1, 2. Tuuvi waari mukhalelo wa Ayuta o Yerusalemu omakuchuwelo wa yawoona yaneethanu napiili ya Sakariya?

WOONA wi yawoona yaneethanu napiili ya Sakariya yaahikuchuwa, owo aahikhalano sincipale sa wuupuwelela. Owo aahilipiheya ni yoolaiherya ya Yehova ya waalaka achu oohiroromeleya. Nyenya hiyaarivo nlelo matorokelo. Ancipale nlelo yaanapaka ichu sootakhala ni soohiroromeleya, nave otekiwa wanaawiili wa empa ya Muluku o Yerusalemu hiwaamalihiwe. Ntakhara heeni Ayuta yaahihiya muteko yoowo Yehova aavanheiye? Apwanne yaakookenle o Yerusalemu pahiru wi yeerihe ikumi saya okhala soophaameya?

² Sakariya aahisuwela wi Ayuta yaawo yaakookenle o Yerusalemu yaari alapeli a Yehova. Awo yaari “yale Muluku àhenleiye mmurimani mwaya otxhuna” wi ehiye ipa ni maroca aya o Papulu. (Esdra 1:2, 3, 5) Awo yaahin’ye elapo yaasuwenlaaya phaama wi epake mukwaha eyaaka mu elapo yeeyo ancipale  a yaawo yahintonkwaaya woona. Wuuluula oteka empa ya Yehova waari wookhweleya wa Ayuta yaale ophiyerya wiiveleela opaka mukwaha wawoopiha wa mastatiya 1.600.

3, 4. Ayuta yaakookenle o Yerusalemu sookacamiha taani yaaryaayano?

³ Mwaanyiherye orekama wa mukwaha ovinyerya o Papulu oya o Yerusalemu. Achu yaahikhalano elukuluku yincipale ya wuupuwelela ni ochekula vooloca sa elapo aya evyaani. Asimakholo yaanaaleela mukhalelo yaarenraaya empa ya Muluku ni epooma yo Yerusalemu. (Esdra 3:12) Waakhanle wi muri ni yaawo, mwaahaala woona hai vaava mweeraanyu moone epooma yo Yerusalemu mu ekwaha yoopacerya? Mwaahaala wuupuwela hai waakhanle wi mohoona isiri so Yerusalemu ikumunwe, isaren’ye miithe mmapuro waarimo mikhora mwemmo alipeleli yaakhalaayamo? Mwaahaala olikanyiha isiri seiye sookumuwa ni wunnuwa wa isiri so Papulu. Nyenya Ayuta hiyaaceechen’ye. Ntakhara heeni? Nthowa nawi variyari va mukwahaaya, Yehova aahaakhaviherya nave aahaakhapelela. Erikimphiyaru o Yerusalemu, awo yaahimpaka altari vaavo yaarivo empa ya Muluku khalai nave epacerya ohelavo mikucho ntakhara Yehova nihiku ti nihiku. (Esdra 3:1, 2) Awo yaahisareya mvai nave yaareheryeya ophara muteko. Yaakhala ntoko wi hiyaarivo echu yaahaala waaceecheiha.

⁴ Ohiya pahiru wuuluulela oteka empa ya Muluku, Ayuta yaanaphwanela wuuluulela oteka miceche ni ipa saya. Awo yaanachuna waala mmiso wi ewerye ovakulela ichoko saya. (Esdra 2:70) Muteko wawaaca yaaphwanelaaya opaka waakhala ntoko woowalamela. Moohilekela, amwiicani aya yaahirwa nave yeererya waamaaliha. Wiikariwa wuuwu waahimaliha iyaakha 15, nave vakhaani vakhaani Ayuta yaaceecheya. (Esdra 4:1-4) Nikacamiho nikina naarwiile mu eyaakha ya 522, vaavaa mwene o Persiya aalamulenleiye wi sooteka soothene o Yerusalemu imaale. Eyo yaakhala ntoko wi epooma hiyaahaala otekiwa wanaawiili.​—Esdra 4:21-24.

5. Yehova aakhavihenrye hai achu awe?

⁵ Yehova aahisuwela wi achu awe yaanachuna nlipiho ni nceenyeryo. Owo aahimvaha Sakariya yawoona yookuchula wi aaroromelihe achu wi Owo aanaasivela nave aanathamalela wiilipiherya waya omurumeela. Owo aahilaiherya waakhapelela waakhanle wi yaachikela ophara muteko aavanheiye. Vooloca sa wuuluulela oteka empa ya Muluku, Yehova aahi: “Sothene iha inamwereya nyuwano mwanawiwela Apwiya Muluku anyu ni murima [wothene].”​—Zakariya 6:15.

