RO KOTA mkun Gujarat, India, John kmari ḇyebaptis ḇe Saksi Yahwe ro papupes taun 1950. Ḇape John i, snari ma ḇedar ririm ḇyeskoya skoḇe agama Katolik Roma. Inja, spampum kaku kmari kakyar ḇyeja.

Ro arwo oso, John kmari dor i fa dunpyan amplop ḇe naek oso ro sidang ḇyedi. Mboi arwo ani, brasi ḇyepar rofyor byas kaleng sosef ḇeba oser. Snar ryower rosai kmari ikofenna, inja ryamura. Pyarkepen brasi ḇepar ani kuker kruben ker ma dun amplop ani ḇediwa.

Fafisu isya kwar ro naek ani rum ḇyedi, ḇyuk amplop ani ḇe naek ani swari. I kako Saksi Yahwe dirya. Rofyor imbe dun amplop ani, imbesrar ine myam John brasi narike inja ifnoḇeki. Imbesrar ine dun obat, ifrur sren par ḇyeja ma pyarkepenna kuker forban. Ramnai ifrur teh ḇe John i. Ro fafisu ani kako suwawos kuker Refoya.

Snar imbesrar ani fyasna ḇaḇenaḇye, inja John fyadwer kakara ḇyeja kuker Saksi Yahwe sya. Jhon ifuken fakfuken risuru kuker rosai Saksi Yahwe sikyar ḇeḇesebur Gereja Katolik sikyarna. Ifuken Yesus ima Allah dirya ke? Ma snonkaku Kristen fandun fa sḇenadi ḇe Maria i ke? Snar imbesrar ine fyarkor kwar wos Gujarati, inja bisa kyarem John fakfuken ḇyeja. Fyasnaḇair kankarem ro Refo ma ḇyuk ḇe i syapmkun ”Kabar Kesukaan dari Kerajaan”.

Ḇarpurya, rofyor John iwasya syapmkun ani ifawi rosai iwasyana nama napnapes dirya. Ryamura isrow imam ḇyeja ma ḇyuk fakfuken ḇemnis risuru ḇe i. Imam ani imsor kaku inja syo John i kuker Refo. Iyuw naba bo ikofen, ”Wakḇe Ibiris kware! Fasnaḇair ḇe aya mnuk ḇekofen Yesus ima Allah risyaḇa. Fasnaḇair mnuk ḇekofen kosyom awer Maria i. Fasnapan!” John ikandor fafayaḇa, kyara ḇaḇeri imam ani imsor radirya. Inja, Jhon ikofen ḇe i nari daksun ro gereja Katolik werḇa. Ma kaku ḇeri daksun ro gereja ani werḇa.

John ifarkor kuker Saksi Yahwe, syun ro napnapes, ma ifarmyan ḇeri ḇe Yahwe I. Ḇarpurya, min ro kina ḇyesi kako saksun ro napnapes. Taun 60 ḇyenande kwar, ḇape par ro John brasi nḇuk swarapepen ḇe i faro ḇaḇenaḇye ḇedif i fa fyarmyan ḇe Yahwe I ro kankenem ḇyedi ḇesiper.​—2 Korintus 6:4, 6.