INDIA ram, Gujarat peng i khuate pakhat ah, John a pa cu 1950 hnuah Jehovah Tehte pakhat in tipil a ing. Asinain John, a unau panga le a nu cu Roman Catholic an si i biaknaklei ah aa zuam tukmi an si. Cucaah a pa zumhnak kha an ralchanh.

Nikhat cu a pa nih John kha Khrihfabu chung i unau pakhat sinah ca pek a fial. Asinain mah zing ah khan thir pung pakhat a awnnak ah a kutdong kha fakpi in aa aah sual. A pa bia ngaih a duh caah a thi a chuakmi a kutdong kha puanchia in a men i cakuat pek awkah a kal.

A va phanh tikah mah unaupa i a nupi kha cakuat bawm cu a pek. Anih cu Jehovah Tehte pakhat a si ve. Mah unaunu nih John a kutdong aa khawnmi kha a hmuh tikah sii kaan thuhpiak lai tiah a ti. Sii chiahnak bawm kha a lak i a hma kha a ṭawlpiak, cun bandage in a menpiak. Mah hnuah John kha lakphak lumte a dangh. Baibal kong kha panh tein a chimh.

Mah unaunu langhtermi zaangfahnak ruangah Jehovah Tehte Hna cung i a hmuhning cu a hun i thleng. Cucaah Jehovah Tehte Hna le Catholic Church zumhnak an i dannak pahnih he aa tlaiin biahalnak a tuah. Mah cu Jesuh cu Pathian a si maw, Khrihfa hna nih Mary sinah thla kan cam awk a si maw? timi an si. Mah unaunu cu Gujarati holh a thiammi a si caah John i a holh a simi mah holh in a hrilhfiah. Baibal kha a relpiak i “Pennak Kong Thawngṭha” timi cauk hmete kha a pek.

John nih mah cauk a rel dih tikah a relmi cu biatak a si ti kha a hun hngalh. Cucaah an siangbawipa sinah a va kal in mah biahalnak pahnih kha a hal. Siangbawipa cu a thin a hung tuk i Baibal in a cheh. Cun hitin a au hnawh: “Satan na si cang hih! Jesuh cu Pathian a si lo tiah a langhtermi Baibal caang cu ka hmuhsak tuah. Mary biak awk a si lo tiah a langhtermi cu ka hmuhsak tuah. Rak ka hmuhsak tuah.” Siangbawipa nih cutin a lehrulh caah John cu a lau tuk i zeitikhmanh ah Catholic church ah kaa pum ti lai lo tiah a ti. Mah hnu cun John cu aa pum taktak ti lo.

John cu Jehovah Tehte Hna sinah Baibal a cawng i biatak kha a hun cohlan, cun Jehovah kha a biak. A hnuah a dang an chungkharmi tampi zong nih biatak kha an cohlan ve. Kum 60 a rauhhnu hmanhah a kutdong i a hmape cu a um rih ko. Mah nih a hmaanmi biaknak ah a hnukmi Khrihfa zaangfahnak a simi tuahsernak pakhat kha a hngalhter ṭhan.—2 Kor. 6:4, 6.