6. (1) Yawoona yaneethanu nararu ya Sakariya epacenrye hai? (Moone eruku yoopacerya.) (2) Ntakhara heeni akavalo yaaryaaya a makhalelo oohiyana?

⁶ Yawoona yaneethanu nararu ni yookuchula ya Sakariya, akhweya yaahilipiha nroromelo na oothene yaale. (Mwaalakhanye Zakariya 6:1-3.) Mweererye waanyiherya yeeyo Sakariya oonneiye. “Veri vamiyako” saapakiwe ni eporonse, yaahikhumavo akavalo ekunxe ikaaro sese. Akavalo yaari a makhalelo oohiyana, yeeyo yeerinhe okhala wookhweya waasuwela alipa ooweeciha. Sakariya aahikoha “Itxhu iha inataphulelani?” (Zakariya 6:4) Hiyaanotho ninnachuna osuwela ntakhara wi yawoona eyo ennanivolowela.

7, 8. (1) Miyaako miili ineemelela eheeni? (2) Ntakhara heeni miyaako iyaka opakiwa ni eporonse?

 ⁷ Mpiipiliyani, miyaako vakina vaya ineemelela omwene, naari olamulelo. Miyaako seiyo Sakariya oonneiye saari soolikana ni miyaako miili nnaalakhanyaahu mu yooloherya ya Taniyeli. Mmoha wa miyaako seiyo oneemelela otokweene wa Yehova, ni olamulelo awe woohimala, nave mukina oneemelela Omwene wa Mesiya ni Yesu ntoko Mwene aya. (Daniyeli 2:35, 45) Ovinyerya mu 1914, vaavaa Yesu aakhanleiye Mwene, miyaako soomiili saahikhalavo nave saahikhalano murici wavameekhaaya mu okhwaanela wa yoolaiherya ya Muluku ntakhara elapo yavathi.

⁸ Ntakhara heeni miyaako saapakiwaaya ni eporonse? Eporonse ti yasisapo nave emetali yawaarya. Mweeparipari, Yehova aahaaleela Aisarayeli opharihela eporonse vaavaa yeeraaya emuteke tapernaakulu nave ohoolo waya empa ya Muluku o Yerusalemu. (Mukwaha 27:1-3; 1 Mamwene 7:13-16) Woona wi miyaako ihe miili sipakiwe ni eporonse enooniherya mukhalelo waphaama wa otokweene wa Yehova ni wa Omwene wa Mesiya yoowo onahaala oweeriha achu okhala ookhapeleleya ni waavaha mareeliho mancipale.

9. Taani ari alipa weeciha ikaaro, nave muteko aya tuuvi?

⁹ Vano ikaaro ni alipa aweeciha ineemelela eheeni? Alipa weeciha ti ankeelo, akhweya makhuuru oohiyana hiyana a ankeelo. (Mwaalakhanye Zakariya 6:5-8.) Awo anakhuma vamiithoni va “Apwiya a elapo yothene” ni muteko wavameekhaaya. Ankeelo yaarummwe wi eye mmapuro ooluluwanya wi yaakhapelele achu a Muluku, xaxaxa orweela o Papulu, “mukuma w’ota.” Ni yawoona yeela, Yehova aaheeriha wi achu awe esuwele wi awo hiyaahaala okhala wanaawiili akapuro o Papulu. Mwaanyiherye mukhalelo eyo yaahakaranryaaya alipa ooteka empa ya Muluku mmahiku a Sakariya! Awo yaahisuwela wi amwiicani aya hiyi ewerye waamaaliha.

10. Yooloherya ya Sakariya vooloca sa ikaaro ni alipa aweeciha enanikhaviherya hai olelo?

¹⁰ Olelo, Yehova nlelo onnaapharihela ankeelo awe wi yaakhapelele ni waalipiha achu awe. (Malakiya 3:6; Ahebri 1:7, 14) Ovinyerya mu 1919, vaavaa achu a Yehova yoopoliwaaya mu okapuro woosiphela mu Papulu Mutokotoko, amwiicani aya yaaheererya omaaliha oya vahoolo ni omwaramwaxeya wa malapelo eeparipari. (Wupulula 18:4) Nyenya awo hanawerya weerano. Woona wi ankeelo annakhapelela marehereryo a Yehova, hannaphwanela okhala awoova wi achu a Yehova anahaala okhala wanaawiili mu malapelo atheru. (Salumu 34:7) Moohiyana, nnahaala otitelela okhala oohakalala ni ooweiwa vaavaa nnamulapelaahu Yehova. Yooloherya ya Sakariya ennanikhaviherya wiiwexexa wi nri awoopowa ni ookhapeleleya ni miyaako miili.

