BAS sada kuta i Gujarat, India, iperidiken me bapa John jadi Saksi Jahwe bas pendungi tahun 1950-en. Tapi John ras lima turang seninana, bage pe nandena, agama Katolik si fanatik. Perban si e, la kalak e senang bapana jadi Saksi.

Bas sada wari, isuruh bapa John si John ngirimken surat ku sekalak turang senina sada runggunna. Tapi bas erpagi-pagi e, sanga ibuka John atena tong, tersayat tanna. Tapi perban patuh ia man bapana, ibalutna lukana emaka berkat ia naruhken surat e.

Seh kenca John i rumah e, iberekenna surat ndai man ndehara turang senina e. Ia pe sekalak Saksi Jahwe. Idahna me tan John si tersayat ndai janah itambarina atena. Ibuatna kotak obat, ibersihkenna luka e, janah ibalutina tan John ndai. Dung e ibanna teh man John. Emaka ercakap-cakap kalak e kerna Pustaka.

Perban mehuli turang senina ndai, mulai berubah pendapat John kerna Saksi. Emaka sungkunna dua penungkunen kerna kiniteken Saksi si la seri ras Gereja Katolik. Isungkunna, ’Payo kin Jesus e Dibata?’ ras ’Arus kin kalak Kristen ertoto man Maria?’ Beluh turang seninanta e bahasa Gujarati, emaka ijabapna penungkunen John alu bahasa e. Janah, icidahkenna jabapenna bas Pustaka nari. Kenca e berekenna buku ”Kabar Kesukaan dari Kerajaan”.

Kenca ioge John buku ndai, ietehna maka kai si iogena e benar. Emaka ijumpaina pastorna janah isungkunna dua penungkunen si seri. Merawa kel pastor e, benterna John alu Pustaka, janah isergangna ia, ”Nggo jadi Setan ko! Tuduhken dage ja ayatna Jesus e la Dibata. Tuduhken ka ja ayatna la banci sisembah Maria. Tuduhken!” Sengget kel John perban merawa-rawa pastor e bana. Ikatakenna man pastor e maka ndigan pe lanai ia nggit mulihken ku gereja Katolik. Payo, lanai ia pernah mulihken ku je!

Mulai me John erlajar ras Saksi, kenca e jadi Saksi Jahwe ia, dungna ngelayani Jahwe. Piga-piga keluargana pe dungna jadi Saksi Jahwe ka. Nggo 60 tahun dekahna kejadin e, tapi tiap idahna bekas luka bas jari-jarina, iingetna kiniulin sekalak jelma si dungna erban ia ngelayani Jahwe.​—2 Korinti 6:4, 6.