, eski sa ti fer li vinn lerwa? Non. Yoshoua pa ti enn desandan David, alor li pa ti kapav vinn lerwa. Sa kouronnman-la ti sinbolik. Li ti pe anonse ki dan lavenir pou ena enn kikenn ki apel “Bourzon” ki pou vinn lerwa ek pret pou touletan. Labib explike ki sa Bourzon-la se Zezi Kris.—Izai 11:1; Matie 2:23, not, NW.
14. Antan ki Lerwa ek Gran Pret, ki travay Zezi pe fer?
14 Zezi li Lerwa ek Gran Pret toulede. Li diriz enn larme anz ek li travay dir pou fer pep Bondie santi zot an sekirite dan sa lemond violan la. (Zeremi 23:5, 6) Biento, pou soutenir souverennte Bondie ek defann pep Zeova, Zezi Kris pou gagn viktwar lor bann nasion. (Revelasion 17:12-14; 19:11, 14, 15) Me avan sa zour-la vini, Zezi, ouswa sa Bourzon-la, ena enn gran travay pou fer.
LI POU KONSTRIR TANP
15, 16. (a) Dan nou lepok, kisannla ki’nn retabli vre ladorasion ek pirifie pep Bondie, ek kouma li’nn fer sa? (b) Kouma later pou ete alafin Regn Mil An?
15 Antan ki Lerwa ek Gran Pret, Zezi inn osi gagn mision pou “konstrir tanp Zeova.” (Lir Zekaria 6:13. *) An 1919, li ti fer sa travay konstriksion la kan li ti liber pep Bondie ar linflians fos relizion, setadir Gran Babilonn. Zezi ti retabli vre ladorasion dan kongregasion ek ti etabli “lesklav fidel ek saz.” Lesklav fidel ek saz reprezant enn group frer ki ena lesperans pou al dan lesiel. Zot pe diriz gran travay ki pe fer dan parti gran tanp spiritiel ki lor later. (Matie 24:45, NW.) Zezi finn osi pirifie pep Bondie pou ki zot ador Bondie dan bon fason.—Malaki 3:1-3.
16 Zezi ek so 144,000 lerwa ek pret pou dirize pandan mil an. Pandan sa letan-la, zot pou ed bann dimounn fidel pou vinn parfe. Kan sa bann lerwa ek pret-la pou fini zot travay, pou ena zis bann vre adorater Zeova lor later. Ek finalman, vre ladorasion pou retabli dan enn fason konple!
PARTISIP DAN TRAVAY KONSTRIKSION
17. Kouma Zeova ti rasir so pep, ek ki lefe so mesaz ti ena lor zot?
17 Ki lefe mesaz Zekaria ti ena lor bann Zwif sa lepok-la? Zeova ti promet ki Li pou ed zot ek protez zot pou ki zot kapav fini konstriksion tanp. Sa promes-la ti donn zot enn lespwar. Me kanmem sa, kitfwa zot ti ankor pe demann zotmem kouma enn tigit dimounn koumsa pou kapav fer sa gran travay-la. Alor, Zekaria ti dir zot enn kitsoz ki ti fer zot laper ek zot dout disparet. Zeova ti dir ki ansam avek Elday, Tobiya, ek Yedaya ki ti vinn ed zot, ti pou ena osi boukou lezot ki pou “vini ek pou partisip dan konstriksion tanp Zeova.” (Lir Zekaria 6:15. *) Bann Zwif ti sir ki Zeova ti pe soutenir zot travay. Avek kouraz, zot ti retourn rekonstrir tanp, mem si lerwa Pers ti interdi zot travay. Sa interdiksion-la ti koumadir enn gro montagn lor zot semin, me Zeova pa’nn tarde pou tir li. Finalman, konstriksion tanp ti fini an 515 avan Zezi Kris. (Ezra 6:22; Zekaria 4:6, 7) Selman, seki Zeova ti dir ti pe anons enn kitsoz pli gran ki pou arive dan nou lepok.