11. Ntakhara heeni nihinaphwanelaahu okhala awoova ntakhara ohipheliwa onoorwa wa achu a Muluku?

¹¹ Moohilekela owerya wa epoliitika ya elapo ya Satana onahaala orwa wi weererye  waatoloxa achu a Muluku. (Ezekiyeli 38:2, 10-12; Daniyeli 11:40, 44, 45; Wupulula 19:19) Mu yooloherya ya Esekiyeli, ninnoona owerya yoowo okhunenle elapo yavathi ntoko meeku. Awo anawela ikavalo nave anarwa ni esara wi yaahiphele achu a Muluku. (Ezekiyeli 38:15, 16) * (Moone masu avathi.) Apwanne ninnaphwanela owoova? Hooye! Nookhalano anakhoco a Yehova mmakupa ahu. Variyari va ekoi etokotoko, ankeelo a Yehova anahaala waakhapelela achu awe nave anahaala waatoloxa yaale aniica olamulelo wa Yehova. (2 Tesalónika 1:7, 8) Chiri nihiku nlo nnahaala okhala nootikhiniha! Nyenya taani oni aahoolele anakhoco awirimu a Yehova?

12, 13. (1) Tiheeni Yehova aamuleenleiye Sakariya wi apake voocharela? (2) Nnasuwela hai wi mulopwana oniichaniwa Murai onamweemelela Yesu Kristu?

¹² Pahiru Sakariya taarino ekari ya woona sawoona seiye thanu nararu. Nyenya voocharela owo aahipaka echu yeeyo akina yaahaalaaya woona nave eyo yaahaala waaceenyerya yaale yuuluulela oteka empa ya Muluku. (Mwaalakhanye Zakariya 6:9-12.) Alopwana araru, Heltayi, Topiya ni Yetaya, yaahirwa orweela o Papulu. Yehova aahimuleela Sakariya wi akuxe eparata ni ewooro orweela wa alopwana yaawo nave apharihele ichu iho wi apake “nleha [naari korowa]” ntokotoko. (Zakariya 6:11) Apwanne nleha nlo naari na Mulamuleli Yosetakhi, yoowo  aari a nloko na Yuta nave aari a muyareriwo wa Tavite? Hooye. Yehova aahimuleela Sakariya wi akuhe nleha mmuruni mwa Yosuwa, Mutokweenesa a Anamukucho. Eyo akhweya yaanamutikhiniha muchu ti muchu aaweha.

¹³ Apwanne nleha naahimweeriha Yosuwa Mutokweenesa a Anamukucho okhala mwene? Hooye. Yosuwa haari a nihimo na Tavite, mwawiihiiha owo haarino ophwanelela wa okhala mwene. Nleha nawe yaari yawooniherya wa yeeyo yaahaala weereya omwaahiyu wa yoowo aahaala okhala mwene ni namukucho, iichaniwa Murai. Piipiliya onnathariha wi Murai ti Yesu Kristu.​—Isaiya 11:1; Mateu 2:23.

14. Ntoko Mwene ni Mutokweenesa a Anamukucho, muteko taani Yesu onapakeiye?

¹⁴ Yesu ti Mwene ni Mutokweenesa a Anamukucho. Owo onaahoolela ankeelo akuru a Yehova nave onnalapa mwakuru wi aweerihe achu a Muluku okhala ookhapeleleya mu elapo yeela yoonanara. (Yeremiya 23:5, 6) Moohilekela, Kristu onahaala ovootha maloko vaavaa oneereiye akhaviherye olamulelo wa Muluku ni owaakiha achu a Yehova. (Wupulula 17:12-14; 19:11, 14, 15) Nyenya nihaakumve nihiku nlo, Yesu, naari Murai, ookhalano muteko mutokweene wa opaka.

15, 16. (1) Achu a Muluku yoopoliwe nave arehereryiwe hai olelo, nave naani? (2) Elapo enahaala okhala hai omakuchuwelo wa miyakha Masanaru Khumi sa olamulelo wa Kristu?

