BABI wa João obatiziwe na Anamoona a Yehova yaka ya 1950, sidadi eng’ono ya Gujarat, o’India. Mbwenye morogorha wa John, vamodha na mwadhi wa mbale, na abaleya otene, ali a Akatolika a kapela ya a’Romano, awene anziveliwana vaddiddi kapelawa ejile. Noona akala ozemberhavi nroromelo na babiwa.

Labo dhahi, babi wa João ohimukumbirha wi adhowe anvahedhe mbali wa mmulogoni envelopi. Omembesi obule João ahinatti odhowana envelopiya wahisuveya vaddiddi ebuno; na garafwa. Masiki wosuveyene, wahipotta ebunoya nanda bakosa guru wi adhowena envelopiya.

Mufiyeli João vamwaddelile babe, envelopi ejile omuttiyedhi mwadhi wa mbaliya. Muyana ole wali vina Munamoona wa Yehova. Muyana wahimulogana João wi amujeedhele arome omukamihedha. Iyene ohidhowela mirobwe dhaye dhosuwana elodda, osuwa eloddaya, mmaleliye opotta. Nomala ohimukosela txaya.

Sabwa ya ttagaraga yaye, João wahiroma ozinddiyela okwela wa Anamoona a Yehova. Venevo wahimukumbirha muyana oddule wi amwaddelelemo masunziho a Anamoona a Yehova, anttiyana na Kapela ya Katolika. Iyene ohimvuza akala Yezu Mulugu, ohimvuza vina akala yanfuneya Akristu omulobelelaga Maria. Murogora oddule wahisunza elogelo ya Gujarati, noona wahikaana ewodhelo ya omwakula João na elogelo yaye yobaliwana. Iyene ohimwakula mavuzoya na malebo a mBibiliani vina ohinvaha brochura “Miselu Dhapama dha Omwene wa Mulugu.”

Mmalele João wengesa folhetuya, ohidha ozinddiyela wi esile dhengesiliye dhali dh’ebaribari. Iyene wahidhowa omukosa mavuzo akene namakutta wokapela waye. Munvuzeliye, namakutta oddule wahisiridhiwa vaddiddi, ofiyedha omponya Bibilia vamentoni vaye, mmaleliye bamunyanyuwela na mazu awi: “Weyo wa Satana! Kaddilagihe mBibiliani valebiwe wi Yezu kahiye Mulugu. Kaddilagihe valebiwe wi kumwebedhege Maria. Kaddilagihe to!” João wahinyimuwa vaddiddi sabwa ya dhawira esile dha namakutta ole. Noona wahimwaddela namakuttaya wi kanadhowe vina okapela wa Katolika. Nne kadhowilewo-wene!

Venevo João wahiroma osunza na Anamoona a Yehova, ohirumeela ebaribari, badhowiha vasogorho omulaba waye Yehova. Musogorhomwa amudhaye enjeene ahidha okosa yakakene. Dhahene dhihivira vyaka 60, João agang’ana nikwadda na elodda yaye onowubuwela ttagaraga ya Mukristu, emukosihile omulabela Yehova mwigumini mwaye.—2 Korinto 6:4, 6.