Zeova zame pa pou bliye lamour ki nou montre pou Li! (Get paragraf 18, 19)
18. Kouma Zekaria 6:15 pe realize zordi?
18 Azordi, plizir milyon dimounn pe ador Zeova. Zot kontan ki zot pe kapav donn Li “zot bann kitsoz ki ena valer,” kouma zot letan, lenerzi, ek dibien materyel. Dan sa fason-la, zot pe soutenir Zeova so gran tanp spiritiel. (Proverb 3:9) Ek nou kapav sir ki Zeova apresie ki nou pe soutenir Li avek fidelite. Rapel ki Elday, Tobiya, ek Yedaya ti amenn larzan ek lor ek ki Zekaria ti fer enn kouronn ar sa. Sa kouronn-la ti enn “memwar,” ouswa enn “rapel,” pou kontribision ki zot ti fer dan vre ladorasion. (Zekaria 6:14; not) Zeova zame pa pou bliye travay ki nou fer pou Li ek lamour ki nou montre pou Li.—Ebre 6:10.
Nou kontan ki nou form parti dan enn lorganizasion ki stab, kot nou an sekirite ek ki pou dire pou touletan
19. Ki lefe bann vizion Zekaria bizin ena lor nou?
19 Dan sa bann dernie zour-la, pep Zeova inn reisi fer enn gran travay. Zot finn kapav fer sa gras-a benediksion Zeova ek direksion Zezi Kris. Nou kontan ki nou form parti dan enn lorganizasion ki stab, kot nou an sekirite ek ki pou dire pou touletan. Ek nou kone ki proze Zeova konsernan vre ladorasion pou realize. Alor, apresie plas ki to ena parmi pep Zeova, ek ‘ekout lavwa Zeova to Bondie.’ Lerla to pou gagn proteksion nou Lerwa ek Gran Pret ek proteksion bann anz. Fer tou seki to kapav pou soutenir vre ladorasion. Zeova pou protez twa pandan leres sa sistem-la ek pou touletan!
^ par. 6 Zekaria 6:1-3: “1 Lerla mo ti re-get lao ek mo ti trouv kat kales pe vini; zot ti pe sorti ant de montagn ek bann montagn-la ti an kwiv. 2 Ti ena bann seval rouz ki ti pe ris premie kales-la, ek bann seval nwar ti pe ris deziem kales-la. 3 Bann seval blan ti pe ris trwaziem kales-la, ek bann seval ki ena tas ti pe ris katriem kales-la.”
^ par. 9 Zekaria 6:5-8: “5 Anz-la ti reponn mwa: ‘Sa bannla reprezant kat lespri ki dan lesiel. Zot ti devan Segner later antie ek asterla zot pe sorti. 6 Kales avek bann seval nwar pe al ver pei lenor; bann ki blan pe al pli lwin ki lamer; ek bann ki ena bann tas-la pe al dan pei lesid. 7 Ek sa bann-la ti bien anvi sorti pou al marse partou lor later.’ Lerla li ti dir: ‘Ale, al marse partou lor later.’ Ek zot ti koumans marse partou lor later. 8 Apre sa li ti kriye dan mo direksion ek li ti dir: ‘Gete, bann ki’nn sorti pou al dan pei lenor inn fer lespri Zeova repoze dan pei lenor.’”
^ par. 11 Pou gagn plis ransegnman, get “Kestion Bann Lekter” dan Latour Degard 15 Me 2015, paz 29-30.
^ par. 12 Zekaria 6:9-12: “9 Zeova ti re-koz avek mwa. Li ti dir: 10 ‘Pran avek Elday, Tobiya ek Yedaya seki zot finn gagne ar bann ki an exil; ek sa zour-la, to bizin al dan lakaz Yoshiya garson Sefania ansam avek bann ki’nn sorti Babilonn. 11 To bizin pran larzan ek lor ek fer enn kouronn ek met kouronn-la lor latet gran pret Yoshoua, garson Yeozadak. 12 Ek dir li, “‘Ala seki Zeova, sef bann larme pe dir: “Limem sa zom ki apel Bourzon la. Li pou bourzone depi so prop plas, ek li pou konstrir tanp Zeova.”’”’”
^ par. 15 Zekaria 6:13: “Limem ki pou konstrir tanp Zeova, ek limem ki pou ena laglwar. Li pou asiz lor so tronn ek li pou regne, ek li pou osi servi kouma pret, ek pou ena lape ant so fonksion lerwa ek pret.”
^ par. 17 Zekaria 6:15: “‘“Ek bann ki sorti bien lwin pou vini ek pou partisip dan konstriksion tanp Zeova.” Ek zot pou bizin kone ki se Zeova, sef bann larme ki’nn avoy mwa ver zot. Ek sa pou arive, si vremem zot ekout lavwa Zeova zot Bondie.’”
