MU Yimwe mbonge yikehe ya Gujarat, mu India, tato ya John kamupapachishile ni kupwa Chela cha Yehova kusongo lia miaka 1950. Alioze John ni mandumbu jenyi atano amapwo ni amalunga ni naye, kapwile akwa-Katolika nawa te kakuzanga chinji uwayilo wo. Hachino, ayo yaputuka kulimika ni ufulielo wa tato.

Ha limwe tangwa, John yamwita kuli tato hanga atwale umwe mukanda kuli umwe ndumbu mu chikungulwila. Alioze ha chimene chacho, John kalilemekene ku munwe ha kwazulula chimwe chipanza. Chipwe chocho, iye kazangile kwononokena tato, chocho yakasa chimwe chipuzu cha hina ku munwe wacho yaya ni kutwala mukanda wacho.

Alioze muze John ahetele kuze amutumine, yahana mukanda kuli pwo lia ndundu wacho. Neye te Chela cha Yehova. Muze, amwene munwe wa John wakukasa, hachino yazanga kumukwasa. Iye yamukosa ha chilonda chacho ni kumusaho yitumbo. Nawa yamulingila chimwe kulia. Ha mashimbu jacho iye yahanjika nenyi ni umbovu weswe hakutwala ku Mbimbiliya.

Hamukunda wa upeme wa yono mama, John yaputuka kwalumuna manyonga jenyi hali Yela ja Yehova. Hachino yamuhula, yihula yiali hakutwala ku ufulielo wa Yela ja Yehova uze walisa ni wa yingeleja ya Katolika. Iye yahula nyi Yesu mwe Zambi, nawa nyi akwa-Kristu katamba kuwayila Maria. Ndumbu te kakuhanjika limi lia Gujarati chocho yahasa kukumbulula John mu limi lienyi. Yamusolwela kumbululo mu Mbimbiliya ni kumwaha kamukanda, “Sango Jipema ja Wanangana”

Muze John atangile mukanda wacho, yanyingika ngwo yize te anatange we umwenemwene. Yaya kuli sasendote wenyi ni kumuhula yihula yoyene yiali. Sasendote wacho yevwa uli unji nawa yamwasa Mbimbiliya, ni kumwamba ngwenyi: “Yena hi wapwa Satana! Ngusolwele mu Mbimbiliya haze anambe ngwo Yesu hi Zambi ko. Ngulweze nawa haze anambe ngwo kuwatambile kuwayila Maria. Ngulwezeho tutale!” John yevwa yinyengo ha chize sasendote amukumbulwile. Yalweza sasendote wacho ngwenyi kechi keza kaya nawa mu yingeleja ya Katolika nilimwe tangwa. Ndo haliapwila keshi kuyamo!

John yaputuka kulilongesa Mbimbiliya ni Yela ja Yehova, yatayiza umwenemwene, nawa yaputuka kuwayila Yehova. Hakupalika cha mashimbu, atu akwo mu usoko wo yalinga chochene. Hikwapalika miaka 60, nihindu chimbandwa ku munwe wa John chakumwiwulula upeme wa akwa-Kristu uze wamukwashile kuwayila Yehova ku mwono wenyi.—2 A-Korindu 6:4, 6.