¹⁵ Ohiya pahiru okhala Mwene ni Mutokweenesa a Anamukucho, Yesu aahithanliwa “oteka empa y’Apwiya.” (Mwaalakhanye Zakariya 6:13.) Mu 1919, owo aahipaka muteko yoola wa oteka moorweela wa owoopola achu a Muluku orweela wa ovolowela wa malapelo atheru, Papulu Mutokotoko. Yesu aahoopola muloko nave aahimuthanla “mulapeli òroromeleya ni awisuwela.” Nikhuuru nenla na anna oothanliwa ninnahoolela muteko wookhweleya yoowo onapakiwa veelaponi yavathi makupa a empa ya Muluku etokweene yoomunepani. (Mateu 24:45) Yesu tho onnaarehererya achu a Muluku, aakhaviheryaka okhalano malapelo aweela.​—Malakiya 3:1-3.

¹⁶ Yesu vamoha ni mamwene ni anamukucho 144.000 anahaala olamulela mu iyaakha masana khumi. Variyari va elukuluku yeeyo, awo anahaala waakhaviherya achu oororomeleya okhala oophaameya. Vaavaa mamwene yaala ni anamukucho eneeraaya emalihe muteko yoola, pahiru alapeli  eeparipari a Yehova teni ehale veelaponi. Wookuchulani, malapelo eeparipari anahaala orehereryiwa moomalela!

17. Yoororomeliha taani Yehova aavanheiye Ayuta voocharela, nave muchaka awe waavolowenle hai?

¹⁷ Muchaka wa Sakariya waavolowenle hai Ayuta mu elukuluku yeele? Yehova aahilaiherya waakhaviherya ni waakhapelela wi ewerye omaliha empa ya Muluku. Yoolaiherya ela yaahaavaha ewehereryo. Nyenya awo akhweya yaaniikoha oni oweryeye hai achu vakhaani opaka muteko yoola mutokweene. Mwawiihiiha Sakariya aahaaleela echu yeeyo yaahaala oviihavo minikwa ni woova waya. Vamoha ni achu ntoko Heltayi, Topiya ni Yetaya yaawo yaarwiile wi yaakhaviherye, Yehova aahiloca wi ancipale yaahaalatho orwa “wi emukhaviherye wulùla oteka empa y’Apwiya.” (Mwaalakhanye Zakariya 6:15.) Ayuta yaanaroromela wi Yehova aanaakhaviherya mmuteko aya. Moolipa murima awo yaakookela oteka empa ya Muluku, naamwi mwene o Persiya aawatinhe muteko wa oteka. Owatiihiwa wuuwu waari ntoko mwaako mutokweene ohoolo waya, nyenya moohilekela Yehova aahiviihavo. Wookuchulani, empa ya Muluku yaakwaaxiwa mu eyaakha ya 515 E.E.K. (Esdra 6:22; Zakariya 4:6, 7) Nyenya masu yaale a Yehova annooniheryatho echu etokweene yeeyo eneereya mmahiku ahu.

18. Zakariya 6:15 onaakhwanela hai olelo?

¹⁸ Olelo, achu macikhwi macikhweene annamulapela Yehova. Awo annahakalala omvaha “muhakhu,” aya ntoko elukuluku, ikuru ni ichu saya soomwiilini. Mmukhalelo yoola, awo annakhaviherya empa ya Muluku etokweene yoomunepani ya Yehova. (Masiposipo 3:9) Nave nnaphwanela ororomela wi Yehova onnavaha esisapo okhaviherya wahu woororomeleya. Muupuwele wi Heltayi, Topiya ni Yetaya yaahiruuha eparata ni ewooro nave Sakariya aahipakano nleha. Nleha naari “nupuseryo” na okhaviherya waya malapelo eeparipari. (Zakariya 6:14) Yehova harwa acuwala muteko nnapharaahu ni osivela nnamooniheryaahu.​—Ahebri 6:10.

19. Sawoona sa Sakariya sinaphwanela onivolowela hai?

¹⁹ Mmahiku yaala oomaliherya, achu a Yehova annawerya opaka muteko mutokweene. Ela enakhala yooweryeya nthowa na mareeliho a Yehova ni ohoolela wa Kristu. Nri oohakalala opaka makupa a marehereryo aweemeleleya, ookhapeleleya ni a mahiku oothene, nave noosuwela wi yookhwela ya Yehova ntakhara malapelo aweela enahaala okhwaanela. Mwawiihiiha muthamalele murici anyu variyari va achu a Yehova, nave ‘munawiwelela Apwiya Muluku anyu ni murima wothene.’ Voocharela munahaala okhapeleliwa moorweela wa Mwene ahu ni Mutokweenesa a Anamukucho vamoha ni ankeelo. Mpake soothene munaweryaanyu wi mukhaviherye malapelo eeparipari. Yehova onahaala wookhapelelaani variyari va mahiku yaala oomaliherya​—nave okhala wookhala!